1 Crón 14
14
1K'o k'a jun rey rubini'an Hiram richin ri ruwach'ulew Tiro, ri rey ri' xuto' ri David richin xupaba-q'anej ri jay ri akuchi niq'aton-tzij. Xeruteq-el rik'in ri David, achi'a' ri k'o kiq'ij, aj-tz'aq y ajanela'. Chuqa' xkik'uala-el tiox-che' richin xkipaba' kan ri jay. 2Keri' toq xq'ax chuwech ri David chi kan ja ri Jehová xya'on kan rey pa ruwi' ri tinamit Israel, roma kan janila utz beneq ri ruq'atbal-tzij pa ruwi' ri ruwach'ulew.
3Y ri David xk'ule' chik kik'in ch'aqa' chik ixoqi' chiri' pa Jerusalem, y xek'oje' chik ch'aqa' ralk'ual. 4Jare' ri kibi' ri e ralk'ual ri David ri xek'oje' pa Jerusalem: Ri Samúa, ri Sobab, ri Natán, Ri Salomón, 5ri Ibhar, ri Elisúa, ri Elpélet, 6ri Nógah, ri Néfeg, ri Jafía, 7ri Elisamá, ri Eliadá y ri Elifélet.
Ri David xeruch'ek ri aj-Filistea
(2 Sam 5:17-25)
8Toq ri aj-Filistea xkak'axaj chi ri David xqasex aceite pa ruwi' richin xok kan rey pa ruwi' ri ruwach'ulew Israel, kan jari' xebe richin nibekikanoj. Jak'a ri David kan xaxe xrak'axaj chi nikanox, kan jari' xbe richin xeberuk'ulu' chi oyowal. 9Xe'apon k'a ri aj-Filistea chuwa-taq'aj rubini'an Refaim y xkiben-qa kichin chire. 10Y roma ri' ri David xuk'utuj chire ri Dios, y xubij: ¿Utz kami yinel-el chubanik oyowal kik'in ri aj-Filistea? ¿Kan xke'ajech kami pa nuq'a'?, xcha'. Y ri Jehová xubij chire chi tibe y kan xkerujech pa ruq'a'.
11Xejote' k'a el pa Baal-perasim, y chiri' xeruch'ek-wi kan. Roma ri' ri David xubij: Kan achi'el jun raqen-ya' toq nujeq-el rubey, kan keri' xuben ri Dios wik'in; kan xujeq nubey chikiwech ri e etzelanel wichin, xcha'. Y roma ri' xubini'aj kan ri chiri' Baal-perasim.*f7* 12Chirij ri' ri aj-Filistea xekimalij kan ri ruwachibel ri ki-dios rije' y ri David xuteq kiporoxik.
13Jak'a ri aj-Filistea xkitaluj chik ki' pa Refaim. 14Keri' k'a ri David xuk'ulubej chik jun bey ri Dios, y ri Dios xubij chire: Man ye'aq'ijuj ta chikiwech; xa tasutij-kij y xke'aq'ijuj toq xkatapon chikikojol ri che' bálsamo. 15Toq rat xtawak'axaj chi achi'el k'o nibiyaj pa kitum ri che', jari' toq xke'achop chi oyowal, roma yin xtinben chi k'o niq'ajan, y xkinik'o-el chiwech richin kan chaq jun xtinya' chike, y xkenk'is ri aj-labal aj-Filistea, xcha' ri Dios chire ri David.
16Y kan xuben k'a ri David achi'el rubin ri Dios chire; y kan xech'akatej k'a ri aj-labal aj-Filistea, nitiker-el pa tinamit Gabaón y napon k'a pa tinamit Guézer. 17Ri xuben ri David kan xtalutej k'a rutzijol kik'in ri winaqi' richin chijun ruwach'ulew, y ri Jehová xuben k'a chire ri David chi kan k'o rukiy chikiwech chijun ruwach'ulew.
Ri David xrelesaj-el ri káxa pa rachoch ri Obed-Edom
(2 Sam 6:12-23)
Currently Selected:
1 Crón 14: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
