2 Rey 21
21
Ri ruq'atbal-tzij ri Manasés
1Ri Manasés k'o k'a kablajuj rujuna' toq xok kan rey, y xuq'et-tzij kawineq wolajuj juna' pa ruwi' ri Judá, chiri' pa Jerusalem. Y ri rute' rubini'an Hepsiba. 2Kan itzel k'a xuben chuwech ri Jehová. Roma xa xuben ri k'ixbel taq banobel ri man niqa' ta chuwech ri Jehová achi'el yekiben ojer kan ri winaqi' ri ek'o chiri', ri e relesan chik el ri Jehová ri chiri' pan Israel. 3Ri Manasés xerupabala' chik q'anej jun bey ri akuchi nikiya-wi kiq'ij ri wachibel pa ruwi' taq juyu', ri xa kan ruwulan chik kan ri Ezequías ri rutata'. Chuqa' xuben jun porobel richin nikiya' ruq'ij ri Baal, y kan xupaba' chik q'anej ri paban-che' richin Asera, achi'el xuben ri Acab rey richin Israel. Chuqa' xuya' kiq'ij konojel ri ek'o chuwech ri kaj. 4-5Keri' chuqa' ri chiri' pa rachoch ri Jehová, xeruben-q'anej porobel kichin ch'aqa' chik dios y chuqa' kichin ri ek'o chuwech ri kaj. Y re' xeruben chupan ri ka'i' ruwa-jay richin rachoch ri Jehová, stape' kan xaxe ri Jehová ri k'o chi niya'ox ruq'ij ri chiri'. 6-7Xerusuj ri ruk'ajol richin kamelabel. Chuqa' kan xbe kik'in ri aj-itza' y xeruk'ulubej ri itzel taq espíritu. Chuqa' kan xuya-apo ri paban-che' richin Asera, chupan ri rachoch ri Jehová. Y ri itzel taq banobel ri' xuben richin xuyek royowal ri Jehová.
Ri ojer kan ri Jehová xubij chike ri David y ri Salomón ri ruk'ajol: Yin xtinya' re nubi' richin q'asen chupan re jay re', re wawe' pa Jerusalem, ri kan xincha' chikikojol konojel ri tzobaj richin Israel. 8Ri ojer kan xinya' ri nupixa' chire ri nusamajel Moisés, richin chi ri ite-itata' nikitaqej, richin man xkenwelesaj ta el rije' y ri kijatzul chupan re ruwach'ulew re', xcha' ri Jehová. 9Jak'a ri Manasés y ri aj-Judá man xkak'axaj ta. Rija' xuben chike chi xemakun, más chuwech ri mak ri xekibanala' ojer kan ri winaqi' aj chiri' ri xeruk'is ri Jehová.
10Roma ri' xch'on chik ri Jehová kik'in ri yeq'alajirisan ri ruch'abel, y xubij: 11Ri Manasés ri rey richin Judá nuben ri man niqa' ta chinuwech, y kan nuben más itzel taq banobel chuwech ri xkiben ri aj-Hamor ri xek'oje' ojer kan, y rija' kan xuben chike ri aj-Judá richin xkiya' kiq'ij ri kiwachibel ri ch'aqa' chik dios. 12Roma ri', yin xtinteq k'a pe jun nimalej ruk'ayewal pa ruwi' ri Jerusalem y pa ruwi' ri Judá. Y ri xke'ak'axan kan man xtiq'ax ta chikiwech. 13Yin xinjunamaj k'a ri kibanobal ri aj-Jerusalem kik'in ri aj-Samaria. Wakami kan xtintzu' wi choj rubanik ri kik'aslen achi'el xinben kik'in ri aj pa rachoch ri Acab. K'ari' xkenk'is k'a el ri aj-Jerusalem achi'el toq nijuq jun leq, chupan y chirij. 14Y ri juba' ri xkekolotej kan, xkenmalij y kan xkenjech pa kiq'a' ri e etzelanel kichin. Xkechap k'a el y xtimaj ronojel chike koma ri e etzelanel kichin, 15roma ri kibanobal kan janila k'a itzel ri nikiben chinuwech, y kan kiyakon k'a pe janila woyowal. Y re' kichapon-pe toq xe'el-pe ri kite-kitata' ri chiri' pan Egipto k'a re wakami, xcha'.
16Ri Manasés xuben chike ri winaqi' aj-Judá chi xemakun y keri' rije' xekibanala' itzel chuwech ri Jehová. Y man xaxe ta ri' ri xuben ri Manasés; kan e k'iy winaqi' ri maneq kimak ri xerukamisaj, y kan chupan k'a chijun ri Jerusalem k'o kamik ri xeruben, xtiker-pe ri jun ruchi' y xapon k'a ri jun chik ruchi'. 17Ri ch'aqa' chik rubanobal ri Manasés chupan ri ruq'atbal-tzij y ronojel ri rusamaj ri xuben y chuqa' ri rumak ri xeruben rija', kan tz'ibatel kan chupan ri wuj richin kibanobal ri rey richin Judá. 18Y toq xken, xmuq chiri' chuwa-rachoch chupan ri qejoj richin Uzá. Y ri xok kan rey pa ruk'exel ja ri ruk'ajol rubini'an Amón.
Ri q'atbel-tzij richin ri Amón
19Ri Amón k'o k'a juwineq ka'i' rujuna' toq xok rey, y xaxe ka'i' juna' ri xuq'et-tzij pa ruwi' ri Judá chiri' pa Jerusalem. Ri rute' rubini'an Mesulémet, rumi'al kan ri Harús, aj-Jotbá. 20Ri Amón kan xuben ri man utz ta chuwech ri Jehová Dios, achi'el xuben ri Manasés ri rutata'. 21Kan xerusamajij ri wachibel ri xerusamajij ri rutata', y kan xuya' kiq'ij. 22Chuqa' man xuben ta achi'el nubij ri Dios, y xumalij kan ri Jehová, ri Dios kichin ri rati't-rumama'. 23Y k'o k'a jun q'ij jujun chike ri aj-raqen xeyakatej k'a chirij, y xkikamisaj kan pa rachoch. 24-26Y rija' xmuq chuwa-rachoch chupan ri qejoj richin Uzá. Chirij re' ri winaqi' richin ri tinamit xekikamisaj k'a ri aj-raqen ri xekamisan ri Amón. K'ari' xkiya' kan ri Josías, ri ruk'ajol pa ruk'exel richin xok kan rey. Ri ch'aqa' chik ri xuben ri Amón chupan ri ruq'atbal-tzij y ronojel ri samaj ri xuben, e tz'ibatel kan chupan ri wuj richin ri kibanobal ri rey richin Judá.
Currently Selected:
2 Rey 21: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
