1 P 1
1
Pedro yamaĝalo da'me lep'iyenataĝanaĝac jogaa'me jo'ne laedelegue ga'me jo'ne p'aye joga'me te'me 'lachaqa't
1Jayem Pedro, da'me jayem lamaĝajec joñe'me Jesucristo, male ami jamaĝalo da'me yep'iyenataĝanaĝac, da'me ami jo'ne lagaĝaiquipi 'me oñita'ña ga'me jo'ne p'aye joga'me te'me at'achaqadi', gaa'me ale'u lael jo'ne lenaqa'te da'me Ponto, Galacia, Capadocia, Asia nataq'aen di'me Bitinia. 2Da'me ami jalchi'ena da'me ami liquiyaqa joñe'me Qadet'a Dios qa'a naq'aeta da'me lelnataĝac joca'li, qama'le ñe'me Lepaqal en ami ja 'nalo'te qaedi auoqochiiya joñe'me nataq'aen da'me joote qoyapalaĝa't gaa'me adoecodi' yajouaĝat da'me naliñi q'aen jaga'me letauo' joñe'me Jesucristo ca'li yeleu. Auacoñiyeguet da'me anichoĝodenataguequi 'me chiyoqo'ot joñe'me Dios nataq'aen da'me at'emaĝaqui.
Qadeuataqataĝanaĝac jo'ne nach'e eta't 'uo
3'Ñonaĝataĝaye joñe'me Qadet'a Dios jo'ne Let'a joñe'me mach'e Qadejaliaĝanec Jesucristo, qa'a naqaeñe jo'ne yataqachiñe choĝodenataĝanaĝaic, qama'le qo'mi yanema da'me qat'oyaĝac jo'ne dalaĝaic. Chane'eja male 'uo da'me qadeuataqataĝanaĝac jo'ne ja yitaĝa ta'le pal, yajouaĝat da'me joote 'niyelaĝajeguem joñe'me Jesucristo ca'li chiyaqauelo ga'me napa'lpi. 4Qama'le 'uo da'me jo'ne auacoñiyeguet qomle, da'me mach'e adoĝochi jo'ne Dios liyamaqatac nayi, ue'tague di'me piyem, qama'le ja qoyaqanatet ta'le qoyolaĝachigui, uotaĝa ta'le qoyen paĝachigui uotaĝa ta'le yemeta. 5Yajouaĝat da'me adepi'i jo'ne ami uetauelo, joñe'me Dios jo'ne 'uañaĝaic yataqata ami de'uolo'te, qaedi ami yovidaĝateda'a da'me nec'alaĝa jo'ne mach'e liyamaqatac, jenjo' jo'ne qoyaloĝon jo' qom'te jogaa'me noloqo'ote jo'ne p'atedegue.
6Chane'eja 'noota qom yataqata ami najaĝayelo da'me adamaiqui, temaqaedi da'me nayi naa'me naajo' noloqo'ote cha'li uo'oe gaa'me anapiyenaguequi' jo'ne yodapecache. 7Qa'a da'me adepi'iyaĝaqui ena'am jaga'me oro, da'me youen da'me qoyapiyenec ga'me lauaq ga'me dole', qaedi qoyayaten da'me yataqata yoqovita, qaya'te lale'gue. Qa'a ga'me nepe'e jo'ne ja yaqanatet da'me napiyenaguec, napacalegue da'me lajo'viyaĝac jaga'me oro jo'ne 'uo ga'me loiquiaqa'. Qama'le naq'aeta da'me adepi'i da'me ami, qom ja yaqanatet da'me napiyenaguec, qama'le 'uo qomle da'me aniyamaĝadenataguequi choqoda'me adi'yoĝodiqui nataq'aen da'me at'onaĝaqui, qom yovita ga'me nolo' p'ategue qom yataqata di'yo'quena joñe'me Jesucristo.
8Da'me ami joote adoqopichiya joñe'me Jesucristo, mate mane'e ja auañiya, qama'le nayi auep'iiya'a joñe'me mate mane'e ja aueloi'yot. Chane'eja yataqata ami made'tape nayi, yataqachiñe let'adaic da'me adamaiqui jo'ne ja qoyaqanatet ta'le qouenate'ta qaedi qo'yaĝatetac, 9yajouaĝat da'me male auovidiya'a da'me adec'alaqai, qa'a naqaeda da'me lomataĝanaĝac joda'me adepi'i.
10Jodia'me Dios 'laqataĝanaĝanaqa napaĝagueta joca'li da'me dojo' jo'ne qadec'alaĝa nataq'aen da'me denataĝatedapelegue, qama'le 'yaĝatetedac joda'me lichoĝodenataĝanaĝac joñe'me Dios jo'ne jetaque ami yanema da'me dojo'. 11Joñe'me Lepaqal ñe'me Cristo ye'uauaĝanouelo da'me yayatenaĝanaĝaneque jogaa'me Dios 'laqataĝanaĝanaqa da'me eeta da'me lachoĝodec ñe'me Cristo nataq'aen da'me 'lonaĝac jo'ne p'ategue. Qama'le jogaa'me jetaque da'me yejomedalegue jach'e jogamaĝa gaa'me noloqo'ote nataq'aen ga'me jo'ne ua'a ga'me en laloqo' joñe'me Dios Lepaqal jo'ne uetauelo jogaa'me. 12Qalaĝaja ñe'me Dios yayatenaĝanaĝaneque jogaa'me da'me ja naqaegaua ta'le loĝo't joda'me jo'ne 'yaĝatetedac, dite da'me naqa'ami jo'ne ami yapaĝague'n. Chane'eja gaa'me Dios 'laqataĝanaĝanaqa jo'ne joote ami yapaĝagueneque da'me 'laqataĝanaĝac joñe'me Dios, da'me chiyaqayi da'me lañoqotaĝanaĝac joñe'me Dios Lepaqal jo'ne uetayelo, naqaegaua jo'ne ami 'yaĝatema nayi da'me dojo' 'naqataĝanaĝac jo'ne chiyaqayi da'me nec'alaĝa. ¡Nach'eda da'me dojo' jo'ne jetaque yayate'n jogaa'me Dios lamaĝa's jo'ne piyem laje'! 13Chane'eja 'noota qom aneloyitaye nataq'aen aniyamaĝacheta't qaedi auauoyi gaa'me at'onataqadi' jo'ne onaĝayaqa, qama'le auachiyaue yema da'me mach'e adeuataqataĝanaĝaqui da'me lichoĝodenataĝanaĝac joñe'me Dios jo'ne ami qoyanema qom yovita ga'me nolo' p'ategue qom yataqata di'yo'quena joñe'me Jesucristo.
Dios qo'mi yiyaĝanalo qaedi en qo'mi ja 'nalo'te
14Ena'am ga'me nec'oĝot jo'ne yoqochiyeguet da'me namaĝajoĝoc, ena'te auauoyapiye jonaa'me adamaicodi' 'me jalchi'ena ami uetauelo joca'li jona'li auatetoñi joñe'me Dios, 15dite da'me oviyaue qomle da'me adaloi'ta't da'me ami ja 'nalo'te, qa'a joñe'me Dios jo'ne ami yiyaĝanalo yataqachiñe ja 'nalegue. 16Qa'a naa'me nedii's jo'ne qoyedidiñe joca'li eet'oi: “Ami ja 'nalo'te qomle, qa'a naqayem jo'ne ja 'nalegue.”
17Nale anetameñiyot joñe'me Dios qama'le aueñiyaac: “Am Qadet'a.” Qalaĝaja joñe'me qayaua'te liquiyaqa da'me yec'ate'n onolqa'tape joga'me jiyaĝadipi, da'me naloqote'n qom maliaĝa uo'oe gaa'me loeco. Chane'eja 'noota qom nach'e eta't da'me ademiya'a da'me a'nonaĝachiyegui joñe'me, yemeda naa'me noloqo'ote da'me cha'li oñeta'ña jena'me aleua. 18Qa'a joote auayachiñe da'me ami joote qoyachiyoĝotedaue da'me 'noyaĝac jo'ne qaya'te chiyaqayi, da'me 'noyaĝac jo'ne e'n adoĝochi jodia'me mach'e auachiyoĝogueta 'me adet'aldi', nataq'aen auayachiñe da'me jo'ne lajo'viyaĝac jenjo' jo'ne yaqanatet da'me ami nauela'ajalo ja qoyen 'te lajo'vi ga'me oro uotaĝa jaga'me plata jo'ne pa'l jo' qomle, 19dite da'me qoyen jaga'me letauo' joñe'me Cristo, jo'ne nach'aga 'me onaĝai, ena'am ga'me 'naĝanaĝate lec'oĝot 'me qaya'te lapite'na nataq'aen ja paĝachigui da'me qoyalat. 20Joñe'me Cristo nach'eñe jo'ne qoyaqataĝata't joca'li maliaĝa jona'li 'uo jena'me aleua, qoyequetelegue da'me dojo' jo'ne qoyamaĝalegue. Qalaĝaja nayi naa'me naajo' noloqo'ote jo'ne p'atedegue male qoyaloĝon qaedi yataqata ami yichoĝode'n. 21Chiyaqayi joñe'me Cristo, da'me ami male auep'iiya'a ñe'me Dios, 'me 'niyelaĝachijeguem joñe'me, yachiyaqaue di'me napa'lpi 'lachaqa', qama'le yanem da'me 'lonaĝac qaedi male auep'iiya'a joñe'me Dios jo'ne anaquichitapega.
22Nayi da'me ami male auoqochiya joda'me 'naqataĝanaĝac jo'ne yataqatelegue qama'le nataq'aen da'me ami yoqovite' qaedi yataqata adoqopichiyalo jogaa'me adaqayadi'. Chane'eja 'noota qom yataqata a'nañaĝachi da'me anoqopichiyapega't onolqa'tape da'me ami. 23Qa'a da'me ami ena'am ta'le yitaĝa 'niyelaq da'me aniyiñe, qama'le nayi ja naqaeda da'me net'ayaĝac 'me ch'e qanejiyaĝauayaĝac jo'ne pal qomle, dite da'me nach'ena na'me 'laqatac joñe'me Dios, jo'ne nach'e eta't nec'aletaye nataq'aen da'me ja pal. 24Qa'a naa'me nedii's jo'ne qoyedidiñe joca'li eet'oi:
“Yema ga'me jiyaĝadipi ena'am ga'me auaqapi,
Nataq'aen da'me mach'e 'loyaĝac ena'am ga'me la'uo jena'me auaqapi.
Ga'me lolelaĝa male daqaqa qomle qama'le ga'me la'uo 'naqañe,
25Qalaĝaja na'me 'laqatac joñe'me Jaliaĝanec ja pal, qaya'te loiquiaqa'.”
Qama'le jenjo' 'naqatac naqaeda da'me 'naqataĝanaĝac jo'ne onaĝaic 'me joote ami qo'yaĝatema.
Currently Selected:
1 P 1: TSN
Highlight
Share
Copy
Want to have your highlights saved across all your devices? Sign up or sign in
Nuevo Testament Toba del Oeste © 2010 Sociedad Bíblica Argentina