2 P 2
2
Jogaa'me paĝaguenataĝanaĝayaqa jo'ne qovinaĝanaĝayaqa
1Nach'e ena'am uo'oe joca'li jogaa'me laqaya' netedaue ga'me noic jo'ne Israel jo'ne enapela'ajalo 'laqataĝanaĝanaqa ñe'me Dios, qalaĝaja ja eja. Qama'le nach'e ena'am da'me ami netedaue qomle jogaa'me paĝaguenataĝanaĝayaqa jo'ne qovinaĝanaĝayaqa. Jogaa'me dapaĝaguenataĝa'n qalaĝaja naa'me mach'e lelnataĝaco yoĝochidiñe queda'me jetaque yapalaĝa't ena'uac, chayovida'a da'me nematedapec da'me 'loyaĝac ñe'me mach'e Lejaliaĝane'j jo'ne yachiyoĝotedaue da'me ne'uaĝanague'j, jenjo' jo'ne chiyaqayi da'me paja'a 'uo da'me lachoĝode'j qoyen jo'ne ne'uaĝanague'j let'adaic. 2Qama'le uo'oe qomle jalcote jogaa'me jiyaĝadipi quetegue jogaa'me, nataq'aen da'me en 'loyaĝa'j da'me manaĝanaĝayaqa, qama'le nach'egaua jo'ne yajouaĝa't da'me yataqata qoye'uetac qomle da'me qadepe'e ladic jo'ne yataqatelegue. 3Yajouaĝat da'me lamai'j jaga'me laicaua, ami yapaĝagueneque da'me jo'ne ja ejoda qaedi yañoĝo't da'me naqa't jana'me anaicauai. Qalaĝaja jogaa'me ja yaĝa'n da'me ne'uaĝanague'j jo'ne male dajo'talo jogaa'me, qa'a jalchi'ena joca'li da'me joote qoyaqataĝañi.
4Dios ja yichoĝode'n joca'li jogaa'me piyem laje'pi jo'ne yauote da'me loe'j, dite da'me yamaĝadoue di'me ne'uaĝanaqa' qaedi yanetedaue joga'me 'lalaĝa, qama'le qoyajoqoteda'aguet ga'me nolo' p'ategue qom qoya'uo da'me nec'atenaĝanaĝac. 5Nach'e ena'am ja yichoĝode'n joca'li ñe'me Dios ga'me aleua laje'pi toye's, dite da'me namaĝa joca'li ga'me uotep let'adaic, qama'le nach'eñeta ñe'me Noé da'me nec'alaĝategue, choqogaa'me siete jo'ne mach'e laqaya', qa'a Noé dapaĝaguenataĝatapec da'me 'noyaĝac jo'ne ja 'nalegue. 6Ñe'me Dios nach'e ena'am ya'uo da'me en lachoĝode'j ga'me laje'pi gaa'me noyaqa jo'ne Sodoma choqodi'me Gomorra, qama'le yolaĝachiguilo, yigouelo chayovida'a en yejamaq ga'me jalo, qaedi nach'ega 'me qoyen naloqotenaĝanaĝaiqui jo'ne di'yoĝoma qoyen jogaa'me loeco lo'ol, qaedi yayate'n jach'e ga'me eeta ga'me mach'e ne'uaĝanague'j jo' qomle. 7Qalaĝaja yelotaĝan joca'li ñe'me Lot, jiyaĝaua jo'ne yataqatelegue, joñe'me jo'ne jalcote da'me lichic qoyen ca'li yajouaĝat da'me 'loyaĝa'j jogaa'me manaĝanaĝayaqa jo'ne loeco lo'ol. 8Qa'a joñe'me Lot jo'ne yataqatelegue ch'e netauelo jogaa'me, qama'le 'uo da'me lachoĝodec na'me lauel da'me yajouaĝat da'me yec'ate'tape naa'me ja 'noe'n jo'ne 'lonataqa jogaa'me choqoda'me domachiyalo yemeda jaa'me noloqo'ote.
9Qama'le joñe'me Jaliaĝanec yaqanatet da'me nec'alaĝate'guejopa ga'me napiyenague'j jogaa'me jo'ne yataqachiñe nemetot joñe'me, nataq'aen da'me taya'a q'ae'n da'me ne'uaĝanague'j ga'me loeco lo'olpi chayovida'a qom yovita ga'me nolo' p'ategue qom qoya'uo da'me nec'atenaĝanaĝac. 10Joñe'me Jaliaĝanec yataqata ye'uaĝa'n qomle ena'uaque jogaa'me jo'ne ja yaĝadiñi da'me quetalo'te naa'me namaico jo'ne ja 'noe'n nataq'aen da'me ja yacoteguet da'me lamaĝajoĝonaĝac ñe'me Jaliaĝanec. Yataqachiñe t'añi'y jogaa'me nataq'aen p'aguenataĝanaĝayaqa, choqoda'me qaya'te loqolanaqa' da'me yojoue'n gaa'me neteda'ague di'me piyem jo'ne 'uo da'me 'lonaĝa'j. 11Qalaĝaja ja ena'ama jogaa'me piyem laje'pi jo'ne dajotedo'ot ñe'me Dios: mate mane'e 'uo da'me 'lañaĝa'j let'adaic choqoda'me lañoqotaĝanaĝa'j, qama'te ja ye'uaĝaneque naa'me 'laqataqa joga'me ja 'noe'npi.
12Naajo' jiyaĝa'u jo'ne ena'ama ga'me yejidipi: qaya'te layatenaĝanaĝa'j, ch'e quetedapegue' da'me lec'atenaĝanaĝa'j, qama'le niyidiñe qaedi taida'a da'me qoyaconalo nataq'aen da'me qoyala't, nataq'aen da'me yojoue'n da'me jo'ne ja yayate'n. Qalaĝaja yele'u jo' qomle qama'le qo'eetema gaa'me yejidi da'me qoyala't, 13da'me 'uo ga'me lachoĝode'j qoyen. Queda'me eetapela'ajalo made'tape da'me najetedoue da'me namaic jo'ne yema ga'me nolo' da'me 'uo. Nataq'aen ena'am ta'le doqo'y nataq'aen paĝachiguilo jogaa'me, jo'ne ye't ga'me ja no'en nale ami uetauelo da'me a'vichetac ga'me adiqui'yaĝaqui, qama'le yataqata machidiñe da'me ch'e ami yoqovi'tape.
14Qaga'te yauo ta'le ja yepiteda'a; ja noua'l da'me yauote da'me loe'j. Gamachaqaega nenaĝatedegue qaedi gaa'me jo'ne choĝolaĝaic da'me lepe'e' male e'n made'tape q'ae'n; qa'a yayate'n da'me mach'e latenataĝanaĝa'j; nach'egaua jiyaĝadipi jo'ne uetedalegue da'me let'adaic ne'uaĝanague'j. 15'Uo da'me lejomaĝa'j queda'me yaĝadegue ga'me naq'aec jo'ne chimaqategue. Qama'le quetegue da'me lapaĝaguenataĝanaĝac jodi'me 'naqataĝanaĝanec jo'ne Balaam, c'oĝot di'me Bosor, jo'ne ya'uo joca'li da'me ja no'en yajouaĝat da'me jetaque yauana jaga'me lomataĝanaqate jo'ne laicaua. 16Qalaĝaja joñe'me 'yelaĝatetapeguem da'me ya'uo loec: jaga'me ajena jo'ne qoyen ena'am ga'me jiyaĝaua lejamaĝa da'me dojapegue' qama'le nach'aga jo'ne nauaneguet da'me lalaĝac ñe'me 'naqataĝanaĝanec.
17Naajo' paĝaguenataĝanaĝayaqa ena'am jaga'me nejede jo'ne qaya'te noĝop ta'le le'ec, nataq'aen da'me ena'am ga'me piyem lo'oc jo'ne layat layonatac. Chane'eja 'uo qomle da'me laviyaĝajet, da'me qoyen yec'adeta ga'me 'lalaĝa let'adaic jo'ne qaya'te loiquiaqa'. 18Nataq'aen da'me 'uo da'me lajamaĝa let'adaic ga'me jo'ne 'yaĝatetedac qalaĝaja qaya'te ta'le chiyaqayi, nataq'aen yejomaĝana'ape naa'me mach'e lamaico choqonaa'me lamanaĝanaĝaco da'me ch'e nejiyaĝauayaĝa'j naa'me jo'ne yemta yañoĝo't da'me ca'ae jogaa'me jo'ne uetedaue da'me lepatenaĝanaĝa'j. 19Jogaa'me eedapega da'me 'yaĝatetedac da'me ladiquiyaĝac da'me 'noyaĝac 'me yelo'tegue da'me 'nemaĝac, qalaĝaja nach'egaua jo'ne uetedaue da'me lejomaĝac queda'me lelataqa da'me neleuaĝa. Qa'a gaa'me jiyaĝa'u onolqa'tape lelatac ga'me jo'ne equegue jo'ne 'uo da'me lañoqotaĝanaĝac. 20Qalaĝaja gaa'me jo'ne joote yaĝa'n daa'me ja 'noe'n jo'ne yodapecache 'me ueteda'ña jenjo' aleua qama'le yateto'n joñe'me Qadejaliaĝanec mach'e Qadec'alaĝaiqui Jesucristo, qom yitaĝa naje'teguet da'me lecoĝoque naa'me naajo' ja 'noe'n ta'le yitaĝa nejaliaĝatelo'te jogaa'me, qama'le nach'egaua jo'ne male 'uo da'me lachoĝode'j 'me ja ena'am da'me jo'ne 'uaechiñe. 21Te'me 'noote' da'me eete' jogaa'me da'me ja yateto'n ga'me ladiquiyaĝac da'me 'noyaĝac jo'ne chimaqategue. Qalaĝaja jalcote da'me lachoĝode'j jo' qomle, yajouaĝat da'me te'me yateto'n joñe'me, yem qama'te yaĝadiñi da'me qoyanem jo'ne namaĝajoĝonaĝac 'me ja 'nalegue. 22Qalaĝaja nach'egaua jogaa'me jo'ne tachiguilo da'me eja jo'ne qo'yaĝatetac: “Ga'me pioq 'viyelaĝa ga'me jo'ne mach'e lolaĝat,” qama'le nach'e ena'am: “Jaga'me cooche qom yemta qoyiyo qama'te yitaĝa necouaye ga'me jenal.”
Currently Selected:
2 P 2: TSN
Highlight
Share
Copy
Want to have your highlights saved across all your devices? Sign up or sign in
Nuevo Testament Toba del Oeste © 2010 Sociedad Bíblica Argentina