2 Rey 12
12
1Toq k'a k'es na ri Jehú rey richin Israel, y chupan ri juna' wuqu' chire ri ruq'atbal-tzij. Jari' toq ri Joás xok kan rey pa ruwi' ri ruwach'ulew Judá y xuq'et k'a tzij kawineq juna' ri chiri' pa tinamit Jerusalem. Y ri rute' rubini'an Sibiá, aj-Beerseba. 2Ri Joás xuben k'a utz chuwech ri Jehová toq k'a ja ri sacerdote Joiadá ri uk'uayon richin. 3Man rik'in ri', ri akuchi niya-wi kiq'ij ri wachibel pa ruwi' taq juyu' man xe'elesex ta, y roma ri' ri winaqi' k'a nikisuj na kamelabel chiri', y k'a nikiporoj na pom chiri' chuqa'.
4Y k'o k'a jun q'ij ri Joás xubij chike ri sacerdote chi tikimolo' ruchi' ri méro ri kan k'o chi nikitoj ri winaqi' ri k'o chik kijuna', ri richin kolotajik y ri sipanik ri nalex-pe pa kánima. 5Y xubij chi ri yemolon ri méro tikijacha' pa kiq'a' ri sacerdote y ja rije' ri ke'ukusan richin nikichojmirisaj ri rachoch ri Jehová, ri akuchi e paxinaqi-wi.
6Jak'a xa xq'ax yan juwineq oxi' juna' y ri sacerdote man jani kibanon ruchojmil ri akuchi ch'aratajineq-wi chire ri rachoch ri Jehová. 7K'ari' ri rey Joás xroyoj ri sacerdote Joiadá y ch'aqa' chik sacerdote, y xubij chike: ¿Achike roma man ibanon ta ruchojmil ri ch'aratajineq chire ri rachoch ri Jehová? Wakami k'a, man ja ta chik rix ri yixk'ulun kan ri méro ri nikiya' ri qawinaq richin ri rachoch ri Jehová, roma re méro re' xtik'atzin richin nichojmirisex ri ch'aratajineq chire ri rachoch rija', xcha'. 8Y ri e sacerdote xkiya' k'a chikiwech richin chi man nikik'ul ta chik méro chikiwech ri winaqi', ni man yek'oje' ta chik pa ruwi' ri samaj richin nichojmirisex ri jay ri'.
9Jak'a ri nimalej sacerdote Joiadá xberuk'ama' k'a pe jun yakonabel, y xuben jun jul chire ri rutz'apebal. Y xuya' pa rijkiq'a' ri porobel, ri akuchi ye'ok-wi-apo chupan ri rachoch ri Jehová. Y toq ri winaqi' nikik'uaj ri sipanik, ri e sacerdote ri nikichajij ri ruchi' ri rachoch ri Jehová, nikiya' k'a chupan ri káxa ri'. 10Y toq nikitz'et chi xnoj yan ri káxa, jari' toq ri tz'ibanel richin ri rey y ri nimalej sacerdote nikajlaj ri méro y nikiya' pa taq peqes richin 11nikijech chike ri aj-raqen ri ek'o pa ruwi' ri samaj; ri ajanel, ri aj-tz'aq, 12ri yechoyon-abej, y ri ch'aqa' chik samaj. Chuqa' nikiya' richin nikiloq' tz'alem y abej ri e choyon chik richin nichojmirisex ri e ch'aratajineq chire ri rachoch ri Jehová, y richin nikiloq' ri k'atzinel richin ri jay ri'. 13Ronojel k'a ri méro ri xkisipaj-apo ri winaqi' xukusex richin xchojmirisex ri rachoch ri Jehová, y man richin ta xeban leq chire ri e banon rik'in saqipueq, ni chupbel-q'aq', ni ri nima'q taq leq, ni trompeta ni man jun chik ri banon ta rik'in saqipueq, 14roma kan ronojel ri méro ri' nikiya' chike ri aj-raqen richin ri samaj ri', y rik'in ri' nikichojmirisaj-wi ri rachoch ri Jehová. 15Y man nik'atzin ta richin nik'utux chike ri akuchi nikikusaj-wi ri méro ri' roma rije' kan utz rukusaxik nikiben chire. 16Jak'a ri méro ri xkik'en-pe roma ri kimak y richin nikuyutej kimak, man xkik'uaj ta apo chiri' roma kan nok kan kichin ri e sacerdote.
17Chupan k'a ri q'ij ri' ri Hazael rey richin Siria, xyakatej richin xberubana' oyowal rik'in ri tinamit Gat, y xeruch'ek k'a. Y k'ari' xjote-el richin xberubana' oyowal kik'in ri aj-Jerusalem. 18Jak'a ri Joás, rey richin Judá xuk'uaj k'a el ronojel ri beyomel ri e jachon chik chire ri Jehová pa rachoch. Y re beyomel re' e kisipan kan ri rey Josafat, ri Joram y ri Ocozías. Xuk'uaj-el chuqa' ri rujachon chik rija' chire ri Jehová. Jak'a ronojel ri q'anapueq ri xkil chupan ri ruyakonabal ri rachoch ri Jehová y pa rachoch rija', xuteq-el chire ri Hazael rey richin Siria, richin man xuben ta chik oyowal rik'in ri tinamit Jerusalem.
19Ri ch'aqa' chik rubanobal ri Joás y ronojel ri xerubanala' kan tz'ibatel kan chupan ri wuj ri akuchi xtz'ibex-wi ronojel ri kibanobal ri rey richin Judá. 20Y xeyakatej k'a ka'i' rusamajela' chirij ri Joás y xkikamisaj pa jun jay ri k'o akuchi taq'ajun-q'anej rik'in ulew, y re' k'o pa relebel-q'ij chire ri Jerusalem chunaqaj ri bey ri nibe pa tinamit Silá. 21Y ri xekamisan richin ri Joás ja ri Josacar ruk'ajol ri Simat, y ri Jozabad ruk'ajol ri Somer. Xkimuq k'a ri Joás akuchi e muqun-wi ri rute-rutata' ri pa rutinamit kan ri rey David. Y ri xk'oje' kan pa ruk'exel richin xuq'et-tzij ja ri Amasías ri ruk'ajol.
Currently Selected:
2 Rey 12: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
