Lok Enadjimomagag oo mazinaigan
Enadjimomagag oo mazinaigan
Mi oo8eni nitam eko nijinigin ojibiiganan Lok (Luc) kagi ijinijaama8agobanen pejig naben Teopil (Théophile) ka ijinikazondjin. Ka8in nogom kikenimagani8isi a8enen aa maia Teopil. Kodagini dac ojibiigani kagi ojitodj Lok, mi ii8e “Jesos Odanodaganan Odijitcige8ini8an” ka ijinikadenig.
Mackiki8inni8iban Lok, acitc Kanek (Grec) ijigij8egoban. Ka8in Coda8inni8isiban, anic dac ogi ani teb8eta8agoban Jesosan. Ogi 8idji pabamadizimabanin Ponan apitc ka paba tibadjimota8andjin min8adjimo8ini ega ka Coda8inni8indjin.
Ka8in 8in Lok ododji nagicka8asi8an Jesosan. Ogi kitci k8ag8edjiman dac kegoni ini8eni8an kagi 8abamandjin acitc kagi noda8andjin, 8e8enda kidji gi odji kikendag adi kagi iji kikinoamagendjin acitc adi kagi inadizindjin Jesosan.
Ooma omazinaiganikag, Lok okitci 8i tibadjimota8abanin min8adjimo8ini a8acamej ini8e ega ka Coda8inni8indjin, ega Israel akikag ka tajikendjin, Kanek dac ka ijigij8endjin. O8a8idama8abanin adi 8a ikidomaganigin ini Coda8inni anim8e8inan ka sanaganigin kidji nisidotcigadenigin, acitc o8a8idama8abanin adi eji pimadizindjin Coda8innin. Midac iidi kakinagotc ka taci8adj ega ka Coda8inni8i8adj mizi8ekamig ogagi nisidotana8a mi ini Jesosan ka ag8acigendjin.
Lok ki 8abadai8e omazinaiganikag mi ini Jesosan Coda8innig ka pia8adjin, kagi ikidogobanen Kije Manido kidji pidjinija8adjin kidji pi nda ag8acimigo8adjin. Acitc ki 8abadai8e adi Jesos epitci sagiadjin a8iagon ka manenimagani8indjin, acitc adi epitci apitenimapanin ik8e8an, acitc adi kagi iji 8idoka8adjin ka tabasendagozindjin, ka kidimagizindjin, ka patadindjin, acitc ka akozindjin. Mojag Lok ogi mikodan aiamie8ini acitc adi Kije Manido eji kasiamagedj patado8inan. Acitc ogi mikoman Mino Manidon acitc ki 8abadai8e adi Jesosan epitci mockineckagondjin ini Mino Manidon. Ki 8idamage adi Kije Manidon Kidadaminan eji minadjin Mino Manidon ini8eni8an ka k8ag8edjimigodjin. Midac 8edji ki aiamo8adj macka8izi8ini acitc mina8azi8ini igi8e ka teb8etamo8adj kidji gi paba tibadjimo8adj min8adjimo8ini.
Currently Selected:
Lok Enadjimomagag oo mazinaigan: ALGNT
Highlight
Share
Copy
Want to have your highlights saved across all your devices? Sign up or sign in
Algonquin New Testament © 1998 Canadian Bible Society