ᐊᐸᔅᑕᓚᒃ 25
25
ᐹᓪ ᒪᐎᒧᔅᑕᐌᐤ ᑭᒋᐅᑭᒫᐗ
1ᐃᔅᐱ ᒫᑲ ᐯᔅᑕᔅ ᑳ ᑕᑯᔑᒃ ᐊᓂᒪ ᑎᐯᓕᒋᑫᐎᓂᒃ, ᑳ ᐳᓂᐸᓕᑭ ᓂᔅᑐ ᑭᔑᑳᐗ ᓯᓴᕆᐊᐃᒃ ᐁ ᐅᒋ ᑭᑐᑌᑦ ᑭ ᐃᑐᑌᐤ ᒋᕉᓴᓚᒥᒃ᙮ 2ᐁᑯ ᑭᒋ ᓵᓵᑭᐎᓕᐌᐎᓕᓕᐤ ᓀᔥᑕ ᑳ ᓂᑳᓀᓕᑖᑯᓯᒋᒃ ᒎᐗᒃ ᑮ ᐎᑕᒪᐌᐗᒃ ᐹᓪ ᐅᒋ, ᓀᔥᑕ ᑮ ᐸᑯᓭᓕᒣᐗᒃ᙮ 3ᑮ ᐸᑯᓭᓕᑕᒧᐌᐗᒃ ᒫᑲ, ᑭᒋ ᓇᑐᒫᓕᒋ ᒋᕉᓴᓚᒥᒃ ᐃᔑ, ᐁ ᐎ ᐊᔅᑲᒪᐙᒋᒃ ᒣᔅᑲᓈᒃ ᑭᒋ ᓂᐸᐋᒋᒃ᙮ 4ᒫᑲ ᐯᔅᑕᔅ ᑮ ᓇᔥᑴᐗᔑᐃᐌᐤ ᐹᓚ ᑭᒋ ᑲᓇᐌᓕᒫᑲᓂᐎᓕᒋ ᐊᓐᑕ ᓯᓴᕆᐊᐃᒃ, ᐎᓚ ᑫᒋᐙᒃ ᓀᔥᑕ ᐎᐸᒡ ᐁᑯᑕ ᑭᒋ ᐃᑐᑌᑦ᙮ 5ᐁᐗᑯ ᒫᑲ ᐅᒋ, ᑮ ᐃᑗᐤ, ᐁᑯᔑ ᐊᓂᑭ ᐁ ᐃᑕᔑᔦᒃ ᑳ ᑲᔥᑭᑖᔦᒃ ᑭ ᑳ ᐎᒉᐎᓇᐗᐤ, ᑭᒋ ᒫᒥᔑᒣᒃ ᐊᐗ ᐃᓕᓕᐤ ᑮᔥᐱᓐ ᑳ ᒪᒋ ᐋᔨᑎᑴ᙮
6ᐃᔅᐱ ᒫᑲ ᑳ ᑮ ᐎᒋᑕᔑᑫᒫᑦ ᐊᐙᓯᑌ ᐃᔥᐱᔥ ᒥᑖᑐ ᑭᔑᑳᐗ, ᐊᔥᑕ ᓯᓴᕆᐊᐃᒃ ᑮ ᐃᑐᑌᐤ; ᐎᐋᐸᓂᓕᒃ ᒫᑲ ᐁ ᐊᐱᑦ ᑎᐹᔅᑯᓂᑫᐎ ᐊᐱᐎᓂᒃ ᑮ ᐃᑕᔓᐙᑌᐤ ᐹᓚ ᑭᒋ ᐯᔑᒥᒋ᙮ 7ᐃᔅᐱ ᒫᑲ ᑎᑯᔑᓂᓕᒋ, ᐊᓂᑭ ᒎᐗᒃ ᒋᕉᓴᓚᒥᒃ ᑳ ᑮ ᐱᒋ ᐅᑐᑌᒋᒃ ᐙᔅᑲ ᐁ ᓂᐹᐎᒋᒃ, ᓈᔅᐱᒡ ᒥᔅᑕᐃ ᑮ ᒪᒋ ᒫᒥᔑᒣᐗᒃ ᐹᓚ, ᐁᑳ ᑳ ᑲᔥᑭᑖᒋᒃ ᑭᒋ ᑖᐺᔦᓕᑖᑯᑖᒋᒃ᙮ 8ᒣᒀᒡ ᒫᑲ ᑳ ᓇᔥᑴᐗᔑᑕᒫᓱᑦ, ᓇᒪᐎᓚ ᐅᑦ ᐅᓚᔓᐌᐎᓂᐗᐤ ᒎᐗᒃ, ᓇᒪ ᓀᔥᑕ ᑭᒋᐋᔭᒥᐁᐎᑲᒥᒃ, ᓇᒪ ᓀᔥᑕ ᓯᓴᕐ ᐅᒋ, ᐙᔦᔥ ᓂ ᑮ ᐙᓂᑐᑌᓐ᙮
9ᒫᑲ ᐯᔅᑕᔅ, ᐁ ᐎ ᓇᐃᓚᐌᐋᑦ ᒎᐗ, ᐁ ᓇᔥᑴᐗᔑᐋᑦ ᐹᓚ ᑮ ᐃᑌᐤ, ᑭ ᑳ ᐃᑐᑖᓐ ᓈ ᒋᕉᓴᓚᒥᒃ, ᐁᑯᑕ ᒫᑲ ᐁ ᑖᔅᑕᒪᐱᔮᓐ ᑭᒋ ᑎᐹᔅᑯᓂᑳᐎᔭᓐ ᐅᐅ ᑫᒀᓇ ᐅᒋ?
10ᐁᑯ ᐁᑗᑦ ᐹᓪ, ᓂᑦ ᐅᑎᔥᑲᐎᑳᐸᐎᔅᑕᒸᓐ ᓯᓴᕐ ᐅ ᑎᐹᔅᑯᓂᑫᐎ ᐊᐱᐎᓐ, ᐃᑕ ᑫ ᑮ ᑎᐹᔅᑯᓂᑳᐎᔮᐸᓐ: ᒎᐗᒃ ᓇᒪᐎᓚ ᐙᔦᔥ ᓂ ᑮ ᐗᓂᑐᑕᐙᐗᒃ, ᒥᑐᓂ ᓀᔥᑕ ᐁ ᐃᔑ ᑭᔅᑫᓕᑕᒪᓐ ᑭᓚ᙮ 11ᐌᓴ ᑮᔥᐱᓐ ᑳ ᐗᓂᑐᑕᒧᐙᓂ ᓂᔥᑕᐱᑯ ᑳ ᑐᑕᒧᐙᓂ ᑫᒀᓐ ᑳ ᐅᒋ ᐃᑌᓕᑖᑯᓯᔮᓐ ᑭᑕ ᓂᐱᔮᓐ, ᓇᒪᐎᓚ ᓂᑦ ᐋᓉᑌᓐ ᑭᒋ ᓂᐱᔮᓐ: ᒫᑲ ᑮᔥᐱᓐ ᐁᑳ ᐁᑕᑾᓄᐙᑴ ᐊᓂᐃ ᑫᒀᓇ ᑳ ᐅᒋ ᒫᒥᔑᒥᒋᒃ, ᓇᒪᐎᓚ ᐊᐌᓇ ᓂ ᑳ ᐸᑭᑌᓂᒃ ᐅᒋᒋᐙᒃ᙮ ᓂ ᓇᑕᐌᓕᒪᐤ ᓯᓴᕐ ᑭᒋ ᑎᐹᔅᑯᓂᑦ᙮
12ᐁᑯ ᐯᔅᑕᔅ, ᐃᔅᐱ ᑳ ᑮ ᐎᒋᐋᔭᒥᒫᑦ ᒫᒪᐎᐅᑲᑫᔅᑭᒥᐌᐗ, ᑮ ᓇᔥᑴᐗᔑᐃᐌᐤ, ᑭ ᓇᑕᐌᓕᒪᐤ ᓈ ᓯᓴᕐ ᑭᒋ ᑎᐹᔅᑯᓂᔉ? ᓯᓴᕐ ᑭ ᑳ ᓈᑕᐤ᙮
ᐹᓪ ᐅᑎᔥᑲᐤ ᐋᒃᕆᐸ ᓀᔥᑕ ᐸᕐᓈᐃᔅ
13ᑭᐃᔥᑾ ᐋᑎᑦ ᑭᔑᑳᐗ ᒫᑲ ᑭᒋᐅᑭᒪᐤ ᐋᒃᕆᐸ ᓀᔥᑕ ᐸᕐᓇᐃᓯ ᑮ ᐯᒋᐃᑐᑌᐗᒃ ᓯᓴᕆᐊᐃᒃ ᑭᒋ ᐊᑕᒥᔅᑲᐙᒋᒃ ᐯᔅᑕᓴ᙮ 14ᐃᔅᐱ ᒫᑲ ᐊᓐᑕ ᑳ ᑮ ᐃᑖᒋᒃ ᒥᒉᑐ ᑭᔑᑳᐗ, ᐯᔅᑕᔅ ᑮ ᐎᑕᒪᐌᐤ ᑭᒋᐅᑭᒫᐗ ᐹᓚ ᐁ ᐃᑎᓕᒋ, ᐁ ᐃᑗᑦ, ᐅᑕ ᐃᑖᐤ ᐯᔭᒃ ᐃᓕᓕᐤ ᑳ ᓇᑲᑎᑯᑦ ᐱᓕᒃᓴ ᐁ ᒫᒫᒋᑯᐱᓱᑦ: 15ᐁᐗᒀᓇ ᐅᒋ, ᐃᔅᐱ ᑳ ᐃᑖᔮᐸᓐ ᒋᕉᓴᓚᒥᒃ ᑭᒋ ᓵᓵᑭᐎᓕᐌᐎᓕᓕᐗᒃ ᓀᔥᑕ ᑳ ᓂᑳᓀᓕᑖᑯᓯᒋᒃ ᒎᐗᒃ ᓂ ᑮ ᐋᓕᒧᑕᒫᑾᒃ, ᐁ ᓇᑕᐌᓕᒫᒋᒃ ᑭᒋ ᑎᐹᔅᑯᓈᑲᓂᐎᓕᒋ᙮ 16ᑳ ᑮ ᓇᔥᑴᐗᔑᐊᑭᒃ, ᓇᒪᐎᓚ ᐁ ᐃᑌᒋᒃ ᕈᒥᐎᓕᓕᐗᒃ ᑭᒋ ᐸᑭᑎᓈᒋᒃ ᐊᐌᓕᐗ ᑭᒋ ᓂᐹᔨᒥᒋ, ᐸᒧᔑ ᐊᓇ ᑳ ᒫᒥᔑᒫᑲᓂᐎᑦ ᐁ ᐅᑎᔥᑲᐎᑳᐸᐎᔅᑕᐙᑦ ᐊᓂᐃ ᑳ ᒫᒥᔑᒥᑯᑦ, ᓀᔥᑕ ᐁ ᐃᓕᓈᑲᓂᐎᑦ ᑭᒋ ᓇᔥᑴᐗᔑᑕᒫᓱᑦ ᐊᓂᐁᓕᐤ ᒪᒋᑐᑕᒧᐎᓂᓕᐤ ᐅᒋ ᑳ ᐃᔑ ᒫᒥᔑᒫᑲᓂᐎᑦ᙮ 17ᐁᐗᑯ ᒫᑲ ᐅᒋ, ᐃᔅᐱ ᐅᑕ ᑳ ᐯᒋ ᐃᑐᑌᒋᒃ, ᐁᑳ ᐁ ᑆᔅᑕᐎᔮᓐ ᐎᐋᐸᒃ ᓂ ᑮ ᐊᐱᓐ ᑎᐹᔅᑯᓂᑫᐎ ᐊᐱᐎᓂᒃ, ᓀᔥᑕ ᓂ ᑮ ᐃᑕᔓᐙᓐ ᐊᓇ ᐃᓕᓕᐤ ᑭᒋ ᐯᔑᐙᑲᓂᐎᑦ᙮ 18ᐃᔅᐱ ᒫᑲ ᐊᓂᑭ ᑳ ᒫᒥᔑᒫᒋᒃ ᑳ ᓂᐸᐎᔅᑕᐙᒋᒃ, ᓇᒪᐎᓚ ᑮ ᒫᒥᔑᒣᐗᒃ ᐊᓂᐃ ᑫᒀᓇ ᐅᒋ ᑳ ᑮ ᐃᑌᓕᑕᒫᓐ: 19ᒫᑲ ᑮ ᒫᒥᔑᒣᐗᒃ ᑫᒀᓇ ᐅᒋ ᑳ ᐃᑕᑾᓂᓕᑭ ᑎᐱᓚᐌ ᐅᑦ ᐋᔭᒥᐋᐎᓂᐙᒃ, ᓀᔥᑕ ᐊᐌᓇ ᒋᓴᔅ ᐅᒋ, ᑳ ᑮ ᓂᐱᑦ, ᒫᑲ ᐱᒫᑎᓯᐤ ᐁ ᐃᑗᓕᒋ ᐹᓚ᙮ 20ᐁ ᑮ ᑶᑕᐎᐃᑌᑕᓚᒫᓐ ᒫᑲ ᐊᓂᒪ ᑐᐎ ᑲᑴᒋᑫᒧᐎᓇ, ᓂ ᑮ ᑲᑴᒋᒪᐤ ᑮᔥᐱᓐ ᒋᕉᓴᓚᒥᒃ ᑫ ᐎ ᐃᑐᑌᑴ, ᐁᑯᑕ ᒫᑲ ᐅᐅ ᑫᒀᓇ ᑭᒋ ᐅᒋ ᑎᐹᔅᑯᓈᑲᓂᐎᑦ᙮ 21ᒫᑲ ᐃᔅᐱ ᐹᓪ ᑳ ᐃᑗᑦ ᑭᒋ ᑲᓇᐌᓕᒫᑲᓂᐎᑦ ᑭᒋ ᐯᑖᑯᑦ ᐋᑲᔅᑕᓴ, ᓂ ᑮ ᐃᑕᔓᐙᐤ ᑭᒋ ᑲᓇᐌᓕᒫᑲᓂᐎᑦ ᐃᓕᑯᒃ ᑫ ᐃᔑᑎᔕᐊᒪᐗᒃ ᓯᓴᕐ᙮
22ᐁᑯ ᐋᒃᕆᐸ ᐁᑖᑦ ᐯᔅᑕᓴ, ᓂᓚ ᑫᒋᐙᒃ ᓂ ᑳ ᐯᑖᐗᐤ ᐊᓇ ᐃᓕᓕᐤ᙮
ᐙᐸᑫ, ᑮ ᐃᑗᐤ, ᑭ ᑳ ᐯᑕᐗᐤ᙮
23ᐎᐋᐸᒃ ᒫᑲ, ᐃᔅᐱ ᑳ ᑕᑯᔑᒃ ᐋᒃᕆᐸ, ᓀᔥᑕ ᐸᕐᓇᐃᓯ, ᑭᒋ ᑭᔅᑌᓕᒧᐎᓂᒃ, ᓀᔥᑕ ᑳ ᐱᑐᑫᑦ ᐯᑖᑫᐎᑲᒥᑯᒃ, ᐊᓯᒋ ᓀᔥᑕ ᑭᒋ ᓇᑐᐸᓕᐎᑭᒫᐗᒃ, ᓀᔥᑕ ᑳ ᓂᑳᓀᓕᑖᑯᓯᒋᒃ ᐃᓕᓕᐗᒃ ᐃᑖᐎᓂᒃ, ᐃᔅᐱ ᐁᑕᔓᐌᑦ ᐯᔅᑕᔅ ᐹᓪ ᑮ ᐯᔑᐙᑲᓂᐎᐤ᙮ 24ᐯᔅᑕᔅ ᒫᑲ ᑮ ᐃᑗᐤ, ᑭᒋᐅᑭᒪᐤ ᐋᒃᕆᐸ, ᓀᔥᑕ ᒥᓯᐌ ᐃᓕᓕᑐᒃ ᐅᑕ ᑳ ᐃᑖᔦᒃ ᐊᓯᒋ ᓂᓚᓈᓐ, ᑮ ᐙᐸᒫᐗᐤ ᐊᐗ ᐃᓕᓕᐤ, ᐊᓇ ᑳ ᐅᒋ ᒥᑯᔥᑳᒋᐃᒋᒃ ᒥᓯᐌ ᒥᔮᒪᐎᒥᒉᑎᒋᒃ ᒎᐗᒃ, ᑖᐱᔅᑯᒡ ᒋᕉᓴᓚᒥᒃ, ᓀᔥᑕ ᐅᑕ, ᐁ ᑌᐺᒋᒃ ᐁᑳ ᐁ ᐃᑌᓕᑖᑯᓯᓕᒋ ᑫᔮᐸᒡ ᑭᒋ ᐱᒫᑎᓯᓕᒋ᙮ 25ᐃᔅᐱ ᒫᑲ ᒣᔅᑲᒫᓐ ᐁᑳ ᑫᒀᓕᐤ ᐁ ᑮ ᑐᑕᒃ ᑭᒋ ᐅᒋ ᓂᐱᑦ, ᐎᓚ ᑫᒋᐙᒃ ᓀᔥᑕ ᐁ ᑮ ᐃᑗᑦ ᐁ ᓇᑕᐌᓕᒫᑦ ᐋᑲᔅᑕᓴ ᑭᒋ ᑎᐹᔅᑯᓂᑯᑦ, ᓂ ᑮ ᐃᑌᓕᑌᓐ ᑭᒋ ᐃᔑᑎᔕᐗᒃ᙮ 26ᐊᐗ ᐅᒋ ᒫᑲ ᓇᒪᐎᓚ ᑫᒀᓐ ᑫᒌᓐ ᓂᑦ ᐋᔮᓐ ᑭᒋ ᒪᓯᓇᐊᒪᐗᒃ ᓂᑦ ᐅᑭᒫᒻ᙮ ᐁᐗᑯ ᐌᒋ ᐯᔑᐗᒃ ᐁ ᑖᔅᑕᒪᐱᔦᒃ, ᒫᑲ ᐅᓵᒻ ᑭᓚ ᐁ ᑖᔅᑕᒪᐱᔭᓐ, ᐅ ᑭᒋᐅᑭᒪᐤ ᐋᒃᕆᐸ, ᐃᔅᐱ ᑮ ᑲᑴᒋᑫᒧᓈᓂᐗᑫ, ᑭᒋ ᐋᔮᔮᓐ ᑫ ᐃᔑ ᒪᓯᓇᐃᑫᔮᓐ᙮ 27ᐌᓴ ᓇᒪᐎᓚ ᓂᑦ ᐃᑌᓕᑌᓐ ᐁ ᒀᔭᔅᑾᒃ ᑭᒋ ᐃᔑᑎᔕᐗᒃ ᑭᐸᐙᑲᓐ, ᐁᑳ ᓀᔥᑕ ᐊᓯᒋ ᑭᒋ ᐎᑕᒫᓐ ᑳ ᐃᔑ ᒫᒥᔑᒫᑲᓂᐎᑦ᙮
Currently Selected:
ᐊᐸᔅᑕᓚᒃ 25: MCNT91
Highlight
Copy
Compare
Share
Want to have your highlights saved across all your devices? Sign up or sign in
The text of the Bible in Moose Cree is in the public domain.
Moose Cree New Testament © Canadian Bible Society, 1991.
