1 Rey 9
9
1Toq ri Salomón xuk'is yan rubanik ri rachoch ri Jehová, ri rachoch rija' y xuk'is yan rubanik ronojel ri xrajo' ri xuben, 2jari' toq ri Jehová xuk'ut chik ri' chuwech ri Salomón achi'el toq xuk'ut-ri' chuwech ri chiri' pa Gabaón. 3Y xuk'uluba-pe ri ruch'abel ri Salomón y xubij chire: Yin kan xinwak'axaj ri ach'owen y ri utzil ri xak'utuj chuwe. Kan xinben yan k'a wichin chire re jay re xapaba-q'anej rat richin chi wawe' niya'ox-wi nuq'ij. Kan jantape' k'a xtik'oje' chinuk'u'x y kan xtinchajij ronojel q'ij. 4Y wi rat xkabiyin chinuwech rik'in chojmilal y rik'in ronojel awánima achi'el xuben ri David ri atata' y kan naben ri nubin chawe yin y nataqej ronojel nupixa', 5yin xtinjikiba' ri aq'atbel-tzij pa ruwi' ri ruwach'ulew Israel richin q'asen achi'el ri xinbij chire ri David ri atata'. Wi keri' kan beneq k'a ruwech xtik'oje' jun chike ri awijatzul chupan ri q'atbel-tzij richin Israel. 6Jak'a wi rix y ri iwijatzul xtijech'ej kan iwi' wik'in yin y wi man xtitaqej ta ronojel ri nupixa' ri nuya'on chiwe, y xa xke'isamajij ri ch'aqa' chik dios y kan xtiya' kiq'ij, 7wi keri' xtiben, yin xkixinwelesaj-el chupan re ruwach'ulew re nuya'on chiwe. Y ri itinamit Israel kan xtitze'ex y chuqa' itzel rutzijoxik xtiban koma ri winaqi' kichin ch'aqa' chik tinamit chuwech re ruwach'ulew. Chuqa' re jay re akuchi niya-wi nuq'ij, xa kan xtinmalij kan. 8Y stape' wakami re wachoch kan jun nimalej jay, rik'in juba' jun q'ij ri winaqi' ri xkeq'ax xa jun wuluwik jay ri xtikitz'et. Y xtikimey y xtikik'utula' chikiwech: ¿Achike roma kere' xuben ri Jehová rik'in re ruwach'ulew re'? ¿Y achike roma kere' xuben chire re jay re kan richin rija'?, xkecha'. 9Y rije' xa xtikibij: Xa roma xkimalij kan ri Jehová ri ki-Dios, ri xelesan-pe kichin ri kite-kitata' pa ruwach'ulew Egipto, y xa xekik'amala-apo ch'aqa' chik dios richin xkiya' kiq'ij y richin xekisamajij. Xa roma ri' ri Jehová xuya-pe pa kiwi' re ruk'ayewal re', xkecha'.
Ri Salomón xuya' sipanik chire ri rey Hiram
(2 Crón 8:1-18)
10Y nitz'aqet yan k'a juwineq juna' chi ri Salomón ruchapon-pe ri samaj richin ri rachoch ri Jehová y ri rachoch rija', y xk'achoj-q'anej. 11Jari' toq ri rey Salomón xerujech chire ri Hiram ri rey richin Tiro, ri juwineq kokoj tinamit ri e rusujun chire, y ri tinamit ri' ek'o chiri' pa ruwach'ulew Galilea. Xerujech k'a ri tinamit ri' roma ri Hiram ruya'on tiox-che', k'isis y ronojel ri q'anapueq ri xk'atzin chire ri rey Salomón. 12Jak'a toq ri Hiram xbe chikitz'etik ri tinamit ri xerujech ri Salomón chire, xa man xqa' ta chuwech. 13Y rija' xubij chire ri Salomón: ¿Achike roma ja ok tinamit re' ri xe'aya' chuwe wach'alal yin?, xcha'. Y roma ri' rija' xubij Cabul*f5* chire ri juwineq tinamit ri' k'a re wakami. 14Y ri Hiram xuya' k'a más juba' jumuch' wuqu' quintal q'anapueq ri xk'atzin chire ri rey Salomón.
Ri Salomón xerumol ri man e ruwinaq ta richin ri samaj
15Ri rey Salomón xerumol k'a winaqi' richin xban-q'anej ri samaj. Y ri samaj ri', ja ri xban-q'anej ri rachoch ri Jehová, ri rachoch rija', ri tz'aq ri rusutin-rij ri tinamit Jerusalem y ri ulew ri achoq ik'in xtaq'ajux-wi richin chiri' xpabex-q'anej ri tinamit, y chuqa' richin xepabex chik q'anej ri tinamit Hasor, ri Meguido y ri Guézer. 16Y re tinamit Guézer jare' ri xuch'ek ri rey richin Egipto, y chuqa' xerukamisaj konojel ri winaqi' aj chiri' y xuya' ruq'aq'al. Y ja tinamit ri' ri xusipaj chire ri rumi'al ri k'ulan rik'in ri Salomón. 17Y roma ri' ri rey Salomón xupaba' chik q'anej ri tinamit Guézer. Chuqa' xerupaba' chik q'anej ri tinamit Bet-horón ri k'o k'a pa xulan-qa, 18ri tinamit Baalat, ri tinamit Tamar, ri k'o pa tz'iran ruwach'ulew richin ri Judá.
19Y keri' chuqa' xerupaba-q'anej ri tinamit ri akuchi ek'o-wi ri ru-carruaje richin oyowal, ri tinamit akuchi xek'oje-wi ri achi'a' ri yech'oke' chirij kiej y ri tinamit ri akuchi ek'o-wi yakonabel richin ronojel ri nitij. Y chuqa' xupaba-q'anej ronojel ri xrajo' chi xban ri chiri' pa Jerusalem, ri chiri' pa Líbano y chijun ruwach'ulew ri k'o chuxe' ri ruq'atbal-tzij rija'. 20Richin xban ronojel re samaj re', xeruya' pa samaj konojel ri winaqi' amorreo, ri heteo, ri ferezeo, ri heveo y ri aj-Jebús. Re winaqi' re' man e rijatzul ta kan ri Israel. 21Konojel re winaqi' re' e kijatzul kan ri xek'oje' chupan ri ruwach'ulew ri xa man xek'is ta pa kiq'a' ri aj-Israel. Y konojel re winaqi' re' kan xe'ok k'a iliy richin ri Salomón, y kan k'o k'a xkitoj chire rija'. Y keri' kibanon k'a re q'ij wakami. 22Jak'a kan man jun chike ri ruwinaq israelita ri xe'ok ta iliy richin, roma ek'o chike rije' ri xe'ok aj-labal y e aj-raqen pa kiwi', ek'o ri xe'ok rusamajel richin q'atbel-tzij, ek'o ri xe'ok tata'al y ek'o ri xe'ok aj-raqen pa kiwi' ri ye'uk'uan carruaje y achi'a' ri yech'oke' chirij kiej. 23Ri Salomón xerukanoj k'a e 550 achi'a' richin xe'ok aj-raqen pa kiwi' ri xebanon jalajoj ruwech samaj ri xeruben-q'anej.
24Ri rixjayil ri Salomón, ri rumi'al ri rey richin Egipto, xel k'a el ri chiri' pa rutinamit kan ri rey David y xq'ax k'a q'anej pa rachoch rija' ri xban-q'anej roma ri Salomón. Y k'ari' ri Salomón xutaq'ajuj, xeruben ch'aqa' chik jay y xusutij chi tz'aq. 25Y ri Salomón oxi' mul pa jun juna' xerusuj chikopi' ri yeporox jumul, pa ruwi' ri porobel, sipanik richin nuq'alajirisaj chi junan ruwech rik'in ri Jehová, y chuqa' kan xuporoj pom chuwech. Keri' toq xk'achoj rubanik ri rachoch ri Jehová.
26Chuqa' ri rey Salomón xeruben barco pa tinamit Esión-guéber ri k'o junan rik'in ri tinamit Elat chuchi' ri Kaqa-Palou chupan ri ruwach'ulew Edom. 27Y ri rey Hiram xeruteq k'a ri rusamajela' richin yebesamej chupan ri barco ri xeruben ri Salomón. Ri achi'a' ri' kan jebel ketaman achike rubanik yekik'uaj barco pa ruwi' ri palou. Kan junan xesamej kik'in ri rusamajela' ri Salomón. 28Rije' xkichop k'a el kibey pa ruwi' ya' richin xebe k'a pa ruwach'ulew Ofir, y toq xetzolin-pe, xkik'en k'a pe jubama 310 quintal q'anapueq; y re' xokiya' chire ri rey Salomón.
Ri reina richin Sabá xberuq'ejela' ri Salomón
(2 Crón 9:1-12)
Currently Selected:
1 Rey 9: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
