1 Co 1
1
Nep'iyenataĝanaĝac
1Jayem Pablo, jo'ne jayem qoyiyaĝana qaedi jayem lamaĝajec joñe'me Cristo Jesús —naq'aeta da'me mach'e loequenataĝanaĝac joñe'me Dios— choqoñe'me qadaqaya Sóstenes, 2ami janema da'me qadamaic, ami jo'ne yataqachiñe Dios lec'oqo'tolqa 'me oñiya'ña di'me Corinto, ami jo'ne joote yoqovite' qa'a auacoñiyeguet ñe'me Cristo Jesús, nataq'aen ami qoyiyaĝanalo qaedi ami qoyapetenegueta joga'me Dios lec'oqo'tepi 'me ja 'nalo'te nach'e ena'ama ena'uaque jogaa'me jo'ne napi'ñalo naa'me ale'u lael 'me 'yaĝatetedac da'me lenaĝat ñe'me Jesucristo mach'e Qadejaliaĝanec nataq'aen joga'me Dios lec'oqo'tepi 'me ja 'nalo'te. 3'Noota qom Dios mach'e Qadet'a nataq'aen ñe'me Qadejaliaĝanec Jesucristo ami yanema da'me anichoĝodenataguequi nataq'aen da'me at'emaĝaqui.
4Nach'e eta't ami jenate'talo chane'eja janem yamaic joñe'me Dios qa'a ami yaloĝonalo da'me lichoĝodenataĝanaĝac chiyoqotelegue ca'li yemta oquiyegue joñe'me Jesucristo. 5Qa'a ami joote ademii'teguet joñe'me Cristo, chane'eja Dios jalcote ga'me ami yanema 'me lapaĝaguenataĝanaĝaco nataq'aen adatetonaĝanaĝaqui. 6Qama'le da'me 'naqataĝanaĝac 'me 'yaĝatetac ñe'me Cristo joote ami qo'yetouelo; 7qo'che' ja auoviñetaque ga'me anemii 'me chiyoqo'ot ñe'me Dios nayi queda'me cha'li auachitaque ga'me nolo' qom di'yo'quena ñe'me Qadejaliaĝanec Jesucristo. 8Nach'eñe ami 'yañaqate't chayovida'a ga'me p'ategue nolo', qaedi qaya'te ja no'en adejamaĝataĝaqui qom yovita ga'me nolo' da'me 'niyelaq joñe'me. 9Dios nach'e eta't en yepaquetelegue ga'me jo'ne joote 'yaĝatetac, nataq'aen nach'eñe joñe'me joote ami yiyaĝanalo ca'li qaedi ademii'teguet ñe'me C'oĝot Jesucristo, mach'e Qadejaliaĝanec.
Ja naqaeda ta'le niyotapecache da'me 'loyaĝac ñe'me Cristo
10Ami yaqaya'olqa, ñe'me Qadejaliaĝanec Jesucristo jayem namaĝaquena qaedi ami ñachoĝodenoto queda'me 'noota ta'le adaloi'ta't nale 'uo ga'me anenaĝachiyegue. 'Noota qom ja yodapecache naa'me ademiyapelo'te, dite ta'le ena'uaque ami ademi'ta't, nataq'aen 'noota qom ena'uaque ami onolec ga'me adelnataĝaqui. 11Qa'a quelqaya gaa'me jo'ne neteda'ña di'me 'lachaqa' ñe'me Cloe jayem t'aqataĝatem da'me ami 'yaĝa'tape, ami yaqaya'olqa, jo'ne mach'e ami da'me 'uo da'me anecotaĝaqui. 12Qama'le ami 'uo ga'me enaac: “Jayem jequegue ñe'me Pablo”; laqaya enaac: “Jayem jequegue ñe'me Apolo”; laqaya enaac: “Jayem jequegue ñe'me Pedro”; nataq'aen laqaya enaac: “Jayem jequegue ñe'me Cristo.” 13Qalaĝaja ¡nach'eda naq'aeta da'me aueñe'tem ta'le neyotapecache da'me 'loyaĝac ñe'me Cristo! ¿Qo'li jayem qoyep'enajeguem jouaĝat ami? Uotaĝa ca'li ami qonachilaĝa'n, ¿qo'li auechoĝochetac da'me jayem adejaliaĝanequi?
14Janem da'me yamaic ñe'me Dios queda'me qaya'te onolec ta'le ñachilaĝan da'me ami, jalgata ga'me Crispo nataq'aen Gayo. 15Chane'eja qaya'te eetapela't qo'yamelegue da'me yenaĝat qom qonachilaĝan qaedi yalemaĝajet. 16Eja da'me dojo', nach'e ena'am uo'oe gaa'me ñachilaĝa'n ca'li 'me ueteda'a di'me 'lachaqa' ñe'me Estéfanas, qalaĝaja ja ñetouenec ta'le uoja'aegaua ñachilaĝa'n. 17Qa'a Cristo ja jayem 'te yamaĝalegue qaedi ami ñachilaĝa'n, dite da'me ami ja'aĝatema da'me onaĝaic 'naqataĝanaĝac. Qalaĝaja naa'me 'yaqataqa ja chiyaqayilo gaa'me jiyaĝaua layatenaĝanaĝaco, qaedi ja yejamaĝajaye da'me leleuaĝa ñe'me Cristo ca'li qoyep'enaje'mec jaga'me sodoso.
Da'me leleuaĝa ñe'me Cristo yaloĝon joda'me lañoqotaĝanaĝac ñe'me Dios
18Ga'me jo'ne qoyapalaĝa't qom'te eetedapega ch'e chiyoĝojoĝoc da'me leleuaĝa ñe'me Cristo ca'li qoyep'elegue jaga'me sodoso, qalaĝaja qo'mi jo'ne qadec'alegue qomle jayatenaq queda'me jenjo' 'naqataĝanaĝac mach'e lañoqotaĝanaĝac joñe'me Dios. 19Naq'aeta joda'me 'yaĝatetedac gaa'me nedii's, eet'oi:
“Dios enaac: «Japalaĝat da'me layatenaĝanaĝac joga'me yatenaĝanaĝaiquipi;
Jaja'a, jemaĝaguet ga'me jetaque yauote.»”
20Chane'eja, ¿Jach'e jogamaĝa yiyamaĝade'n jogaa'me jo'ne quetedapegue' da'me layatenaĝanaĝac jena'me aleua, jogaa'me yatenaĝanaĝayaqa, joga'me judiopi napaĝaguenoqo'tpi nataq'aen jogaa'me jo'ne yayate'n da'me necoyatapega't nale? ¡Yataqachiñe eja Dios yaloĝonalo queda'me layatenaĝanaĝac jena'me aleua mach'e chiyoĝojoĝoc! 21Dios yauanalo ga'me aleua laje'pi queda'me ja yacota da'me mach'e layatenaĝanaĝa'j qaedi yateto'n joñe'me, chane'eja ñe'me jetaque t'onataĝana da'me qat'aqataĝanaĝac jo'ne ena'am ta'le chiyoĝojoĝoc qaedi nec'aledegue gaa'me jo'ne p'iida'a.
22Joga'me judiopi jetaque yauata 'nanec 'me yaloĝon ñe'me Dios, nataq'aen joga'me griegopi yelotedaque da'me nayatenaĝanaĝac, 23qalaĝaja qo'mi ja'aĝataqatac queda'me Cristo yeleu ca'li qoyep'elegue jaga'me sodoso, chane'eja ena'am ta'le nepocoĝoc ga'me judiopi, nataq'aen ga'me jo'ne ja judiopi eetedapega qo'mi chiyoĝo's. 24Qalaĝaja gaa'me jo'ne Dios yiyaĝanalo, naqaegaua ga'me judiopi uotaĝa ga'me griegopi, jayatenaq da'me Cristo mach'e lañoqotaĝanaĝac nataq'aen layatenaĝanaĝac ñe'me Dios. 25Qa'a qom Dios ya'uo ga'me jo'ne ena'am ta'le chiyoĝojoĝoc, ñe'me eja queda'me yataqachiñe yatenaĝanaĝaic, da'me layatenaĝanaĝac napacalo'te gaa'me ch'e jiyaĝa'u; nataq'aen nale ñe'me Dios ena'am ta'le qaya'te 'lañaĝac, ñe'me eja queda'me yataqachiñe ñoqotaĝanaĝaic, da'me lañoqotaĝanaĝac napacalo'te gaa'me ch'e jiyaĝa'u.
26Naq'aeta da'me dojo', ami yaqaya'olqa, anetoviñetac da'me at'oyaĝaqui ca'li Dios ami yiyaĝanalo: mate mane'e ja lama'y ami ua'ajopa da'me nayatenaĝanaĝac jena'me aleua, ja lama'y ami gaa'me jiyaĝa'u 'me ñoqotaĝanaĝayaqa nataq'aen ja lama'y ami uo'oe gaa'me jiyaĝa'u jo'ne p'ajodaye. 27Qalaĝaja, Dios 'yatetelo'te gaa'me jo'ne jenjo' aleua qo'enapegalo chiyoĝo's qaedi qoya'uo lepocoĝo'j jogaa'me yatenaĝanaĝayaqa nach'e naq'aeta Dios 'yatetelo'te gaa'me jo'ne jena'me aleua qo'enapegalo choĝolaĝayaqa qaedi qoya'uo lepocoĝo'j jogaa'me ñoqotaĝanaĝayaqa. 28Dios 'yatetelo'te ga'me qo'yota'tape jogaa'me jo'ne qo'enapegalo ja p'ajodaye qaedi pa'l q'ae'n gaa'me jo'ne qo'enapegalo p'ajodaye. 29Naq'aeta da'me ya'uo ñe'me Dios qaedi qaya'te ni'yoĝodela't nale dajoya'aguet joñe'me. 30Qalaĝaja nach'eñe ñe'me Dios ami yapetenegueta joñe'me Cristo Jesús, qama'le nach'eñe Cristo qo'mi yanema da'me layatenaĝanaĝac ñe'me Dios. Qama'le da'me Cristo ya'uo ca'li chiyaqayi da'me ena'am ta'le qo'mi e'n yataqatelo'te ñe'me Dios; Cristo qo'mi 'yatetelo'te qaedi maqachaĝa ja qo'mi 'te 'nalo'te nataq'aen qo'mi yaĝayaĝa'n qaedi ja jaĝaue da'me ja no'en. 31Chane'eja ena'am da'me 'yaĝa'tape joga'me nedii's:
«Ga'me jo'ne jetaque ni'yoĝodela't,
'Noota qom 'nonaĝachigui ñe'me Jaliaĝanec.»
Currently Selected:
1 Co 1: TSN
Highlight
Share
Copy
Want to have your highlights saved across all your devices? Sign up or sign in
Nuevo Testament Toba del Oeste © 2010 Sociedad Bíblica Argentina