ᑭᔅᑫᓕᑖᑯᑖᑫᐎᓐ 4
4
ᐊᓂᑭ ᑭᒋᑭᔑᑯᒃ ᐊᔭᒥᐁᔅᑕᐌᐗᒃ ᑭᒋᒪᓂᑐᐗ
1ᑳ ᐳᓂᐸᓕᒃ ᐅᒪ ᓂ ᑮ ᐃᑖᐱᓐ, ᒫᑎᑲ, ᒫᑲ, ᐃᔥᒀᑌᒻ ᑮ ᐹᔅᑭᑌᓂᑳᑌᐤ ᑭᒋᑭᔑᑯᒃ: ᓃᔥᑕᒻ ᒫᑲ ᐯᑖᑯᓯᐎᓐ ᑳ ᑮ ᐯᑕᒫᓐ ᑮ ᐃᑎᑖᑾᓐ ᑖᐱᔅᑯᒡ ᐳᑖᒋᑲᓐ ᐁ ᐋᔭᒥᐃᑯᔮᓐ, ᑳ ᐃᑗᒪᑲᒃ, ᐯᒋ ᓵᑲᒋᐌ ᐅᑕ, ᑭ ᑳ ᐙᐸᑎᓕᑎᓐ ᒫᑲ ᑫᒀᓇ ᐹᑎᒫ ᑫ ᐃᑭᑭ᙮ 2ᑣᔦᒃ ᒫᑲ ᐊᒑᑯᒃ ᓂ ᑮ ᐃᑖᓐ: ᒫᑎᑲ, ᒫᑲ, ᐅᑭᒪᐗᐱᐎᓐ ᑮ ᐅᓚᔅᑖᓂᐗᓐ ᑭᒋᑭᔑᑯᒃ, ᐯᔭᒃ ᒫᑲ ᑮ ᐊᐱᐤ ᐅᑭᒪᐗᐱᐎᓂᒃ᙮ 3ᐊᓇ ᒫᑲ ᑳ ᐊᐱᑦ ᑮ ᐃᔑᓈᑯᓯᐤ ᑖᐱᔅᑯᒡ ᒑᔅᐸᕐ ᓀᔥᑕ ᓵᕐᑕᐃᓐ ᐊᓯᓂᔭ: ᐎᑯᐯᓵᑲᓐ ᒫᑲ ᑮ ᐃᑕᑾᓐ ᐙᔅᑲ ᐅᑭᒪᐗᐱᐎᓂᒃ, ᐁ ᐃᔑᓈᑾᒃ ᑖᐱᔅᑯᒡ ᐁᒥᕋᓪᑦ ᐊᓯᓂ᙮ 4ᐙᔅᑲ ᒫᑲ ᐅᑭᒪᐗᐱᐎᓂᒃ ᑮ ᐃᑕᑾᓋ ᓂᔑᑕᓇ ᓀᐊᔖᑉ ᓀᔥᑕ ᑌᑕᐱᐎᓇ; ᐊᓂᐃ ᒫᑲ ᑌᑕᐱᐎᓇ ᓂ ᑮ ᐙᐸᒪᐗᒃ ᐁ ᑌᑕᐱᒋᒃ ᓂᔑᑕᓇ ᓀᐊᔖᑉ ᓀᔥᑕ ᑳ ᓂᑳᓀᓕᑖᑯᓯᒋᒃ, ᐁ ᐙᐱᐅᒋᒃ, ᑮ ᑭᑭᔥᑲᒶᒃ ᒫᑲ ᐅᔅᑎᒀᓂᐙᒃ ᐅᓵᐎᔔᓕᐊᓈᐱᔉ ᐅᑭᒪᐗᔅᑐᑎᓋ᙮ 5ᐅᑭᒪᐗᐱᐎᓂᒃ ᒫᑲ ᑮ ᐅᒋᐸᓕᐗ ᐁ ᐙᔅᑌᐸᓕᑭ, ᓀᔥᑕ ᐅᓂᒥᔅᑭᐗᒃ, ᓀᔥᑕ ᐯᑖᑯᓯᐎᓇ: ᑮ ᐃᑕᑾᓋ ᓀᔥᑕ ᓂᔂᔅ ᐃᔥᑯᑌᐎ ᐙᔅᑌᓇᒫᑲᓇ ᐁ ᐸᓯᑌᑭ ᐅᑎᔥᑲᐤ ᐅᑭᒪᐗᐱᐎᓂᒃ, ᐁᐗᒀᓂᐃ ᑭ ᒪᓂᑐ ᐅᑦ ᐊᒑᑾ ᑳ ᓂᔂᓯᓕᒋ᙮ 6ᐅᑎᔥᑲᐤ ᒫᑲ ᐅᑭᒪᐗᐱᐎᓂᒃ ᑮ ᐃᑕᑾᓐ ᐙᓭᓂᑖᑲᓂᐎ ᑭᒋᑲᒥ ᑖᐱᔅᑯᒡ ᒪᔅᑾᒥ:
ᑌᑖᐎᒡ ᒫᑲ ᐅᑭᒪᐗᐱᐎᓂᒃ, ᓀᔥᑕ ᐙᔅᑲ ᐅᑭᒪᐗᐱᐎᓂᒃ ᑮ ᐃᑖᐗᒃ ᓀᐤ ᐅᐱᒫᑎᓴᒃ, ᒥᓯᐌ ᐁ ᐅᔅᑭᔑᑯᒋᒃ ᓃᔅᑖᒥᒃ ᓀᔥᑕ ᐅᑖᓈᒃ᙮ 7ᐊᓇ ᓃᔥᑕᒻ ᐅᐱᒫᑎᔅ ᑮ ᓇᔅᐱᑕᐌᐤ ᒥᔑᐱᔑᐗ, ᐊᓇ ᓂᔓ ᐅᐱᒫᑎᔅ ᒫᑲ ᑮ ᓇᔅᐱᑕᐌᐤ ᒥᑐᔑᔕ, ᐊᓇ ᓂᔅᑐ ᐅᐱᒫᑎᔅ ᒫᑲ ᑮ ᐅᑖᔅᑕᒥᑯ ᑖᐱᔅᑯᒡ ᓈᐯᐗ, ᐊᓇ ᓀᐤ ᐅᐱᒫᑎᔅ ᒫᑲ ᑮ ᓇᔅᐱᑕᐌᐤ ᐁ ᐱᒥᓛᓕᒋ ᒥᑭᓯᐗ᙮ 8ᐊᓂᑭ ᓀᐤ ᐅᐱᒫᑎᓴᒃ ᒫᑲ ᑕᑐ ᐁ ᐃᑕᓯᒋᒃ ᓂᑯᑣᔅ ᑮ ᑕᑎᓂᓕᐗ ᐅ ᑕᑲᑾᓇ; ᐱᒋ ᒫᑲ ᒥᓯᐌ ᑮ ᐅᔅᑭᔑᑯᐗᒃ: ᓇᒪᐎᓚ ᒫᑲ ᐋᓜᓯᐗᒃ ᐁ ᑭᔑᑳᓕᒃ ᓀᔥᑕ ᐁ ᑎᐱᔅᑳᓕᒃ, ᐁ ᐃᑗᒋᒃ, ᐯᓓᑭᓯᑦ, ᐯᓓᑭᓯᑦ, ᐯᓓᑭᓯᑦ, ᐅᑎᐯᓕᒋᑫᐤ ᑭᒋᒪᓂᑐ ᒥᓯᐌ ᓯᔪᑳᑎᓰᑦ, ᑳ ᑮ ᐃᑖᑦ, ᑳ ᐃᑖᑦ, ᓀᔥᑕ ᑫ ᐃᑖᑦ᙮
9ᐃᔅᐱ ᒫᑲ ᐅᑯ ᐅᐱᒫᑎᓴᒃ ᑮ ᒫᒥᒋᒫᒋᒃ ᓀᔥᑕ ᑭᔅᑖᒋᒫᒋᒃ ᓀᔥᑕ ᓇᓈᔅᑯᒫᒋᒃ ᐊᓂᐃ ᑳ ᐊᐱᓕᒋ ᐅᑭᒪᐗᐱᐎᓂᒃ, ᑳ ᐱᒫᑎᓯᓕᒋ ᑳᑭᑫ ᓀᔥᑕ ᑳᑭᑫ; 10ᐊᓂᑭ ᓂᔑᑕᓇ ᓀᐅᔖᑉ ᓀᔥᑕ ᑳ ᓂᑳᓀᓕᑖᑯᓯᒋᒃ ᐸᑭᔑᓃᔅᑕᐌᐗᒃ ᐊᓂᐃ ᑳ ᐊᐱᓕᒋ ᐅᑭᒪᐗᐱᐎᓂᒃ, ᓇᐗᑮᔅᑕᐌᐗᑳ ᒫᑲ ᐊᓂᐃ ᑳ ᐱᒫᑎᓯᓕᒋ ᑳᑭᑫ ᓀᔥᑕ ᑳᑭᑫ, ᐌᐱᓇᒶᒃ ᒫᑲ ᐅᑦ ᐅᑭᒪᐗᔅᑐᑎᓂᐙᐗ ᐅᑎᔥᑲᐤ ᐅᑭᒫᐗᐱᐎᓂᒃ, ᐁ ᐃᑗᒋᒃ, 11ᑮ ᑌᐸᑫᓕᑖᑯᓯᓐ, ᐅ ᑌᐯᓕᒋᑫᔭᓐ, ᑭᒋ ᒥᓕᑲᐎᔭᓐ ᒫᒥᒋᒥᑯᓯᐎᓈ ᓀᔥᑕ ᑭᔅᑖᒋᒥᑯᓯᐎᐤ ᓀᔥᑕ ᑲᔥᑭᐅᐎᓐ: ᐌᓴ ᑭ ᑮ ᐅᔑᑖᓐ ᒥᓯᐌ ᑫᒀᓇ, ᓀᔥᑕ ᐁ ᐃᔑ ᒥᓜᓕᑕᒪᓐ ᐅᒋ ᐃᑕᑾᓋ ᓀᔥᑕ ᑮ ᐅᔑᒋᑳᑌᐗ᙮
Currently Selected:
ᑭᔅᑫᓕᑖᑯᑖᑫᐎᓐ 4: MCNT91
Highlight
Share
Copy
Want to have your highlights saved across all your devices? Sign up or sign in
The text of the Bible in Moose Cree is in the public domain.
Moose Cree New Testament © Canadian Bible Society, 1991.