ᑯᓚᔑᔭᓇ 1
1
1ᐹᓪ, ᐅᑦ ᐊᐸᔅᑕᓕᒪ ᒋᓴᔅ ᙭, ᑭᒋᒪᓂᑐ ᐁ ᐃᑌᓕᑕᒃ, ᓀᔥᑕ ᑎᒧᑎ, ᑭᒋᔖᓂᓇᐤ:
2ᐁ ᒪᓯᓇᐊᒪᐙᑦ ᐊᓂᐃ ᐅᐸᓓᑭᓴ ᓀᔥᑕ ᑳ ᒀᔭᔅᑭᑎᓕᒋ ᐎᒋᔖᓂᒪᐗ ᙭ᑎᒃ, ᑳ ᐃᑖᓕᒋ ᑯᓚᓯᐃᒃ: ᔕᐌᓕᒋᑫᐎᓐ ᑭ ᑳ ᐎ ᐋᔮᓇᐗᐤ, ᓀᔥᑕ ᑳᔮᒣᓕᑕᒧᐎᓐ, ᑭᒋᒪᓂᑐ ᑯᑖᐎᓇᐤ ᐅᒋ, ᓀᔥᑕ ᐅᑎᐯᓕᒋᑫᐤ ᒋᓴᔅ ᙭᙮
ᓇᔅᑯᒧᐎ ᐊᔭᒥᐋᐎᓐ
3ᓂ ᓇᓈᔅᑯᒫᓈᓐ ᑭᒋᒪᓂᑐ ᓀᔥᑕ ᐅᑖᐎᔭ ᑭ ᑎᐯᓕᒋᑫᒥᓇᐤ ᒋᓴᔅ ᙭, ᒧᔕᒃ ᐁ ᐋᔭᒥᐁᔅᑕᒫᑖᑾᒃ᙮ 4ᐊᔅᐱᓐ ᐁ ᑮ ᐯᑐᒫᒃ ᐁ ᐃᔑ ᑖᐺᔦᓕᒣᒃ ᒋᓴᔅ ᙭, ᓀᔥᑕ ᐁᔅᐱᒋ ᓵᑭᐁᒀᒃ ᒥᓯᐌ ᐅᐸᓓᑭᓴᒃ; 5ᐊᓂᒪ ᐊᔅᐯᓕᒧᐎᓐ ᐅᒋ ᑳ ᐊᔅᑣᑲᐎᔦᒃ ᑭᒋᑭᔑᑯᒃ, ᐊᓂᒪ ᐋᔕᔾ ᑳ ᑮ ᐯᑕᒣᒃ, ᐁ ᐃᔑ ᐃᑗᒪᑲᒃ ᑖᐺᐎᓐ ᒥᓄᐋᒋᒧᐎᓂᒃ; 6ᑳ ᑮ ᐯᒋ ᐅᑎᑎᑯᔦᒃ, ᑖᐱᔅᑯᒡ ᐁ ᐃᑕᑾᒃ ᒥᓯᐌ ᐊᔅᑮᒃ; ᓀᔥᑕ ᑳ ᒥᓂᔑᐗᒃ ᑖᐱᔅᑯᒡ ᓀᔥᑕ ᑳ ᐃᔑ ᒥᓂᔑᔅᑳᑯᔦᒃ, ᐊᔅᐱᓐ ᐊᓂᒪ ᐁ ᑭᔑᑳᒃ ᑳ ᑮ ᐯᑕᒣᒃ, ᓀᔥᑕ ᐁ ᑮ ᑭᔅᑫᓕᑕᒬᒃ ᑭᒋᒪᓂᑐ ᐅ ᔕᐌᓕᒋᑫᐎᓐ ᑖᐺᐎᓂᒃ: 7ᑖᐱᔅᑯᒡ ᓀᔥᑕ ᑳ ᑮ ᐃᔑ ᑭᔅᑭᓄᐊᒫᑖᒃ ᐃᐸᑉᕌᔅ, ᑳ ᓵᑭᐊᑭᑦ ᓂᒋ ᐊᑑᔅᑫᓛᑲᓂᓈᓐ, ᐊᓇ ᑭᓚᐗᐤ ᐅᒋ ᑳ ᐋᐎᑦ ᑳ ᒀᔭᔅᑭᑎᑦ ᐅᑦ ᐊᔭᒥᐊᐎ ᐊᑑᔅᑫᓛᑲᓂᒪ ᙭; 8ᐁᐗᒀᓇ ᓀᔥᑕ ᑳ ᑮ ᐎᑕᒪᐎᔭᒥᑦ ᑭ ᓵᑭᐃᐌᐎᓂᐗᐤ ᐊᒑᑯᒃ᙮
9ᐅᒪ ᐅᒋ ᓂᓚᓈᓐ ᓀᔥᑕ, ᐊᔅᐱᓐ ᐊᓂᒪ ᐁ ᑭᔑᑳᒃ ᑳ ᑮ ᐯᑕᒫᒃ, ᓇᒪᐎᓚ ᓂ ᐳᓂᓈᓐ ᐁ ᐋᔭᒥᐁᔅᑕᒫᑕᑾᒃ, ᑭᒋ ᓴᑲᔅᑭᓀᔅᑳᑯᐌᒃ ᐁ ᑭᔅᑫᓕᒋᑳᑌᓕᒃ ᐅᑦ ᐃᑌᓕᑕᒧᐎᓐ, ᒥᓯᐌ ᑲᑫᑕᐌᓕᑕᒧᐎᓂᒃ ᓀᔥᑕ ᐊᒑᑯᐎ ᓂᓯᑐᑕᒧᐎᓂᒃ; 10ᑭᒋ ᐱᒧᑌᔦᒃ ᐁ ᑌᐸᑫᓕᑖᑯᓰᔅᑕᐌᒃ ᐅᑎᐯᓕᒋᑫᐤ, ᒥᓯᐌ ᐁ ᓇᐃᓚᐌᐁᒃ, ᐁ ᒥᓂᔑᐎᔦᒃ ᒥᓯᐌ ᒥᓗ ᐊᑑᔅᑫᐎᓂᒃ, ᓀᔥᑕ ᐁ ᓚᑭ ᑭᔅᑫᓕᒣᒃ ᑭᒋᒪᓂᑐ; 11ᐁ ᒪᔥᑲᐎᓯᔅᑳᑯᔦᒃ ᒥᓯᐌ ᓱᑳᑎᓯᐎᓐ, ᑳ ᐃᑕᔅᑌᓕᒃ ᐅ ᑭᒋ ᑲᔥᑭᐅᐎᓐ ᒥᓯᐌ ᔑᐱᓚᐌᓯᐎᓂᒃ ᐃᔑ ᓀᔥᑕ ᔑᐯᓕᑕᒧᐎᓂᒃ ᑭᑭ ᒥᓚᐙᑕᒧᐎᓐ; 12ᐁ ᓇᓈᔅᑯᒣᒃ ᐌᐅᑖᐎᒪᐎᑦ, ᑳ ᑮ ᑐᑖᑕᒃ ᑭᒋ ᐊᓯᒋ ᐋᔮᔭᒃ ᐊᓂᒪ ᑎᐱᓚᐌᐎᓯᐎᓐ ᑳ ᐋᔮᒋᒃ ᐅᐸᓓᑭᓴᒃ ᐙᓭᔮᓯᐎᓂᒃ: 13ᑳ ᑮ ᐎᑾᒋᐃᑕᒃ ᐗᓂᑎᐱᔅᑭᓯᐎ ᑳᔥᑭᐅᐎᓐ ᐅᒋ, ᓀᔥᑕ ᑳ ᑮ ᐃᔑᐎᓕᑕᒃ ᐅᑦ ᐅᑭᒪᐎᐎᓂᓕᒃ ᑳ ᓵᑭᐋᑦ ᐅᑯᓯᓴ: 14ᐊᓇ ᑳ ᐅᒋ ᐋᔮᔭᒃ ᐱᒫᒋᐃᑯᓯᐎᓐ ᐅᒥᑯ ᐅᒋ, ᐁ ᐌᐯᓕᒋᑳᑌᑭ ᒪᒋᑣᐎᓇ ᐅᑎ᙮
᙭ ᒫᐗᒡ ᐁ ᓂᑳᓀᑌᓕᑖᑯᓯᑦ
15ᐊᓇ ᑳ ᓇᔅᐱᑕᐙᑦ ᐁᑳ ᑳ ᓄᑯᓯᓕᒋ ᑭᒋᒪᓂᑐᐗ, ᐊᓇ ᑳ ᓂᔥᑕᒧᔖᓂᐎᑦ ᒥᓯᐌ ᑳ ᐅᔑᐃᒥᑦ: 16ᐌᓴ ᐎᓚ ᐅᒋ ᒥᓯᐌ ᑫᒀᓇ ᑮ ᐅᔑᑖᓂᐗᓋ, ᑭᒋᑭᔑᑯᒃ ᑳ ᐃᑕᑾᑭ, ᓀᔥᑕ ᐊᔅᑮᒃ ᑳ ᐃᑕᑾᑭ, ᑳ ᓄᑾᑭ, ᓀᔥᑕ ᐁᑳ ᑳ ᓄᑾᑭ, ᑮᔥᐱᓐ ᐅᑭᒪᐗᐱᐎᓇ, ᓀᔥᑕᐱᑯ ᐅᑭᒪᐎᐎᓇ, ᓀᔥᑕᐱᑯ ᑎᐯᓕᒋᑫᐎᓇ, ᓀᔥᑕᐱᑯ ᑲᔥᑭᐅᐎᓇ: ᒥᓯᐌ ᑫᒀᓇ ᐎᓚ ᑮ ᐅᒋ ᐅᔑᑖᓂᐗᓋ, ᓀᔥᑕ ᐎᓚ ᑭᒋ ᐋᔮᑦ᙮ 17ᒥᓯᐌ ᑫᒀᓇ ᒫᑲ ᓂᑳᓂᔥᑲᒻ, ᐎᓚ ᐅᒋ ᓀᔥᑕ ᒥᓯᐌ ᑫᒀᓇ ᐃᑕᑾᓋ᙮ 18ᐎᓚ ᒫᑲ ᐁᐗᒀᓇ ᑳ ᑎᐯᓕᑕᒃ ᒥᔭᐎᓕᐤ, ᒫᒪᐎᐋᔮᒥᐊᐗ ᐅᑎ: ᐁᐗᑯ ᓃᔥᑕᒻ ᑳ ᑮ ᐃᑖᑦ, ᑳ ᓃᔥᑕᒧᔖᓂᐎᑦ ᐅᓂᐱᐗ ᐅᒋ: ᒥᓯᐌ ᐃᔑ ᑭᒋ ᒪᐗᒋ ᑭᔅᑌᓕᑖᑯᓯᑦ᙮ 19ᐌᓴ ᑮ ᒥᓜᓕᑕᒻ ᐌᐅᑖᐎᒪᐎᑦ ᒥᓯᐌ ᒥᑐᓂᐎᓯᐎᓂᓕᐤ ᑭᒋ ᐱᒋᔅᑳᑯᓕᒋ᙮ 20ᓀᔥᑕ ᒫᑲ ᐁ ᑮ ᑳᔮᒣᓕᑕᒧᐎᓂᑫᑦ ᐁ ᒥᑯᐗᓂᓕᒃ ᐅᑦ ᐋᔑᑌᐋᑎᑯᒻ ᐅᒋ, ᐎᓚ ᐅᒋ ᑭᒋ ᐙᑯᐙᒋᑕᒫᓱᑦ ᒥᓯᐌ ᑫᒀᓇ; ᐎᓚ ᐅᒋ, ᓂᑦ ᐃᑣᓐ, ᑮᔥᐱᓐ ᐊᔅᑮᒃ ᑳ ᐃᑕᑾᑭ, ᓀᔥᑕᐱᑯ ᑭᒋᑭᔑᑯᒃ ᑳ ᐃᑕᑾᑭ᙮
21ᑭᓚᐗᐤ ᒫᑲ, ᐌᔅᑲᒡ ᑳ ᑮ ᒫᓐᑌᐎᑖᑎᓯᔦᒃ, ᓀᔥᑕ ᑳ ᑮ ᐸᒀᔑᐌᔭᒃ ᑭ ᒥᑐᓀᓕᒋᑲᓂᐙᒃ ᐁ ᑮ ᒪᒋ ᐃᔑᒋᑫᔦᒃ, ᐊᓄᒡ ᐋᑕ ᑭ ᑮ ᐙᑯᐙᒋᐃᑯᐗᐤ, 22ᐁ ᐎᔭᐎᒪᑲᓂᓕᒃ ᐅ ᐎᔮᓯᒃ ᓂᐱᐎᓐ ᐅᒋ, ᐁ ᐸᓓᑭᓯᔦᒃ, ᓀᔥᑕ ᐁᑳ ᐁ ᐊᑖᒣᓕᑖᑯᓯᔦᒃ, ᓀᔥᑕ ᐁᑳ ᐁ ᑭᑐᑖᑯᓯᔦᒃ ᐁ ᑲᓇᐗᐸᒥᑖᒃ: 23ᑮᔥᐱᓐ ᑫᔮᐸᒡ ᑕᔑᑫᔦᑴ ᑖᐺᔦᓕᑕᒧᐎᓂᒃ, ᐁ ᐋᔨᒋᑳᐸᐎᔦᒃ ᓀᔥᑕ ᐁ ᑫᒋᓇᐅᔦᒃ, ᐁᑳ ᓀᔥᑕ ᐋᒋᐸᓕᐃᑲᐎᔦᑴ ᐁ ᐃᔑ ᐊᔅᐯᓕᒧᑐᑕᒣᒃ ᒥᓗᐋᒋᒧᐎᓐ, ᑳ ᑮ ᐯᑕᒣᒃ, ᓀᔥᑕ ᑳ ᑮ ᐎᑕᒪᐙᑲᓂᐎᑦ ᒥᓯᐌ ᐊᐌᓇ ᔑᐹ ᑭᒋᑭᔑᑯᒃ ᑳ ᐃᑖᑦ; ᐁᐗᑯ ᑳ ᐅᒋ ᓂᓚ ᐹᓪ ᐁ ᐋᔭᒥᐋᐎ ᐊᑐᔅᑫᓛᑲᓂᔮᓐ᙮
ᐹᓪ ᐊᑐᔅᑲᐌᐤ ᐊᓂᐃ ᐅᑖᐺᑕᒧᐗ
24ᐊᓄᒡ ᒫᑲ ᓂ ᒥᓚᐙᑌᓐ ᓂ ᐎᓴᑫᓕᑕᒧᐎᓂᒃ ᑭᓚᐗᐤ ᐅᒋ, ᓀᔥᑕ ᓂ ᓵᑲᔅᑭᓇᑖᓐ ᐊᓂᐁᓕᐤ ᑳ ᓄᑌᐸᓕᓕᒃ ᐅ ᑲᒀᑕᑭᓯᐎᓇ ᙭, ᓂ ᐎᔮᓯᒃ, ᐎᔭᐤ ᐅᒋ, ᐁᐗᑯ ᒫᒪᐎᐋᔭᒥᐊᐗᒃ; 25ᐁᐗᑯ ᑳ ᐅᒋ ᐋᔭᒥᐊᐎ ᐊᑑᒃᑫᓛᑲᓂᐃᑲᐎᔮᓐ, ᑖᐱᔅᑯᒡ ᑳ ᐃᑕᔅᑌᓕᒃ ᐅ ᒫᑎᓇᒫᑫᐎᓐ ᑭᒋᒪᓂᑐ, ᑳ ᒥᓕᑲᐎᔮᓐ ᑭᓚᐗᐤ ᐅᒋ, ᑭᒋ ᑎᐱ ᑲᑫᔅᑭᒥᐌᐗᒃ ᐅᑦ ᐋᔭᒥᐎᓐ ᑭᒋᒪᓂᑐ; 26ᐊᓂᒪ ᐅᑎ ᑳ ᒫᒪᔅᑳᑌᓕᑖᑾᒃ ᑕᑭ ᑳ ᑮ ᑳᑖᓂᐗᒃ ᓀᔥᑕ ᑳ ᐊᑎ ᐋᔭᓂᔅᑫ ᐱᒫᑎᓯᓈᓂᐗᒃ, ᒫᑲ ᐊᓄᒡ ᑳ ᐸᔭᑌ ᐙᐸᑎᓛᒋᒃ ᐅ ᐸᓓᑭᓯᒪ; 27ᐊᓂᐃ ᑭᒋᒪᓂᑐ ᑫ ᑮ ᑭᔅᑫᓕᑕᒥᐋᔅᐸᓐ ᐁᔅᐱᒋ ᐌᓗᒋ ᑭᔅᑌᓕᑖᑾᒃ ᐅᒪ ᑳ ᒫᒪᔅᑳᑌᓕᑖᑾᒃ ᐃᑕ ᐁ ᐃᑖᒋᒃ ᒉᓐᑖᐃᓚᒃ; ᐁᐗᑯ ᙭ ᐁ ᐱᒋᔅᑳᑖᒃ, ᐁ ᐊᔅᐯᓕᒧᑐᒋᑳᑌᒃ ᑭᔅᑌᓕᑖᑯᓯᐎᓐ: 28ᐊᓇ ᑳ ᑲᑫᔅᑭᒥᐌᔮᓐ, ᐁ ᔭᒀᒥᒪᑭᑦ ᒥᓯᐌ ᑕᑐ ᐃᓕᓕᐤ, ᓀᔥᑕ ᐁ ᑭᔅᑭᓄᐊᒪᐗᑭᑦ ᒥᓯᐌ ᑕᑐ ᐃᓕᓕᐤ, ᒥᓯᐌ ᑲᑫᑕᐌᓕᑕᒧᐎᓂᒃ; ᒥᓯᐌ ᑕᑐ ᐃᓕᓕᐤ ᒥᑐᓂ ᐁ ᒥᓦᑎᓯᑦ ᑭᒋ ᐸᑭᑎᓇᒫᐗᑭᑦ ᙭ ᒋᓴᔅ: 29ᐃᑌ ᓀᔥᑕ ᑳ ᐃᔑ ᐊᑑᔅᑫᔮᓐ, ᐁ ᑲᑴᑲᔥᑭᑖᔮᓐ ᐁ ᐃᔑ ᐊᑐᔅᑫᑦ, ᐁᓕᑯᒃ ᑳ ᐊᑐᔅᑫᔅᑳᑯᐗᒃ᙮
Currently Selected:
ᑯᓚᔑᔭᓇ 1: MCNT91
Highlight
Share
Copy
Want to have your highlights saved across all your devices? Sign up or sign in
The text of the Bible in Moose Cree is in the public domain.
Moose Cree New Testament © Canadian Bible Society, 1991.