ᑭᔅᑫᓕᑖᑯᑖᑫᐎᓐ 2
2
ᐊᓂᑭ ᑖᐺᑕᒧᐗᒃ ᐁᐱᓯᒃ ᒥᓛᑲᓂᐙᓄᒃ ᑎᐹᒋᒧᐎᓂᓕᐤ
1ᐊᓇ ᐁᓐᒐᓪ ᑳ ᑎᐯᓕᒫᑦ ᒫᒪᐎᐋᔭᒥᐋᐗ ᐁᐱᓴᓯᒃ ᒪᓯᓇᐊᒪᐤ:
ᐅᐅ ᑫᒀᓇ ᐃᑗᐤ ᐊᓇ ᑳ ᒥᒋᒥᓈᑦ ᐊᓂᐃ ᓂᔂᔅ ᐊᒐᑾ ᐅ ᑭᒋᓂᔅᑮᒃ, ᑳ ᐱᒧᑌᑦ ᒣᑴᔭᔥ ᐊᓂᐃ ᓂᔂᔅ ᐅᓵᐎᔔᓕᐋᓈᐱᔉ ᐙᔅᑌᓇᒫᑲᓈᑎᑾ; 2ᓂ ᑭᔅᑫᓕᑌᓐ ᑭᑦ ᐊᑑᔅᑫᐎᓇ, ᓀᔥᑕ ᑭᑦ ᐋᐸᑎᓯᐎᓐ, ᓀᔥᑕ ᑭ ᔑᐱᓚᐌᓯᐎᓐ, ᓀᔥᑕ ᐁᑳ ᐁ ᑮ ᔑᐯᓕᒪᒋᒃ ᐊᓂᑭ ᑳ ᒪᒋᑣᒋᒃ: ᑭ ᑮ ᑲᑴᒋᐋᐗᒃ ᒫᑲ ᐊᓂᑭ ᓂᑦ ᐊᐸᔅᑕᓕᐎᓂᓈᓐ ᑳ ᐃᑗᒋᒃ, ᐁᑳ ᒫᑲ ᐁᐗᑯ ᑳ ᑐᐎᑳᓂᐎᒋᒃ, ᑭ ᑮ ᒥᔅᑲᐙᐗᒃ ᒫᑲ ᐁ ᑭᓛᔅᑭᔅᑭᒋᒃ: 3ᑭ ᑮ ᔑᐯᓕᑌᓐ ᒫᑲ, ᓀᔥᑕ ᑭ ᔑᐱᓚᐌᓯᓐ, ᓀᔥᑕ ᓂᑦ ᐃᔑᓂᑳᓱᐎᓐ ᐅᒋ ᑭ ᑮ ᐊᑑᔅᑳᓐ, ᓇᒪ ᓀᔥᑕ ᑭ ᑮ ᓄᑌᔑᓐ᙮ 4ᐁᓕᐌᒃ ᒫᑲ ᓂᑦ ᐋᔮᓐ ᑫᒀᓐ ᑭᒋ ᒫᒥᔑᒥᑖᑦ, ᐁ ᑮ ᓇᑲᑕᒪᓐ ᑭ ᓃᔥᑕᒻ ᓵᑭᐃᐌᐎᓐ᙮ 5ᐁᐗᑯ ᐅᒋ ᑭᔅᑭᓯ, ᑖᓐᑌ ᑳ ᑭ ᐅᒋ ᐸᑭᔑᓂᔭᓐ, ᓀᔥᑕ ᒥᒋᓚᐌᔦᓕᑕ, ᑐᑕ ᒫᑲ ᐊᓂᐃ ᓃᔥᑕᒻ ᐊᑑᔅᑫᐎᓇ; ᑮᔥᐱᓐ ᒫᑲ ᐁᑳ ᐎᐸᒡ ᑭ ᑳ ᐯᒋ ᓈᑎᑎᓐ, ᓂ ᑳ ᐃᑲᑌᓀᓐ ᒫᑲ ᑭ ᐙᔅᑌᓇᒫᑲᓈᑎᒃ ᐃᑕ ᑳ ᐋᔮᒃ ᐅᒋ, ᑮᔥᐱᓐ ᐁᑳ ᒥᒋᓚᐌᔦᓕᑕᒪᓀ᙮ 6ᒫᑲ ᐅᒪ ᑭᑦ ᐋᔮᓐ, ᐁ ᐸᒀᑕᒶᒋᒃ ᐅᑦ ᐃᓯᒋᑫᐎᓂᐙᐗ ᐊᓂᑭ ᓂᑯᓚᐃᑖᓇᒃ, ᓂᓚ ᐊᓯᒋ ᑳ ᐸᒀᑕᒫᓐ᙮
7ᐊᓇ ᑳ ᐅᑖᐗᑳᑦ, ᐁᑯᔑ ᑲᑕ ᐯᑕᒻ ᐋᒑᒃ ᑳ ᐃᑖᑦ ᒫᒪᐎᐋᔭᒥᐋᐗ;
ᐊᓇ ᑳ ᔖᑯᒋᐃᐌᑦ, ᓂ ᑳ ᒥᓚᐤ ᐱᒫᑎᓯᐎᓂ ᒥᔅᑎᑯᒃ ᑭᒋ ᐅᒋ ᒥᒋᓱᑦ, ᑳ ᐃᑖᓕᒋ ᑌᑖᐎᒡ ᐅ ᐹᕋᑕᐃᓯᒥᒃ ᑭᒋᒪᓂᑐ᙮
ᐊᓂᑭ ᑖᐺᑕᒧᐗᒃ ᔅᒪᕐᓇᐃᒃ ᒥᓛᑲᓂᐗᓄᒃ ᑎᐹᒋᒧᐎᓂᓕᐤ
8ᐊᓇ ᐁᓐᒐᓪ ᒫᑲ ᑳ ᑎᐯᓕᒫᑦ ᒫᒪᐎᐋᔭᒥᐋᐗ ᔅᒪᕐᓇᐃᒃ ᒪᓯᓇᐊᒪᐤ;
ᐅᐅ ᑫᒀᓇ ᐃᑗᐤ ᐊᓇ ᓃᔥᑕᒻ ᓀᔥᑕ ᒫᒋᒡ, ᐊᓇ ᑳ ᑮ ᓂᐱᑦ, ᓀᔥᑕ ᑳ ᐱᒫᑎᓰᑦ: 9ᓂ ᑭᔅᑫᓕᑌᓐ ᑭᑦ ᐊᑑᔅᑫᐎᓇ, ᓀᔥᑕ ᑭᑦ ᐊᓕᒥᓯᐎᓐ, ᓀᔥᑕ ᑭ ᒪᓀᓯᐎᓐ, (ᒫᑲ ᑮ ᒥᔕᑭᓯᓐ,) ᓂ ᑭᔅᑫᓕᑕᒸᓐ ᐅ ᐹᔅᑕᒧᐎᓂᐙᐗ ᐊᓂᑭ ᓂ ᒎᐎᓈᓐ ᑳ ᐃᑗᒋᒃ ᐁᑳ ᒫᑲ ᐁᐗᑯ ᑳ ᑐᐎᑳᓂᐎᒋᒃ, ᒫᑲ ᑳ ᐅᑦ ᐋᔭᒥᐁᐎᑲᒥᒥᑯᒋᒃ ᓭᑕᓇ᙮ 10ᐁᑳᐎᓚ ᑯᔅᑕ ᐊᓂᐃ ᑫᒀᓇ ᑫ ᐃᔑ ᑲᒀᑕᑭᑖᔭᓐ: ᒫᑎᑲ, ᒪᒋᒪᓂᑐ ᐋᑎᑦ ᑭᐸᐅᑐᐎᑲᒥᑯᒃ ᑭ ᑳ ᐃᔑ ᐌᐱᓂᑯᐗᐤ, ᑭᒋ ᑲᑴᒋᐃᑲᐎᔦᒃ; ᓀᔥᑕ ᑭ ᑳ ᐋᔮᓇᐗᐤ ᐊᓕᒥᓯᐎᓐ ᒥᑖᑐ ᑭᔑᑳᐗ: ᒀᔭᔅᑭᑎ ᓂᐱᐎᓂᒃ ᐃᔅᑯ, ᑭ ᑳ ᒥᓕᑎᓐ ᒫᑲ ᐱᒫᑎᓯᐎᓂ ᐅᑭᒪᐗᔅᑐᑎᓐ᙮
11ᐊᓇ ᑳ ᐅᑖᐗᑳᑦ, ᐁᑯᔑ ᑲᑕ ᐯᑕᒻ ᐊᒑᒃ ᑳ ᐃᑖᑦ ᒫᒪᐎᐋᔭᒥᐊᐗ;
ᐊᓇ ᑳ ᔖᑯᒋᐃᐌᑦ ᓇᒪᐎᓚ ᑲᑕ ᐊᑯᐃᑯ ᐊᓂᐁᓕᐤ ᓂᔓ ᓂᐱᐎᓂᓕᐤ᙮
ᐊᓂᑭ ᑖᐺᑕᒧᐗᒃ ᐸᕐᑲᒪᓐ ᒥᓛᑲᓂᐎᐗᒃ ᑎᐹᒋᒧᐎᓂᓕᐤ
12ᐊᓇ ᐁᓐᒐᓪ ᓀᔥᑕ ᑳ ᑎᐯᓕᒫᑦ ᒫᒪᐎᐙᔭᒥᐋᐙ ᐸᕐᑲᒪᓯᒃ ᒪᓯᓇᐊᒪᐤ:
ᐅᐅ ᑫᒀᓇ ᐃᑗᐤ ᐊᓇ ᑳ ᐋᔮᑦ ᑳ ᐃᑕᐎ ᑳᔖᓕᒃ ᔑᒫᑲᓂᓕᐤ; 13ᓂ ᑭᔅᑫᓕᑌᓐ ᑭᑦ ᐊᑑᔅᑫᐎᓇ, ᓀᔥᑕ ᐃᑕ ᑳ ᐎᑭᔭᓐ, ᐊᓐᑕ ᐅᑎ ᐁ ᐃᑕᑾᓂᓕᒃ ᓭᑕᓐ ᐅᑦ ᐊᐱᐎᓐ: ᑭ ᒪᔥᑲᐎ ᒥᒋᒥᓀᓐ ᒫᑲ ᓂᑦ ᐃᔑᓂᑳᓱᐎᓐ, ᓇᒪ ᓀᔥᑕ ᑭ ᑮ ᐋᓉᑌᓐ ᓂ ᑖᐺᔦᓕᑕᒧᐎᓐ, ᐊᐳᒋᑲ ᒣᒀᒡ ᐊᓂᐃ ᐁ ᑭᔑᑳᑭ ᐃᔅᐱ ᐋᓐᑎᐹᔅ ᑳ ᒀᔭᔅᑭᑎᑦ ᓂ ᒫᕐᑕᐱᒻ, ᑳ ᑭ ᓂᐸᐋᑲᓂᐎᑦ ᐃᑕ ᐁ ᐃᑖᔦᒃ, ᐃᑕ ᓭᑖᓐ ᑳ ᐎᑭᑦ᙮ 14ᒫᑲ ᐋᑎᑦ ᑫᒀᓇ ᓂᑦ ᐋᔮᓐ ᑭᒋ ᒫᒥᔑᒥᑖᓐ, ᐊᓐᑕ ᐁ ᐋᔭᐗᒋᒃ ᐊᓂᑭ ᑳ ᑲᓇᐌᓕᑕᒸᒋᒃ ᐅ ᑭᔅᑭᓄᐊᒫᑫᐎᓂᓕᐤ ᐯᓚᒪ, ᐊᓇ ᑳ ᑮ ᑭᔅᑭᓄᐊᒪᐙᑦ ᐊᓂᐃ ᐯᓛᒃ ᑭᒋ ᐃᔑ ᐌᐱᓇᒥᓕᒋ ᑫ ᐅᒋ ᐱᓱᔑᓂᓕᒋ ᐅᑦ ᐊᐙᔑᒥᔕ ᐃᔅᕃᐃᓪ, ᑭᒋ ᒥᒋᓕᒋ ᐊᓂᐃ ᑫᒀᓇ ᑳ ᐸᑭᑎᓇᒫᒥᑦ ᒪᓂᑐᑳᓇ, ᓀᔥᑕ ᑭᒋ ᐱᔑᒀᒋ ᐃᓯᒋᑫᓕᒋ᙮ 15ᐊᓯᒋ ᓀᔥᑕ ᑭᑦ ᐋᔭᐙᐗᒃ ᐊᓂᑭ ᑳ ᑲᓇᐌᓕᑕᒸᒋᒃ ᐊᓂᐃ ᓂᑯᓛᐃᑌᓈ ᐅ ᑭᔅᑭᓄᐊᒫᑫᐎᓂᓕᐗ, ᐊᓂᒪ ᑳ ᐸᒀᑕᒫᓐ᙮ 16ᒥᒋᓚᐌᔦᓕᑕ; ᑮᔥᐱᓐ ᒫᑲ ᐁᑳ ᐎᐸᒡ ᑭ ᑳ ᐯᒋ ᓈᑎᑎᓐ, ᐁᑯ ᒫᑲ ᑫ ᓄᑎᓇᑭᒃ ᐁ ᐋᐸᒋᑖᔮᓐ ᐊᓂᒪ ᔑᒫᑲᓐ ᓂᑐᓂᒃ ᑳ ᐅᒋᐸᓕᒃ᙮
17ᐊᓇ ᑳ ᐅᑖᐗᑳᑦ ᐁᑯᔑ ᑲᑕ ᐯᑕᒻ ᐊᒑᒃ ᑳ ᐃᑖᑦ ᒫᒪᐎᐋᔭᒥᐊᐗ!
ᐊᓇ ᑳ ᔖᑯᒋᐃᐌᑦ ᓂ ᑳ ᒥᓚᐤ ᑭᒋ ᒥᒋᑦ ᑳ ᑳᒋᑳᑌᓕᒃ ᒫᓇ, ᓂ ᑳ ᒥᓚᐤ ᓀᔥᑕ ᐙᐸᓯᓂᔭ, ᓀᔥᑕ ᐊᓯᓂᒃ ᐅᔥᑭ ᐃᔑᓂᑳᓱᐎᓐ ᐁ ᒪᓯᓇᐃᑳᑌᒃ, ᐁᑳ ᐊᐌᓇ ᐃᓕᓕᐤ ᑳ ᑭᔅᑫᓕᑕᒃ, ᐊᓇ ᐱᑯ ᑳ ᐅᑎᓇᒃ᙮
ᐊᓂᑭ ᑖᐺᑕᒧᐗᒃ ᑖᐃᕋᑖᕋᐃᒃ ᒥᓛᑲᓂᐎᐗᒃ ᑎᐹᒋᒧᐎᓂᓕᐤ
18ᐊᓇ ᐁᓐᒐᓪ ᓀᔥᑕ ᑳ ᑎᐯᓕᒫᑦ ᒫᒪᐎᐋᔭᒥᐋᐗ ᑕᐃᔭᑖᐃᕋᐃᒃ ᒪᓯᓇᐊᒪᐤ:
ᐅᐅ ᑫᒀᓇ ᐃᑗᓕᐗ ᑭᒋᒪᓂᑐ ᐅᑯᓯᓴ, ᐊᓇ ᑖᐱᔅᑯᒡ ᐁ ᐗᓚᑌᒃ ᐃᔥᑯᑌᐤ ᑳ ᐃᔑᓈᑾᓂᓕᑭ ᐅᔅᑭᔑᑾ, ᓀᔥᑕ ᐅᓯᑕ ᑖᐱᔅᑯᒡ ᑳ ᒥᓨᔑᒃ ᐅᓵᐙᐱᔉ; 19ᓂ ᑭᔅᑫᓕᑌᓐ ᑭᑦ ᐊᑑᔅᑫᐎᓇ, ᓀᔥᑕ ᑭ ᓵᑭᐃᐌᐎᓐ, ᓀᔥᑕ ᑭᑦ ᐋᐸᑎᓯᐎᓐ, ᓀᔥᑕ ᑭ ᑖᐺᔦᓕᑕᒧᐎᓐ, ᓀᔥᑕ ᑭ ᔑᐱᓚᐌᓯᐎᓐ, ᓀᔥᑕ ᑭᑦ ᐊᑑᔅᑫᐎᓇ; ᓀᔥᑕ ᐊᓂᐃ ᒫᒋᒡ ᐊᐙᓯᑌ ᐁ ᑭᔅᑕᑭᑖᑾᑭ ᐃᔥᐱᔥ ᐊᓂᐃ ᓃᔥᑕᒻ᙮ 20ᐁᓕᐌᒃ ᒫᑲ, ᓂᑦ ᐋᔮᓐ ᐋᑎᑦ ᑫᒀᓇ ᑭᒋ ᒫᒥᔑᒥᑖᓐ, ᐁ ᐃᓕᓇᐗᑦ ᐊᓇ ᐎᔅᑴᐤ ᒉᓯᐸᓐ, ᐅᑭᔅᑭᐙᐃᑫᔅᑴᐤ ᑳ ᐃᔑᓂᑲᑎᑎᓱᑦ, ᑭᒋ ᑭᔅᑭᓄᐊᒪᐙᑦ, ᓀᔥᑕ ᑭᒋ ᐙᔦᔑᒫᑦ ᓂᑦ ᐊᑑᔅᑫᓛᑲᓂᒪ ᑭᒋ ᐱᔑᑾᒋ ᐃᓯᒋᑫᓕᒋ, ᓀᔥᑕ ᑭᒋ ᒥᒋᓕᒋ ᑫᒀᓇ ᑳ ᐸᑭᑎᓇᒫᒥᑦ ᒪᓂᑐᑲᓇ᙮ 21ᓂ ᑮ ᑕᐎᓇᒪᐗᐤ ᒫᑲ ᑭᒋ ᒥᒋᓚᐌᔦᓕᑕᒃ ᐅ ᐱᔑᑾᑎᓯᐎᓐ; ᓇᒪᐎᓚ ᒫᑲ ᑮ ᐅᒋ ᒥᒋᓚᐌᔦᓕᑕᒻ᙮ 22ᒫᑎᑲ, ᓂᐯᐎᓂᒃ ᓂ ᑳ ᐃᔑ ᐌᐱᓇᐤ, ᐊᓂᐃ ᓀᔥᑕ ᑳ ᐎᒋᐱᔑᒀᑎᓯᒥᑯᑦ ᑭᒋ ᐊᓕᒥᓯᐎᓂᒃ, ᑮᔥᐱᓐ ᐁᑳ ᒥᒋᓚᐌᔦᓕᑕᑾᐌ ᐅᑦ ᐃᓯᒋᑫᐎᓂᐙᐗ᙮ 23ᓂ ᑳ ᓂᐹᐃᒫᐗ ᒫᑲ ᐅᑦ ᐊᐙᔑᒥᔕ ᓂᐱᐎᓐ ᐅᒋ; ᓀᔥᑕ ᒥᓯᐌ ᒫᒪᐎᐋᔭᒥᐋᐗᒃ ᑲᑕ ᑭᔅᑫᓕᑕᒶᒃ ᓂᓚ ᐁ ᐋᐎᔮᓐ ᐊᓇ ᑳ ᑲᑴᒋᑖᑦ ᐱᒋᓚᐗ ᓀᔥᑕ ᒥᑌᐊ: ᑭ ᑳ ᒥᓕᑎᓇᐗᐤ ᒫᑲ ᒥᓯᐌ ᐁ ᐃᑕᔑᔦᒃ ᑳ ᑭ ᐃᔑ ᐊᔭᑑᔅᑫᔦᒃ᙮
24ᒫᑲ ᑭᓚᐗᐤ ᑭᑦ ᐃᑎᓈᐗᐤ, ᓀᔥᑕ ᒥᓯᐌ ᐊᓂᑭ ᑕᐃᔭᑖᐃᕋᐃᒃ ᑳ ᐃᑖᒋᒃ, ᒥᓯᐌ ᐊᓂᑭ ᐁᑳ ᑳ ᐋᔮᒋᒃ ᐅᒣᓕᐤ ᑭᔅᑭᓄᐊᒫᑫᐎᓂᓕᐤ, ᐁᑳ ᓀᔥᑕ ᑳ ᑭᔅᑫᓕᑕᒸᒋᒃ ᓭᑕᓇ ᐅ ᑎᒥᐋᒥᓕᐗ, ᐁ ᐃᔑᓂᑳᑕᑭᒃ; ᓇᒪᐎᓚ ᑯᑕᒃ ᓇᔭᒋᑲᓐ ᑭ ᑳ ᐸᑭᑎᓇᒫᑎᓈᐗᐤ: 25ᒫᑲ ᐊᓂᒪ ᐋᔕᔾ ᑳ ᐋᔮᔦᒃ, ᒪᔥᑲᐎ ᒥᒋᒥᓇᒧᒃ ᐃᓕᑯᒃ ᑫ ᐯᒋ ᑕᑯᔑᓈᓐ᙮ 26ᐊᓇ ᒫᑲ ᑳ ᔖᑯᒋᐃᐌᑦ, ᓀᔥᑕ ᐃᔅᒀᔮᒡ ᐃᔅᑯ ᑫ ᑲᓇᐌᓕᑕᒃ ᓂᑦ ᐋᔭᒥᐎᓇ, ᓂ ᑳ ᒥᓚᐤ ᑭᒋ ᑎᐯᓕᒫᑦ ᒥᓯᐌ ᑳ ᑕᑐᔅᑳᓀᓯᓕᒋ ᐃᓕᓕᐗ: 27ᑲᑕ ᑎᐯᓕᒣᐤ ᒫᑲ ᐱᐙᐱᔅᑯᓕᐤ ᐅᒋ; ᑖᐱᔅᑯᒡ ᐅᑦ ᐊᓱᐗᒋᑲᓇ ᐊᔑᔥᑭᐅᓛᑲᓂᑫᐤ ᑲᑕ ᐱᓯᐸᓕᐋᐗᒃ: ᑖᐱᔅᑯᒡ ᑳ ᑭ ᐃᔑ ᐸᑭᑎᓇᒪᐎᑦ ᓄᑖᐎ᙮ 28ᓂ ᑳ ᒥᓚᐤ ᒫᑲ ᐙᐸᓐ ᐊᒐᑯᔕ᙮
29ᐊᓇ ᑳ ᐅᑖᐗᑳᑦ, ᐁᑯᔑ ᑲᑕ ᐯᑕᒻ ᐊᒑᒃ ᑳ ᐃᑖᑦ ᒫᒪᐎᐋᔭᒥᐋᐗ᙮
Currently Selected:
ᑭᔅᑫᓕᑖᑯᑖᑫᐎᓐ 2: MCNT91
Highlight
Share
Copy
Want to have your highlights saved across all your devices? Sign up or sign in
The text of the Bible in Moose Cree is in the public domain.
Moose Cree New Testament © Canadian Bible Society, 1991.