1 Crón 11
11
1Chijun ri winaqi' richin ri ruwach'ulew Israel xkimol-ki' rik'in ri David pa tinamit Hebrón y xkibij chire: Rat kan at qach'alal-wi. 2Y stape' toq ri Saúl k'a k'es na, kan ja rat ri xatuk'uan qichin roj ri oj aj-labal. Chuqa' ri Jehová ri qa-Dios kan rubin k'a chawe chi ja rat ri xkayuq'un richin ri rutinamit y xkatok rey pa qawi', xecha'.
3Toq konojel k'a ri achi'a' ri k'o kiq'ij richin ri tinamit Israel xebe y xech'on rik'in ri David pan Hebrón, jari' toq rija' kan xuben jun jikibel-tzij kik'in, y kan chuwech ri Dios xuben-wi. K'ari' rije' xkiqasaj aceite pa ruwi' ri David richin xok kan rey pa ruwi' ri Israel, achi'el ri ch'abel ri rubin kan ri Dios chire ri Samuel.
Ri David xuch'ek kan ri tinamit Sión
(2 Sam 5:6-10)
4Ri David y konojel ri aj-Israel xebe pa Jerusalem, ri chuqa' nibix Jebús chire roma ri jebuseo k'a ek'o na chiri'. 5Y ri achi'a' jebuseo xkibij chire ri David: Wawe' man yatok ta pe rat, xecha'. Jak'a ri David xtikir xuch'ek kan ri tobel rubini'an Sión, ri sutin-rij rik'in tz'aq; y roma ri' k'a re wakami ri tinamit ri' nibix ri Rutinamit ri David chire. 6Toq man jani tuch'ek ri tinamit Sión, ri David xubij chike ri e aj-labal israelita: Ri xtich'akon pa nabey chikij ri jebuseo, jari' xtinya' kan aj-raqen pa kiwi' ri ch'aqa' chik aj-labal, xcha'. Y ri nabey ri xch'akon, ja ri Joab ral ri Seruiá. Y ja rija' ri xok kan aj-raqen pa kiwi' ri aj-labal israelita. 7Chirij ri', ri David xk'oje' kan chupan ri tobel, y roma ri' xkijel ri rubi', y re wakami nibix ri Rutinamit ri David chire. 8Ri David xupaba' chik q'anej ri tobel richin Sión, y chuqa' xutaq'ajuj chik ri ulew ri k'o chunaqaj. Rokik ri David nupaba' chik q'anej ri Sión, ri Joab chuqa' xupaba' chik q'anej ri tinamit. 9Keri' k'a toq ri David xnimer ri ruq'atbal-tzij, roma ri Jehová ri k'iytisanel richin ronojel kan k'o-wi rik'in.
Ri achi'a' e richin ri David ri jebel kuchuq'a'
(2 Sam 23:8-39)
10Ja achi'a' re' ri k'o más kiq'ij, ri ek'o pa kiwi' ri aj-labal ri maneq xibinri'il chikiwech; y rije' xeto'on richin ri David chupan ri ruq'atbal-tzij. Xjunamatej k'a kiwech kik'in ri ch'aqa' chik israelita richin chi ri David xok kan rey, achi'el ri rubin-pe ri Jehová chire ri tinamit Israel.
11Ri nabey chike ri achi'a' ri xk'oje' ruq'ij, ja ri Jasobeam, ruk'ajol ri Hacmoní. Y ri Jasobeam jun chike ri aj-raqen pa kiwi' ri aj-labal. Y k'o k'a jun q'ij chupan jun oyowal, xerukamisaj e 300 achi'a' rik'in ri rukum. 12Ri ruka'n chike ri achi'a' ri k'o ruq'ij, ja ri Eleazar, ruk'ajol ri Dodó, jun ahohíta, jun chike ri achi'a' ri maneq xibinri'il chikiwech. 13Ri Eleazar k'o k'a rik'in ri David chiri' pa Pas-damim toq ri aj-Filistea xkimol-ki' richin nibekibana' oyowal. Y xkiben k'a ri oyowal chiri' chunaqaj jun ulew ri tikon cebada chuwech, jak'a ri achi'a' israelita xa xe'animej chikiwech ri aj-Filistea. 14Jak'a ri Eleazar y jun tzobaj achi'a' xkipaba-ki' chikiwech ri aj-Filistea chiri' pa runik'ajal ri ulew ri'. Y kan xekich'ek k'a roma kan ja ri Dios xya'on ri jun nimalej ch'akonik ri' chike ri israelita.
15K'o k'a jun q'ij toq ri e oxi' aj-raqen, ri k'o más kiq'ij, xebe-qa rik'in ri nimalej abej ri k'o chuxikin ri jul rubini'an Adulam, richin xe'apon rik'in ri David. Y ri aj-Filistea ek'o-pe chikiwech rije' pa taq'aj richin ri Refaim. 16Ri David k'o pa jun tobel richin nuto-ri'. Y chupan ri q'ij ri' ri aj-labal aj-Filistea ek'o-qa pa tinamit Belén. 17Y ri David xubij: K'ate' ta k'o-pe juba' nuya' ri elesan-pe chupan ri pozo ri k'o chuchi' ri Belén, xcha'.
18Toq xkak'axaj re oxi' achi'a' re' ri kan janila kuchuq'a' y man nikixibij ta ki', xeq'ax chikikojol ri aj-Filistea ri ek'o pa taq'aj, richin xbekelesaj juba' ya' chupan ri pozo ri k'o chuchi' ri Belén. Y xkik'uaj k'a el chire ri David. Jak'a ri David xa man xuqum ta. Xa xutix chuwech ri Jehová richin jun sipanik, 19y xubij: Kan kinato' nu-Dios richin man xtinqum ta re ya' re', roma re' xa kan achi'el xa ta ja ri kikik'el re achi'a' re' ninqum, roma rije' kan xkiya-el ri kik'aslen chuwi-kamik richin xbekik'ama-pe re ya' re', xcha'. Y roma ri' man xuqum ta. Keri' xkiben ri e oxi' achi'a' aj-raqen ri maneq xibinri'il chikiwech.
20Ri Abisai, rach'alal ri Joab, chuqa' jun aj-raqen pa kiwi' ri aj-labal. K'o k'a jun q'ij xeruq'ijuj e 300 achi'a' rik'in ri rukum, y xerukamisaj. Keri' toq xel rutzijol chi kan k'o ruchuq'a' chikiwech ri ch'aqa' achi'a' ri maneq xibinri'il chikiwech. 21Y ja rija' ri xya'ox más ruq'ij chikiwech, y xok aj-raqen pa kiwi', jak'a kan man xeruq'i' ta ri ch'aqa' chik ri xenatex yan qa.
22Chuqa' ri Benaías, ruk'ajol ri Joiadá aj-Cabseel, chuqa' jun achin kan maneq xibinri'il chuwech. Y k'iy k'a nima'q taq banobel ri xeruben. Rija' xkamisan kichin ri e ka'i' achi'a' ri achi'el kewachin koj, achi'a' aj-Moab ri e ruk'ajol ri Ariel. Y chuqa' jun q'ij toq ruchapon ruqajinen tef, rija' xok-qa pa jun jul y chiri' xukamisaj jun koj. 23Y chuqa' xukamisaj jun achin aj-Egipto ri k'o jun jaj rik'in wo'o' q'a'aj ri rupalen, ri nuk'uaj jun rukum ri janila nim rupan. Ri Benaías xuk'uaj jun ch'ich' pa ruq'a' y rik'in ri' xtikir xumej ri kum pa ruq'a' ri aj-Egipto, y rik'in ri' xukamisaj-wi. 24Ri xuben ri Benaías, ruk'ajol ri Joiadá xel rutzijol y xetamex chi kan k'o-wi ruchuq'a' chikiwech ri e juwineq lajuj achi'a' ri maneq xibinri'il chikiwech; 25y kan xnimirisex k'a ruq'ij chikiwech ri e juwineq lajuj achi'a', jak'a man xeruq'i' ta ri e oxi' nabey, y xok chajiy richin ri David.
26Ja aj-labal re' ri janila kuchuq'a' y man jun xibinri'il chikiwech: Ri Azael, rach'alal ri Joab; ri Elhanán, ruk'ajol ri Dodó, aj-Belén; 27ri Samot, aj-Harod; 28ri Irá, ruk'ajol ri Iqués, aj-Tecoa; ri Abiézer, aj-Anatot, 29ri Sibecai, aj-Husá; ri Ilai, ri ahohíta; 30ri Maharai, aj-Netofá; ri Héled, ruk'ajol ri Baaná, chuqa' aj-Netofá; 31ri Itai, ruk'ajol ri Ribai, aj-Guibeá, ri k'o pa ruwach'ulew ri Benjamín; ri Benaías, aj-Piratón; 32ri Hidai, ri xk'oje' chunaqaj ri ti raqen-ya' richin Gaas; ri Abiel, arbatita; 33ri Azmávet aj-Bahurim; ri Eliahbá aj-Saalbim; 34ri e ralk'ual ri Jasén aj-Guinzo; ri Jonatán, ruk'ajol ri Sagué aj-Harar; 35ri Ahiam, ruk'ajol ri Sacar chuqa' aj-Harar; ri Elifal, ruk'ajol ri Ur; 36ri Héfer aj-Mequerá; ri Ahías aj-Pelón; 37ri Hesrai aj-Carmel; ri Naarai, ruk'ajol ri Esbai; 38ri Joel, rach'alal ri Natán; ri Mibhar, ruk'ajol ri Hagrai; 39ri Sélec amonita; ri Naharai aj-Berot, y chuqa' to'onel richin ri Joab, ral ri Seruiá; 40ri Irá aj-Jatir; ri Gareb chuqa' aj-Jatir; 41ri Urías, ri hitita; ri Zabad, ruk'ajol ri Ahlai; 42ri Adiná, ruk'ajol ri Sizá, rubenita, y chuqa' aj-raqen kichin rije' y e rachibilan e juwineq lajuj achi'a'; 43ri Hanán, ruk'ajol ri Maacá; ri Josafat ri mitnita; 44ri Ozías aj-Astarot; ri Samá ruk'ajol ri Hotam; ri Jehiel, ruk'ajol chuqa' ri Hotam aj-Aroer; 45ri Jediael, ruk'ajol ri Simrí; y ri rach'alal rubini'an Johá aj-Tizá; 46ri Eliel aj-Mahanaim; ri Jerebai, ruk'ajol ri Elnáam; ri Josavía, ruk'ajol chuqa' ri Elnáam; ri Itmá aj-Moab; 47ri jun chik Eliel; ri Obed; y ri Jaasiel aj-Sobá.
Currently Selected:
1 Crón 11: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
