Ro 2
2
Dios yataqachiñe yataqatelegue
1Qo'che' ja naqaeda ta'le qaya'te adajouaĝajet, da'me am jo'ne auatapiñgue ga'me lajouaĝajet ga'me adaqaya. Ja yaqalan qom p'ajaye ga'me am netaye, qama'le nach'e ena'am oueta'ñe' ga'me qom qoya'uo ne'uaĝanaguec, qa'a auadenaĝa't gaa'me 'lonataqa jogaa'me. 2Qama'le jayatenaq queda'me Dios yataqachiñe yaqate'tegue da'me nemitaque ga'me jiyaĝaua lajouaĝajet qom ya'uo ne'uaĝanague'j jogaa'me jo'ne naq'aete' daa'me 'lonataqa.
3Qama'le da'me am jo'ne auatapiñgue ga'me laviyaĝajet ga'me adaqaya, nataq'aen auadenaĝa't gaa'me 'lonataqa jogaa'me, ena'te aueetapega am yaĝan qomle ga'me Dios ya'uo ne'uaĝanague'j. 4Am aualajaĝan da'me ja yemeta lichoĝodenataĝanaĝac ñe'me Dios, ¿ja auetadenac joona da'me nach'eda da'me lichoĝodenataĝanaĝac jo'ne am yeuequetague da'me aĝadegue naa'me adoeco? 5Qalaĝaja qom yataqachiñe ja damichigui na'me adauel, ja jetaque a'viyeloqot ñe'me Dios, dite da'me alapotapega't da'me ane'uaĝanaguec 'me am qoyachalegue qomle, ga'me nolo' qom 'uo da'me nec'atenaĝanaĝac, qom ñe'me Dios yechoĝot da'me lajouaĝajet ga'me onolec qama'le qoya'uo ne'uaĝanaguec. 6Qama'le onolqa'tape yejetenec ga'me jo'ne mach'e 'yetetac ca'li. 7Yanem da'me 'loyaĝac 'me ja 'naidena'a jogaa'me jo'ne 'nañaĝadetec da'me yelodaque, da'me 'lonaĝac ñe'me Dios da'me ja yitaĝa pal. 8Qalaĝaja yedolo'te da'me lalemataic ñe'me Dios da'me ya'uo ne'uaĝanague'j joga'me qoleguetaĝanaĝaiquipi nataq'aen gaa'me ja yoqochideta da'me yataqatelegue dite da'me yauote da'me ja no'en. 9Jalcote 'uo qomle da'me lachoĝode'j ena'uaque gaa'me jo'ne 'yetedac da'me ja no'en. 'Uaediñe jogaa'me judiopi, yem qama'le jogaa'me ja judiopi. 10Qalaĝaja, ena'uaque jogaa'me jo'ne 'yetedac da'me 'noota qamqa'me Dios yanema da'me 'lonaĝa'j nataq'aen da'me li'yoĝodi'j nataq'aen da'me 'lemaĝa'j, nach'e ena'am 'uaediñe joga'me judiopi, yem qama'le nach'e ena'am joga'me ja judiopi. 11Qa'a ñe'me Dios qaya'te liquiyac da'me onolqa'tape nemitaque ga'me najouaĝajet.
Daa'me Dios lamaĝajoĝonaĝaco jo'ne chiyoqodo'ot ñe'me Moisés
12Ena'uaque gaa'me jo'ne ja yateto'n daa'me Dios lamaĝajoĝonaĝaco jo'ne chiyoqodo'ot ñe'me Moisés, qama'le tadoue da'me liyamaĝa'j temaqaedi da'me ja yateto'n daa'me namaĝajoĝonaĝaco; qama'le jogaa'me yauote loeco mate mane'e uetedaue da'me laqataĝaco di'me Moisés qama'le qoyen chiyaqayi ga'me naqataĝacpi da'me qonemitaque naa'me laviyaĝaco. 13Qa'a qom Dios yec'atelo'te joga'me jiyaĝadipi, ja chimaqachiñe da'me lajoĝo'j jogaa'me jo'ne nach'edata da'me domachiyalo daa'me namaĝajoĝonaĝaco, dite da'me lajoĝa'j jogaa'me jo'ne yoqocha'alo. 14Qa'a qom gaa'me ja judiopi nataq'aen ja uetedaue da'me namaĝajoĝonaĝaco, qom ch'e naeda'ac da'me ye't ga'me damaĝajoĝolegue daa'me naqataĝaco, qama'le mach'e chiyaqayilo naa'me lai'li da'me que'teguelo daa'me namaĝajoĝonaĝaco. 15Qa'a da'me lajoĝo'j jogaa'me yaloĝo'n da'me yachitedac ga'me naqataĝacpi 'me qoyedelo'te naa'me lai'li. Da'me yotaua'n da'me mach'e letadenataĝanaĝa'j, naqaenaua mach'e lelnataĝaco yequemaqate't uotaĝa lelnataĝaco de'uolo'te jogaa'me. 16Ga'me nolo' p'ategue qom Dios ya'uo da'me lec'atenaĝanaĝac da'me nemitaque ga'me lelnataĝacopi 'me ja di'yo't ga'me jiyaĝadipi chiyaqayi q'aen ñe'me Cristo Jesús nach'e naq'aeta da'me onaĝaic 'naqataĝac 'me ja'aĝatetac.
17Am a'naĝatapela't judiopi le'ec auep'iya'alo daa'me namaĝajoĝonaĝaco jo'ne yepota'n ca'li ñe'me Moisés, nataq'aen ani'yoĝodetapiye ñe'me Dios. 18Auateton da'me loequenataĝanaĝac ñe'me Dios nataq'aen daa'me namaĝajoĝonaĝacpi am qoyapaĝaguenec da'me oquegue ga'me 'noota. 19Nataq'aen yataqachiñe auayaten da'me auetapela't auaqanatet da'me auaue'j jogaa'me qana'mi nataq'aen auoqoyadelo'te gaa'me uetedaue ga'me 'lalaĝa. 20Da'me auetapela't auayaten ga'me auen lajoĝoc da'me anoqotena ga'me qaya'te letadenataĝanaĝac nataq'aen a'uañaqate't gaa'me dalaĝayaqa, qa'a aueetapega am ua'ajop yema ga'me natetonaĝanaĝacpi 'me chiyaqayilo daa'me namaĝajoĝonaĝaco nataq'aen da'me jo'ne yataqachiñe eja.
21Chane'eja, qom auapaĝaguen ga'me adaqaya, qama'le ¿toqoch'e ja nach'e ena'am anapaĝaguela't? Qom auapaĝaguenec da'me ja 'noota da'me necachaĝac, qama'te am, ¿toqoch'e auecachetac? 22Qom a'uaĝatetac da'me ja 'noota da'me qonecachiyapegue' jaga'me ja yataqachiñe noua, qama'te am, ¿toqoch'e aua'uo da'me dojo'? Qom adiquiya'alo gaa'me nequi'il 'me qop'iyapegalo, ¿toqoch'e auecachiyapega ga'me leuoyaĝac 'me uetauelo gaa'me 'lemaqa jogaa'me? 23Ani'yoĝodetapiyelo naa'me namaĝajoĝonaĝaco qalaĝaja ja avi'yoĝoden ñe'me Dios, qa'a ja yataqachiñe auoqocha'alo daa'me lamaĝajoĝonaĝaco joñe'me.
24Naa'me nedii's jo'ne qoyedidiñe ca'li eet'oi: “Joga'me ja judiopi ye'uetedac ñe'me Dios qa'a jouaĝat ami judiopi.”
25Eja da'me qom 'uo ga'me yoqocha'alo daa'me namaĝajoĝonaĝaco jo'ne yepota'n ñe'me Moisés, ga'me 'nanec jo'ne nichaĝajoĝonaĝac 'uo ga'me yelo'teguet jo'ne lecochiya joga'me; qalaĝaja qom ja yaqalanapiye't da'me ja yoqocha'alo qama'le ena'am da'me ja ue'tajop ga'me 'nanaĝajet 'me nechaĝajet. 26Ga'me jo'ne ja netaye da'me nichaĝajoĝonaĝac, qom ta'teguet da'me mach'e 'loyaĝac da'me que'tegue ga'me damaĝajoĝolegue naa'me naqataĝacpi; joga'me qo'yanec da'me ena'am ta'le netaye ga'me 'nanaĝajet, mate mane'e ja yauana da'me dojo'. 27Ñe'me jo'ne yoqocha'alo daa'me naqataĝaco, mate mane'e ja netaye da'me nichaĝajoĝonaĝac ga'me lo'oc, nach'ega ami yepoleguelo'te, yajouaĝat da'me temaqaedi da'me ovitaue da'me namaĝajoĝonaĝac nataq'aen ami netayelo ga'me nichaĝajoĝonaĝac, qalaĝaja ja auoqochiiya.
28Qa'a ja naqaeda da'me am judío le'ec jo'ne nach'edata netaye ga'me p'aye, nataq'aen da'me nichaĝajoĝonaĝac ja nach'edata da'me p'aye jo'ne netaye na'me ado'oc. 29Ga'me yataqachiñe yataqatelegue judío le'ec nach'ega p'auo, nataq'aen da'me am netaye da'me nichaĝajoĝonaĝac mach'e loĝot na'me adauel ja naqaeda ta'le chiyaqalegue ga'me qoyediñe, dite ñe'me Dios Lepaqal. Ñe'me jo'ne naq'aeta, nach'eñe da'me niyamaĝadenataguec, qalaĝaja ja chiyaqayi ga'me ch'e jiyaĝaua dite ñe'me Dios.
Currently Selected:
Ro 2: TSN
Highlight
Share
Copy
Want to have your highlights saved across all your devices? Sign up or sign in
Nuevo Testament Toba del Oeste © 2010 Sociedad Bíblica Argentina