ᑯᓚᔑᔭᓇ 2
2
1ᐌᓴ ᓂ ᓇᑕᐌᓕᑌᓐ ᑭᑭ ᑭᔅᑫᓕᑕᒣᒃ ᐁᔅᐱᒋ ᓈᔅᐱᒡ ᑯᔅᐸᓀᓕᑕᒫᑕᑾᒃ, ᐊᓂᑭ ᓀᔥᑕ ᓓᐅᑕᓯᐊᐃᒃ ᑳ ᐃᑖᒋᒃ, ᓀᔥᑕ ᒥᓯᐌ ᐊᓂᑭ ᐁᑳ ᑳ ᑮ ᐙᐸᒥᒋᒃ ᓂ ᐎᔮᓯᒃ; 2ᐅᑌᐃᐙᐗ ᑭᒋ ᑳᑭᒋᑖᓂᐗᓂᓕᑭ, ᐁ ᒪᐗᓴᑯᓈᑲᓂᐎᒋᒃ ᓵᑭᐃᐌᐎᓂᒃ, ᓀᔥᑕ ᑭᒋ ᒥᑐᓂᑫᒋᓇᐅᐎ ᓂᓯᑐᑕᑭᒃ ᐁ ᐃᔑ ᐌᓗᑕᓂᓕᒃ, ᒥᑐᓂ ᑭᒋ ᑭᔅᑫᓕᑕᒸᒋᒃ ᑭᒋᒪᓂᑐᐗ ᐅ ᒫᒪᔅᑳᑌᓕᑖᑯᓯᐎᓂᓕᐤ, ᓀᔥᑕ ᐅᑖᐎᒪᐗ, ᓀᔥᑕ ᙭ᑕ; 3ᐊᓇ ᑳ ᐱᒋᔅᑳᑯᑦ ᒥᓯᐌ ᐌᓗᒋ ᑲᑫᑕᐌᓕᑕᒧᐎᓂᓕᐤ ᓀᔥᑕ ᑭᔅᑫᓕᑕᒧᐎᓂᓕᐤ᙮
4ᐅᒪ ᒫᑲ ᓂᑦ ᐃᑣᓐ, ᐁᑳ ᐊᐌᓇ ᐃᓕᓕᐤ ᑭᒋ ᐙᔦᔑᒥᑖᒃ ᔓᔅᒀᒋᐋᔭᒥᐎᓇ ᐅᒋ᙮ 5ᐌᓴ ᐋᑕ ᐁ ᐃᑖᐱᒋᔮᓐ ᐎᔮᓯᒃ, ᐁᓕᐌᒃ ᒫᑲ ᑭ ᐎᒉᐎᑎᓇᐗᐤ ᐊᒑᑯᒃ, ᐁ ᒥᓚᐙᑕᒫᓐ ᓀᔥᑕ ᐁ ᑲᓇᐙᐸᑕᒫᓐ ᐁ ᒀᔭᔉ ᐋᔨᑎᔦᒃ, ᓀᔥᑕ ᐁ ᐋᔨᒋ ᑖᐺᔦᓕᒣᒃ ᙭᙮
ᒥᔭᑭᓯᐤ ᐅᐱᒫᑎᓯᐎᓂᒃ ᑳ ᐊᑑᔅᑲᐙᑦ ᙭ᑕ
6ᑳ ᑮ ᐃᔑ ᐅᑎᓀᒃ ᙭ ᒋᓴᔅ ᐅᑎᐯᓕᒋᑫᐤ, ᐁᑯ ᐃᔑ ᐱᒧᑖᑎᒃ; 7ᐎᓚ ᐃᔑ ᐁ ᐅᒉᐱᑭᐎᔦᒃ ᓀᔥᑕ ᐁ ᐋᔨᒋᑳᐸᐎᔦᒃ, ᐁ ᒪᔥᑳᐎᑳᐸᐎᔦᒃ ᑖᐺᔦᓕᑕᒧᐎᓂᒃ, ᑖᐱᔅᑯᒡ ᑳ ᑮ ᐃᔑ ᑭᔅᑭᓄᐊᒫᑲᐎᔦᒃ, ᐁᑯᑕ ᐁ ᒥᔕᑭᓯᔦᒃ ᐁ ᓇᓈᔅᑯᒧᔦᒃ ᓀᔥᑕ᙮
8ᔮᒀᒥᓯᒃ ᐁᑳᐎᓚ ᐊᐌᓇ ᐃᓕᓕᐤ ᑭᒋ ᐊᐗᑳᓂᐃᑖᒃ ᒥᔅᑲᐙᑕᐎᓐ ᐅᒋ ᓀᔥᑕ ᐸᑾᓐᑕᐤ ᑲᑳᔦᓕᓯᐎᓐ, ᐁ ᐃᔑ ᑭᔅᑭᓄᐊᒫᑫᒋᒃ ᐃᓕᓕᐗᒃ, ᑳ ᐃᑕᔅᑌᑭ ᓂᔥᑕᒻ ᑭᔅᑭᓄᐊᒫᑫᐎᓇ ᐅᑕ ᐊᔅᑮᒃ, ᓇᒪᐎᓚ ᒫᑲ ᑳ ᐃᔑ ᑭᔅᑭᓄᐊᒫᑫᑦ ᙭᙮ 9ᐌᓴ ᐎᓚ ᐎᔭᐎᔥᑳᑯ ᐁ ᐃᔑ ᒫᒪᐌᓕᑖᑾᓂᓕᒃ ᑭᒋᒪᓂᑐ ᐅᑦ ᐃᑌᓕᑖᑯᓯᐎᓐ᙮ 10ᑭᓚᐗᐤ ᒫᑲ ᑭ ᒥᑐᓂᐎᓯᓇᐗᐤ ᐎᔭᐎᒃ, ᐊᓇ ᑳ ᑎᐯᓕᑕᒃ ᒥᓯᐌ ᑎᐯᓕᒋᑫᐎᓂᓕᐤ ᓀᔥᑕ ᑲᔥᑭᐅᐎᓂᓕᐤ:
11ᐊᓇ ᑭᓚᐗᐤ ᓀᔥᑕ ᑳ ᐅᒋ ᑭᔅᑭᓄᐙᒋᔓᑲᐎᔦᒃ ᐊᓂᒪ ᑭᔅᑭᓄᐙᒋᔓᐎᓐ ᐅᒋ ᐁᑳ ᒥᒋᒋᔭ ᑳ ᐅᒋ ᐅᔑᑖᓂᐗᒃ, ᐁ ᐃᑲᑌᔅᑖᔦᒃ ᐁ ᐎᔭᐎᒪᑲᑭ ᐎᔮᓯᐎᓂ ᒪᒋᑣᐎᓇ, ᐅ ᑭᔅᑭᓄᐙᒋᔔᐃᓐ ᙭ ᐅᒋ: 12ᐁ ᐎᒋᓇᐃᑳᑲᐎᒣᒃ ᓯᑲᐋᑖᑫᐎᓂᒃ, ᐃᑕ ᓀᔥᑕ ᐁ ᑮ ᐎᒋᐗᓂᔥᑳᒣᒃ, ᐁ ᑖᐺᔦᓕᑕᒬᒃ ᑭᒋᒪᓂᑐ ᐅ ᑐᑕᒧᐎᓐ, ᑳ ᑮ ᐗᓂᔥᑳᓈᑦ ᐅᓂᐱᐗ ᐅᒋ᙮ 13ᑭᓚᐗᐤ ᒫᑲ, ᐁ ᑮ ᓂᐱᔦᒃ ᑭ ᒪᒋᑣᐎᓂᐙᒃ, ᓀᔥᑕ ᐁᑳ ᐁ ᑮ ᑭᔅᑭᓄᐙᒋᔑᑳᑌᒃ ᑭ ᐎᔮᓯᐗᐤ, ᐊᓯᒋ ᐎᓚ ᑭ ᑮ ᐱᒫᑎᓯᐃᑯᐗᐧ, ᐁ ᑮ ᐌᐯᓕᑕᒫᑖᒃ ᒥᓯᐌ ᐗᓂᑐᑕᒧᐎᓇ; 14ᐁ ᑮ ᑳᓯᐊᒃ ᐊᓂᒪ ᒥᒋᒋᐎ ᒪᓯᓇᐃᑫᐎᓐ ᐊᓂᐃ ᐃᑕᔓᐌᐎᓇ ᑳ ᑮ ᐸᑲᒥᔅᑳᑯᔭᒃ ᐊᓂᒪ ᑳ ᑮ ᑭᐱᔥᑳᑯᔭᒃ, ᒣᔅᑲᓈᒃ ᒫᑲ ᐁ ᑮ ᐅᒋ ᐃᑲᑌᓇᒃ, ᐁ ᑮ ᒋᔅᑖᔅᒀᑕᒃ ᐅᑦ ᐋᔑᑌᐋᑎᑯᒥᒃ; 15ᐁ ᑮ ᐃᑲᑌᓇᒃ ᒫᑲ ᒥᓯᐌ ᑎᐯᓕᒋᑫᐎᓇ ᓀᔥᑕ ᑲᔥᑭᐅᐎᓇ, ᒧᔐ ᐁ ᓄᑯᑖᑦ, ᐎᓚ ᑫᒋᐙᒃ ᐁ ᑮ ᔖᑯᒋᑖᑦ᙮
16ᐁᑳᐎᓚ ᒫᑲ ᐊᐌᓇ ᐃᓕᓕᐤ ᑭ ᑳ ᑎᐹᔅᑯᓂᑯᐗᐤ ᒥᒋᓱᐎᓂᒃ, ᓀᔥᑕᐱᑯ ᒥᓂᑴᐎᓂᒃ, ᓀᔥᑕᐱᑯ ᐸᓓᑭ ᑭᔑᑳᐤ ᐅᒋ, ᓀᔥᑕᐱᑯ ᐅᔥᑭ ᐱᓯᒻ ᐅᒋ, ᓀᔥᑕᐱᑯ ᐋᓜᐱᐎ ᑭᔑᑲᐗ ᐅᒋ: 17ᐁᐗᑯ ᐱᑯ ᐁᑎᑳᔅᑌᑎᑭ ᐁᔥᑾ ᑫ ᐅᑎᒋᐸᓕᑭ; ᒫᑲ ᒥᔭᐤ ᑎᐱᓚᐌᐎᓯᐤ ᙭᙮ 18ᐁᑳᐎᓚ ᐊᐌᓇ ᐃᓕᓕᐤ ᑭ ᑳ ᐙᔦᔑᒥᑯᐗᐤ ᑭ ᑎᐸᐊᒫᑯᓯᐎᓂᐗᐤ, ᐃᑌᓕᑕᒪᐎ ᑕᐸᑌᓕᒥᑎᓱᐎᓂᒃ, ᓀᔥᑕ ᐁ ᓇᐗᑮᔅᑕᐙᒋᒃ ᐁᓐᒐᓚ, ᐁ ᑭᔅᑫᓕᑕᒥᑳᓱᑦ ᐊᓂᐃ ᐁᑳ ᑳ ᑮ ᐙᐸᑕᒃ, ᐸᑾᓐᑕᐤ ᐁ ᑭᔅᑌᓕᒧᐃᑯᑦ ᐅ ᐎᔮᓯᐎ ᒥᑐᓀᓕᒋᑲᓐ, 19ᐁᑳ ᒫᑲ ᐁ ᒥᒋᒥᓇᒃ ᒥᔅᑎᒀᓐ, ᐊᓂᒪ ᐅᒋ ᒥᓯᐌ ᒥᔭᐤ ᐋᓂᔅᑲᐎᑲᓇᓇ ᐅᒋ ᓀᔥᑕ ᐸᔅᑫᓯᐎᓇ ᐁ ᐊᓯᒋᑳᑌᒃ, ᓀᔥᑕ ᐁ ᒪᒪᐎᐱᒋᑳᑌᒃ, ᓚᑭᐸᓕᐤ ᑭᒋᒪᓂᑐ ᐅ ᓚᑭᐃᐌᐎᓐ ᐅᒋ᙮
ᐁ ᐃᔑ ᓂᐱᔭᒃ ᓀᔥᑕ ᐁ ᐃᔑ ᐎᒋᐱᒫᑎᓯᔦᒃ ᙭
20ᐁᐗᑯ ᐅᒋ, ᑮᔥᐱᓐ ᑮ ᐎᒋᓂᐱᒣᒃ ᙭ ᐊᔅᑭᐎ ᓂᔥᑕᒻ ᑭᔅᑭᓄᐊᒫᑫᐎᓇ ᐅᒋ, ᑖᓀᑭ ᐌᒋ, ᑖᐱᔅᑯᒡ ᐁ ᐱᒫᑎᓯᔦᒃ ᐊᔅᑮᒃ, ᑎᐯᓕᒥᑯᔦᒃ ᐃᑕᔓᐌᐎᓇ, 21(ᐁᑳᐎᓚ ᓴᒥᓇᒧᒃ, ᐁᑳᐃᓚ ᑯᒋᔅᑕᒧᒃ, ᐁᑳᐎᓚ ᒥᒋᒥᓇᒧᒃ, 22ᒥᓯᐌ ᑫ ᓂᔑᐗᓈᑕᑭ ᐁ ᐋᐸᒋᑖᓂᐗᑭ,) ᑳ ᐃᑕᔅᑌᓕᑭ ᐅ ᑲᑫᔅᑴᐎᓂᐗᐗ ᓀᔥᑕ ᐅ ᑭᔅᑭᓄᐊᒫᑫᐎᓂᐗᐗ ᐃᓕᓕᐗᒃ? 23ᐊᓂᐃ ᑖᐺ ᐃᔑᓈᑾᓋ ᑖᐱᔅᑯᒡ ᑲᑫᑕᐌᓕᑕᒧᐎᓐ, ᐃᑌᓕᑕᒧᐎ ᐋᔭᒥᐋᐎᓂᒃ, ᓀᔥᑕ ᑕᐸᑌᓕᒥᑎᓱᐎᓂᒃ, ᓀᔥᑕ ᐁᑳ ᐁ ᒪᓈᒋᑖᓂᐗᒃ ᒥᔭᐤ; ᓇᒪᐎᓚ ᐁ ᑭᔅᑌᓕᒋᑳᑌᒃ ᑭᒋ ᑌᐯᓕᒋᑳᑌᒃ ᐎᔮᔅ᙮
Currently Selected:
ᑯᓚᔑᔭᓇ 2: MCNT91
Highlight
Share
Copy
Want to have your highlights saved across all your devices? Sign up or sign in
The text of the Bible in Moose Cree is in the public domain.
Moose Cree New Testament © Canadian Bible Society, 1991.