Ro 14

Ena'te auenapegalo jogaa'me adaqaya'

1Auacoñiyeguet joga'me p'etaqadaic jo'ne ja jalcote t'añi da'me lepe'e, qalaĝaja ena'te anecotai'ye' joga'me. 2Jenjo' laloĝoiqui uo'oe jogaa'me eetedapega 'uañaĝayaqa qama'le 'yamaqate'n da'me 'noota ta'le yema yali'j ga'me yauata. Qalaĝaja joga'me qaya'te 'lañaĝac yejamaĝa't da'me yalic joga'me nanal jala. 3Qalaĝaja joga'me yaqanatet da'me yema yalic, ja 'noota ta'le ye'ue'tape jogaa'me laqaya' jo'ne qaya'te 'lañaĝa'j, qama'le nach'e ena'am joga'me yalic na'me nanal jala, ja 'noota ta'le ye'ue'tape joga'me yema yalic, qa'a joñe'me Dios nataq'aen yaconegueta, qaya'te yiyota'a. 4¿Jach'e am ta'le analoqoten joga'me adaqaya jo'ne lalemaĝajet ñe'me laqaya? Qa'a joñe'me loĝot joga'me nalemaĝajet mach'e yayaten joga'me ee'tec, uotaĝa t'onataĝan uotaĝa ja naq'aeta. Chane'eja naq'aeta joñe'me Dios, jo'ne naqaeñe onolec yaqanatet da'me 'uo joga'me lañoqotaĝanaĝac qaedi ami yataqata lecochiyalo da'me a'vichi joga'me at'onataqui. 5Yitaĝa 'uo joga'me qodaloqotenaĝana jo'ne eetac: uo'oe jogaa'me eetedapega 'uo joga'me nolo' jo'ne napacalo'te jogaa'me laqaya' nataq'aen 'uo ga'me jiyaĝaua laqaya jo'ne eetapega naa'me noloqo'ote nach'e eta'ajalo qaya'te 'loyaĝac. Chane'eja 'noota ta'le onolqa'tape mach'e yataqata e'n eja q'aen joga'me lelnataĝac. 6Joga'me jo'ne yamaqaten da'me 'uo joga'me nolo' jo'ne yataqata yiyamaĝatetac, qama'le naq'aeta da'me 'nonaĝachigui joñe'me Dios. Nach'e ena'am joga'me jo'ne yema yalic nale nataq'aen yi'yoĝoden joñe'me Dios qama'le yatem da'me lamaic joñe'me, nach'e ena'ama jogaa'me nale yejamaĝa't da'me yalic na'me nanal jala, nataq'aen yi'yoĝoden joñe'me Qadet'a Dios nataq'aen yatem joda'me netonaĝac joñe'me. 7Joda'me qat'oyaĝac chayovida'a da'me qadeleuaĝa male ja qadoqo'te, qa'a onolec joñe'me Dios yayaten ga'me ee'tec. 8Qama'le qom qanec'aletaye uotaĝa male qadeleu male yataqata qo'nonaĝachigui joñe'me Qadejaliaĝanec Jesucristo, nach'e ena'am da'me uotaĝa maliaĝa qanelotaye uotaĝa qadeleu, nach'e ena'am qo'mi loqo'te joñe'me. 9Qa'a joñe'me Jesucristo yeleu nataq'aen yitaĝa 'niyelaĝajeguem qaedi male naqaeñe joñe'me Lejaliaĝane'j jogaa'me joote yele'u nach'e ena'ama jogaa'me maliaĝa nec'aletedaye. 10Chane'eja da'me ami ja 'noota qom aueñiyapegalo jogaa'me adaqayadi' jo'ne nataq'aen p'etaqadayaqa. Ena'te a'ue'tape qa'a yema qomle da'me qo'mi male jajoqo'tot joñe'me Dios, qom 'uo ga'me naloqotenaĝanaĝac. 11Naa'me nedii's jo'ne Dios 'laqatac eet'oi:

“Yataqata jayem eja nayi da'me ñec'aletaye,

qama'le jayem qoyauana,

male yema yejoidiñe naa'me leliquetel,

nataq'aen jayem qo'nonaĝachigui.”

12Chane'eja qomle da'me qo'mi male jajoqo'tot joñe'me Dios qaedi qanechoĝodetot joñe'me.

Ena'te aua'uo ga'me laviyaĝajet joga'me adaqaya

13Qama'le aĝañiñi da'me auachinataĝalo'te jogaa'me adaqayadi', qa'a 'uo jo' qomle joga'me jajouaĝataq jo'ne joote p'iya'a joñe'me Cristo qama'le ya'uo loec, nataq'aen da'me p'iya'a joñe'me Dios. 14Da'me jayem, joñe'me Qadejaliaĝanec Jesús yataqata jayem yapaĝaguenec da'me qaya'te niqui'yaĝat jo'ne ja no'en. Qalaĝaja qom 'uo joga'me eetapega joga'me niqui'yaĝat ja 'noota ta'le qoyalic, qama'le eja cha'li ja yalic. 15Qom joga'me adaqayai jo'ne ja 'yamaqaten nale joga'me aualiqui, qa'a jouaĝat da'me ami ja yataqata aualoĝoñiya joda'me adoqopich'ii, qama'le uotaĝa male 'naĝat joga'me jo'ne nach'e ena'am chiyaqayi da'me yeleu joñe'me Cristo. 16Chane'eja ena'te auauoyi qomle ledaqa' da'me nojaĝac jo'ne eetapela't ja no'en joda'me onaĝaic jo'ne ami uetauelo. 17Joda'me lejaliaĝa ñe'me Dios ja qoyelo'ogue joga'me niqui'yaĝac uotaĝa joga'me qoniyomigui, nach'edata da'me yataqata qoyen p'ajaye da'me qoye'et joda'me 'noota nataq'aen da'me 'uo da'me 'nemaĝac choqoda'me namaic 'me chiyoqo'ot joñe'me Dios Lepaqal. 18Qama'le jogaa'me jo'ne naq'aeta da'me t'onataĝadeuo'o joñe'me Jesucristo, nach'egaua eja da'me male yataqata yiyamaĝade'n joñe'me Dios, nataq'aen jena'me jiyaĝadipi nach'e ena'am da'me qouatec'alo.

19Chane'eja 'noota qom jelaqaque ga'me jo'ne chiyaqayi da'me 'nemaĝac nataq'aen da'me 'nañaqataĝanaĝac 'me ja qonañaĝanañi'. 20Ena'te chiyaqayi ga'me aualic da'me anolaĝachiñe da'me Dios 'lonatac. Eja yema yoqovita ga'me niqui'yaqa'tepi; qalaĝaja da'me yataqachiñe ja no'en qom ga'me jiyaĝaua chiyaqajeguem q'aen ga'me laqaya qom yec'atenec ga'me yalic. 21Chane'eja ena'te aualic ga'me lapat uotaĝa aniyomigui ga'me lataĝa nataq'aen gamachaqaega at'onatac 'me chiyaqayi da'me nejaliñe ga'me adaqaya. 22Da'me adepe'e jo'ne am ue'tajop 'noota da'me nedo'ta't da'me yalemaqa'tot ñe'me Dios. Matacolec ga'me jiyaĝaua jo'ne ja yepoleguelegue da'me mach'e lauelyaĝac da'me 'lamaqatenataĝanaĝac. 23Qalaĝaja ga'me jo'ne ch'e nache'taguet da'me 'uo ga'me yalic, qama'le qom yalic male mach'ega najouaĝatela't; qa'a ja chiyaqayi da'me lepe'e da'me yaconeguet joga'me, nataq'aen yema ga'me ja chiyaqayi da'me nepe'e nach'eda nejomaĝac.

Currently Selected:

Ro 14: TSN

Highlight

Copy