2 Crón 31
31
1Toq xk'is k'a ronojel re', konojel ri israelita ri ek'o chiri' xebe k'a pa taq tinamit ri ek'o chupan chijun ri ruwach'ulew Judá y xekiwulaj k'a ri wachibel e paban y xekiyoj k'a ri paban-che' richin Asera. Xekiyoj k'a akuchi yekamela'an-wi ri ek'o pa ruwi' taq juyu', y xekiwulaj ri ch'aqa' chik porobel ri ek'o chiri' pa Judá, pa Benjamín, pa Efraín y ri pa Manasés. K'ari' konojel israelita xetzolej pa taq kiruwach'ulew y pa taq kixoral.
Ri Ezequías nuyala' ri kisamaj ri sacerdote y ri levita
2K'ari' ri Ezequías xuch'arala' k'a ri samaj chikiwech ri e sacerdote y ri e levita: Ri rusujik ri chikop ri niporox chijun ri pa taq nimaq'a' y ri tiqaq'ij, ri sipanik ri niq'alajirisan chi ri winaqi' junan kiwech rik'in ri Dios, ri matioxinik y ri bix ri yebixex chuchi' ri rachoch. 3Chirij re' ri rey kan xeruya' k'a apo chikopi' ri yek'atzin richin ri sipanik ri yeporox chijun ri pa taq nimaq'a' y ri tiqaq'ij, chuqa' ri q'ij richin uxlanenri'il, ri nimaq'ij richin ri k'ak'a' ik', y ronojel ri nimaq'ij ri e rubin ri Dios chupan ri pixa'. 4Ri Ezequías chuqa' xubij chike ri winaqi' ri ek'o chiri' pa Jerusalem chi k'o chi nikiya' chike ri e sacerdote y ri e levita ri kan k'o chi niya'ox chike, richin keri' rije' yetikir nikijech-ki' jumul chupan ri rusamaj ri Jehová. 5Y toq ri israelita xkak'axaj re', kan rik'in k'a ronojel kánima xkiya-apo ri nabey taq ruwech kitiko'n, ri jalajoj ruwech taq ixin, ri k'ak'a' ruya'al uva, ri aceite richin olivo, ri kab ri nikiya' taq chikopi' y ronojel k'a ri yetik pa juyu'. Chuqa' xkiya-apo ri jun chire ri lajuj chire ri kitiko'n; y pa ruk'iyal k'a ri xkiya'.
6Chuqa' ri winaqi' israelita ri ek'o pa xaman, y ri ch'aqa' chik aj-Judá ri ek'o pa taq tinamit richin ri ruwach'ulew ri' xkik'en-pe ri jun chire ri lajuj, chire ri nima'q taq awej y ri kokoj taq awej, y chuqa' ri jun chire ri lajuj ri kisujun chire ri Jehová; kan k'iy k'a xkiya-apo. 7Ronojel re' xkichop rumolik chupan ri rox ik', y xek'achoj chupan ri ik' wuqu'. 8Y toq ri Ezequías y ri e tata'al xkitz'et chi xmolotej k'iy, kan xkiya' ruq'ij ri Jehová y xkimatioxij chike ri kiwinaq. 9K'ari' ri Ezequías xch'on kik'in ri e sacerdote y ri e levita pa ruwi' ri xmolotej pa ruk'iyal. 10Y ri nimalej sacerdote Azarías, ri rijatzul kan ri Sadoc, xubij chire: Toq ri winaqi' xkichop nikik'en-pe ri kuchuj chupan ri rachoch ri Jehová, kan k'o k'a k'iy ri niqatej y kan k'a pa ruk'iyal na k'a ri nik'oje' kan, roma ri Jehová kan ruya'on urtisanik pa qawi' roj ri oj rutinamit, xcha'.
11K'ari' ri Ezequías xubij chi kejosq'ix ri jay ri ek'o chiri' pa rachoch ri Dios, richin nok yakonabel. Y kan keri' xbanatej. 12Y chiri' k'a xeyak-wi ronojel ri xmolotej, ri xkiya-apo ri israelita. Jak'a ri levita ri rubini'an Conanías ri xok aj-raqen pa ruwi' ri yakonabel, y ri pa ruka'n-qa chire rija' ja ri Simí ri rach'alal. 13K'ari' ri rey Ezequías y ri nimalej sacerdote Azarías kan xekiya' k'a, e lajuj achi'a' richin yesamej kik'in ri Conaías y ri Simí. Re achi'a' re' kibini'an: Jehiel, Azazías, Náhat, Asael, Jerimot, Jozabad, Eliel, Ismaquías, Máhat y ri Benaías. 14Ri jun levita rubini'an Coré ruk'ajol ri Imná, ja rija' ri nichajin ri ruchi' ri k'o pa relebel-q'ij chire ri ruwa-jay richin ri rachoch ri Dios. Ja rija' ri xya'ox kan richin nuk'ul chikiwech ri winaqi' ri janipe' nalex-pe pa kánima. Y chuqa' ja rija' nik'ulun chikiwech ri winaqi' ri kan k'o chi nikiya-apo y nutaluj chik chikiwech ri e sacerdote, y chuqa' ri ch'aqa' chik ri kan e ch'aron chik chire ri Jehová. 15Chuqa' xesamej chik e waqi' achi'a' rik'in ri Coré richin xkitaluj ri sipanik pa kitinamit ri e levita. Jare' ri kibi' ri achi'a': Ri Edén, Miniamín, Jesús, Semaías, Amarías y Secanías. Ja rije' yejachon chike ri e levita rik'in ruchojmilal, y nikiya' chike achi'el rubanik ri kitzobaj, nitiker-el rik'in ri más nim k'a ri más ch'uti'n. 16Xtalux k'a achi'el kajlabal ri alaboni' ri ek'o pa taq kachoch ri levita, nitiker-el rik'in ri k'ajolaxel ri k'o oxi' rujuna' y ri tz'iban chik rubi' chupan ri wuj ri akuchi tz'iban-wi kibi' ri e levita ri yesamej pa rachoch ri Dios. Rije' xeq'axilan k'a pa taq tzobaj ri junan kisamaj richin xkik'ul ri k'atzinel chike. 17Ri e sacerdote kan tz'iban k'a kibi' chupan ri wuj achi'el ri kibi' kan ri kite-kitata', y chuqa' xtz'ibex ri kibi' ri e levita ri k'o juwineq kijuna' pa jotol achi'el rubanik ri kisamaj. 18Chupan ri wuj ri' tz'iban kan kibi' konojel ri ixjayilonela', ri neneya', y konojel ri ch'aqa' chik alk'ualaxela'. Kere' xbanatej roma ri e levita kan rik'in ronojel kánima kijachon-ki' chubanik ri samaj.
19Keri', kan chupan k'a ronojel ri kitinamit y ri kulew ri ek'o chunaqaj ek'o achi'a' ri xetalun ri kan k'o chi niya'ox chike ri e sacerdote ri e rijatzul kan ri Aarón, y ri ch'aqa' chik levita ri tz'iban kibi' chupan ri wuj.
20Kere' k'a xuben ri Ezequías chupan chijun ri ruwach'ulew Judá. Ronojel ri xuben kan utz, kan choj y kan qitzij chuwech ri Jehová ri ru-Dios. 21Ronojel ri samaj ri xuben pa rachoch ri Dios kan achi'el ri ruchojmilal ri tz'ibatel chupan ri pixa'. Kan xusamajij k'a ri Dios rik'in ronojel ránima, y roma ri' kan ronojel k'a utz xel chuwech.
Ri Dios xerukol ri Ezequías y ri aj-Jerusalem
(2 Rey 18:13-19:37; Isa 36-37)
Currently Selected:
2 Crón 31: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
