ᕈᒪᓇ 15
15
ᐁᑳᐎᓚ ᐐ ᓇᐃᓚᐌᐃᑎᓱᔭᓐ, ᒫᑲ ᓇᐃᓚᐌᐃᒃ ᑯᑕᑭᔭᒃ
1ᑭᓚᓈᓇᐤ ᒫᑲ ᑳ ᒪᔥᑲᐎᓯᔭᒃ ᑭ ᑳ ᓇᔭᑕᒸᑕᓇᐤ ᐅᑦ ᐊᓕᒥᓯᐎᓂᐗᐗ ᐊᓂᑭ ᑳ ᓕᓚᒥᓯᒋᒃ, ᓇᒪᐎᓚ ᑭᒋ ᓇᐃᓚᐌᐃᑎᓱᔭᒃ᙮ 2ᐁᑯᔑ ᒥᓯᐌ ᑕᑐ ᐊᐌᓇ ᐁ ᐃᑕᔑᔭᒃ ᑲᑕ ᓂᐃᓚᐌᐁᐤ ᐎᒋᐃᓕᓕᐗ ᑭᒋ ᐃᔑ ᒥᓗᑭᔅᑭᓄᐊᒫᑯᐎᓯᓕᒋ᙮ 3ᐌᓴ ᐙᐙᒡ ᙭ ᓇᒪᐎᓚ ᑮ ᓇᐃᓚᐌᐃᑎᓱ; ᒫᑲ, ᐁ ᐃᑕᓯᓇᐃᑳᑌᒃ, ᐅ ᑭᑐᔑᐌᐎᓂᐗᐗ ᐊᓂᑭ ᑳ ᑮ ᑭᑐᑎᔅᑭᒃ ᓂ ᑮ ᐸᑲᒥᔅᑳᑯᐙᓐ᙮ 4ᐌᓴ ᑫᒀᓇ ᑳ ᑮ ᒪᓯᓇᐃᑳᑌᑭ ᐌᔅᑲᒡ ᑮ ᒪᓯᓇᐃᑳᑌᐗ ᑭᓚᓈᓇᐤ ᑭᒋ ᑭᔅᑫᓕᑕᒪᒃ, ᑭᓚᓈᓇᐤ ᔑᐱᓚᐌᓯᐎᓂᒃ ᐅᒋ, ᓀᔥᑕ ᐁ ᒥᓜᓕᒧᐃᑯᔭᒃ ᑭᒋ ᒪᓯᓇᐃᑫᐎᓇ, ᑭᒋ ᐅᒋ ᐋᔮᔭᒃ ᐊᔅᐯᓕᒧᐎᓐ᙮ 5ᐁᑯ ᑭᒋᒪᓂᑐ ᑳ ᑎᐯᓕᑕᒃ ᔑᐱᓚᐌᓯᐎᓂᓕᐤ ᓀᔥᑕ ᑳᑭᒋᐃᐌᐎᓂᓕᐤ ᑭ ᑳ ᐎ ᒥᓕᑯᐗᐤ ᒣᒥᔅᑯᒃ ᑭᒋ ᒥᓗᐃᑌᓕᒥᑐᔦᒃ ᑳ ᐃᔑ ᑭᔅᑭᓄᐊᒫᑫᑦ ᙭ ᒋᓴᔅ: 6ᐯᔭᑯ ᒥᑐᓀᓕᒋᑲᓂᒃ ᓀᔥᑕ ᐯᔭᑯ ᒥᑐᓂᒃ ᑭᒋ ᐅᒋ ᒫᒥᒋᒣᒃ ᑭᒋᒪᓂᑐ, ᐅᑖᐎᔭ ᐅᑎ ᑭ ᑎᐯᓕᒋᑫᒥᓇᐤ ᒋᓴᔅ ᙭᙮
ᒥᓗᐙᒋᒧᐎᓐ ᐎᑕᒪᐙᑲᓂᐎᐗᒃ ᒉᓐᑖᐃᓚᒃ
7ᐁᐗᑯ ᐅᒋ ᒣᒦᔅᑯᒡ ᐅᑎᓂᑐᒃ, ᑖᐱᔅᑯᒡ ᙭ ᓀᔥᑕ ᑳ ᑮ ᐅᑎᓂᑕᒃ ᑭᒋ ᐅᒋ ᑭᔅᑖᒋᒫᑲᓂᐎᑦ ᑭᒋᒪᓂᑐ᙮ 8ᓂᑦ ᐃᑣᓐ ᒫᑲ ᒋᓴᔅ ᙭ ᐁ ᑮ ᐊᑑᔅᑫᔅᑕᒃ ᑭᔅᑭᓄᐙᒋᔓᐎᓂᓕᐤ ᐅ ᑖᐺᐎᓐ ᑭᒋᒪᓂᑐ ᐅᒋ, ᑭᒋ ᐋᔨᒋᑖᓂᐗᑭ ᐊᓂᐃ ᐊᔓᑕᒫᑫᐎᓇ ᑳ ᑮ ᐊᔓᑕᒫᒋᒃ ᐅᑖᐎᒪᐗᒃ: 9ᓀᔥᑕ ᒉᑣᐃᓚᒃ ᐅ ᔕᐌᓕᒋᑫᐎᓂᓕᐤ ᑭᒋ ᐅᒋ ᒫᒥᒋᒫᒋᒃ ᑭᒋᒪᓂᑐᐗ; ᐁ ᐃᑕᓯᓇᐃᑳᑌᒃ, ᐅᒪ ᑭ ᑳ ᐅᒋ ᐋᓕᒧᒥᑎᓐ ᐃᑕ ᐁ ᐃᑖᒋᒃ ᒉᓐᑖᐃᓚᒃ, ᓀᔥᑕ ᓂ ᑳ ᓂᑲᒧᔅᑌᓐ ᑭᑦ ᐃᔑᓂᑳᓱᐎᓐ᙮ 10ᒥᓇ ᒫᑲ ᐃᑗᐤ, ᒥᓚᐙᑕᒧᒃ, ᑭᓚᐗᐤ ᒉᓐᑖᐃᓕᑐᒃ, ᐊᓯᒋ ᐅᑦ ᐃᓕᓕᒪ᙮ 11ᒥᓇ ᒫᑲ, ᒫᒥᒋᒥᒃ ᐅᑎᐯᓕᒋᑫᐤ, ᒥᓯᐌ ᑭᓚᐗᐤ ᒉᓐᑖᐃᓕᑐᒃ: ᓀᔥᑕ ᑭᔅᑖᒋᒥᒃ ᒥᓯᐌ ᑭᓚᐗᐤ ᐃᓕᓕᑐᒃ᙮ 12ᒥᓇ ᒫᑲ ᐋᐃᓭᔭ ᐃᑗᐤ, ᐅᒉᐱᒃ ᒉᓯᒃ ᑲᑕ ᐅᒋᐸᓕᐤ, ᐊᓇ ᒫᑲ ᑫ ᑕᑯᔑᒃ ᑭᒋ ᑎᐯᓕᒫᑦ ᐊᓂᐃ ᒉᓐᑖᐃᓚ, ᐁᐗᒀᓇ ᑫ ᐊᔅᐯᓕᒧᑕᒫᑯᑦ ᒉᓐᑖᐃᓚ᙮
13ᐁᑯ ᑭᒋᒪᓂᑐ ᑳ ᑎᐯᓕᑕᒃ ᐊᔅᐯᓕᒧᐎᓂᓕᐤ ᑭ ᑳ ᐎ ᓵᑲᔅᑭᓇᐃᑯᐗᐤ ᒥᓯᐌ ᒥᓚᐙᑕᒧᐎᓂᓕᐤ ᓀᔥᑕ ᑳᔮᒣᓕᑕᒧᐎᓂᓕᐤ ᐁ ᑖᐺᑕᒣᒃ, ᑭᒋ ᐌᓗᑎᓯᔦᒃ ᐊᔅᐯᓕᒧᐎᓐ, ᑳ ᐸᓓᑭᓯᑦ ᐊᒑᒃ ᐅ ᓱᑳᑎᓯᐎᓐ ᐅᒋ᙮
ᑄᓪ ᐎᑕᒻ ᑫᒀᓐ ᐌᒋ ᒪᓯᓇᐃᑫᑦ ᓈᔅᐱᒡ ᐁ ᓲᑫᓕᒧᑦ
14ᓂᓚ ᓀᔥᑕ ᓂ ᑫᒋᓇᐅᓐ ᐁ ᐃᑌᓕᒥᑖᑾᒃ, ᓂᒋᔖᓂᑐᒃ, ᑭᓚᐗᐤ ᓀᔥᑕ ᐁ ᓵᑲᔅᑭᓀᔅᑳᑯᔦᒃ ᒥᓨᑎᓯᐎᓐ, ᐁ ᓵᑲᔅᑭᓀᔅᑳᑯᔦᒃ ᒥᓯᐌ ᑭᔅᑫᓕᑕᒧᐎᓐ, ᐁ ᑲᔥᑭᑖᔦᒃ ᓀᔥᑕ ᑭᒋ ᑲᑫᔅᑭᒥᑐᔦᒃ᙮ 15ᐁᓕᐌᒃ ᒫᑲ, ᓂᒋᔖᓂᑕᒃ, ᐊᐙᓯᑌ ᑭ ᑮ ᓱᑭᑌᐁᐎ ᒪᓯᓇᐊᒫᑎᓇᐗᐤ, ᑭᒋ ᐃᔑ ᑭᔅᑭᓯᐃᑕᑾᒃ, ᐊᓂᒪ ᔕᐌᓕᒋᑫᐎᓐ ᐅᒋ ᑳ ᑮ ᒥᓕᑦ ᑭᒋᒪᓂᑐ᙮ 16ᑭᒋ ᐋᔭᒥᐙᐎ ᐅᑦ ᐊᑑᔅᑫᓛᑲᓂᒥᑦ ᒋᓴᔅ ᙭ ᐁ ᑮ ᐋᔭᒥᐊᑭᒃ ᒉᓐᑖᐃᓚᒃ, ᐁ ᒫᑎᓇᒶᒃ ᐅ ᒥᓗᐋᒋᒧᐎᓐ ᑭᒋᒪᓂᑐ, ᐁ ᐸᑭᑎᓈᑲᓂᐎᒋᒃ ᒉᓐᑖᐃᓚᒃ ᑭᒋ ᓇᐁᓕᑖᑾᓂᓕᒃ, ᐁ ᑮ ᐸᓓᑭᐋᑲᓂᐎᒋᒃ ᐸᓓᑭ ᐊᒑᑾ ᐅᒋ᙮ 17ᓂᑦ ᐋᔮᓐ ᒫᑲ ᐊᓂᒪ ᑫ ᐅᒋ ᒫᒪᑖᑯᒧᔮᓐ ᒋᓴᔅ ᙭ ᐅᒋ ᐅᐅ ᑫᒀᓇ ᐅᒋ ᑳ ᐅᑦ ᐋᔮᓂᑦ ᑭᒋᒪᓂᑐ᙮ 18ᐌᓴ ᓇᒪᐎᓚ ᓂ ᑳ ᐃᔅᐱᒋ ᓱᑭᑌᐋᓐ ᑭᒋ ᐋᓕᒧᑕᒫᓐ ᐊᓂᐃ ᑫᒀᓇ ᐁᑳ ᙭ ᑳ ᑭ ᑐᑕᒃ ᓂᓚ ᐅᒋ, ᑭᒋ ᑐᑕᐙᑲᓂᐎᒋᒃ ᒉᓐᑖᐃᓚᒃ ᑭᒋ ᓇᓇᐃᑕᑭᒃ, ᐋᔭᒥᐎᓂᒃ ᓀᔥᑕ ᑐᑕᒧᐎᓂᒃ᙮ 19ᑭᒋ ᒫᒪᑖᐎ ᐃᓯᒋᑫᐎᓇ ᐅᒋ ᓀᔥᑕ ᒥᐋᒥᔅᑳᑌᓕᑖᑾᑭ, ᐅ ᑲᔥᑭᐅᐎᓂᓕᒃ ᐅᑦ ᐊᒑᑾ ᑭᒋᒪᓂᑐ; ᓀᔥᑕ ᒫᑲ ᒋᕉᓴᓚᒥᒃ ᐅᒋ, ᓀᔥᑕ ᒥᓯᐌ ᐙᔅᑲ ᐃᓕᕆᑲᒥᒃ ᐃᔅᑯ, ᒥᑐᓂ ᓂ ᑮ ᐙᐎᑕᒸᓐ ᐅ ᒥᓗᐋᒋᒧᐎᓐ ᙭᙮ 20ᐁᐁ, ᑳ ᑮ ᐃᔑ ᑯᒋᑖᔮᓐ ᑭᒋ ᐙᐎᑕᒫᓇ ᒥᓗᐋᒋᒧᐎᓐ, ᓇᒪᐎᓚ ᐃᑕ ᐋᔕᔾ ᐁ ᑮ ᐎᒋᑳᑌᓕᒃ ᙭ ᐅ ᒥᓗᐋᒋᒧᐎᓐ, ᐌᓴ ᒫᔅᑯᒡ ᓂ ᑳ ᐙᔅᑲᔨᑳᑖᔾ ᑯᑕᒃ ᐃᓕᓕᐤ ᐅᑦ ᐅᓚᔅᑕᒋᑲᓂᒃ: 21ᒫᑲ ᐁ ᐃᑕᓯᓇᐃᑳᑌᒃ, ᐊᓂᑭ ᐁᑳ ᑳ ᑮ ᐋᓕᒧᑕᒧᐙᑲᓂᐎᒋᒃ, ᑲᑕ ᐙᐸᑕᒶᒃ: ᐊᓂᑭ ᓀᔥᑕ ᐁᑳ ᑳ ᑮ ᐯᑕᑭᒃ ᑲᑕ ᓂᓯᑐᑕᒶᒃ᙮
ᐹᓪ ᐃᑌᓕᑕᒻ ᒋ ᑭᐗᑌᑦ ᕈᒥᒃ
22ᐁᐗᑯ ᐅᒋ ᓀᔥᑕ ᒥᒉᑡᐤ ᓂ ᑮ ᐅᑕᒥᐃᑳᐎᓐ ᐁ ᐎ ᐯᒋ ᓈᑎᑕᑾᒃ᙮ 23ᒫᑲ ᐁᑯ ᐁᑳ ᐙᔦᔥ ᐁ ᐋᔮᔮᓐ ᐅᑕ ᐃᑌᑫ, ᓀᔥᑕ ᒥᒉᑦ ᐱᐴᓋ ᓈᔅᐱᒡ ᐁ ᑮ ᓇᑕᐌᓕᑕᒫᓐ ᑭᒋ ᓈᑎᑕᑾᒃ; 24ᐃᔅᐱ ᐃᑐᑌᔮᓀ ᔅᐯᓂᒃ, ᑭ ᑳ ᓈᑎᑎᓇᐗᐤ: ᐌᓴ ᓂ ᐸᑯᓭᓕᒧᓐ ᑭᒋ ᐙᐸᒥᑕᑾᒃ ᓂ ᐱᒥᐱᒋᐎᓂᒃ, ᓀᔥᑕ ᐊᓐᑕ ᐃᔑ ᑭᓚᐗᐤ ᑭᒋ ᐃᑐᑕᐃᔦᒃ, ᑮᔥᐱᓐ ᓃᔥᑕᒻ ᒫᓐᔑᔥ ᐎᒋᑕᔑᑫᒥᑕᑾᒃ᙮ 25ᒫᑲ ᐊᓄᒡ ᓂᑦ ᐃᑐᑖᓐ ᒋᕉᓴᓚᒥᒃ ᑭᒋ ᐅᒌᔅᑕᒪᑄᑭᒃ ᐅᐸᓓᑭᓯᐗᒃ᙮ 26ᐌᓴ ᑮ ᐃᔑ ᒥᓜᓕᑕᒶᒃ ᐊᓂᑭ ᒫᓯᑐᓂᔭᐃᒃ ᓀᔥᑕ ᐊᑳᔭᐃᒃ ᑭᒋ ᒫᒪᐎ ᒥᓕᐌᐎᓂᑫᒋᒃ ᐊᓂᐃ ᑭᑎᒫᑭᓯᐎ ᐅᐸᓓᑭᓯᐗ ᒋᕉᓴᓚᒥᒃ ᑳ ᐃᑖᓕᒋ ᐅᒋ᙮ 27ᑖᐺ ᑮ ᐃᔑ ᒥᓜᓕᑕᒶᒃ; ᐅᐅ ᐁ ᑮ ᒪᓯᓇᐃᑫᔅᑕᐙᒋᒃ᙮ ᐌᓴ ᑮᔥᐱᓐ ᒉᓐᑖᐃᓚᒃ ᑮ ᒥᓛᑲᓂᐎᐗᒃ ᑭᒋ ᑭᑭ ᐋᔮᒋᒃ ᐅᑦ ᐊᒑᑯᐎ ᐋᔮᓂᓕᐗ, ᐎᓚᐗᐤ ᓀᔥᑕ ᑲᑕ ᐅᒋᔅᑕᒪᐙᐗᔅᐸᓐ ᐎᔮᓯᐎ ᑫᒀᓇ᙮ 28ᐃᔅᐱ ᒫᑲ ᐅᒪ ᑮ ᑎᐱᑐᑕᒫᓀ, ᓀᔥᑕ ᑮ ᐅᑎᓇᒶᒃ ᐅᒪ ᑳ ᐃᔑ ᒥᓂᔑᐎᒋᒃ, ᑭ ᑳ ᓈᑎᑎᓇᐗᐤ ᐁ ᐊᑎ ᐃᑐᑌᔮᓐ ᔅᐯᓂᒃ᙮ 29ᐌᓴ ᓂ ᑫᒋᓇᐅᓐ, ᐃᔅᐱ ᐯᒋ ᐅᑎᑎᑕᑾᐗ, ᓂ ᑳ ᑕᑯᔑᓂᓐ ᐁ ᐃᔑ ᑭᔅᑌᓕᑖᑯᓯᐎ ᔕᐌᓕᑖᑾᓂᓕᒃ ᐅ ᒥᓗᐋᒋᒧᐎᓐ ᙭᙮
30ᑭ ᐸᑯᓭᓕᒥᑎᓇᐗᐤ ᒫᑲ, ᓂᒋᔖᓂᑐᒃ, ᐎᓚ ᐅᒋ ᐅᑎᐯᓕᒋᑫᐤ ᒋᓴᔅ ᙭, ᓀᔥᑕ ᐅ ᓵᑭᐃᐌᐎᓐ ᐅᒋ ᐊᒑᒃ, ᓱᑲ ᑭᒋ ᒫᒪᐎ ᐎᒋᐃᔦᒃ ᐁ ᐋᔭᒥᐁᔅᑕᐌᒃ ᑭᒋᒪᓂᑐ ᓂᓚ ᐅᒋ᙮ 31ᑭᒋ ᐅᒋ ᐎᑾᒋᐃᑲᐎᔮᓐ ᐊᓂᑭ ᐁᑳ ᑳ ᑖᐺᔦᓕᑕᑭᒃ ᒎᑎᐊᐃᒃ ᑳ ᐃᑖᒋᒃ; ᓀᔥᑕ ᐊᓂᒪ ᐊᑑᔅᑫᐎᓐ ᑳ ᐋᔮᔮᓐ ᒋᕉᓴᓚᒻ ᐅᒋ ᑭᒋ ᐎ ᐅᑎᓇᑭᒃ ᐅᐸᓓᑭᓱᐗᒃ; 32ᑭᒋ ᐯᒋ ᓈᑎᑕᑾᒃ ᒥᓕᐙᑕᒧᐎᓂᒃ ᐁ ᐃᑌᓕᑕᒃ ᑭᒋᒪᓂᑐ, ᑭᒋ ᒥᓜᓕᒧᐃᑳᐎᔮᓐ ᐊᓯᒋ ᑭᓚᐗᐤ᙮ 33ᐁᑯ ᑭᒋᒪᓂᑐ ᑳᔮᒣᓕᑕᒧᐎᓕᓕᐤ ᑳ ᑎᐯᓕᑕᒃ ᑭ ᑳ ᐎ ᐎᒉᐎᑯᐗᓇᐗᐤ ᒥᓯᐌ ᐁ ᐃᑕᔑᔦᒃ᙮ ᐁᒣᓐ᙮
Currently Selected:
ᕈᒪᓇ 15: MCNT91
Highlight
Copy
Compare
Share
Want to have your highlights saved across all your devices? Sign up or sign in
The text of the Bible in Moose Cree is in the public domain.
Moose Cree New Testament © Canadian Bible Society, 1991.
