ᐅᐸᓓᑭᔅ ᓘᒃ 12
12
ᔮᑾᒥᒣᐤ ᐅᑕᔭᒥᐁᑳᓱᐎᓐ ᐅᒋ
(ᒫᑎᐤ 10:26–27)
1ᐁᑯ ᒣᒀᒡ, ᐃᔅᐱ ᑮ ᒪᐗᒋᐃᑐᒋᒃ ᐃᓕᓕᐗᒃ ᐃᔥᐱᔥ ᐁᑳ ᐁ ᑮ ᐊᑭᒫᑲᓂᐎᒋᒃ, ᐙᐙᒡ ᐁ ᑕᑯᔅᑳᑎᑐᒋᒃ, ᑮ ᒫᒋ ᐃᑌᐤ ᐅ ᑭᔅᑭᓄᐊᒪᐙᑲᓇ ᓃᔥᑕᒻ, ᔮᒀᒦᔅᑕᒸᒃ ᐸᕋᓯᔭᒃ ᐅ ᐱᓯᑲᓂᐗᐤ, ᐁᐗᑯ ᐋᔭᒥᐁᑳᓱᐎᓐ᙮ 2ᐌᓴ ᓇᒪᐎᓚ ᑫᒀᓐ ᐃᑕᑾᓐ ᐁ ᐊᑾᓇᐃᑳᑌᒃ, ᐁᑳ ᑫ ᑭᔅᑫᓕᑖᑯᑖᓂᐗᒃ; ᓇᒪ ᓀᔥᑕ ᑫᒀᓐ ᑳᑖᓂᐗᓐ, ᐁᑳ ᑫ ᑭᔅᑫᓕᑖᑾᒃ᙮ 3ᐁᐗᑯ ᐅᒋ ᐱᑯ ᑫᒀᓐ ᑳ ᑮ ᐃᑗᔦᒃ ᐃᑕ ᐁ ᑎᐱᔅᑳᒃ, ᑲᑕ ᐯᑖᑾᓐ ᐃᑕ ᐁ ᐙᓭᔮᒃ; ᐊᓂᒪ ᒫᑲ ᑳ ᑮ ᐃᑗᔦᒃ ᒥᑖᐗᑳᒃ ᐱᔅᑭᒑᑭ ᐙᔅᑳᔨᑲᓂᒃ, ᑲᑕ ᐙᐎᒋᑳᑌᐤ ᑕᑯᒡ ᐙᔅᑳᔨᑲᓂᒃ᙮
ᐊᐌᓇ ᑫ ᑯᔅᑌᒃ
(ᒫᑎᐤ 10:28–31)
4ᑭᑦ ᐃᑎᓇᐗᐤ ᒫᑲ, ᓂᑐᑌᒥᑐᒃ, ᐁᑳᐎᓚ ᑯᔅᑎᑯᒃ ᐊᓂᑭ ᑳ ᓂᐸᑖᒋᒃ ᒥᔭᐎᓕᐤ, ᐹᑎᒫ ᐊᓂᐁᓕᐤ ᒫᑲ ᐁᑳ ᑳ ᐋᔮᒋᒃ ᑫᒀᓕᐤ ᑫ ᑮ ᑐᑕᑭᒃ᙮ 5ᒫᑲ ᓂᑳᓐ ᑭ ᔮᑾᒥᐃᑎᓇᐗᐤ ᐊᐌᓇ ᑫ ᑯᔅᑌᒃ: ᑯᔅᑎᒃ ᐊᓇ, ᑳ ᓂᐹᔨᐌᒋ, ᑳ ᐋᔮᑦ ᑲᔥᑭᐅᐎᓂᓕᐤ ᑭᒋ ᒪᒎᔅᑌᐅᐌᑦ ᒪᒋ ᐃᔥᑯᑌ; ᐁᐁ, ᑭᑦ ᐃᑎᓇᐗᐤ, ᐁᐗᑯ ᑯᔅᑎᒃ᙮
6ᓇᒪ ᓈ ᓂᔮᓚᓐ ᒥᒋᔥᑯᔑᔕᒃ ᓂᔓ ᔔᓕᐋᓇᐱᔅᑯᔑᔕ ᐃᑕᑭᒫᐗᒃ? ᓇᒪᐎᓚ ᐙᐙᒡ ᐯᔭᒃ ᐁ ᐃᑕᓯᒋᒃ ᒫᑲ ᐗᓂᑭᔅᑭᓯᑐᑖᑯ ᑭᒋᒪᓂᑐᐗ᙮ 7ᒫᑲ ᐙᐙᒡ ᒥᓯᐌ ᑭᔅᑎᒀᓂᐱᐙᔨᐙᐗ ᐊᑭᒋᑳᑌᐗ᙮ ᐁᐗᑯ ᐅᒋ ᐁᑳᐎᓚ ᓭᑭᓰᒃ: ᐊᐙᓯᑌ ᑭ ᑭᔅᑕᑭᒥᑲᐎᓇᐗᐤ ᐃᔥᐱᔥ ᒥᒉᑦ ᒥᒋᔥᑯᔑᔕᒃ᙮
ᐁ ᐎᒋᑳᑌᒃ ᓀᔥᑕ ᐁ ᐋᑕᐌᓂᒥᑦ ᙭
(ᒫᑎᐤ 10:32–33; 12:32; 10:19–20)
8ᐊᓯᒋ ᓀᔥᑕ ᑭᑦ ᐃᑎᓇᐗᐤ, ᐊᐌᓇ ᑫ ᑎᐹᒋᒥᑴ ᐃᑕ ᐁ ᐃᑖᓕᒋ ᐃᓕᓕᐗ, ᐁᐗᒀᓇ ᓀᔥᑕ ᑫ ᑎᐹᒋᒫᑦ ᐃᓕᓕᐎᑯᓯᓵᓐ ᐅᑎᔥᑳᐤ ᑭᒋᒪᓂᑐ ᐅᑦ ᐁᓐᒐᓕᒪ᙮ 9ᒫᑲ ᐊᓇ ᑳ ᐋᓉᑕᐎᑦ ᐃᑕ ᐁ ᐃᑖᓕᒋ ᐃᓕᓕᐗ, ᑲᑕ ᐊᓉᑕᐗᐤ ᐅᑎᔥᑳᐤ ᐅᑦ ᐁᓐᒐᓕᒪ ᑭᑭᒪᓂᑐ᙮
10ᐊᐌᓇ ᒫᑲ ᑫ ᒪᒋ ᐃᑖᑴ ᐃᓕᓕᐎᑯᓯᓵᓇ, ᑲᑕ ᐌᐯᓕᑕᒪᐗᐤ: ᒫᑲ ᐊᓇ ᑳ ᐸᐹᔅᑕᒫᑦ ᐸᓓᑭ ᐊᒑᑾ, ᓇᒪᐎᓚ ᑲᑕ ᐌᐯᓕᑕᒪᐗᐤ᙮
11ᐃᔅᐱ ᒫᑲ ᐯᒋ ᐃᑐᑕᐃᑖᑾᐌ ᐋᔭᒥᐁᐎᑲᒥᑯᒃ, ᓀᔥᑕ ᐅᑎᔥᑳᐤ ᐅᑎᐹᔅᑯᓂᑫᐗᒃ ᓀᔥᑕ ᐅᑭᒫᐗᒃ, ᐁᑳᐎᓚ ᒪᒥᑐᓀᓕᑕᒧᒃ ᑖᓂ ᑫ ᐃᔑ ᓀᔥᑕ ᑫᒀᓐ ᑫ ᓇᔥᑴᐗᔑᐃᐌᔦᒃ, ᓀᔥᑕᐱᑯ ᑫᒀᓐ ᑫ ᐃᑗᔦᒃ᙮ 12ᐌᓴ ᑳ ᐸᓓᑭᓯᑦ ᐊᒑᒃ ᑭ ᑳ ᑭᔅᑭᓄᐊᒫᑯᐗᐤ ᐊᓂᒪ ᑎᐸᔨᑲᓐ ᐱᓯᒧᑳᓂᒃ ᑫᒀᓐ ᑫ ᐃᑗᔦᑯᐸᓐ᙮
ᐋᑕᓗᑳᓐ ᑳ ᒥᔕᑭᓯᑦ ᑲᑫᐹᑎᔅ
13ᐊᐌᓇ ᒫᑲ ᐁ ᒪᐗᒋᐃᑐᓕᒋ ᐃᓕᓕᐗ ᐅᒋ ᑮ ᐃᑌᐤ, ᑫᔅᑭᓄᐊᒫᑫᔭᓐ, ᐋᔭᒥ ᓂᒋᔖᓐ ᑭᒋ ᓂᔓᑖᑦ ᑎᐱᓚᐌᐎᓯᐎᓂᓕᐤ ᐋᐱᑕᐤ ᓂᓚ ᑭᒋ ᐋᔮᔮᓐ᙮
14ᑮ ᐃᑌᐤ ᒫᑲ, ᐃᓕᓕᐤ, ᐊᐌᓇ ᑳ ᑎᐹᔅᑯᓂᑫᐎᓕᓕᑳᔑᑦ ᓀᔥᑕ ᒫᑎᓇᒫᑫᐎᓕᓕᑳᔑᑦ ᑭᒋ ᑎᐯᓕᒥᑖᑾᒃ? 15ᑮ ᐃᑌᐤ ᒫᑲ, ᔮᒀᒦᔅᑕᒧᒃ ᓀᔥᑕ ᑯᔅᐸᓂᔅᑕᒧᒃ ᒧᔅᑌᓇᒫᑫᐎᓐ: ᐌᓴ ᐃᓕᓕᐤ ᐅ ᐱᒫᑎᓯᐎᓐ ᓇᒪᐎᓚ ᐁᐗᑴᓕᐤ ᑳ ᐃᔅᐱᒋ ᐌᓗᑎᓰᑦ᙮
16ᑮ ᐃᑌᐤ ᒫᑳ ᓇᔅᐱᑐᐌᐎ ᐋᑕᓗᑳᓂᓕᐤ, ᐁ ᐃᑗᑦ, ᐯᔭᒃ ᐁ ᒥᔕᑭᓯᑦ ᐃᓕᓕᐤ ᐅᑦ ᐊᔅᑭ ᒥᔅᑕᐃ ᑮ ᓂᑖᐎᑭᑖᒪᑲᓂᓕᐤ᙮ 17ᑮ ᒥᑐᓀᓕᑕᒻ ᒫᑲ ᐅᑌᐃᒃ, ᐁ ᐃᑗᑦ, ᑖᓂ ᑫ ᐃᑎᔮᓐ, ᐁᑳ ᐁ ᐋᔮᔮᓐ ᐃᑕ ᑫ ᐊᔅᑖᔮᓐ ᓂ ᓂᑖᐎᑭᑖᑲᓇ? 18ᑮ ᐃᑗᐤ ᒫᑲ, ᐅᒪ ᓂ ᑳ ᑐᑌᓐ: ᓂ ᑳ ᓂᒋᐱᑌᓐ ᓂ ᑕᑾᐃᑫᐎᑲᒥᑾ, ᓀᔥᑕ ᓂ ᑳ ᐅᔑᑖᓐ ᐊᐙᓯᑌ ᐁ ᒥᔖᑭ; ᐁᑯᑕ ᒫᑲ ᑫ ᓇᐊᔅᑖᔮᓐ ᒥᓯᐌ ᓂ ᓂᑖᐎᑭᑖᑲᓇ ᓀᔥᑕ ᓂᑦ ᐋᔮᓇ᙮ 19ᓂ ᑳ ᐃᑕᐤ ᒫᑲ ᓂᑦ ᐊᒑᒃ, ᐊᒑᒃ, ᑭᑦ ᐋᔮᓐ ᒥᔅᑕᐃ ᐋᐸᒋᑖᐎᓇ ᐁ ᓇᐊᔅᑌᑭ ᑫ ᐃᔅᐸᓕᑭ ᒥᒉᑦ ᐱᐴᓋ; ᐋᓜᓯ, ᒥᒋᓱ, ᒥᓂᑴ, ᓀᔥᑕ ᒧᒋᑫᓕᑕ᙮ 20ᒫᑲ ᑮᒋᒪᓂᑐ ᑮ ᐃᑌᐤ, ᑭᓚ ᑮᔥᑴᑳᓐ, ᐊᓄᒡ ᑫ ᑎᐱᔅᑳᒃ ᑭᑦ ᐊᒑᒃ ᑭ ᑳ ᓇᑕᐌᓕᑕᒫᑲᐎᓐ: ᐁᑯ ᒫᑲ ᐊᐌᓇ ᑫ ᑎᐱᓚᐌᐎᓰᑦ ᐊᓂᐃ ᑫᒀᓇ ᑳ ᑮ ᓇᐃᑕᔅᑖᔭᓐ?
21ᐁᑯ ᑖᐱᔅᑯᒡ ᐁᑎᑦ ᐊᓇ ᑳ ᓇᐊᔅᑣᓱᑦ ᒥᔕᑭᓯᐎᓇ, ᐁᑳ ᒫᑲ ᑳ ᒥᔕᑭᓰᑦ ᐁ ᐃᑌᓕᒥᑯᑦ ᑭᒋᒪᓂᑐᐗ᙮
ᐊᔅᐯᓕᒧᑐᑕᐤ ᑭᒋᒪᓂᑐ
(ᒫᑎᐤ 6:25–34)
22ᑮ ᐃᑌᐤ ᒫᑲ ᐅ ᑭᔅᑭᓄᐊᒪᐙᑲᓇ, ᐁᐗᑯ ᐌᒋ ᐃᑎᑖᑾᒃ, ᐁᑳᐎᓚ ᒫᒥᑐᓀᓕᑕᒧᒃ ᑭ ᐱᒫᑎᓯᐎᓂᐗᐤ, ᑫᒀᓐ ᑫ ᒥᒋᔦᒃ; ᐁᑳ ᓀᔥᑕ ᑭᔭᐙᐗ ᑫᒀᓐ ᑫ ᐳᔅᑎᔥᑲᒣᒃ᙮ 23ᐊᐙᓯᑌ ᐃᑌᓕᑖᑾᓐ ᐱᒫᑎᓯᐎᓐ ᐃᔥᐱᔥ ᒥᒋᒻ, ᓀᔥᑕ ᒥᔭᐤ ᐃᔥᐱᔥ ᐎᓛᒋᑲᓐ᙮ 24ᒫᒥᑐᓀᓕᒥᑯᒃ ᑳᑳᑭᐗᒃ: ᐌᓴ ᓇᒪᐎᓚ ᐗᓭᓶᐱᓂᑫᐗᒃ, ᓇᒪ ᓀᔥᑕ ᒪᓂᔑᑫᐗᒃ; ᐁᑳ ᑳ ᐅᑦ ᐊᔅᑖᓱᐎᑲᒥᑯᒋᒃ, ᐁᑳ ᓀᔥᑕ ᑳ ᐅ ᑕᒀᐃᑫᐎᑲᒥᑯᒋᒃ; ᐊᔕᒥᑯᐗᒃ ᒫᑲ ᑭᒋᒪᓂᑐᐗ᙮ ᑖᓐ ᐁᔅᐱᒋ ᐊᐙᓯᑌ ᐁᑌᓕᑖᑯᓯᔦᒃ ᐃᔥᐱᔥ ᐱᓓᓯᐗᒃ? 25ᐊᐌᓇ ᐁ ᐃᑕᔑᔦᒃ ᒫᑲ, ᐁ ᒧᒋ ᒫᒥᑐᓀᓕᑕᒃ, ᑫ ᑮ ᑕᑯᑖᑦ ᐯᔭᒃ ᑭᐤᐱᑦ ᐁ ᐃᔅᑯᑳᐸᐎᑦ? 26ᑮᔥᐱᓐ ᒫᑲ ᐁᑳ ᑮ ᑐᑕᒧᐌᑴ ᐊᓂᒪ ᑳ ᒫᐗᒋ ᐋᐱᔅᑌᓕᑖᑾᒃ, ᑖᓀᑭ ᐌᒋ ᒪᒥᑐᓀᓕᑕᒣᒃ ᐊᓂᐃ ᑯᑕᑭᔭ? 27ᒫᒥᑐᓀᓕᒥᑯᒃ ᐅᔅᑭᑌᐸᑾᒃ ᐁ ᐃᔑ ᐅᐱᑭᒋᒃ: ᓇᒪᐎᓚ ᐊᑑᔅᑫᐗᒃ, ᓇᒪ ᓀᔥᑕ ᐱᒫᐃᑫᐗᒃ; ᐁᓕᐌᒃ ᒫᑲ ᑭᑦ ᐃᑎᓇᐗᐤ, ᓇᒪᐎᓚ ᓴᓚᒪᓐ ᐋᑕ ᐁ ᐃᔑ ᑭᔅᑌᓕᑖᑯᓯᑦ ᑮ ᐃᔑᐅ ᑖᐱᔅᑯᒡ ᐯᔭᒃ ᐅᑯ᙮ 28ᑮᔥᐱᓐ ᒫᑲ ᑭᒋᒪᓂᑐ ᐅᒪ ᐃᔑ ᐁᑾᓇᐊᒧᑴ ᒪᔅᑯᔑᔭ, ᐊᓄᒡ ᐁ ᑭᔑᑳᒃ ᑳ ᐃᑕᑾᑭ ᓂᑖᐎᑭᒋᑲᓂᒃ, ᐙᐸᑫ ᒫᑲ ᐃᔥᑯᑌᐎᑲᒥᑯᒃ ᐃᔑᐌᐱᓂᑳᑌᒃ; ᑖᓐ ᐁᔅᐱᒋ ᐊᐙᓯᑌ ᑫ ᐎᓛᑕᐃᑖᒃ, ᐅ ᑭᓚᐗᐤ ᐋᐱᔑᔥ ᐱᑯ ᑎᐋᐺᔦᓕᑕᒣᒃ?
29ᐁᑳᐎᓚ ᒫᑲ ᓈᓇᑕᐌᓕᑕᒧᒃ ᑫ ᒥᒋᔦᒃ ᓀᔥᑕ ᑫ ᒥᓂᑴᔦᒃ, ᐁᑳ ᓀᔥᑕ ᑶᑕᐎᐃᑌᓕᑕᒧᒃ᙮ 30ᐌᓴ ᒥᓯᐌ ᐅᐅ ᑫᒀᓇ ᐁ ᑕᑐᔅᑳᓀᓯᒋᒃ ᐃᓕᓕᐗᒃ ᐊᔅᑮᒃ ᓈᓇᑕᐌᓕᑕᒶᒃ; ᑯᑖᐎᐗᐤ ᒫᑲ ᑭᔅᑫᓕᑕᒻ ᐁ ᓇᑕᐌᓕᑕᒣᒃ ᐅᐅ ᑫᒀᓇ᙮ 31ᒫᑲ ᐊᐙᓯᑌ ᓈᓇᑕᐌᓕᑕᒸᒃ ᑭᒋᒪᓂᑐ ᐅᑦ ᐅᑭᒫᐎᐎᓐ; ᒥᓯᐌ ᐅᐅ ᑫᒀᓇ ᒫᑲ ᑭ ᑳ ᐊᓯᒋ ᒥᓕᑲᐎᓇᐗᐤ᙮
ᒥᔕᑭᓯᐎᓐ ᑭᒋᑭᔑᑯᒃ
(ᒫᑎᐤ 6:19–21)
32ᐁᑳᐎᓚ ᓭᑭᓯᒃ, ᐁ ᒐᑲᐙᔑᔑᔦᒃ ᒫᓂᔥᒑᓂᔑᑐᒃ; ᐌᓴ ᑰᑖᐎᐗᐤ ᒥᓜᓕᑕᒻ ᑭᒋ ᒥᓕᑖᒃ ᐊᓂᐁᓕᐤ ᐅᑭᒫᐎᐎᓂᓕᐤ᙮ 33ᐊᑖᐙᑫᒃ ᐊᓂᒪ ᑳ ᐋᔮᔦᒃ, ᒥᓕᐌᒃ ᒫᑲ; ᐅᑎᓇᒫᓱᒃ ᒫᑲ ᒥᐗᑕ ᐁᑳ ᑳ ᐊᑎ ᑳᔮᔑᐗᑭ, ᒥᔕᑭᓯᐎᓐ ᑭᒋᑭᔑᑯᒃ ᐁᑳ ᑫ ᑮ ᒣᔅᑎᓂᑳᑌᒃ, ᐃᑕ ᑭᒧᑎᔉ ᐁᑳ ᐁ ᐯᔣᐸᑕᒃ, ᐁᑳ ᓀᔥᑕ ᒪᓂᒍᔥ ᐁ ᓂᔑᐗᓈᒋᑖᑦ᙮ 34ᐌᓴ ᐃᑕ ᐁ ᐃᔑ ᑕᑾᒃ ᑭ ᒥᔕᑭᓯᐎᓂᐗᐤ, ᐁᑯᑕ ᓀᔥᑕ ᑫ ᐃᑕᑾᒃ ᑭᑌᐃᐗᐤ᙮
ᑳ ᐊᔕᐙᐱᒋᒃ ᐊᑐᔅᑫᓚᑲᓇᒃ
35ᐁᑯᔑ ᐸᑾᑌᐅᒃ ᐃᑕ ᐁ ᑭᑲᔭᐌᔦᒃ, ᐁᑯᔑ ᓀᔥᑕ ᑭ ᐙᔅᑌᓇᒫᑲᓂᐙᐗ ᐁ ᓴᔅᑲᐃᑳᑌᑭ᙮ 36ᑭᓚᐗᐤ ᒫᑲ ᓇᔅᐱᑖᑯᒃ ᐃᓕᓕᐗᒃ ᐁ ᐯᔗᓕᒫᒋᒃ ᐅᑦ ᐅᑭᒫᒥᐙᐗ, ᑭᐌᓕᑌ ᐎᑭᑐᐎᓂᒃ ᐅᒋ; ᐃᔅᐱ ᐯᒋ ᑕᑯᔑᓂᓕᑌ ᓀᔥᑕ ᐸᐹᐙᐃᑫᓕᑌ, ᑣᔦᒃ ᑭᒋ ᐋᐸᐊᒪᐙᒋᒃ᙮ 37ᔕᐌᓕᑖᑯᓯᐗᒃ ᐊᓂᑭ ᐊᑑᔅᑫᓛᑲᓇᒃ, ᐅᑭᒪᐗ ᑕᑯᔑᓂᓕᑌ, ᑮ ᒥᔅᑳᑯᒋᒃ ᐁ ᐊᔕᐙᐱᒋᒃ: ᑖᐺ ᑭᑦ ᐃᑎᓇᐗᐤ, ᑲᑕ ᐸᑾᑌᐅᓱ, ᓀᔥᑕ ᑲᑕ ᓇᐊᐱᐁᐤ ᑭᒋ ᒥᒋᓱᓕᒋ, ᓀᔥᑕ ᑲᑕ ᐯᒋ ᐱᒥᐁᐤ᙮ 38ᑮᔥᐱᓐ ᒫᑲ ᑕᑯᔑᑫ ᓂᔓ ᓂᐯᐱᐎᓂᒃ, ᓀᔥᑕᐱᑯ ᑕᑯᔑᑫ ᓂᔅᑐ ᓂᐯᐱᐎᓂᒃ, ᐁᑯ ᐃᔑ ᓀᔥᑕ ᒥᔅᑲᐙᑌ, ᔕᐌᓕᑖᑯᓯᐗᒃ ᐊᓂᑭ ᐊᑑᔅᑫᓛᑲᓇᒃ᙮ 39ᐅᒪ ᒫᑲ ᑭᔅᑫᓕᑕᒧᒃ ᑮᔥᐱᓐ ᐊᓇ ᑳ ᑎᐯᓕᑕᒃ ᐙᔅᑳᔨᑲᓂᓕᐤ ᑮ ᑭᔅᑫᓕᑕᒧᑯᐸᓀ ᑫᑯ ᑎᐹᔨᑲᓐ ᐱᓯᒧᑳᓂᒃ ᑭᒧᑎᔅᑲ ᑫ ᑕᑯᔑᓂᓕᒋ, ᑲᑕ ᑮ ᐊᔕᐙᐱᐸᓐ, ᐁᑯ ᐅ ᐙᔅᑳᔨᑲᓂᒻ ᐁᑳ ᑫ ᑮ ᐸᔅᐱᐱᑯᓂᑳᑌᓕᔅᐸᓐ᙮ 40ᐁᐗᑯ ᐅᒋ ᑭᓚᐗᐤ ᓀᔥᑕ ᐋᔦᔅᑲᐎᓰᒃ: ᐌᓴ ᐃᓕᓕᐎᑯᓯᓵᓐ ᐯᒋ ᑕᑯᔑᓐ ᑎᐹᔨᑲᓂᒃ ᐱᓯᒧᑳᓂᒃ ᒣᒀᒡ ᐁᑳ ᐁ ᐃᑌᓕᑕᒣᒃ᙮
ᑳ ᑖᐺᔦᓕᑕᒃ ᓀᔥᑕ ᐱᑯ ᐁᑳ ᑳ ᑖᐺᔦᓕᑕᒃ ᐊᑐᔅᑫᓚᑲᓐ
(ᒫᑎᐤ 24:45–51)
41ᐁᑯ ᐱᑕᕐ ᐁᑖᑦ, ᑌᐯᓕᒋᑫᔭᓐ, ᓂᓚᓈᓐ ᓈ ᑭᑦ ᐃᔑᓈᓐ ᐅᒪ ᓇᔅᐱᑐᐌᐎ ᐋᑕᓗᑳᓐ, ᓀᔥᑕᐱᑯ ᒥᓯᐌ ᓈ ᑭᑦ ᐃᑖᐗᒃ?
42ᐅᑎᐯᓕᒋᑫᐤ ᒫᑲ ᑮ ᐃᑗᐤ, ᐊᐌᓇ ᒫᑲ ᐊᓇ ᐁ ᒀᔭᔅᑭᑎᑦ ᓀᔥᑕ ᐁ ᑲᑫᑕᐌᓕᑕᒃ ᑲᓇᐌᓕᑎᓛᑲᓐ, ᑫ ᑎᐯᓕᑕᒥᐃᑯᑦ ᐅᑦ ᐅᑭᒫᒪ ᐅ ᐙᔅᑲᔨᑲᓂᒥᓕᐤ, ᑭᒋ ᒫᑎᓇᒪᐗᑦ ᐅ ᒥᒋᒥᒥᓕᐤ, ᐌᑎᒋᐸᓕᓕᑭ? 43ᔕᐌᓕᑖᑯᓯᐤ ᐊᓇ ᐊᑑᔅᑫᓛᑲᓐ, ᐅᑦ ᐅᑭᒫᒪ, ᑕᑯᔑᓂᓕᑌ, ᑫ ᒥᔅᑳᑯᑦ ᐅᒪ ᐁ ᐃᔑ ᑐᑕᒃ᙮ 44ᑖᐺ ᑭᑦ ᐃᑎᓇᐗᐤ, ᑲᑕ ᑎᐯᓕᑕᒥᐃᑯ ᒥᓯᐌ ᑳ ᐋᔮᓕᒋ᙮ 45ᒫᑲ ᑮᔥᐱᓐ ᐊᓇ ᐊᑑᔅᑫᓛᑲᓐ ᐃᑗᑌ ᐅᑌᐃᒃ, ᓂᑦ ᐅᑭᒫᒻ ᑆᔅᑕᐎ ᑕᑯᔑᓐ: ᓀᔥᑕ ᒫᒋ ᐅᑖᒪᐙᑌ ᓈᐯᐎ ᐊᑑᔅᑫᓛᑲᓇ ᓀᔥᑕ ᐊᑑᔅᑫᓛᑲᓂᔅᑴᐗ, ᓀᔥᑕ ᒥᒋᓱᑌ, ᓀᔥᑕ ᒥᓂᑴᑌ, ᓀᔥᑕ ᑮᔥᑴᐯᑌ; 46ᐊᓇ ᐊᑑᔅᑫᓛᑲᓐ ᐅᑦ ᐅᑭᒫᒪ ᑲᑕ ᑕᑯᔑᓂᓕᐗ ᑭᔑᑳᓕᑫ ᐃᔅᐱ ᐁᑳ ᐁ ᐊᔕᐙᐸᒫᑦ, ᓀᔥᑕ ᑎᐹᔨᑲᓂᒃ ᐱᓯᒧᑳᓂᒃ ᐁᑳ ᐁ ᑭᔅᑫᓕᑕᒃ, ᑲᑕ ᑮᔥᑭᔓᑯ ᒫᑲ, ᓀᔥᑕ ᑳᑕ ᐃᑎᔕᐅᑯ ᑭᒋ ᐎᒉᐙᑦ ᐁᑳ ᑳ ᑖᐺᑕᒥᓕᒋ᙮
47ᐊᓇ ᒫᑲ ᐊᑑᔅᑫᓛᑲᓐ ᑳ ᑭᔅᑫᓕᑕᒸᑦ ᐅᑦ ᐅᑭᒫᒪ ᐅᑦ ᐃᑌᓕᑕᒧᐎᓂᓕᐤ, ᐁᑳ ᒫᑲ ᑳ ᐋᔦᔅᑲᐎᐃᑎᓱᑦ, ᐁᑳ ᓀᔥᑕ ᑳ ᑐᑕᒸᑦ ᑳ ᐃᑌᓕᑕᒥᓕᒋ ᒥᔅᑕᐃ ᑲᑕ ᐸᐸᓴᔅᑌᐗᐤ᙮ 48ᒫᑲ ᐊᓇ ᐁᑳ ᑳ ᑭᔅᑫᓕᑕᒃ, ᑳ ᑐᑕᒃ ᒫᑲ ᑫᒀᓇ ᑳ ᐅᒋ ᐃᑌᓕᑖᑯᓯᑦ ᑭᒋ ᐸᐸᓭᔅᑌᐙᑲᓂᐎᑦ, ᐋᐱᔑᔥ ᑲᑕ ᐸᐸᓴᔅᑌᐗᐤ᙮ ᐌᓴ ᐊᓇ ᒥᔅᑕᐃ ᑳ ᒥᓛᑲᓂᐎᑦ, ᒥᔅᑕᐃ ᑲᑕ ᓇᑕᐌᓕᑕᒪᐗᐤ; ᐊᓇ ᒫᑲ ᒥᔅᑕᐃ ᑳ ᑎᐯᓕᑕᒥᐃᑯᑦ ᐃᓕᓕᐗ, ᐁᐗᑯ ᐊᐙᓯᑌ ᑫ ᐸᑯᓭᓕᒥᑯᑦ᙮
ᒋᓴᔅ ᑫ ᐅᒋ ᐸᑳᓂᐃᑐᓈᓂᐗᒃ
(ᒫᑎᐤ 10:34–36)
49ᓂ ᑮ ᐯᒋ ᑕᑯᔑᓂᓐ ᑭᒋ ᐃᑎᔕᐊᒫᓐ ᐃᔥᑯᑌᐤ ᐊᔅᑮᒃ, ᑫᒀᓐ ᒫᑲ ᑫ ᐃᑌᔮᓐ ᑮᔥᐱᓐ ᐋᔕᔾ ᑳ ᓴᔅᑲᐃᑳᑌᑴ᙮ 50ᒫᑲ ᓂᑦ ᐋᔮᓐ ᓯᑲᐋᑖᑫᐎᓐ ᑫ ᐅᒋ ᓯᑲᐋᑖᑲᐎᔮᓐ; ᐙ ᒫᑲ ᒥᑯᔥᑳᑌᓕᑕᒫᓐ ᐹᑎᒫ ᑮ ᑎᐱᐸᓕᑫ! 51ᐯᒋ ᑕᑯᔑᓐ ᑭᒋ ᐃᑎᔕᐊᒃ ᑳᔮᒣᓕᑕᒧᐎᓂᓕᐤ ᐊᔅᑮᒃ ᑭᑦ ᐃᑌᓕᒥᓇᐗᐤ ᓇ? ᑭ ᐐᑕᒫᑎᓇᐗᐤ, ᓇᒪᐎᓚ; ᒫᑲ ᐹᐱᑐᔥ ᐃᑌᓕᑕᒧᐎᓐ᙮ 52ᐌᓴ ᐊᓄᒡ ᐅᒋ ᓂᔮᓚᓐ ᑲᑕ ᐃᑖᐗᒃ ᐯᔭᒃ ᐙᔅᑳᔨᑲᓂᒃ ᐁ ᐹᐱᑐᔥ ᐃᑌᓕᑕᑭᒃ, ᓂᔅᑐ ᐁ ᐗᑳᑖᒋᒃ ᓂᔓ, ᓀᔥᑕ ᓂᔓ ᐁ ᐗᑳᑖᒋᒃ ᓂᔅᑐ᙮ 53ᐅᑖᐎᒪᐤ ᑲᑕ ᐗᑳᑌᐤ ᐅᑯᓯᓴ, ᓀᔥᑕ ᐅᑯᓯᓯᒫᐤ ᑲᑕ ᐗᑳᑌᐤ ᐅᑖᐎᔭ; ᐅᑳᐎᒪᐤ ᑲᑕ ᐗᑳᑌᐤ ᐅᑖᓂᔅ, ᓀᔥᑕ ᐅᑖᓂᓯᒪᐤ ᑲᑕ ᐗᑳᑌᐤ ᐅᑳᐎᔭ; ᐅᓯᑯᓯᒫᐤ ᑲᑕ ᐗᑳᑌᐤ ᐅ ᓇᐋᑲᓂᔅᑴᒪ, ᐅᓇᐋᑲᓂᔅᑴᒥᒪᐤ ᒫᑲ ᑲᑕ ᐗᑳᑌᐤ ᐅᓯᑯᓴ᙮
ᑭᒋ ᑭ ᓂᓯᑐᒋᑳᑌᒃ ᓂᑳᓐ
(ᒫᑎᐤ 16:2–3)
54ᑮ ᐃᑌᐤ ᒫᑲ ᐃᓕᓕᐗ, ᐃᔅᐱ ᐎᐋᐸᑕᒣᑯ ᐗᔅᑯ ᓇᑲᐯᐊᓄᑖᒃ ᐁ ᐅᐱᐸᓕᒃ, ᑣᔦᒃ ᑭᑦ ᐃᑣᓇᐗᐤ, ᐯᒋ ᑭᒥᐗᓐ; ᐁᑯ ᓀᔥᑕ ᐁᑭᒃ᙮ 55ᐃᔅᐱ ᒫᑲ ᐎᐋᐸᑕᒣᑯ ᐁ ᔖᐗᓂᓗᐌᒃ, ᑭᑦ ᐃᑣᓇᐗᐤ, ᑲᑕ ᑭᔑᑌᐤ; ᐃᑭᓐ ᒫᑲ᙮ 56ᑭᓚᐗᐤ ᐅᑖᔭᒥᐁᑳᓱᑐᒃ, ᑭ ᓂᓯᑖᐎᓀᓇᐗᐤ ᐁ ᐃᔑᓈᑾᒃ ᑭᔑᒃ, ᓀᔥᑕ ᐊᔅᑭ; ᒫᑲ ᑖᓀᑭ ᐌᒋ ᐁᑳ ᓂᓯᑖᐎᓇᒣᒃ ᐅᐅ ᑭᔑᑳᐗ?
ᑭᓕᐱ ᐐᒋ ᐃᑌᓕᑕᒧᒃ ᐊᓇ ᑳ ᓈᔦᑕᐌᓕᒥᔉ
(ᒫᑎᐤ 5:25–26)
57ᐁᐁ, ᑖᓀᑭ ᒫᑲ ᐌᒋ ᐁᑳ ᑭᓚᐗᐤ ᑎᐹᔅᑯᓀᓕᑕᒣᒃ ᑳ ᒀᔭᔅᑾᒃ? 58ᐃᔅᐱ ᐙᒉᐗᒋ ᐊᓇ ᑳ ᓈᔦᑕᐌᓕᒥᔉ, ᐁ ᓇᑕᐙᐸᒣᒃ ᐅᑎᐹᔅᑯᓂᑫᐤ, ᒣᒀᒡ ᐁ ᐃᑐᑌᔭᓐ, ᔮᒀᒥᓯ ᑭᒋ ᐎᑾᒋᐃᑳᐎᔭᓐ ᐅᒋᒌᒃ ᐅᒋ; ᐁᑳ ᑭᒋ ᐃᑐᑕᐃᔉ ᐅᑎᔥᑳᐤ ᐅᑎᐹᔅᑯᓂᑫᐤ, ᐅᑎᐹᔅᑯᓂᑫᐤ ᒫᑲ ᑭᒋ ᐸᑭᑎᓂᔉ ᐊᑑᔅᑫᓛᑲᓇ ᐅᒋᒋᓕᒃ, ᐊᑑᔅᑫᓛᑲᓐ ᒫᑲ ᑭᒋ ᐃᑎᔑᓂᔉ ᑭᐸᐅᑐᐎᑲᒥᑯᒃ᙮ 59ᑭ ᐎᑕᒫᑎᓐ, ᓇᒪᐎᓚ ᐊᓐᑕ ᑭ ᑳ ᐅᒋ ᐗᓚᐐᓐ, ᐹᑎᒫ ᑭ ᑎᐸᐊᒪᓀ ᐙᐙᒡ ᒫᒋᒡ ᔔᓕᐊᓈᐱᔅᑯᔑᔥ᙮
Currently Selected:
ᐅᐸᓓᑭᔅ ᓘᒃ 12: MCNT91
Highlight
Copy
Compare
Share
Want to have your highlights saved across all your devices? Sign up or sign in
The text of the Bible in Moose Cree is in the public domain.
Moose Cree New Testament © Canadian Bible Society, 1991.
