2 Crón 15
15
1Ri Espíritu richin ri Dios xpe k'a rik'in ri Azarías, ruk'ajol ri Oded, 2y roma ri' xberuk'ulu' k'a el ri Asá, y xubij chire: Rey Asá, kinawak'axaj k'a rat, y konojel ri winaqi' ri ek'o chupan ri awajawaren: Ri Jehová kan k'o-wi iwik'in rix, wi rix ixk'o rik'in rija'; y wi rix nikanoj, kan xtiwil; jak'a wi rix xa xtimalij kan rija', rija' chuqa' kan xkixrumalij kan. 3Ri ojer kan, chupan ri ruwach'ulew Israel, ri winaqi' man xkikanoj ta ri k'aslik Dios, e maneq sacerdote richin yetijon y maneq chik kik'in ri pixa' ri ya'on kan chike. 4Jak'a toq ek'o chupan ri ruk'ayewal, ri winaqi' ri' k'ari' xtzolin kik'u'x rik'in ri Jehová ri ki-Dios. Rije' kan xkikanoj chik k'a ri Jehová y kan xkil. 5Chupan ri q'ij ri' ri winaqi' ri yeq'ax chiri' kan maneq uxlanibel-k'u'x kik'in, roma chijun ri ruwach'ulew xa kan yojtajineq k'a jumul. 6Ri jun tinamit yakatajineq chirij jun chik tinamit, jun ruwach'ulew chirij jun chik ruwach'ulew, roma kan ja ri Dios xbanon chike richin nikik'owisaj ronojel ri ruk'ayewal ri'. 7Wakami k'a, rix kan kow k'a kixk'oje'; man kixmayamo-qa, roma ri ibanobal ri ibanon-pe kan k'o rajel-ruk'exel nuk'en-pe, xcha' ri Azarías.
8Toq ri Asá xrak'axaj ri ruch'abel ri Dios ri xuq'alajirisaj ri Azarías, kan xk'oje-el ruchuq'a' richin xerelesaj-el ronojel ri itzel taq wachibel ri kan ruk'amon richin ye'etzelex, ri ek'o chupan chijun ruwach'ulew Judá y ri ruwach'ulew Benjamín y chuqa' ri ek'o pa taq tinamit ri xeruch'ek, ri ek'o-el chuwi' taq juyu' richin ri ruwach'ulew Efraín. Chuqa' kan xuchojmirisaj ri porobel ri k'o-pe chuwech ri rachoch ri Jehová. 9K'ari' xerumol konojel ri winaqi' ri ek'o pa rajawaren, ri chiri' pa Judá y Benjamín y chuqa' xerumol ri winaqi' ri e peteneq pan Efraín, pa Manasés y ri pa Simeón ri xeq'ax-pe kik'in rije', roma kan xkitz'et chi kan k'o-wi ri Jehová kik'in.
10Re jun molojri'il re' xkiben k'a pa tinamit Jerusalem chupan ri rox ik' chire ri juna' wolajuj chire ri q'atbel-tzij richin ri Asá. 11Chupan ri q'ij ri', xkisuj k'a kamelabel chuwech ri Jehová, e 700 bóyix y 7,000 karne'l ri xkik'en-pe pa Guerar chuwi-kiq'a' ri e etzelanel kichin. 12K'ari' rije' xkiben jun jikibel-tzij rik'in ronojel kánima y ronojel kik'u'x richin chi jantape' xtikikanoj ri Jehová, ri Dios kichin kan ri kati't-kimama'. 13Y chuqa' xkijikiba' chi wi k'o ta jun ri man xtukanoj ta ri Jehová ri ki-Dios kan xtikamisex, stape' k'o ruq'ij o maneq ruq'ij, chi achin chi ixoq. 14Xkiya' k'a kitzij chuwech ri Jehová rik'in raqoj-chi'ij y rik'in janila kikoten. Y kan nikixupula' ri trompeta y ri uk'a'. 15Konojel k'a ri winaqi' ri' kan janila xekikot roma ri ya'on-tzij ri xkiben, roma kan rik'in ronojel kánima xkiya' kitzij, y rik'in ronojel kik'u'x xkikanoj ri Jehová. Y ri Jehová kan xerak'axaj k'a, y xuya' uxlanibel-k'u'x kik'in chire ri oyowal.
16Y chuqa' xuben chire ri Maacá ri rati't chi xel-pe chupan ri q'atbel-tzij, roma rija' rubanon-q'anej jun itzel ruwachibel Asera. Ri Asá xuwulaj-el ri wachibel ri', y k'ari' xberuboxo' pa q'aq' chuchi' ri siwan ri napon-qa pa ch'uti'n raqen-ya' Cedrón. 17Ri ránima rija' kan xuya' k'a richin xuben ri xrajo' ri Jehová chupan chijun ruk'aslen, stape' xa man xeruwulaj ta el ri akuchi xya-wi kiq'ij ri ch'aqa' chik dios ri pa ruwi' taq juyu'. 18Y xuya-apo chupan ri rachoch ri Dios ri rusujun kan ri rutata' y ri rusujun-apo rija'; ri saqipueq y ri q'anapueq y ri jalajoj kiwech taq samajibel. 19Y kan man jun chik labal xbanatej, k'a xapon na ri juna' juwineq wolajuj chire ri q'atbel-tzij richin ri rey Asá.
Currently Selected:
2 Crón 15: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
