ᐅᐸᓓᑭᔅ ᓘᒃ 14
14
ᒋᓴᔅ ᒥᓇᐙᒋᐁᐤ ᐁ ᐋᑯᓯᓕᒋ ᓈᐯᐗ
1ᑮ ᐃᑭᓐ ᒫᑲ, ᐁ ᐱᑐᑫᐙᑦ ᐅ ᐙᔅᑳᔨᑲᓂᒥᓕᒃ ᐯᔭᒃ ᐊᓂᐃ ᑳ ᓂᑳᓀᓕᑖᑯᓯᓕᒋ ᐸᕋᓯᔭ, ᑭᒋ ᒧᐙᑦ ᐊᓚᑯᓇᐗ ᐁ ᐋᔭᒥᐁᑭᔑᑳᓕᒃ ᑮ ᓇᓈᑲᒋᐃᑯ᙮ 2ᒫᑎᑲ, ᒫᑲ, ᑮ ᐃᑖᓕᐗ ᐯᔭᒃ ᐃᓕᓕᐗ ᐁ ᐅᑎᔥᑲᐙᐱᔅᑖᑯᑦ, ᐁ ᐋᔮᓕᒋ ᐹᑭᓯᐎ ᐃᑖᔅᐱᓀᐎᓂᓕᐤ᙮ 3ᒋᓴᔅ ᒫᑲ ᐁ ᓇᔥᑴᐗᔑᐃᐌᑦ, ᑮ ᐋᔭᒥᐁᐤ ᐅᓚᔓᐌᐎᓕᓕᐗ ᓀᔥᑕ ᐸᕋᓯᔭ, ᐁ ᐃᑗᑦ, ᐅᓚᔓᐌᓕᑖᑾᓐ ᓈ ᑭᒋ ᒥᓇᐙᒋᐃᐙᓂᐗᒃ ᐁ ᐋᔭᒥᐁᑭᔑᑳᒃ?
4ᓇᒪ ᒫᑲ ᐅᒋ ᑭᑐᓕᐗ᙮ ᑮ ᐅᑎᓀᐤ ᒫᑲ, ᓀᔥᑕ ᐁ ᑮ ᒥᓇᐙᒋᐋᑦ, ᑮ ᐸᑭᑎᓀᐤ; 5ᐁᑯ ᓀᔥᑴᐗᔑᐋᑦ ᐊᓂᐃ, ᐁ ᐃᑗᑦ, ᐊᐌᓇ ᐁ ᐃᑕᔑᔦᒃ ᐁ ᐋᔭᐙᑦ ᐋᓴ ᓀᔥᑕᐱᑯ ᒥᔅᑐᓴ ᐁ ᐳᒋᐸᓕᓕᒋ ᐙᑎᑳᓂᒃ, ᐁᑳ ᑣᔦᒃ ᑫ ᐗᓚᐎᐱᑖᑦ ᐁ ᐋᔭᒥᐁᑭᔑᑳᓕᒃ?
6ᓇᒪᐎᓚ ᒫᑲ ᒥᓇ ᑮ ᓇᔥᑴᐗᔑᐁᐗᒃ ᐅᐅ ᑫᒀᓇ ᑳ ᐃᑗᓕᒋ᙮
ᑕᐸᑌᓕᒥᓱᐎᓐ ᓀᔥᑕ ᐱᒥᐃᐌᐎᓐ
7ᑮ ᐃᑌᐤ ᒫᑲ ᓇᔅᐱᑐᐌᐎ ᐋᑕᓗᑳᓂᓕᐤ ᐊᓂᐃ ᑳ ᐎᑯᒫᑲᓂᐎᓕᒋ, ᐁ ᐙᐸᑕᒃ ᐁ ᐃᔑ ᓇᐗᓱᓇᒥᓕᒋ ᑭᒋ ᐊᐱᐎᓇ; ᐁ ᐃᑖᑦ, 8ᐃᔅᐱ ᐎᑯᒥᔅᑴ ᐊᐌᓇ ᐎᑭᑐᐎᓂᒃ, ᐁᑳ ᓇᐊᐱ ᑭᒋ ᐊᐱᐎᓂᒃ; ᑫᑳ ᑮ ᓇᑐᒫᒋ ᐃᓕᓕᐗ ᐊᐙᓯᑌ ᐁ ᐃᔅᐯᓕᑖᑯᓯᓕᒋ ᐃᔥᐱᔥ ᑭᓚ; 9ᐊᓇ ᒫᑲ ᑖᐱᔅᑯᒡ ᑳ ᐎᑯᒥᑖᒃ ᑫ ᐯᒋ ᐃᑎᔉ, ᑕᐎᔅᑕᐤ ᐊᐗ ᐃᓕᓕᐤ; ᐁᑯ ᐁ ᓇᓀᐯᐎᓯᔭᓐ ᑫ ᐊᑎ ᓈᑕᒪᓐ ᐁ ᐋᐱᔅᑌᓕᑖᑾᒃ ᐊᐱᐎᓐ᙮ 10ᐃᔅᐱ ᒫᑲ ᐐᑯᒥᑲᐎᔭᓀ, ᓇᑕᐎ ᓇᐊᐱ ᑳ ᐋᐱᔅᑌᓕᑖᑾᒃ ᐊᐱᐎᓂᒃ; ᑕᑯᔑᑫ ᐊᓇ ᑳ ᐃᑯᒥᔉ, ᑭᒋ ᐃᑎᔉ, ᓂᑐᑌᒻ, ᐃᑕ ᐊᐙᓯᑌ ᐁ ᑭᔅᑌᓕᑖᑾᒃ ᐃᑐᑕ: ᐁᑯ ᑫ ᐋᔮᔭᓐ ᑭᔅᑌᓕᑖᑯᓯᐎᓐ ᐁ ᐙᐸᒥᔅᑭᒃ ᐊᓂᑭ ᑳ ᐎᑕᐱᒥᔅᑭᒃ ᐁ ᐎᒋᒥᒋᓱᒥᔅᑭᒃ᙮ 11ᐌᓴ ᐊᐌᓇ ᑫ ᑭᔅᑌᓕᒥᑎᓱᑴ ᑲᑕ ᒪᒉᓕᒪᐤ᙮ ᐊᓇ ᒫᑲ ᑳ ᑕᐸᑌᓕᒥᑎᓱᑦ ᑲᑕ ᑭᔅᑌᓕᒪᐤ᙮
12ᐁᑯ ᐁᑖᑦ ᓀᔥᑕ ᐊᓂᐃ ᑳ ᐎᑯᒥᑯᑦ, ᐃᐋᐱᑖᑭᔑᑳᓂᒥᒋᓱᑫᔭᓂ, ᓀᔥᑕᐱᑯ ᓈᐯᑴᑫᔭᓂ, ᐁᑳᐎᓚ ᓇᑐᒥᒃ ᑭ ᑐᑌᒪᒃ᙮ ᐁᑳ ᓀᔥᑕ ᑭᒋᔖᓇᒃ, ᐁᑳ ᓀᔥᑕ ᑭ ᐙᑯᒫᑲᓇᒃ, ᐁᑳ ᓀᔥᑕ ᑳ ᒥᔕᑭᓯᒋᒃ ᑮᒋᐃᓕᓕᐗᒃ; ᑫᑲ ᒥᓇ ᓇᑐᒥᔅᑾᐌ, ᐁᑯ ᑫ ᑭᐌ ᑎᐸᐊᒫᑲᐎᔭᓐ᙮ 13ᒫᑲ ᒣᑯᔐᔭᓂ, ᓇᑐᒥᒃ ᑳ ᑭᑎᒫᑭᓯᒋᒃ, ᑳ ᒫᔅᑭᓯᒋᒃ, ᐁᑳ ᑳ ᓂᑕᐅᑌᒋᒃ, ᐁᑳ ᑳ ᐋᐱᒋᒃ: 14ᐁᑯ ᑫ ᔕᐌᓕᑖᑯᓯᔭᓐ; ᐌᓴ ᐎᓚᐗᐤ ᓇᒪᐎᓚ ᑭ ᑳ ᑮ ᑭᐌ ᑎᐸᐊᒫᑾᒃ: ᐌᓴ ᑭ ᑳ ᑭᐌ ᑎᐸᐊᒫᑲᐎᓐ ᐗᓂᔥᑳᑣᐌ ᑳ ᒀᔭᔅᑭᑎᒋᒃ᙮
ᓈᔅᐱᑐᐌᐎ ᐋᑕᓗᑳᓐ ᑭᒋ ᒪᑯᔐᐎᓐ ᐅᒋ
(ᒫᑎᐤ 22:1–10)
15ᐃᔅᐱ ᒫᑲ ᐯᔭᒃ ᐊᓂᐃ ᑳ ᐎᑕᐱᒥᑯᑦ ᐁ ᒥᒋᓱᑦ ᐱᐁᑕᒃ ᐅᐅ ᑫᒀᓇ, ᑮ ᐃᑌᐤ, ᔕᐌᓕᑖᑯᓯᐤ ᐊᓇ ᑫ ᒧᐙᑦ ᐊᓚᑯᓈᐗ ᑭᒋᒪᓂᑐᐗ ᐅᑦ ᐅᑭᒫᐎᐎᓂᓕᒃ᙮
16ᐁᑯ ᐁᑖᑦ, ᐯᔭᒃ ᐃᓕᓕᐤ ᑮ ᐅᔑᑖᐤ ᑭᒋ ᓂᐯᑴᐎᓂᓕᐤ, ᒥᒉᑦ ᒫᑲ ᑮ ᐎᑯᒣᐤ; 17ᑮ ᐃᔑᑎᔕᐌᐤ ᒫᑲ ᐅᑦ ᐊᑑᔅᑫᓛᑲᓂᒪ ᐃᔅᐱ ᐌᑎᒋᐸᓕᒃ ᑭᒋ ᓂᐯᒀᓂᐗᒃ ᑭᒋ ᐃᑖᓕᒋ ᐊᓂᐃ ᑳ ᐎᑯᒫᑲᓂᐎᓕᒋ, ᐯᒋ ᐃᑐᑌᒃ: ᐌᓴ ᒥᓯᐌ ᑫᒀᓇ ᐋᔕᔾ ᐋᔦᔅᑲᐎᑖᓂᐗᓋ᙮ 18ᒥᓯᐌ ᐁ ᐃᑌᓯᒋᒃ ᒫᑲ, ᐁ ᐯᔭᑯ ᐃᑌᓕᑕᑭᒃ, ᑮ ᒫᒋ ᑲᑶᑕᐎ ᐃᑗᐗᒃ᙮ ᐊᓇ ᓃᔥᑕᒻ ᑮ ᐃᑗᐤ, ᓂ ᑮ ᐊᑖᐙᓐ ᓂᑖᐎᑭᒋᑲᓐ, ᔮᓕᑌᓪ ᒫᑲ ᓂ ᑳ ᓇᑕᐎ ᐙᐸᑌᓐ: ᑭ ᓇᑐᑕᒫᑎᓐ, ᒫᒥᓄᒥᓐ᙮ 19ᑯᑕᒃ ᒫᑲ ᑮ ᐃᑗᐤ, ᓂ ᑮ ᐊᑖᐙᓐ ᓂᔮᓚᓪ ᐁ ᓂᔓᐱᓱᒋᒃ ᒥᔅᑐᓴᒃ, ᓂ ᓇᑕᐎ ᑯᒋᐋᐗᒃ ᒫᑲ: ᑭ ᓇᑐᑕᒫᑎᓐ, ᒫᒥᓄᒥᓐ᙮ 20ᑯᑕᒃ ᒫᑲ ᑮ ᐃᑗᐤ, ᓂ ᑮ ᐎᐎᓐ; ᐁᐗᑯ ᐌᒋ ᐁᑳ ᑮ ᐯᒋ ᐃᑐᑌᔮᓐ᙮
21ᐁᑯ ᐊᓇ ᐊᑑᔅᑫᓛᑲᓐ ᐱᐁᒋ ᐙᐸᑎᓛᑦ ᐅᑦ ᐅᑭᒫᒪ ᐅᐅ ᑫᒀᓇ᙮ ᐁᑯ ᒫᑲ ᐊᓇ ᑳ ᑎᐯᓕᑕᒃ ᐙᔅᑳᔨᑲᓂᓕᐤ, ᐁ ᑭᓯᐙᓯᑦ, ᑮ ᐃᑌᐤ ᐅᑦ ᐊᑑᔅᑫᓛᑲᓂᒪ, ᑭᓕᐱ ᐃᑐᑌ ᐱᒧᑌᔅᑲᓈᒃ ᓀᔥᑕ ᐱᒧᑌᔅᑲᓈᔑᒃ ᐃᑖᐎᓂᒃ ᑳ ᐃᑕᑾᑭ, ᐯᒋ ᐱᑐᑳᐃᒃ ᐅᑕ ᒫᑲ ᑳ ᑭᑎᒫᑭᓯᒋᒃ ᓀᔥᑕ ᑳ ᒫᔅᑭᓯᒋᒃ, ᓀᔥᑕ ᐁᑳ ᑳ ᓂᑖᐅᑌᒋᒃ, ᓀᔥᑕ ᐁᑳ ᑳ ᐙᐱᒋᒃ᙮ 22ᐊᑑᔅᑫᓛᑲᓐ ᒫᑲ ᑮ ᐃᑗᐤ, ᐅᑭᒪᐤ, ᑮ ᐃᑐᒋᑳᑌᐤ ᑖᐱᔅᑯᒡ ᐁ ᑮ ᐃᑕᔓᐌᔭᓐ, ᑫᔮᐸᒡ ᒫᑲ ᑕᐗᐤ᙮ 23ᐅᑭᒪᐤ ᒫᑲ ᑮ ᐃᑌᐤ ᐊᑖᔅᑫᓛᑲᓇ, ᐗᓚᐎ ᐃᑐᑌ ᑭᒋ ᒣᔅᑲᓈᒃ, ᓀᔥᑕ ᒣᓂᔅᑳᑎᑯᒃ, ᔖᑯᒋᒥᒃ ᒫᑲ ᑭᒋ ᐯᒋ ᐱᑐᑫᒋᒃ, ᑭᒋ ᓵᑲᔅᑭᓀᒃ ᓂ ᐙᔅᑳᔨᑲᓂᒻ᙮ 24ᐌᓴ ᑭᑦ ᐃᑎᓇᐗᐤ, ᓇᒪᐎᓚ ᐊᐌᓇ ᐁ ᐃᑕᓯᒋᒃ ᐊᓂᑭ ᐃᓕᓕᐗᒃ ᑳ ᑭ ᐎᑯᒫᑲᓂᐎᒋᒃ ᑲᑕ ᑯᒋᔅᑕᒻ ᓂ ᓂᐯᑴᐎᓂᓕᐤ᙮
ᐁ ᐃᔑ ᐸᑭᑎᓂᓱᑦ ᑭᔅᑭᓄᐊᒪᐙᑲᓐ
(ᒫᑎᐤ 10:37–38)
25ᑮ ᐎᒉᐎᑯ ᒫᑲ ᓈᔅᐱᒡ ᒥᔮᒪᐎᒥᒉᑎᓕᒋ ᐃᓕᓕᐗ; ᐁ ᑴᔅᑭᑳᐸᐎᑦ ᒫᑲ, ᑮ ᐃᑌᐤ, 26ᑮᔥᐱᓐ ᐊᐌᓇ ᐯᒋ ᓈᔑᑌ, ᐁᑳ ᒫᑲ ᐁ ᐸᒀᑖᑦ ᐅᑖᐎᔭ, ᓀᔥᑕ ᐅᑳᐎᔭ, ᓀᔥᑕ ᐅᑦ ᐊᐙᔑᒥᔕ, ᓀᔥᑕ ᐎᒋᔖᓇ, ᓀᔥᑕ ᐎᒋᔖᓂᔅᑴᒪ, ᐁᐁ, ᓀᔥᑕ ᑎᐱᓚᐌ ᐅ ᐱᒫᑎᓯᐎᓐ ᐊᓯᒋ, ᓇᒪᐎᓚ ᓂ ᑳ ᑮ ᐅᑭᔅᑭᓄᐊᒪᐙᑲᓂᒪᐤ᙮ 27ᐊᐌᓇ ᒫᑲ ᐁᑳ ᐯᒥᐎᑖᑴ ᐅᑦ ᐋᔑᑌᐋᑎᑯᒻ, ᓀᔥᑕ ᐯᒋ ᓄᔅᐱᓇᔑᑦ, ᓇᒪᐎᓚ ᓂ ᑲ ᑮ ᐅᑭᔅᑭᓄᐊᒪᐙᑲᓂᒪᐤ᙮
28ᐌᓴ ᐊᐌᓇ ᐁ ᐃᑕᔑᔦᒃ ᐁ ᐎ ᐅᔑᑖᑦ ᐊᔕᐙᐱᐎᑲᒥᑯᓕᐤ, ᐁᑳ ᓃᔥᑕᒻ ᓀᐊᐱᑦ ᑭᒋ ᐊᑭᒫᑦ ᑫ ᐃᔥᐱᔑ ᒣᔅᑎᓈᑲᓂᐎᓕᒋ ᔔᓕᐋᓇ, ᑭᒋ ᑭᔅᑫᓕᑕᒃ ᐁᔭᐙᑴ ᐃᔥᐱᔥ ᑭᒋ ᐅᒋ ᑭᔑᑖᑦ? 29ᑫᑲ ᒫᔅᑯᒡ ᐹᑎᒫ ᑳ ᒫᒋ ᐅᔑᑖᒋ, ᐁᑳ ᒫᑲ ᐁ ᑲᔥᑭᑖᑦ ᑭᒋ ᑭᔑᑖᑦ, ᒥᓯᐌ ᑳ ᐙᐸᑕᒥᓕᒋ ᒫᒋ ᐹᐱᐃᑯᑦ, 30ᐁ ᐃᑗᓕᒋ, ᐊᐗ ᐃᓕᓕᐤ ᑮ ᒫᒋ ᐅᔑᑕᐤ, ᓇᒪᐎᓚ ᒫᑲ ᑮ ᑲᔥᑭᑕᐤ ᑭᒋ ᑭᔑᑖᑦ᙮
31ᓀᔥᑕᐱᑯ ᑫᑯ ᑭᒋᐅᑭᒪᐤ, ᐁ ᐎ ᓇᑐᐸᓖᔅᑕᐙᑦ ᑯᑕᑭᔭ ᑭᒋᐅᑭᒫᐗ, ᐁᑳ ᓃᔥᑕᒻ ᓀᐊᐱᑦ, ᓀᔥᑕ ᒥᐋᒥᑐᓀᓕᑕᒃ ᑭᒋ ᑭᔅᑫᓕᑕᒃ ᐁ ᐋᔭᐙᑦ ᒥᑖᑡᐤ ᑭᒋᒥᑖᑐᒥᑕᓇᐤ ᑫ ᑮ ᓇᑭᔥᑲᐙᑴ ᐊᓂᐃ ᑳ ᐯᒋ ᓇᑐᐸᓖᔅᑖᑯᑦ ᐁ ᐋᔭᐙᓕᒋ ᓂᔑᑕᓇᐤ ᑭᒋᒥᑖᑐᒥᑕᓇᐤ? 32ᓀᔥᑕᐱᑯ, ᒣᒀᒡ ᑯᑕᑭᔭ ᑫᔮᐸᒡ ᐁ ᓛᐎᓈᑯᓯᓕᒋ, ᐃᔑᑎᔕᐌᐤ ᐃᔑᑎᔕᐙᑲᓇ, ᐁ ᓇᑕᐌᓕᑕᒃ ᓇᐁᓕᑐᐎᓂᓕᐤ᙮ 33ᐁᑯ ᑖᐱᔅᑯᒡ ᓀᔥᑕ, ᐊᐌᓇ ᐁ ᐃᑕᔑᔦᒃ ᐁᑳ ᑳ ᓇᑲᑕᒃ ᒥᓯᐌ ᑳ ᐋᔮᑦ, ᓇᒪᐎᓚ ᓂ ᑳ ᑮ ᐅᑭᔅᑭᓄᐊᒪᐙᑲᓂᒪᐤ᙮
ᐁᑳ ᑭ ᐋᐸᑕᒃ ᔑᐎᑖᑲᓐ
(ᒫᑎᐤ 5:13; ᒫᕐᒃ 9:50)
34ᔑᐎᑖᑲᓐ ᒥᓨᔑᓐ: ᒫᑲ ᑮᔥᐱᓐ ᔑᐎᑖᑲᓐ ᑳ ᐗᓂᑖᒪᑲᑭ ᐁ ᐃᔅᐸᑾᒃ, ᑫᒀᓐ ᑫ ᐅᒋ ᔑᐎᑖᑲᓂᐗᒃ? 35ᓇᒪᐎᓚ ᐙᔦᔥ ᐃᑖᐸᑕᓐ ᐊᔅᑮᒃ, ᓇᒪ ᓀᔥᑕ ᑭᒋ ᐌᐱᓂᑳᑌᒃ ᐃᑕ ᐁ ᐱᔅᑾᔅᑌᒃ ᐊᓂᒪ ᑳ ᐌᐸᐃᑳᑌᒃ ᐊᐗᑳᓂᑲᒥᑯᒃ ᐅᒋ; ᒫᑲ ᐃᓕᓕᐗᒃ ᐗᓚᐎᐌᐱᓇᒶᒃ᙮ ᐊᓇ ᑳᐅᑖᐗᑳᑦ ᑭᒋ ᐯᑕᒃ, ᐁᑯᔑ ᑲᑕ ᐯᑕᒻ᙮
Currently Selected:
ᐅᐸᓓᑭᔅ ᓘᒃ 14: MCNT91
Highlight
Copy
Compare
Share
Want to have your highlights saved across all your devices? Sign up or sign in
The text of the Bible in Moose Cree is in the public domain.
Moose Cree New Testament © Canadian Bible Society, 1991.
