ᒎᑦ 1
1
1ᒎᑦ, ᐅᑦ ᐊᑑᔅᑫᓛᑲᓇ ᒋᓴᔅ ᙭, ᓀᔥᑕ ᐎᒋᔖᓇ ᒉᒻᔅ, ᐁ ᒪᓯᓇᐊᒪᐙᑦ ᐊᓂᐃ ᑳ ᐸᓓᑭᐃᑯᓕᒋ ᑭᒋᒪᓂᑐᐗ ᐌᐅᑕᐎᒪᐎᓕᒋ, ᓀᔥᑕ ᑳ ᑲᓇᐌᓕᒫᑲᓂᐎᓕᒋ ᒋᓴᔅ ᙭ᑎᒃ, ᓀᔥᑕ ᑳ ᓇᑐᒫᑲᓂᐎᓕᒋ᙮
2ᔖᐌᓕᒋᑫᐎᓐ ᑭ ᑳ ᐎ ᐋᔮᓇᐗᐤ, ᓀᔥᑕ ᑳᔮᒣᓕᑕᒧᐎᓐ, ᓀᔥᑕ ᓵᑭᐃᐌᐎᓐ ᑭ ᑳ ᐎ ᓚᑭᑕᒫᑲᐎᓇᐙᐤ᙮
ᓇᔅᐹᒋ ᑭᔅᑭᓄᐊᒫᑫᐗᒃ
3ᓯᐋᑭᐃᑕᑾᒃ, ᐃᔅᐱ ᓈᔅᐱᒡ ᒥᐋᒥᑐᓀᓕᑕᒫᓐ ᑭᒋ ᒪᓯᓇᐊᒫᑕᑾᒃ ᐁ ᐋᓕᒧᑕᒫᓐ ᒫᒪᐎ ᐱᒫᒋᐃᐌᐎᓐ, ᑮ ᓇᑕᐌᓕᑖᑾᓐ ᑭᒋ ᒪᓯᓇᐊᒫᑕᑾᒃ ᑭᒋ ᔑᑭᒥᑕᑾᒃ ᐁᓕᑯᒃ ᑭᒋ ᐎ ᑲᑴ ᑲᓇᐁᓕᑕᒣᒃ ᐊᓂᒪ ᑖᐺᔦᓕᑕᒧᐎᓐ ᐯᔭᑾᐤ ᑳ ᑮ ᐸᑭᑎᓇᒪᐙᑲᓂᐎᒋᒃ ᐅᐸᓓᑭᓴᒃ᙮ 4ᐌᓴ ᐋᑎᑦ ᐃᓕᓕᐗᒃ ᑭᒧᒡ ᑮ ᐱᑐᑫᑖᒋᒧᐗᒃ, ᐌᔅᑲᒡ ᑳ ᑮ ᐅᓚᑭᒫᑲᓂᐎᒋᒃ ᑭᒋ ᐋᔮᒋᒃ ᐅᒣᓕᐤ ᓂᔑᐗᓈᒋᒥᐌᐎᓂᓕᐤ; ᑳ ᒪᒋᑣᒋᒃ ᐃᓕᓕᐗᒃ, ᐁ ᑴᔅᑭᓇᒸᒋᒃ ᑭ ᑭᒋᒪᓂᑐᒥᓇᐗ ᐅ ᔕᐌᓕᒋᑫᐎᓂᓕᐤ ᑮᔥᑴᐙᑎᓯᐎᓂᒃ ᐃᔑ, ᓀᔥᑕ ᐁ ᐋᓉᑕᐙᒋᒃ ᐱᔦᔭᑯᓕᒋ ᐅᑎᐯᓕᒋᑫᐗ ᑭᒋᒪᓂᑐᐗ, ᓀᔥᑕ ᑭ ᑎᐯᓕᒋᑫᒥᓇᐗ ᒋᓴᔅ ᙭᙮
5ᐁᐗᑯ ᐅᒋ ᑭ ᑭᔅᑭᓯᑐᑕᒥᐃᑎᓇᐗᐤ, ᐋᑕ ᐯᔭᑾᐤ ᐅᒪ ᐁ ᑮ ᑭᔅᑫᓕᑕᒣᒃ, ᐅᑎᐯᓕᒋᑫᐤ ᐁ ᑮ ᐱᒫᒋᐋᑦ ᐃᓕᓕᐗ ᐃᒋᑉᑦ ᐊᔅᑮᒃ ᐅᒋ, ᐹᑎᒫ ᑮ ᓂᔑᐗᓈᒋᐁᐤ ᐊᓂᐃ ᐁᑳ ᑳ ᑮ ᑖᐺᑕᒥᓕᒋ᙮ 6ᐊᓂᑭ ᐁᓐᒐᓚᒃ ᓀᔥᑕ ᐁᑳ ᑳ ᑮ ᑲᓇᐌᓕᑕᑭᒃ ᐅ ᑎᐯᓕᒋᑫᐎᓂᐗᐤ, ᑳ ᑮ ᓇᑲᑕᑭᒃ ᒫᑲ ᑎᐱᓚᐌ ᐅ ᑕᔑᑫᐎᓂᐗᐤ, ᑲᓇᐌᓕᒥᑯᐗᒃ ᐁ ᒫᒫᒋᒀᐱᓱᒋᒃ ᑳᑭᑫ ᐱᐙᐱᔅᑴᐋᐱᐊ ᐃᑕ ᐁ ᐗᓂᑎᐱᔅᑳᓕᒃ ᐱᓕᔥ ᑎᐹᔅᑯᓂᑳᓂᐗᑫ ᑭᒋ ᑭᔑᑳᑫ᙮ 7ᑖᐱᔅᑯᒡ ᓴᑕᒻ ᓀᔥᑕ ᑯᒪᕋ, ᓀᔥᑕ ᐊᓂᐃ ᐃᑖᐎᓇ ᐙᔅᑲ ᑖᐱᔅᑯᒡ ᐃᔑ, ᐁ ᐸᑭᑎᓂᑎᓱᒋᒃ ᐱᔑᒀᑎᓯᐎᓂᒃ, ᐁ ᓈᓇᑕᐌᓕᑕᑭᒃ ᐋᔭᒡ ᐎᔮᓯᓕᐤ, ᐸᑭᑎᓇᐗᒃ ᑭᒋ ᑭᔅᑭᓄᐙᐸᒫᑲᓂᐎᒋᒃ, ᐁ ᑎᐸᒪᒋᑖᒋᒃ ᑲᒀᑕᑭᓯᐎᓂᓕᐤ ᑳᑭᑫ ᐃᔥᑯᑌᒃ᙮
8ᐁᑯ ᑖᐱᔅᑯᒡ, ᐅᑯ ᐎᓂᓯᐎ ᐅᐸᐗᒧᐗᒃ ᐎᓂᑕᐗᒃ ᐎᔮᓯᓕᐤ, ᐋᑕᐌᓕᑕᒶᒃ ᑎᐯᓕᒋᑫᐎᓂᓕᐤ, ᓀᔥᑕ ᒪᒋ ᐋᓕᒧᑕᒶᒃ ᑭᔅᑌᓕᑖᑯᓯᐎᓇ᙮ 9ᐁᓕᐌᒃ ᒫᑳ ᒫᐃᑫᓪ ᐊᓇ ᑭᒋᐁᓐᒐᓪ, ᐃᔅᐱ ᐃᐋᔑᑌᒫᑦ ᒪᒋᒪᓂᑐᐗ, ᑮ ᐙᔦᔥ ᐃᑗᐤ, ᒧᓯᓴ ᐎᔭᐎᓕᐤ ᐅᒋ, ᓇᒪᐎᓚ ᑮ ᐃᑌᓕᑕᒻ ᑭᒋ ᑭᑳᒫᑦ, ᒫᑲ ᑮ ᐃᑗᐤ, ᐅᑎᐯᓕᒋᑫᐤ ᑭ ᑳ ᐎ ᑭᑕᐊᒫᒃ᙮ 10ᒫᑲ ᐅᑯ ᒪᒋ ᐋᓕᒧᑕᒶᒃ ᐊᓂᐃ ᑫᒀᓇ ᐁᑳ ᑳ ᑭᔅᑫᓕᑕᑭᒃ: ᒫᑲ ᑫᒀᓐ ᐅᒋᑕᐤ ᑳ ᑭᔅᑫᓕᑕᑭᒃ, ᑖᐱᔅᑯᒡ ᐃᓚᑐ ᐊᐌᓯᓴᒃ, ᐅᐅ ᑫᒀᓇ ᐅᒋ ᐎᓂᐃᑎᓱᐗᒃ᙮ 11ᑲᒀᑕᑭᓯᐗᒃ! ᐌᓴ ᑮ ᐱᒧᑌᐗᒃ ᐅ ᒣᔅᑲᓈᓕᒃ ᑫᓇ, ᓀᔥᑕ ᑮ ᐱᒥᐸᑕᐗᒃ ᐅ ᐗᓂᔑᓄᐎᓂᓕᒃ ᐯᓚᒪ ᑭᒋ ᐅᑎᓯᒋᒃ, ᑮ ᓂᔑᐗᓈᑎᓯᐗᒃ ᒫᑲ ᐅᑦ ᐋᓉᑕᒧᐎᓂᓕᒃ ᑯᕋᐊ᙮ 12ᐅᑯ ᒪᓯᓇᓱᐎᓂᐎᐗᒃ ᑭ ᓵᑭᐃᐌᐎ ᒪᑯᔐᐎᓂᐙᒃ, ᐃᔅᐱ ᐙᒋᒪᑯᔐᒥᑖᑾᒃ, ᐁᑳ ᐁ ᓭᑭᓯᒋᒃ ᐁ ᐊᔕᒥᑎᓱᒋᒃ: ᐗᔅᑯᐎᐗᒃ ᐁᑳ ᑳ ᓂᐱᐗᑭ, ᐁ ᐌᐌᐹᔅᑕᑭ; ᒥᔅᑎᑾᒃ ᐅ ᒥᓂᔑᒥᐗᐗ ᑳ ᓂᔑᐗᓈᑕᓂᓕᑭ, ᐁᑳ ᐁ ᒥᓂᔑᐎᒋᒃ, ᓂᔡᐤ ᐁ ᓂᐱᒋᒃ, ᐁ ᒋᒋᐸᔅᑯᒋᐌᐱᑖᑲᓂᐎᒋᒃ; 13ᐁ ᑯᔅᑖᑎᑯᓯᒋᒃ ᑲᔅᑲᓇᒃ ᑭᒋᑲᒥᒃ, ᐁ ᐱᔅᑌᐗᑖᒧᒋᒃ ᑎᐱᓚᐌ ᐅ ᓇᓀᐯᐎᓯᐎᓂᐗᐤ; ᐯᐹᒥᐸᓕᒋᒃ ᐊᒐᑯᔕᒃ, ᐊᓂᑭ ᑳ ᐃᑕᔅᑣᒋᒃ ᐃᑕ ᐁ ᒪᑲᑌᐎ ᑎᐱᔅᑳᓕᒃ ᑳᑭᑫ᙮
14ᐃᓇᒃ ᒫᑲ ᓀᔥᑕ, ᐊᓇ ᓂᑯᑣᔅ ᑳ ᐋᓂᔅᑫ ᐅᒌᑦ ᐋᑕᒥᒃ, ᑮ ᑭᔅᑭᐙᐃᑫᐎ ᐋᓕᒧᒣᐤ ᐅᐅ, ᐁ ᐃᑗᑦ, ᒫᑎᑲ, ᐅᑎᐯᓕᒋᑫᐤ ᐯᒋ ᐃᑐᑌᐤ ᐁ ᐎᒉᐙᑦ ᒥᑖᑡᐤ ᑭᒋᒥᑖᑐᒥᑕᓇᐤ ᐅ ᐸᓓᑭᓯᒪ, 15ᑭᒋ ᑎᐹᔅᑯᓈᑦ ᒥᓯᐌ, ᓀᔥᑕ ᑭᒋ ᔖᑯᒋᒫᑦ ᒥᓯᐌ ᐁ ᐃᑕᓯᓕᒋ ᑳ ᒪᒑᑎᓯᓕᒋ, ᒥᓯᐌ ᐅᑦ ᐃᓯᒋᑫᐎᓂᓕᐗ ᑳ ᒪᒑᑎᓯᒪᑲᓂᓕᑭ ᑳ ᑮ ᒪᒑᑎᓯᐎ ᑐᑕᒥᓕᒋ, ᓀᔥᑕ ᒥᓯᐌ ᑳ ᐋᓕᒪᓂᓕᑭ ᐅᑦ ᐋᔭᒥᐎᓂᓕᐗ ᑳ ᒪᒑᑎᓯᓕᒋ ᐅᒪᒋᑣᐗ ᑳ ᑮ ᐸᑾᓄᒥᑯᑦ᙮
16ᐅᑯ ᐁᐗᒀᓂᑭ ᐅᒥᑕᐌᔅᑲᒃ, ᐅᑕᑖᒥᒥᐌᔅᑲᒃ, ᐁ ᓄᔅᐱᓇᑕᑭᒃ ᑎᐱᓚᐌ ᐅ ᒪᒋ ᓇᑕᐌᓕᑕᒧᐎᓂᐙᐗ; ᐅᑐᓂᐗᐗ ᒫᑲ ᐋᔭᒥᒪᑲᓂᓕᐗ ᑭᒋ ᑭᔅᑌᓕᒧᐎ ᐋᔭᒥᐎᓇ, ᐁ ᒥᓨᐸᒫᒋᒃ ᐃᓕᓕᐗ ᐁ ᐃᔑᓈᑯᓯᓕᒋ ᑭᒋ ᐅᒋ ᐅᑎᓯᒋᒃ᙮
ᔮᑾᒥᒥᐌᐎᓇ ᓀᔥᑕ ᑭᔅᑭᓄᐊᒫᑫᐎᓇ
17ᒫᑲ, ᓯᐋᑭᐃᑕᑾᒃ, ᑭᔅᑭᓯᒃ ᐊᓂᐃ ᐋᔭᒥᐎᓇ ᓂᑳᓐ ᑳ ᑮ ᐃᑗᓕᒋ ᐅᑦ ᐊᐸᔅᑕᓕᒪ ᑭ ᑎᐯᓕᒋᑫᒥᓇᐤ ᒋᓴᔅ ᙭; 18ᐁ ᑮ ᐎᑕᒫᑖᑾᒃ ᒣᒀᒡ ᒫᒋᒃ ᐁ ᑭᔑᑳᑭ ᑭᒋ ᐃᑖᒋᒃ ᐅᐹᐱᓄᑕᑫᔅᑲᒃ, ᑫ ᓄᔅᐱᓈᑕᑭᒃ ᑎᐱᓚᐌ ᐅ ᒪᒑᑎᓯᐎ ᒪᒋ ᓇᑕᐌᓕᑕᒧᐎᓂᐙᐗ᙮ 19ᐅᑯ ᐁᐗᒀᓂᑭ ᑳ ᐹᑳᓂᐃᑎᓱᒋᒃ, ᐁ ᐃᓚᑐᑖᑎᓯᒋᒃ, ᐁᑳ ᐁ ᐋᔭᐙᒋᒃ ᐊᒑᑾ᙮ 20ᒫᑲ ᑭᓚᐗᐤ, ᓯᐋᑭᐃᑕᑾᒃ ᐁ ᐋᔨᒋᑳᐸᐎᐃᑎᓱᔦᒃ ᑭ ᒪᐗᒋ ᐸᓓᑭ ᑖᐺᔦᓕᑕᒧᐎᓂᐙᒃ, ᐁ ᐋᔭᒥᐋᔦᑳ ᐸᓓᑭ ᐊᒑᑯᒃ, 21ᑲᓇᐌᓕᒥᑎᓱᒃ ᑭᒋᒪᓂᑐ ᐅ ᓵᑭᐃᐌᐎᓂᒃ, ᐁ ᐊᔕᐙᐸᑕᒬᒃ ᐅ ᔕᐌᓕᒋᑫᐎᓐ ᑭ ᑎᐯᓕᒋᑫᒥᓇᐤ ᒋᓴᔅ ᙭ ᑳᑭᑫ ᐱᒫᑎᓯᐎᓂᒃ ᐃᔑ᙮
22ᐋᑎᑦ ᒫᑲ ᑭᑎᒫᑫᓕᒥᑯᒃ, ᐹᐱᑐᔥ ᐁ ᐃᑐᑕᐙᔦᒃ; 23ᑯᑕᑭᔭᒃ ᒫᑲ ᓭᑭᓯᐎᓂᒃ ᐱᒫᒋᐃᑯᒃ ᐃᔥᑯᑌᒃ ᐁ ᐅᒋ ᐅᒋᐱᑌᑾᒃ; ᐁ ᐸᒀᑕᒣᒃ ᐊᐳᒋᑲ ᐎᓛᒋᑲᓐ ᐎᔮᔅ ᐁ ᐅᒋ ᒪᓯᓇᔅᑌᒃ᙮
ᑭᔅᑖᒋᒥᐌᐎ ᐊᔭᒥᐋᐎᓐ
24ᐁᑯ ᐊᓇ ᑳ ᑲᔥᑭᑖᑦ ᑭᒋ ᑲᓇᐌᓕᒥᑖᒃ ᐁᑳ ᑭᒋ ᐸᑭᔑᓂᔦᒃ, ᓀᔥᑕ ᑭᒋ ᓄᑯᐃᑖᒃ ᐁ ᒥᓗᐃᑌᓕᑖᑯᓯᔦᒃ ᐅᑎᔥᑲᐤ ᐁ ᐃᔑᓈᑾᓂᓕᒃ ᐅ ᑭᔅᑌᓕᑖᑯᓯᐎᓐ ᑭᒋ ᒥᓚᐙᑕᒧᐎᓂᒃ, 25ᐊᓇ ᐱᑯ ᑳ ᑲᑫᑕᐌᓕᑕᒃ ᑭᒋᒪᓂᑐ ᑭ ᐱᒫᒋᐃᐌᒥᓇᐤ, ᑫ ᐎ ᐋᔮᑦ ᑭᔅᑌᓕᑖᑯᓯᐎᓂᓕᐤ ᓀᔥᑕ ᑭᒋᐅᑭᒪᐌᓕᑖᑯᓯᐎᓂᓕᐤ, ᑎᐯᓕᒋᑫᐎᓂᓕᐤ ᓀᔥᑕ ᑲᔥᑭᐅᐎᓂᓕᐤ, ᐊᓄᒡ ᓀᔥᑕ ᑳᑭᑫ᙮ ᐁᒣᓐ᙮
Currently Selected:
ᒎᑦ 1: MCNT91
Highlight
Share
Copy
Want to have your highlights saved across all your devices? Sign up or sign in
The text of the Bible in Moose Cree is in the public domain.
Moose Cree New Testament © Canadian Bible Society, 1991.