2 Crón 9
9
1Toq xel rutzijol ri retamabal ri Salomón, xapon k'a pa ruwach'ulew Sabá, jari' toq ri reina richin chiri' kan xpe k'a pa tinamit Jerusalem richin xutejtobej ri retamabal ri Salomón. Y e k'iy k'a ri e beneq y e kik'uan-el k'iy camello, y chikij ri' e kik'uan-el jubulej taq aq'om, q'anapueq pa ruk'iyal, y jebelej taq abej. Ri reina xapon k'a rik'in ri Salomón y xtzijon rik'in chirij ronojel ri k'o pa ránima richin nuk'utuj chire. 2Y ri Salomón kan xtikir xubij ronojel ri xuk'utuj ri reina chire, y man jun k'ayew xuben chuwech richin xuchol chire. 3Y ri reina xrak'axaj k'a ri na'oj ri k'o rik'in, y xutz'et chuqa' ri rachoch ri rupaban-q'anej. 4Xutz'et ri jebelej taq q'utun, ri kachoch ri e aj-samaj ri ek'o rik'in, ri kina'oj y ri kitziaqul ri ye'ilin richin, ri e pajoy y ri e jachoy vino, y ri grada ri nijote-el pa rachoch ri Jehová, toq xutz'et ronojel ri' kan janila xumey, 5y xubij chire ri Salomón: Kan qitzij na wi ri rutzijol ri apowineq pa nutinamit, pa ruwi' ri wak'axan chirij ri abanon-q'anej y kan k'o janila ana'oj. 6Jak'a yin xa man xinimaj ta ronojel re', k'a xipe na chutz'etik rik'in ri runaq' nuwech. Ri wak'axan-pe kan man nuq'i' ta k'a ri awetamabal ri nintz'et wakami. Kan qitzij wi chi ri na'oj y ronojel ri k'o awik'in kan janila k'iy, man achi'el ta ok ri rutzijol ri wak'axan-pe. 7Jebel ruwa-kiq'ij ri awinaq ri ek'o awik'in; jebel ruwa-kiq'ij ri asamajela' roma kan q'ij-q'ij nikak'axaj ri awetamabal. 8Tinimirisex k'a ri rubi' ri Jehová ri a-Dios ri utz xarutz'et richin xarutz'uyuba' kan chupan ri tz'uyubel richin q'atbel-tzij richin xatok rey pa ruwi' ri Israel, roma rija' kan jantape' rajowan-pe ri atinamit Israel. Roma ri' xarukusaj kan rey richin kan ta k'o q'atbel-tzij pa ruchojmilal, xcha'.
9Jari' toq xujech-apo chire ri rey jumuch' wuqu' quintal q'anapueq, pa ruk'iyal jalajoj ruwech jebelej taq abej y jubulej taq aq'om ri man jun bey tz'eton chupan ri ruwach'ulew ri', jari' ri ruk'uan-el ri reina richin Sabá chire ri rey Salomón. 10Chuqa' ri rusamajela' ri Hiram, y ri rusamajela' ri Salomón, ri xebek'amo ri q'anapueq pan Ofir, xkik'en-pe che' ri nibix sándalo chire, y jebelej taq abej. 11Rik'in ri sándalo, ri rey xeruben grada chire ri rachoch ri Jehová y chire ri rachoch rija'. Chuqa' rik'in ri che' ri' xeruben k'a q'ojom ri rubini'an arpa y salterio, kichin ri bixanela'; y ri chiri' kan man jun bey k'a tz'eton jun samaj rik'in ri che' ri' achi'el ri xuben ri Salomón. 12Y ri rey Salomón xuya' chire ri reina ri achike xrajo' y ri achike xuk'utuj chire. Y ri xuya-el chire kan xik'o k'a ruwi' chire ri ruk'amon-pe ri reina. Chirij ronojel re' ri reina xtzolin pa rutinamit e rachibilan-el ri rusamajela'.
Ri rubeyomel y ri retamabal ri rey Salomón
(1 Rey 10:14-29; 2 Crón 1:14-17)
13Ronojel juna' ri Salomón nuk'ul jubama 500 quintal q'anapueq. 14Y chupan re' man etan ta ri nikitoj-apo ri k'ayinela', ni ri nitoj roma ri k'ayij, ni ri nikitoj ri rey ri ek'o pan Arabia, ni ri nikitoj ri e aj-raqen ri ek'o chupan ri ruwach'ulew Israel. 15Y ri rey Salomón xeruben 200 tobel ri e nima'q banon rik'in q'anapueq, ri achi'el yekusex pan oyowal, y xukusaj k'a wolajuj libra q'anapueq richin xuya' chikij jujun tobel. 16Y chuqa' xeruben 300 kokoj tobel y xukusaj k'a oxi' libra q'anapueq richin xuya' chikij jujun tobel. Y ri rey xeruya' k'a re tobel re' ri chiri' pa rachoch ri rubini'an Che' Richin Líbano. 17Y ri rey xuben chuqa' jun nimalej rutz'uyubal richin q'atbel-tzij y xuben rik'in baq ri rey tix, y k'ari' xuya' q'anapueq chirij. 18Ri rutz'uyubal k'a pa waqi' grada k'o-wi-el, y xuya' jun rupalibal ri nojisan-rij rik'in q'anapueq, y ri pa ruxikin k'o ri akuchi yeruya-wi ri ruq'a', y ri tz'uyubel ri' k'o chikikojol ka'i' kiwachibel koj ri e pa'el. 19Chikiwech pe ri ka'i' wachibel ri', k'o chik pe ka'i' cholaj kiwachibel koj, jujun koj pa jujun grada, y keri' kibanon chi e ka'i' rutza'n ri grada. Ri kajlabal ri ka'i' cholaj wachibel ri' e kablajuj. Kan man jun chik k'a q'atoy-tzij pan Israel ri xbanon jun tz'uyubel richin q'atoj-tzij achi'el ri xuben rija'. 20Y ronojel qumbel ri richin ri rey Salomón kan e banon rik'in q'anapueq, y keri' chuqa' ri jalajoj ruwech rulaq ri k'o pa rachoch rubini'an Che' Richin Líbano. Toq ri Salomón xq'aton-tzij, man xukusaj ta saqipueq roma man jun rejqalen, 21roma ri rey k'o jun molaj ru-barco ri yebe pa ruwach'ulew Tarsis junan rik'in ri molaj ru-barco ri rey Hiram. Y ri barco ri' chi ox-ox juna' ye'ok'ulun kik'amon-pe k'iy q'anapueq, saqipueq y nima'q taq key tix; chuqa' e kik'amon-pe ri chikopi' ri nibix batz'*f5* chike y chuqa' ri pavo real. 22Kan xaxe k'a ri rey Salomón ri k'o más rubeyomel y más runa'oj chikiwech konojel rey richin ri ruwach'ulew. 23Konojel k'a rey richin chijun ruwach'ulew nikikanoj k'a ri rey Salomón roma nikajo' nikak'axaj ri na'oj ri ya'on chire roma ri Dios. 24Chikijujunal ri rey ri ye'apon rik'in kik'ualon k'a sipanik ri nalex pa kánima, richin nikiya' chire. Yekiyala' k'a saqipueq, q'anapueq ri jalajoj rubanik banon chire, chuqa' tzieq, kamisabel, jubulej taq aq'om, kiej y kowilej taq kiej. Y kan kere' xbanatej ronojel juna'.
Ri Salomón yeruloq' y yeruk'ayij carruaje y kiej
(1 Rey 10:26-29; 2 Crón 1:14-17)
25Ri Salomón xek'oje' e 4,000 rukiej y keri' chuqa' rajlabal ri akuchi xek'oje-wi ri kiej y ri carruaje, chuqa' e 12,000 achi'a' ri yech'oke' chirij taq kiej. Re' xerutaluj k'a pa taq tinamit ri akuchi yeyak-wi ri carruaje, y chuqa' ek'o xek'oje' kan rik'in ri chiri' pa Jerusalem. 26Y rija' xk'oje' pa kiwi' ri rey ri ek'o chupan ri ruwach'ulew ri nitiker-pe pa xaman rik'in ri raqen-ya' Éufrates, k'a pa qajbel-q'ij rik'in ri kiruwach'ulew ri aj-Filistea, y napon k'a pa xokon rik'in ruk'ulba't ri ruwach'ulew Egipto. 27Ri rey xuben chi chiri' pa tinamit Jerusalem ri saqipueq kan pa ruk'iyal ri xk'oje', y kan achi'el chik k'a ri abej rubanon, y chuqa' janila xetamex ruwech ri tiox-che' kan achi'el etaman ruwech ri ruche'el wíkix ri k'o chuwa-taq'aj. 28Ri kiej ri e richin ri rey Salomón yeloq' k'a pe pan Egipto y pa Cilicia; y ri loq'onela' y ri k'ayinela' richin ri rey jari' ri yeloq'on-pe ri kiej ri'.
Ri rukamibal ri Salomón
(1 Rey 11:41-43)
29Ri ch'aqa' chik natabel richin ri Salomón, ri pa rutikeribel y pa ruk'isibel chire ri ruk'aslen, xtz'ibatej kan chupan ri wuj ri kichin ri e q'alajirisey ruch'abel ri Dios, kibini'an Natán y ri Ahías ri aj-Siló, y chuqa' chupan ri wuj ri nich'on chirij ri rubanobal ri Jeroboam ruk'ajol ri Nabat, y ri wuj ri' ja ri Iddo ri nitz'eton ri peteneq chiqawech ri tz'ibayon kan. 30Ri Salomón kawineq k'a juna' xq'aton-tzij pa ruwi' chijun ruwach'ulew Israel chiri' pa Jerusalem. 31Y toq xken, xmuq chupan ri rutinamit kan ri rey David ri rutata', y chirij rija' ja ri ruk'ajol rubini'an Roboam xk'oje' kan pa ruk'exel.
Toq ri ajawaren xuch'er-ri'
(1 Rey 12:1-24)
Currently Selected:
2 Crón 9: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
