Ap 18

Male qoyalaĝachigui di'me Babilonia

1Mane'e ca'li yem da'me dojo', qama'le jauana jo'me piyem le'ec laqaya jo'ne nenochiñe, chiyaqaje'ma di'me piyem, jo'me jo'ne 'uo da'me lañoqotaĝanaĝac let'adaic, qama'le jena'me mach'e lauaq yecoyadelegue ca'li jena'me aleua. 2En yejam da'me 'laqatac, enaac:

“¡Ami yaqaya'olqa, male qoyalaĝachigui di'me noic let'adaic 'me Babilonia!

¡Male qoyen payagodipi 'lachaqa't,

choqona'me nañoĝotaqa' yema jena'me nepaqa'lpi

jo'ne yodapecache da'me 'loyaĝa'j jo'ne paĝachiguilo.

Nach'e ena'am uo'oe gaa'me lepataque'te gaa'me mayodi

jo'ne yodapecache da'me 'loyaĝa'j jo'ne paĝachiguilo,

nataq'aen gaa'me yejidi

jo'ne paĝachiguilo choqoda'me ouaqayaqa!

3Qa'a yemeda naa'me noyaqa da'me en taĝaiquipi da'me nequejeguetaĝa,

ena'am da'me uotaĝa qoniyomaĝañi ga'me lataĝa.

Chane'eja jogaa'me nejaliaĝanaqa jo'ne uetedalegue jena'me aleua

nach'e ena'ama da'me e'n lequejeguetaĝaua jañe'me Babilonia,

nataq'aen jogaa'me menaĝayaqa jo'ne uetedalegue jena'me aleua

male en neuoyaĝadi' da'me mach'e lañoqotaĝanaĝac da'me nequejeguetaĝa.”

4Qama'le yitaĝa jomachiya da'me 'naqatac laqaya jo'ne chiyaqaje'ma di'me piyem jo'ne eetac:

“Ami yalaqa, male oquiya'ae na'me noic,

qaedi ja nach'e ena'am ami tauelo naa'me mach'e loeco

nataq'aen da'me ja ami 'te novidalo'te gaa'me qoyen lapite'nadi

jo'ne ne'uaĝanaguec;

5qa'a naa'me mach'e loeco ma'ejama'le da'me natedajeguem

chayovida'a da'me yedaje'ma di'me piyem,

qama'le ñe'me Dios male tachigui lauel jogaa'me mach'e loeco jogaa'me.

6Auejeteneque joga'me nach'ega ca'li ami yanema;

aueñi dos 'viyelaĝalegue da'me auauoyi lachoĝodec

qa'a yajouaĝat da'me nichiyoĝojoĝoc.

Nataq'aen aueñi dos 'viyelaĝalegue ga'me laiquip

jo'ne jetaque yanema ca'li jogaa'me laqaya'.

7Auañem nayi da'me layaliaĝa nataq'aen da'me lachoĝodec,

analoqote'teguet da'me ee'tec ca'li ni'yoĝodela't

nataq'aen da'me 'yetetac jo'ne yataqachiñe ja no'en.

Qa'a 'uo ca'li da'me lelnataĝac jaga'me jo'ne eetac:

«Jenjo' jena'me joue'ta da'me joñichiñe ena'am ta'le jayem nejaliaĝana.

Da'me jayem ja jayem 'te p'ai, nataq'aen qaya'te ta'le yachoĝodec qomle.»

8Chane'eja nach'eda 'me yajouaĝat da'me ch'e onolec qoyen joga'me nolo'

da'me male qoyovidaĝatalegue da'me ne'uaĝanague'j,

jo'ne loqouaĝa nataq'aen da'me layaliaĝa chayovida'a da'me leleuaĝa,

qama'le qoyachaue ga'me dole' da'me qoyigoue;

queda'me nach'eñe Dios jo'ne ñoqotaĝanaĝaic,

joñe'me Jaliaĝanec jo'ne ya'uo da'me nalataguec.”

9Qama'le jogaa'me nejaliaĝanaqa jo'ne e'n lequejeguetaĝaua ca'li jañe'me Babilonia nataq'aen da'me ja yayate'n ga'me yauote ca'li queda'me tadoue da'me ja no'en, qom yauata jaga'me nemala' da'me male qoyigoue jañe'me, qama'le yataqata noye'tape choqoda'me 'yalaqatedapeguem da'me layaliaĝa jañe'me. 10Chane'eja male qaya'alo joga'me ueteda'a, yajouaĝat da'me t'oita da'me ne'uaĝanaguec jañe'me Babilonia, qama'le enapega't:

“Am Babilonia jo'ne am p'ajaye da'me am noic let'adaic,

¡Degueja da'me adachoĝodec nayi!

Qa'a pelaqatela't da'me novi' ga'me ane'uaĝanaguec.”

11Qama'le nach'e ena'ama jogaa'me menaĝayaqa noye'tape choqoda'me 'yalaqa'tape, qa'a yajouaĝat da'me lachoĝodec joga'me noic choqoda'me male ja yitaĝa ta'le 'uo ga'me ecot ga'me lemene'j, 12nach'egaua jogaa'me li'yaco jo'ne oro, plata, qadi jo'ne onaĝayaqa, perlas, laqañe jo'ne onaĝayaqa choqoga'me seda jo'ne 'loyaĝac da'me tomaqalegue nataq'aen ga'me tomaĝadaic; yema jana'me epaq jo'ne yodapecache da'me laetayaĝac jo'ne jama; choqogaa'me 'nonataqa jo'ne chiyoqodayi ga'me marfil, nataq'aen gaa'me chiyaqayilo gaa'me ep'a jo'ne onaĝayaqa daa'me 'loyaĝaco, nach'e ena'am jena'me bronce, nataq'aen jena'me yataqachiñe laicaua nataq'aen jena'me marmol; 13qama'le nach'e ena'ama jogaa'me li'yaco laqaya' jo'ne canela choqogaa'me lale'gue laqaya' jo'ne yodapecache jena'me laetayaĝa'j jo'ne jama; nataq'aen jana'me licha' 'me 'uo da'me laeta jo'ne jama, choqona'me yoĝoqui jo'ne davioĝon jo'ne nach'e ena'am chiyaqayi jana'me licha'; choqona'me uva li'i, cheta 'me aceite, aliina jo'ne no'en, nataq'aen jena'me trigo; choqoga'me yejidi jo'ne nelodi 'me uacapi nataq'aen gaa'me 'naĝanaĝatel choqogaa'me pegaĝadipi nataq'aen jogaa'me cadeetal, chayovida'alo jogaa'me jiyaĝa'u jo'ne nelataqa. 14Qama'le jenjo' jo'ne male qo'yaĝatem qomle di'me noic:

“¡Male ja yitaĝa ta'le auanalo naa'me nana jala jo'ne ye't,

jo'ne yataqachiñe anamañi';

yataqata qoyen qaya'alo

qa'a nayi male nale'en da'me ja yitaĝa 'uo da'me te'me adeuoyaĝaqui

choqoda'me adi'yoĝodiqui!”

15Chane'eja jogaa'me menaĝayaqa jo'ne yemena'ape naa'me naajo' jo'ne uo'oe qaedi yachiyoĝotedayi da'me leuoyaĝa'j, male qaya'alo ga'me neteda'ña, yajouaĝat da'me t'oita da'me ne'uaĝanaguec jañe'me Babilonia, qama'le yataqata noye'tape nataq'aen 'yalaqatedapeguem da'me lachoĝodec qoyen joga'me noic. 16Chane'eja nayi male enapega't:

“Da'me am jo'ne am noic let'adaic,

¡degueja da'me adachoĝodec nayi!

Qa'a auatedañe ca'li naa'me adeuo jo'ne lino 'me pagaĝaic da'me 'loyaĝac,

choqoda'me 'loyaĝac laqaya jo'ne tomaqalegue nataq'aen da'me tomaĝadaic,

qama'le nach'e ena'ama naa'me adi'yoĝodaqa'te jo'ne oro,

nataq'aen perlas choqonaa'me qadi jo'ne onaĝayaqa.

17Qalaĝaja ¡pelaqatela't da'me yem yema da'me dojo' jo'ne adeuoyaĝac let'adaic!”

Qama'le nach'e ena'am da'me qaya'alo joga'me ueteda'a ena'uaque jogaa'me lejaliaĝanaqa jana'me licota choqogaa'me jiyaĝa'u jo'ne quetayelo naa'me loguelo ga'me noĝop, nataq'aen jogaa'me licota lo'olpi laqaya', nach'e ena'ama jogaa'me jo'ne 'uo da'me nejetenague'j 'me domataĝadiye jena'me noĝop da'me en 'lonataĝanaĝaiqui, 18da'me yauata jaga'me nemala' da'me yavigoue joga'me noic, qama'le 'yala', eet'oi: «¿Jach'e ga'me noic ta'le yaqanatet da'me qonaloqotenaĝaneguet jena'me jenjo' noic let'adaic?» 19Qama'le yajaĝalo'te naa'me laqai'go jena'me enaĝayaĝa, da'me noye'tape choqoda'me 'nalaqatedapejeguem, enaac:

“¡Am choĝodaicole, am noic let'adaic!

¡Degueja da'me adachoĝodec nayi!

Da'me adeuoyaĝac en neuoyaĝadipi

yemeda gaa'me jo'ne yauata jana'me lelicota' jena'me noĝop.

Qama'le ¡pelaqatela't da'me am pal!”

20“Male am matac nayi, am piyem,

Qa'a yajouaĝat da'me ne'uaĝanaguec jena'me jenjo' noic,

nataq'aen male ami made'tape, ami Dios lec'oqo'tepi jo'ne ami ja 'nalo'te,

da'me ami Dios lamaĝa's nataq'aen da'me ami 'laqataĝanaĝanaqa joñe'me,

qa'a nach'eñe ñe'me Dios jo'ne ye'uaĝan di'me noic let'adaic,

qaedi ya'uo da'me en adajo'viyaĝaqui.

21Chane'eja 'uo ñe'me piyem le'ec, jo'ne 'uo da'me lañoqotaĝanaĝac let'adaic, yaconot jo'me qa' let'adaic jo'ne ena'am jena'me nejogaĝaiqui, qama'le yajaĝañgui jaga'me qa'em lat'edai, qama'le enaac:

“Naq'aeta da'me am qoyajaĝaye qomle,

am Babilonia jo'ne am noic let'adaic, am qoyajaĝañe qomle,

qama'le ja yitaĝa ta'le am qoyauana.

22Nataq'aen da'me ja yitaĝa ta'le qodomachiya jena'me lajamaĝa jaga'me niviqui

uotaĝa jaga'me nejeede jo'ne flauta uotaĝa trompeta.

Nataq'aen ja yitaĝa ta'le 'uo ga'me am t'onataĝatapelegue

gamachaqaega 'nonataĝanaĝac jo'ne 'uo nale,

uotaĝa ta'le qodomachiya joga'me lajamaĝa ga'me qa'

jo'ne 'uo nale ga'me yolaĝat.

23Ja yitaĝa ta'le am yecoyadelegue ga'me lauaq jaa'me coyadaĝanaqate,

uotaĝa ta'le qodomachiya jena'me nalimaĝa ga'me 'nonáĝac.

Qa'a jogaa'me ademenaĝayaqa nach'egaua jo'ne 'uo da'me yaqanate't let'adaic

jo'ne nalalegue jena'me aleua

choqoda'me auoqovi'n ena'uaque naa'me noyaqa

da'me auoqovinaĝanot da'me anapinec.”

24Qa'a jena'me jenjo' noic joote qoyejomalegue jana'me letauo't jodia'me Dios 'laqataĝanaĝanaqa choqoga'me Dios lec'oqo'tepi jo'ne ja 'nalo'te, nataq'aen jodia'me jo'ne qoyala't 'me uedalegue yema jena'me aleua.

Currently Selected:

Ap 18: TSN

Highlight

Copy

Compare