ᐊᐸᔅᑕᓚᒃ 23
23
1ᐹᓪ ᒫᑲ, ᐁ ᐊᔑᑳᐸᒫᑦ ᑳ ᒪᐗᒋᐃᑐᓕᑭ, ᑮ ᐃᑗᐤ, ᐃᓕᓕᑐᒃ ᓀᔥᑕ ᓂᒋᔖᓂᑐᒃ, ᓂ ᑮ ᐱᒫᑎᓰᔅᑕᐗᐤ ᑭᒋᒪᓂᑐ ᒥᑐᓂ ᒥᓗ ᒥᑐᓀᓕᒋᑲᓂᒃ ᐱᓕᔥ ᐊᓄᒡ ᐁ ᑭᔑᑳᒃ᙮ 2ᑭᒋ ᓵᓵᑭᐎᓕᐌᐎᓕᓕᐤ ᒫᑲ ᐋᓈᔅ ᑮ ᐃᑕᔓᐙᑌᐤ ᐊᓂᐃ ᑳ ᐎᒋᑳᐸᐐᔅᑖᑯᓕᑭ ᑭᒋ ᐅᑖᒥᑐᓀᐙᓕᒋ᙮ 3ᐁᑯ ᐹᓪ ᐁᑖᑦ, ᑭᒋᒪᓂᑐ ᑭ ᑳ ᐸᑲᒪᐅᒃ, ᑭᓚ ᑳ ᐙᐱᔅᑲᐃᑳᑌᒃ ᒣᓂᑲᓐ: ᐌᓴ ᑭᑦ ᐊᐱᓐ ᓈ ᑭᒋ ᑎᐹᔅᑯᓂᔭᓐ ᐁ ᐃᑕᔅᑌᒃ ᐅᓚᔓᐌᐎᓐ, ᓀᔥᑕ ᑭᑦ ᐃᑕᔓᐙᓐ ᑭᒋ ᐅᑖᒪᐅᑲᐎᔮᓐ ᐁᑳ ᐁ ᐃᑕᔅᑌᒃ ᐅᓚᔓᐌᐎᓐ?
4ᐊᓂᑭ ᒫᑲ ᐊᓐᑕ ᑳ ᓂᐸᐎᒋᒃ ᑮ ᐃᑗᐗᒃ, ᑭ ᒫᓓᓕᒥᒫᐗ ᓈ ᑭᒋᒪᓂᑐ ᐅ ᑭᒋ ᓵᓵᑭᐎᓕᐌᓕᓕᒪ?
5ᐁᑯ ᐹᓪ ᐁᑗᑦ, ᓇᒪ ᓂ ᑭᔅᑫᓕᑌᑖᔾ ᓂᒋᔖᓂᑐᒃ, ᐎᓚ ᐁ ᑭᒋ ᓵᓵᑭᐎᓕᐌᐎᓕᓕᐎᑦ: ᐌᓴ ᐃᑕᓯᓇᐃᑳᑌᐤ, ᓇᒪᐎᓚ ᑭ ᑳ ᒪᒋ ᐃᑖᐤ ᐊᓇ ᑳ ᑎᐯᓕᒫᑦ ᓂᑦ ᐃᓕᓕᒪ᙮
6ᒫᑲ ᐃᔅᐱ ᐹᓪ ᐯᓯᔅᑫᓕᑕᒃ ᐋᑎᑦ ᐁ ᓵᑦᔪᓯᐎᓕᒋ, ᓀᔥᑕ ᑯᑕᑭᔭ ᐁ ᐹᕋᓯᐎᓕᒋ, ᑮ ᑌᐺᐤ ᐊᓐᑕ ᐁ ᐃᔑ ᒪᐗᒋᐃᑐᓕᒋ, ᐃᓕᓕᑐᒃ ᓀᔥᑕ ᓂᒋᔖᓂᑐᒃ, ᓂᓚ ᓂ ᐹᕋᓯᐎᓐ, ᐁ ᐅᑯᓯᓯᒥᑦ ᓀᔥᑕ ᐹᕋᓯ: ᐅᑦ ᐊᔅᐯᓕᒧᐎᓂᐗᐤ ᓀᔥᑕ ᐅ ᐗᓂᔥᑲᐎᓂᐗᐤ ᐊᓂᑭ ᑳ ᓂᐱᒋᒃ ᐅᒋ ᓂ ᑎᐹᔅᑯᓂᑳᐎᓐ᙮
7ᐃᔅᐱ ᒫᑲ ᐅᒪ ᑳ ᑮ ᐃᑗᑦ, ᑮ ᒫᒋ ᒀᓗᑐᑖᑐᐗᒃ ᐹᕋᓯᔭᒃ ᓀᔥᑕ ᓵᑦᔪᓯᔭᒃ: ᑳ ᒫᒪᐎᒥᒉᑎᒋᒃ ᐃᓕᓕᐗᒃ ᒫᑲ ᑮ ᓀᓈᐎᐸᓕᐗᒃ᙮ 8ᐌᓴ ᓵᑦᔪᓯᔭᒃ ᐃᑗᐗᒃ ᐁᑳ ᐁ ᐃᑕᑾᒃ ᐗᓂᔥᑳᐎᓐ, ᐁᑳ ᓀᔥᑕ ᐁ ᐃᑖᑦ ᐁᓐᒐᓪ, ᐁᑳ ᓀᔥᑕ ᐊᒑᒃ: ᒫᑲ ᐹᕋᓯᔭᒃ ᒥᓯᐌ ᐅᐅ ᑖᐺᑕᒶᒃ᙮ 9ᐁᓕᑯᒃ ᒫᑲ ᑮ ᒫᒋ ᑌᑆᓂᐗᓐ: ᐊᓂᑭ ᒫᑲ ᐅᒪᓯᓇᐃᑫᐗᒃ ᑳ ᐎᒉᐙᒋᒃ ᐹᕋᓯᔭ ᑮ ᐸᓯᑯᐗᒃ, ᓀᔥᑕ ᑮ ᑲᑴᐸᔅᑭᓛᑫᐗᒃ, ᐁ ᐃᑗᒋᒃ, ᓇᒪᐎᓚ ᑫᒀᓐ ᑳ ᒫᓛᑕᒃ ᓂ ᒥᔅᑲᒸᓈᓐ ᐊᐗ ᐃᓕᓕᐤ: ᒫᑲ ᑮᔥᐱᓐ ᐊᒑᑾ ᓀᔥᑕᐱᑯ ᐁᓐᒐᓚ ᑳ ᐋᔭᒥᐃᑯᑴ, ᐁᑯᔑ ᐁᑳᐎᓚ ᓄᑎᓈᑕᐤ ᑭᒋᒪᓂᑐ᙮
10ᐃᔅᐱ ᒫᑲ ᓈᔅᐱᒡ ᒥᐋᒋ ᒀᓗᑕᑖᑐᓈᓂᐗᒃ, ᑭᒋ ᓇᑐᐸᓕᐃᑭᒪᐤ ᐁ ᓇᓂᒌᑦ ᐹᓚ ᑭᒋ ᐱᓯᐱᑎᑯᓕᑭ, ᑮ ᐃᑕᔓᐙᑌᐤ ᐅᓇᑐᐸᓕᐗ ᑭᒋ ᐃᑐᑌᓕᒋ, ᓀᔥᑕ ᑭᒋ ᒪᔅᑲᒫᓕᒋ, ᑭᒋ ᐯᔑᐙᓕᒋ ᒫᑲ ᓇᑐᐸᓕᐎᑲᒥᑯᒃ᙮
11ᐊᓂᐁᓕᐤ ᒫᑲ ᐁ ᑎᐱᔅᑳᓕᒃ ᑮ ᐎᒋᑳᐸᐎᔅᑖᑯ ᐅᑎᐯᓕᒋᑫᐗ, ᑮ ᐃᑎᑯ ᒫᑲ, ᒥᓜᓕᑕ, ᐹᓪ: ᐌᓴ ᑖᐱᔅᑯᒡ ᑳ ᑮ ᐃᑖᒋᒥᔭᓐ ᒋᕉᓴᓚᒥᒃ, ᐁᑯ ᓀᔥᑕ ᑫ ᐃᑖᒋᒧᔭᓐ ᕈᒥᒃ᙮
ᑮᒧᒡ ᐎ ᓂᐸᐁᐗᒃ ᐹᓚ
12ᐃᔅᐱ ᒫᑲ ᐎᐋᐸᒃ, ᐋᑎᑦ ᐊᓂᑭ ᒎᐗᒃ ᑮ ᒫᒪᐎ ᓇᔅᑯᒥᑐᐗᒃ, ᓀᔥᑕ ᑮ ᒫᑯᐱᑎᓱᐗᒃ ᑭᒋ ᒪᒐᑭᒥᐌᐎᓐ ᐅᒋ, ᐁ ᐃᑗᒋᒃ ᐁᑳ ᑭᒋ ᒥᒋᓱᒋᒃ ᐁᑳ ᓀᔥᑕ ᑭᒋ ᒥᓂᑴᒋᒃ ᐹᑎᒫ ᑮ ᓂᐸᐋᑣᐌ ᐹᓚ᙮ 13ᐊᐙᓯᑌ ᒫᑲ ᓀᒥᑕᓇᐤ ᑮ ᐃᑕᓯᐗᒃ ᑳ ᑮ ᐅᔑᑖᒋᒃ ᐅᒣᓕᐤ ᑭᒧᒋᔑᑭᒥᑐᐎᓂᓕᐤ᙮ 14ᑮ ᐯᒋ ᓈᑌᐗᒃ ᒫᑲ ᑭᒋ ᓵᓵᑭᐎᓕᐌᐎᓕᓕᐗ ᓀᔥᑕ ᐅᓂᑳᓀᓕᑖᑯᓯᐗ, ᓀᔥᑕ ᑮ ᐃᑗᐗᒃ, ᓂ ᑮ ᒫᑯᐱᑎᓱᓈᓐ ᑭᒋ ᒪᒐᑭᒥᐌᐎᓂᒃ, ᐁᑳ ᑫᒀᓐ ᑭᒋ ᒥᒋᔮᒃ ᐹᑎᒫ ᑮ ᓂᐸᐊᑭᑌ ᐹᓪ᙮ 15ᐁᐗᑯ ᐅᒋ ᒫᑲ ᑭᓚᐗᐤ ᐊᓯᒋ ᐅᑲᑫᔅᑭᒥᐌᐗᒃ ᐎᑕᒫᒃ ᑭᒋ ᓇᑐᐸᓕᐎᑭᒪᐤ ᑭᒋ ᐯᑣᑎᑖᒃ ᐙᐸᑫ, ᒫᓇ ᐱᑯ ᐊᐙᓯᑌ ᑫᔮᐸᒡ ᐁ ᐎ ᑲᑴᒋ ᑭᔅᑫᓕᑕᒬᒃ ᐅᑦ ᐋᔨᑎᐎᓇ: ᓂᓚᓈᓐ ᒫᑲ, ᐎᔅᑳᑦ ᑭᔑᐙᒃ ᐯᒋ ᐃᑐᑌᑌ, ᓂᑦ ᐋᔦᔅᑳᐎᓯᓈᓐ ᑭᒋ ᓂᐸᐊᑭᑦ᙮
16ᐃᔅᐱ ᒫᑲ ᐹᓪ ᐎᒋᔖᓂᔅᑴᒪ ᐅᑯᓯᓯᓕᐗ ᐱᐁᑕᒥᓕᒋ ᐁ ᐊᔅᑲᒪᐅᑯᑦ, ᑮ ᓇᑕᐎ ᐱᑐᑫᐤ ᓇᑐᐸᓕᐎᑲᒥᑯᒃ, ᓀᔥᑕ ᑮ ᐎᑕᒪᐌᐤ ᐹᓚ᙮ 17ᐁᑯ ᐹᓪ ᓀᑐᒫᑦ ᐯᔭᒃ ᐊᓂᐃ ᓇᑐᐸᓕᐎᑭᒫᐗ, ᑮ ᐃᑌᐤ ᒫᑲ, ᐯᑡᐤ ᐊᐗ ᐅᔥᑭᓂᑭᐤ ᐊᓇ ᑭᒋ ᓇᑐᐸᓕᐎᑭᒪᐤ: ᐌᓴ ᐙᔦᔥ ᐋᔭᐤ ᑭᒋ ᐎᑕᒪᐙᑦ᙮ 18ᐁᑯ ᐌᑎᓈᑦ, ᓀᔥᑕ ᑮ ᐯᑐᐌᐤ ᑭᒋ ᓇᑐᐸᓕᐎᑭᒫᐗ, ᑮ ᐃᑗᐤ ᒫᑲ, ᐊᓇ ᑭᐸᐙᑲᓐ ᐹᓪ ᓂ ᑮ ᓇᑐᒥᒃ, ᓀᔥᑕ ᓂ ᑮ ᐸᑯᓭᓕᒥᒃ ᐊᐗ ᐅᔥᑭᓂᑭᐤ ᑭᒋ ᐯᑣᑖᓐ, ᑳ ᐋᔮᑦ ᐙᔦᔥ ᑭᒋ ᐎᑕᒫᔉ᙮
19ᐁᑯ ᑭᒋ ᓇᑐᐸᓕᐎᑭᒪᐤ ᓯᐊᑭᒋᒉᓈᑦ, ᓀᔥᑕ ᐅᐱᒣ ᑭᒧᒡ ᑮ ᐎᒉᐌᐤ, ᑮ ᑲᑴᒋᒣᐤ ᒫᑲ, ᑫᒀᓐ ᐊᓂᒪ ᑳ ᐋᔮᔭᓐ ᑭᒋ ᐎᑕᒫᐎᔭᓐ?
20ᑮ ᐃᑗᐤ ᒫᑲ, ᒎᐗᒃ ᑮ ᓇᔅᑯᒥᑐᐗᒃ ᑭᒋ ᐸᑯᓭᓕᒥᔅᑭᒃ ᑭᒋ ᐯᔑᐗᑦ ᐹᓪ ᐙᐸᑫ ᐃᑕ ᐁ ᐃᔑ ᒪᐗᒋᐃᑐᒋᒃ, ᒫᓇ ᐱᑯ ᐊᐙᓯᑌ ᑫᔮᐸᒡ ᑭᒋ ᑲᑴᒋ ᑭᔅᑫᓕᑕᒸᒋᒃ ᐅᑦ ᐋᔨᑎᐎᓂᓕᐗ᙮ 21ᒫᑲ ᐁᑳᐎᓚ ᑖᐺᑖᒃ: ᐌᓴ ᐊᐙᓯᑌ ᐃᔥᐱᔥ ᓀᒥᑕᓇᐤ ᐃᓕᓕᐗᒃ ᑮ ᒫᑯᐱᑎᓱᐗᒃ ᐁ ᑭᒋᐃᑗᒋᒃ, ᐁᑳ ᑭᒋ ᒥᒋᓱᒋᒃ ᐁᑳ ᓀᔥᑕ ᑭᒋ ᒥᓂᑴᒋᒃ ᐹᑎᒫ ᑮ ᓂᐸᐋᑡᐌ: ᐊᓄᒡ ᒫᑲ ᐋᔦᔅᑲᐎᓯᐗᒃ ᐁ ᐊᔅᐯᓕᑐᑖᔅᑭᒃ ᑭᒋ ᐊᔓᑕᒪᐌᒃ᙮
22ᐁᑯ ᑭᒋ ᓇᑐᐸᓕᐎᑭᒪᐤ ᐯᑭᑎᓈᑦ ᐊᓂᐃ ᐅᔥᑭᓂᑭᐗ, ᓀᔥᑕ ᑮ ᐃᑕᔓᐙᑌᐤ, ᔮᑾ ᐁᑳᐎᓚ ᐊᐌᓇ ᐎᑕᒪᐤ ᐅᐅ ᑫᒀᓇ ᐁ ᑮ ᐎᑕᒪᐎᔭᓈ᙮
ᐹᓪ ᐃᔑᑎᔕᐗᑲᓂᐎᐤ ᐅᑎᔥᑲᐤ ᐅᑭᒪᐤ ᐱᓕᒃᓴ
23ᑮ ᓇᑐᒣᐤ ᒫᑲ ᓂᔓ ᓇᑐᐸᓕᐎᑭᒫᐗ, ᐁ ᐃᑗᑦ, ᐋᔦᔅᑲᐎᐃᑯᒃ ᓂᔡᐤ ᒥᑖᑐᒥᑕᓇᐤ ᐅᓇᑐᐸᓕᐗᒃ ᑭᒋ ᐃᑐᑌᒋᒃ ᐊᓐᑕ ᓯᓴᕆᔭ, ᓀᔥᑕ ᒥᔅᑕᑎᒥᓕᓕᐗᒃ ᓂᔂᓱᒥᑕᓇᐤ, ᓀᔥᑕ ᑕᑭᒋᑲᓂᓕᓕᐗᒃ ᓂᔡᐤ ᒥᑖᑐᒥᑕᓇᐤ, ᐃᔅᐱ ᐃᔅᐸᓕᑫ ᓂᔅᑐ ᑎᐸᐃᑲᓐ ᐱᓯᒧᑳᓂᒃ ᑫ ᑎᐱᔅᑳᒃ; 24ᓀᔥᑕ ᐅᑎᓇᒪᐎᒃ ᐊᐌᓯᓴᒃ, ᑭᒋ ᑌᑕᓛᒋᒃ ᐹᓪ, ᒀᔭᔉ ᑭᒋ ᐯᑐᐙᒋᒃ ᐊᓂᐃ ᐱᓕᒃᓴ ᐅᑎᐯᓕᒋᑫᐗ᙮ 25ᐅᒪ ᒫᑲ ᑮ ᐃᔑ ᒪᓯᓇᐃᑫᐤ: 26ᒃᓚᑎᔭᔅ ᓕᓯᔭᔅ ᐁ ᒪᓯᓇᐊᒪᐙᑦ ᐊᓂᐃ ᓈᔅᐱᒡ ᑫᔅᑎᓯᓕᒋ ᐱᓕᒃᓴ ᐊᑕᒥᔅᑲᐌᐤ᙮ 27ᐊᐗ ᐃᓕᓕᐤ ᑮ ᐅᑎᓂᑯ ᒎᐗ, ᑲᑕ ᑮ ᓂᐸᔨᑯᐸᓐ ᒫᑲ: ᐁᑯ ᒫᑲ ᐱᐁᒋ ᐃᑐᑌᔮᓐ ᐁ ᐎᒉᐗᑭᒃ ᒥᔮᒪᐎᐅᓇᑐᐸᓕᐗᒃ, ᓂ ᑮ ᐎᑾᒋᐊᐤ ᒫᑲ, ᐁ ᑮ ᐯᑕᒫᓐ ᐁ ᕈᒥᐎᓕᓕᐎᑦ᙮ 28ᐃᔅᐱ ᒫᑲ ᐙ ᑭᔅᑫᓕᑕᒫᐸᓐ ᐊᓂᒪ ᑳ ᐅᒋ ᒪᒥᔑᒫᒋᒃ, ᓂ ᑮ ᐯᔑᐗᐤ ᐃᑕ ᐁ ᐃᔑ ᒪᐗᒋᐃᑐᓕᒋ: 29ᐊᓇ ᑳ ᐱᓯᔅᑫᓕᒪᒃ ᐁ ᒫᒥᔑᒫᑲᓂᐎᑦ ᑲᑴᒋᑫᒧᐎᓇ ᐅᒋ ᐅᑦ ᐅᓚᔓᐌᐎᓂᐙᒃ, ᒫᑲ ᐁᑳ ᐁ ᒫᒥᔑᒫᑲᓂᐎᑦ ᑫᒀᓕᐤ ᑳ ᐅᒋ ᐃᑌᓕᑖᑯᓯᑦ ᑭᒋ ᓂᐸᐋᑲᓂᐎᑦ ᓀᔥᑕᐱᑯ ᑭᒋ ᒫᒫᒋᑯᐱᑖᑲᓀᐎᑦ᙮ 30ᐃᔅᐱ ᒫᑲ ᑳ ᐎᑕᒫᑲᐎᔮᓐ ᒎᐗᐤ ᐁ ᐊᔅᑲᒪᐙᒋᒃ ᐊᓂᐃ ᐃᓕᓕᐗ, ᑭᔖᒡ ᑭ ᑮ ᐃᑎᔕᐊᒫᑎᓐ, ᓂ ᑮ ᐃᑕᔓᐙᑖᐗᒃ ᒫᑲ ᐊᓂᑭ ᑳ ᒫᒥᔑᒫᒋᒃ ᐊᓯᒋ ᑭᒋ ᐎᑕᑭᒃ ᐁ ᑖᔅᑕᒪᐱᔭᓐ ᐊᓂᐃ ᑫᒀᓇ ᑫ ᒪᒋ ᐃᑖᒋᒃ᙮ ᐙᒋᔭ᙮
31ᐁᑯ ᐅᓇᑐᐸᓕᐗᑳ, ᑳ ᑮ ᐃᑕᔓᐙᑖᑲᓂᐎᒋᒃ, ᐌᑎᓈᒋᒃ ᐹᓚ, ᓀᔥᑕ ᒣᒀᒡ ᐁ ᑎᐱᔅᑳᓕᐤ ᑮ ᐯᔑᐌᐗᒃ ᐊᓐᑕ ᐋᓐᑎᐯᑦᕆᔅ᙮ 32ᐎᐋᐸᓂᓕᒃ ᒫᑲ ᑮ ᓇᑲᑌᐗᒃ ᒥᔅᑕᑎᒥᓕᓕᐗ ᑭᒋ ᐎᒉᐙᓕᒋ, ᓀᔥᑕ ᓇᑐᐸᓕᐎᑲᒥᑯᒃ ᑮ ᐃᔑ ᑭᐌᐗᒃ: 33ᐎᓚᐗᐤ, ᐃᔅᐱ ᑌᑯᔑᑭᒃ ᐊᓐᑕ ᓯᓴᕆᔭ, ᓀᔥᑕ ᑳ ᒥᓛᒋᒃ ᒪᓯᓇᐊᒫᑐᐎᓂᓕᐤ ᐅᑎᐯᓕᒋᑫᐗ, ᐹᓚ ᓀᔥᑕ ᑮ ᐅᑎᔥᑳᐎᑳᐸᐎᔅᑕᐎᐁᐗᒃ᙮ 34ᐃᔅᐱ ᒫᑲ ᐅᑎᐯᓕᒋᑫᐤ ᑳ ᑮ ᐋᔭᒥᑖᑦ ᒪᓯᓇᐊᒫᑐᐎᓂᓕᐤ, ᑮ ᑲᑴᒋᑫᒧ ᑫᑯ ᑎᐯᓕᒋᑫᐎᓂᒃ ᐌᒋᓕᒋ᙮ ᐃᔅᐱ ᒫᑲ ᑫᔅᑫᓕᑕᒃ ᓯᓕᓯᔭᐃᒃ ᐅᒋ; 35ᑭ ᑳ ᐯᑖᑎᓐ, ᑮ ᐃᑌᐤ, ᐃᔅᐱ ᐎᓚᐗᐤ ᓀᔥᑕ ᑳ ᒫᒥᔑᒥᔅᑭᒃ ᑕᑯᔑᑾᐌ᙮ ᑮ ᐃᑕᔓᐙᑌᐤ ᒫᑲ ᑭᒋ ᑲᓇᐌᓕᒥᒥᒋ ᐦᐁᕋᑕ ᐅ ᑎᐹᔅᑯᓂᑫᐎᑲᒥᑯᓕᒃ᙮
Currently Selected:
ᐊᐸᔅᑕᓚᒃ 23: MCNT91
Highlight
Copy
Compare
Share
Want to have your highlights saved across all your devices? Sign up or sign in
The text of the Bible in Moose Cree is in the public domain.
Moose Cree New Testament © Canadian Bible Society, 1991.
