ᓂᔥᑕᒻ ᑯᕆᓐᑎᐊᓇ 1
1
1ᐹᓪ, ᑳ ᑮ ᓇᑕᒫᑲᓂᐎᑦ ᐅᑦ ᐊᐸᔅᑕᓕᒪ ᒋᓴᔅ ᙭, ᐁ ᐃᑌᓕᑕᒃ ᑭᒋᒪᓂᑐ, ᓀᔥᑕ ᓱᔅᑐᓃᔅ ᑭᒋᔖᓂᓇᐤ:
2ᐁ ᒪᓯᓇᐊᒪᐙᑦ ᐊᓂᐃ ᐅ ᒫᒪᐎᐋᔭᒥᐋᒪ ᑭᒋᒪᓂᑐ ᑳ ᐃᑖᓕᒋ ᑯᕆᓐᑎᒃ, ᐊᓂᐃ ᑳ ᐸᓓᑭᐋᑲᓂᐎᓕᒋ ᙭ ᒋᓴᓯᒃ, ᑳ ᑮ ᓇᑐᒫᑲᓂᐎᓕᒋ ᑭᒋ ᐅᐸᓓᑭᓯᐎᓕᒋ, ᐊᓯᒋ ᒥᓯᐌ ᐃᑌ ᑳ ᑌᑆᑕᒸᓕᒋ ᐅᑦ ᐃᔑᓂᑳᓱᐎᓂᓕᐤ ᒋᓴᔅ ᙭ᑕ ᑭ ᑎᐯᓕᒋᑫᒥᓇᐗ, ᐊᓇ ᑳ ᑎᐯᓕᒫᑦ ᐊᓂᐃ ᓀᔥᑕ ᑭᓚᓈᓇᐤ᙮
3ᔕᐌᓕᒋᑫᐎᓐ ᑭ ᑳ ᐎ ᐋᔮᓇᐗᐤ, ᓀᔥᑕ ᑳᔮᒣᓕᑕᒧᐎᓐ, ᑭᒋᒪᓂᑐ ᑯᑖᐎᓇᐤ ᐅᒋ, ᓀᔥᑕ ᑭ ᑎᐯᓕᒋᑫᒥᓇᐤ ᒋᓴᔅ ᙭᙮
ᐁ ᐃᔑ ᔕᐌᓕᑖᑯᓯᔭᒃ ᙭ᑎᒃ
4ᓂ ᓇᓈᔅᑯᒪᐤ ᓂ ᑭᒋᒪᓂᑐᒻ ᒧᔕᒃ ᑭᓚᐗᐤ ᐅᒋ, ᐊᓂᒪ ᐅ ᔕᐌᓕᒋᑫᐎᓐ ᐅᒋ ᑳ ᑮ ᒥᓕᑖᒃ ᑭᒋᒪᓇᑐ ᐎᓚ ᐅᒋ ᒋᓴᔅ ᙭; 5ᒥᓯᐌ ᑫᒀᓐ ᐁ ᑮ ᒥᔕᑭᐃᑖᒃ, ᒥᓯᐌ ᐋᔭᒥᐎᓂᒃ, ᓀᔥᑕ ᒥᓯᐌ ᑭᔅᑫᓕᑕᒧᐎᓂᒃ; 6ᐅ ᑎᐹᒋᒧᐎᓐ ᙭ ᑳ ᑮ ᐃᔑ ᐋᔨᒋᑕᒫᑲᐎᔦᒃ᙮ 7ᑳ ᐅᒋ ᐁᑳ ᓈᓐᑕᐤ ᒥᓕᐌᐎᓐ ᐁ ᓄᑌᐸᓕᔦᒃ; ᐁ ᐊᔕᐙᐸᑕᒬᒃ ᐅ ᑕᑯᔑᓄᐎᓐ ᑭ ᑎᐯᓕᒋᑫᒥᓇᐤ ᒋᓴᔅ ᙭; 8ᐊᓇ ᓀᔥᑕ ᑫ ᐋᔨᒋᐃᑖᒃ ᐃᔅᒀᔮᒡ ᐃᔅᑯ, ᐁᑳ ᐗᔦᔥ ᑭᒋ ᐋᑖᒥᒥᑳᐎᔦᒃ ᐅᑎᒋᐸᓕᓕᑫ ᐅ ᑭᔑᑳᒻ ᑭ ᑎᐯᓕᒋᑫᒥᓇᐤ ᒋᓴᔅ ᙭: 9ᑭᒋᒪᓂᑐ ᒀᔭᔅᑭᑎᐤ, ᐊᓇ ᑳ ᑮ ᓇᑐᒥᑖᒃ ᑭᒋ ᐅ ᐎᒉᐙᑲᓂᒥᒣᒃ ᐅᑯᓯᓴ ᒋᓴᔅ ᙭ ᑭ ᑎᐯᓕᒋᑫᒥᓇᐤ᙮
ᐸᑳᓂᐃᑐᐎᓐ ᒣᑯᔦᔥ ᐅᑕᔭᒥᐋᐗᒃ
10ᐁᑯ ᑭ ᓇᑕᐌᓕᑕᒫᑎᓇᐗᐤ, ᓂᒋᔖᓂᑐᒃ, ᐅᑦ ᐃᔑᓂᑳᓱᐎᓂᒃ ᐅᒋ ᑭ ᑎᐯᓕᒋᑫᒥᓇᐤ ᒋᓴᔅ ᙭, ᒥᓯᐌ ᐁ ᐃᑕᔑᔦᒃ ᑭᒋ ᐯᔭᑯ ᐃᑗᔦᒃ, ᐁᑳ ᓀᔥᑕ ᑭᒋ ᐃᑕᑾᑭ ᐸᑳᓂᐃᓱᐎᓇ ᐃᑕ ᐁ ᐃᑖᔦᒃ; ᒥᑐᓂ ᒫᑲ ᑭᒋ ᐎᒉᑐᔦᒃ ᓵᑭᐃᑐᐎᓂᒃ ᐁ ᐯᔭᑯ ᒥᑐᓀᓕᒋᑲᓂᔦᒃ, ᓀᔥᑕ ᐁ ᐯᔭᑯ ᑎᐹᔅᑯᓂᑫᔦᒃ᙮ 11ᐌᓴ ᓂ ᑮ ᐎᑕᒫᑲᐎᓐ ᐁ ᐃᑖᒋᒥᑲᐎᔦᒃ, ᓂᒋᔖᓂᑐᒃ, ᐊᓂᑭ ᑳ ᐃᑖᒋᒃ ᒃᓗᐃ ᐎᑭᓕᒃ ᐁᐗᒀᓂᑭ ᑳ ᑮ ᐎᑕᑭᒃ, ᐁ ᐋᔑᑌᒥᑐᓈᓂᐗᒃ ᐃᑕ ᐁ ᐃᑖᔦᒃ᙮ 12ᐅᒪ ᒫᑲ ᓂᑦ ᐃᑣᓐ, ᒥᓯᐌ ᑕᑐ ᐁ ᐃᑕᔑᔦᒃ ᐁ ᐃᑗᑦ, ᓂᓚ ᓂ ᓄᔅᐱᓇᑕᐤ ᐹᓪ; ᓀᔥᑕ ᓂᓚ ᐊᐸᓚᔅ; ᓀᔥᑕ ᓂᓚ ᓯᐸᔅ; ᓀᔥᑕ ᓂᓚ ᙭᙮ 13ᓀᓈᐎᓇᐤ ᓈ ᙭? ᐹᓪ ᓈ ᑮ ᒋᔅᑖᔅᑾᐗᐤ ᑭᓚᐗᐤ ᐅᒋ? ᓀᔥᑕ ᐱᑯ ᑭ ᑮ ᓯᑲᐋᑖᑲᐎᓈᐗᐤ ᓈ ᐹᓪ ᐅᑦ ᐃᔑᓂᑳᓯᐎᓂᒃ?
14ᓂ ᓇᓈᔅᑯᒪᐤ ᑭᒋᒪᓂᑐ, ᐁᑳ ᐊᐌᓇ ᐁ ᐃᑕᔑᔦᒃ ᐁ ᑮ ᓯᑲᐋᑕᐗᒃ, ᐱᑯ ᒃᕆᔅᐸᔅ ᓀᔥᑕ ᑫᐊᔅ; 15ᐁᑳ ᐊᐌᓇ ᑭᒋ ᑮ ᐃᑗᑦ ᐁ ᑮ ᓯᑲᐋᑖᑫᔮᓐ ᑎᐱᓚᐌ ᓂᑦ ᐃᔑᓂᑳᓱᐎᓂᒃ᙮ 16ᓂ ᑮ ᓯᑲᐋᑕᐙᐗᒃ ᓀᔥᑕ ᑳ ᐃᑕᑐᑫᑦ ᔅᑎᐸᓇᔅ: ᐊᐙᓯᑌ ᐅᑯ, ᓇᒪᐎᓚ ᓂ ᑭᔅᑫᓕᑌᓐ ᐁ ᑮ ᓯᑲᐗᑕᐗᒃ ᑯᑕᒃ ᐊᐌᓇ᙮ 17ᐌᓴ ᙭ ᓇᒪᐎᓚ ᓂ ᑮ ᐃᔑᑎᔕᐅᒃ ᑭᒋ ᓯᑲᐋᑖᑫᔭᓐ, ᒫᑲ ᑭᒋ ᑲᑫᔅᑭᒥᐌᔮᓐ ᒥᓗᐋᒋᒧᐎᓐ: ᓇᒪᐎᓚ ᑲᑫᑕᐌᓕᑕᒧᐎ ᐋᔭᒥᐎᓇ ᐅᒋ, ᐁᑳ ᙭ ᐅᑦ ᐋᔑᑌᐋᑎᑯᒻ ᐁᑳ ᐙᔦᔥ ᑭᒋ ᐃᑖᐸᑕᓂᓕᒃ᙮
᙭ ᑳ ᓲᑳᑎᓯᑦ ᓀᔥᑕ ᐊᓂᒪ ᐅᑲᑫᑖᐌᓕᑕᒧᐎᓐ ᑭᒋᒪᓂᑐ
18ᐌᓴ ᐁ ᑲᑫᔅᑭᒥᐙᓂᐗᒃ ᐊᓂᒪ ᐋᔑᑌᐋᑎᒃ ᑭᔥᑴᐄᓐ ᐃᑌᓕᑕᒶᒃ ᐊᓂᑭ ᑳ ᓂᔑᐗᓈᑎᓯᒋᒃ; ᒫᑲ ᑭᓚᓈᓇᐤ ᑳ ᐱᒫᒋᐃᑲᐎᔭᒃ ᑭᒋᒪᓂᑐ ᐅ ᑲᔥᑭᐅᐎᓐ ᑭᑦ ᐃᑌᓕᑌᓈᓇᐤ᙮ 19ᐌᓴ ᐃᑕᓯᓇᐃᑳᑌᐤ, ᓂ ᑳ ᓂᔑᐗᓈᒋᑕᐙᓐ ᐅ ᑲᑫᑕᐌᓕᑕᒧᐎᓂᐗᐤ ᐅᑲᑫᑕᐌᓕᑕᒶᒃ, ᓀᔥᑕ ᓂ ᑳ ᐃᔥᒀᐸᓕᑕᒸᓐ ᐅ ᓂᓯᑐᑕᒧᐎᓂᐗᐤ ᐅᓕᑆᑳᐗᒃ᙮ 20ᑖᓐᑌ ᐁᑖᑦ ᐅᑲᑫᑕᐌᓕᑕᒻ? ᑖᓐᑌ ᐁᑖᑦ ᐅᒪᓯᓇᐃᑫᐤ? ᑖᓐᑌ ᐁᑖᑦ ᐊᓇ ᑳ ᑲᑴᔖᑯᒋᒥᐌᑦ ᐅᑕ ᐊᔅᑮᒃ? ᓇᒪ ᓈ ᑭᒋᒪᓂᑐ ᑮ ᑭᔥᑴᑕᐤ ᐅᒪ ᐊᔅᑭᐎ ᑲᑫᑕᐌᓕᑕᒧᐎᓂᓕᐤ?
21ᐌᓴ ᐹᑎᒫ, ᐅ ᑲᑫᑕᐌᓕᑕᒧᐎᓂᒃ ᑭᒋᒪᓂᑐ, ᐊᔅᑮᒃ ᑳ ᐃᑖᒋᒃ ᑲᑫᑕᐌᓕᑕᒧᐎᓂᒃ ᐁᑳ ᐁ ᐅᒋ ᑭᔅᑫᓕᒫᒋᒃ ᑭᒋᒪᓂᑐᐗ, ᑮ ᐃᔑ ᒥᓜᓕᑕᒻ ᑭᒋᒪᓂᑐ ᐁ ᐃᔑ ᑮᔥᑴᒪᑲᒃ ᑲᑫᔅᑭᒥᐌᐎᓐ ᐅᒋ ᑭᒋ ᐱᒫᒋᐋᑦ ᐊᓂᐃ ᑳ ᑖᐺᔦᓕᑕᒥᓕᒋ᙮ 22ᐌᓴ ᒎᐗᒃ ᓇᑕᐌᓕᑕᒶᒃ ᑭᔅᑭᓄᐙᒋᒋᑲᓂᓕᐤ, ᒃᕆᑲᒃ ᒫᑲ ᓈᓇᑕᐌᓕᑕᒶᒃ ᑲᑫᑕᐌᓕᑕᒧᐎᓂᓕᐤ: 23ᒫᑲ ᓂ ᑲᑫᔅᑭᒥᐙᓈᓐ ᙭ ᐁ ᒋᔅᑖᔅᑾᐙᑲᓂᐎᑦ, ᒍᐗᒃ ᐁ ᐅ ᐱᔓᓯᓄᐎᓂᒋᒃ, ᓀᔥᑕ ᒃᕆᑲᒃ ᑲᑫᐹᑎᓯᐎᓐ ᑳ ᐃᑌᓕᑕᑭᒃ; 24ᒫᑲ ᐊᓂᑭ ᑳ ᓇᑐᒫᑲᓂᐎᒋᒃ, ᑖᐱᔅᑯᒡ ᒎᐗᒃ ᓀᔥᑕ ᒃᕆᑲᒃ, ᐁᐗᑯ ᑳ ᐃᑌᓕᑕᑭᒃ, ᙭ ᐅ ᑲᔥᑭᐅᐎᓐ ᑭᒋᒪᓂᑐ, ᓀᔥᑕ ᐅ ᑲᑫᑕᐌᓕᑕᒧᐎᓐ ᑭᒋᒪᓂᑐ᙮ 25ᐌᓴ ᐅ ᑲᑫᐹᑎᓯᐎᓐ ᑭᒋᒪᓂᑐ ᐊᐙᓯᑌ ᑲᑫᑕᐌᓕᑖᑾᓂᓕᐤ ᐃᔥᐱᔥ ᐃᓕᓕᐗᒃ; ᓀᔥᑕ ᐅ ᓕᓚᒥᓯᐎᓐ ᑭᒋᒪᓇᑐ ᐊᐙᓯᑌ ᒪᔥᑲᐎᓯᒪᑲᓂᓕᐤ ᐃᔥᐱᔥ ᐃᓕᓕᐗᒃ᙮
26ᐌᓴ ᑭ ᐙᐸᑌᓇᐗᐤ ᑭ ᓇᑐᒥᑯᓯᐎᓂᐗᐤ, ᓂᒋᔖᓂᑐᒃ, ᐁᑳ ᐁ ᒥᒉᑎᒋᒃ ᑳ ᑲᑫᑕᐌᓕᑕᑭᒃ ᐎᔮᓯᐎᓂᒃ ᐃᔑ, ᐁᑳ ᐁ ᒥᒉᑎᒋᒃ ᑳ ᓱᑳᑎᓯᒋᒃ, ᐁᑳ ᐁ ᒥᒉᑎᒋᒃ ᑳ ᑭᒋᐃᑌᓕᑖᑯᓯᒋᒃ᙮ ᐁ ᓇᑐᒫᑲᓂᐎᒋᒃ: 27ᒫᑲ ᑭᒋᒪᓂᑐ ᑮ ᐙᐌᓛᐊᑕᒻ ᑳ ᑲᑫᐹᑎᓯᒪᑲᑭ ᐅᑕ ᐊᔅᑭᒃ ᑭᒋ ᐗᓀᓕᑕᒥᐃᐌᒪᑲᑭ ᐊᓂᐃ ᑳ ᑲᑫᑕᐌᓕᑕᒧᒪᑯᑭ; ᑭᒋᒪᓂᑐ ᓀᔥᑕ ᑮ ᐙᐌᓛᐸᑕᒻ ᑳ ᓕᓚᒥᓯᒥᑲᑭ ᑭᒋ ᐗᓀᓕᑕᒥᐃᐌᒪᑲᑭ ᐊᓂᐃ ᑳ ᒪᔥᑲᐎᓯᒪᑲᑭ; 28ᓀᔥᑕ ᑳ ᒪᒉᓕᑖᑾᑭ ᐅᑕ ᐊᔅᑮᒃ, ᓀᔥᑕ ᑳ ᐋᑕᐌᓕᑖᑾᑭ, ᑭᒋᒪᓂᑐ ᑮ ᐙᐌᓛᐸᑕᒻ ᐁᐁ, ᓀᔥᑕ ᑫᒀᓇ ᐁᑳ ᑳ ᐃᑕᑾᑭ ᑭᒋ ᓂᔑᐗᓈᒋᑖᒪᑲᑭ ᐊᓂᐃ ᑳ ᐃᑕᑾᑭ: 29ᐁᑳ ᐊᐌᓇ ᑳ ᐎᔮᓯᐎᑦ ᑭᒋ ᒫᒪᑖᑯᒧᑦ ᐁᑕᔅᑕᒪᐱᓕᒋ᙮ 30ᒫᑲ ᐎᓚ ᐅᒋ ᑭᑦ ᐋᐎᓇᐗᐤ ᙭ ᒋᓴᓯᒃ, ᐊᓇ ᑳ ᐃᔑᑕᒫᑲᐎᔭᒃ ᑭᒋᒪᓂᑐᒃ ᐅᒋ, ᑲᑫᑕᐌᓕᑕᒧᐎᓐ, ᓀᔥᑕ ᒀᔭᔅᑭᑖᑎᓯᐎᓐ, ᓀᔥᑕ ᐸᓓᑭᐃᑯᓯᐎᓐ, ᓀᔥᑕ ᑎᐸᐊᒫᑫᔅᑕᒫᑯᓯᐎᓐ; 31ᑭᒋ ᐃᑭᒃ ᐁ ᐃᑕᓯᓇᐃᑳᑌᒃ, ᐊᓇ ᑳ ᒫᒫᑖᑯᒧᑦ, ᐁᑯᔑ ᑲᑕ ᒫᒫᑖᑯᒧ ᐅᑎᐯᓕᒋᑫᒃ᙮
Currently Selected:
ᓂᔥᑕᒻ ᑯᕆᓐᑎᐊᓇ 1: MCNT91
Highlight
Copy
Compare
Share
Want to have your highlights saved across all your devices? Sign up or sign in
The text of the Bible in Moose Cree is in the public domain.
Moose Cree New Testament © Canadian Bible Society, 1991.
