1 Ts 5
5
1Qama'le jogaa'me noloqo'ote chayovida'a jogaa'me auoĝoyaqa, ami yaqaya', ja auoviñetaque ta'le ami jedaĝanaĝalo jena'me jenjo' jo'ne ami ja'aĝataĝapema. 2Qa'a jena'me jenjo' yataqata joote auayachiñe, ga'me ua'ña da'me yitaĝa 'niyelaq joñe'me Jaliaĝanec, yataqata qaya'te yayaten, ena'am joga'me cachaĝaic qom yeuotac ga'me pi'yaq. 3Qa'a jena'me jiyaĝadipi enaac jo' qomle: “Yataqata qo'mi 'noote', chayovida'a da'me qo'mi machidiñe,” qama'te paja'a da'me 'uo ga'me ne'uaĝanague'j let'adaic jo'ne yedalo'te jogaa'me, ga'me layaliaĝa'j ena'am jaga'me yauo nale c'oe, yataqata co'yaq nale maliaĝa dayaletac, qama'le yataqata qaya'te yaĝan. 4Qalaĝaja, ami yaqaya'olqa, da'me ami ja ovitaue joga'me 'naltapiye, qama'le ga'me nolo' qom 'niyelaq ñe'me Jaliaĝanec ja ami 'te yepelaĝa't, ja ena'am ga'me cachaĝaic. 5Yema da'me ami ovitaue joga'me yataqata yoqochiñe, yataqata edañgui ena'am joga'me lauaq joga'me nolo', ja qo'mi 'te pi'yaĝadi laje', nataq'aen ta'le jouaqataue joga'me 'naltapiye jo'ne yataqata ja no'en. 6Chane'eja 'noota ta'le ja jo'ochaq, ena'te jadenaĝataq joga'me ochaĝayaqa, dite da'me nach'e eta't ñeloqotaye nataq'aen yataqata jeloqo'tegue da'me qadadiquiyaĝac. 7Jogaa'me t'oche'tape yataqata t'oche'y nale joga'me pi'yaq, nataq'aen jogaa'me niyo'm nale, yataqata taĝayaqa nale pi'yaq; 8qalaĝaja da'me qo'mi jo'ne mach'e qadoĝot joga'me nolo', 'noota ta'le nach'e eta't jauoqo joga'me yataqata 'noota jo'ne qoyiyamaĝaden, ja jadenaĝataq jogaa'me taĝayaqa. 'Noota qom janaĝadiñi da'me qadepe'e choqoda'me qadoqopich'i nach'e ena'am ta'le quejaĝanaĝai, nataq'aen 'noota qom ñaĝat'onaĝa'ña da'me qadajoĝonataĝanaĝac queda'me qo'mi qonec'alaĝatedegue, nach'e ena'am ta'le jaĝa'to jo'ne laicaua. 9Qa'a joñe'me Dios ja qo'mi 'te yiyaĝanalo qaedi qo'mi dalemata'yalo, dite da'me jaconaĝaguet da'me nec'alaĝa 'me chiyoqo'ot ñe'me mach'e Qadec'alaĝaiqui Jesucristo. 10Jesucristo nach'eñe ca'li qo'mi nemelo'te ca'li yeleu uetalegue jaga'me sodoso, qaedi nach'e eta't da'me qadec'aetayejop joñe'me, uotaĝa maliaĝa qadec'aletalegue jena'me aleua uotaĝa joote qadeleu. 11Qama'le nayi, a'nañaĝachiyapega't nataq'aen anecochiyapega't, oqui'tague da'me dojo' jo'ne joote auauoyitac nayi.
Da'me p'ategue napaĝaguenataĝanaĝac
12Ami yaqaya'olqa, ami ñachoĝodenoqoto qaedi yataqata avichoĝodeñi' jogaa'me ami ue'tajopa jo'ne 'lonataĝanaĝanaqa ñe'me Qadejaliaĝanec, naqaegaua jo'ne ami yelotalo'te nataq'aen ami uaqatetapegalo. 13'Noota qom yataqata auoqochiyalo nataq'aen yataqata adoqopichiyalo, qa'a jouaĝat joda'me 'lonatac jo'ne 'yetedac. Nataq'aen 'noota qom yataqata anemaĝadiñiyapega't.
14Nataq'aen ami qadaqaya'olqa, yitaĝa ami jaqataĝalo da'me 'noota qom auojeyapegue'to jogaa'me choĝolaĝayaqa qaedi nach'e ena'am t'onataĝa'n, 'noota qom auañiyijeguem jogaa'me ja t'añi'y naa'me lai'li, nataq'aen alecochiiyalo jogaa'me yataqata qaya'te 'lañaĝa'j nataq'aen aneualaĝañi'ye' yema ga'me jiyaĝadipi.
15Auelaĝañitapema ena'uaque jogaa'me jo'ne te'me lelnataĝa'j da'me jetaque yauote lovi' joga'me laqaya, qa'a jena'me jenjo' yataqata ja no'en, dite da'me a'nañaĝachi da'me yataqata a'vichi joga'me 'noota ladic, qa'a jena'me jenjo' yataqata 'noota, da'me mach'e ami anoqopichiila't ena'uaque, nataq'aen aueñe'tema naa'me adaqayadi' jo'ne qaya'alo jo'ne neda'ña jena'me jenjo' aleua.
16'Noota qom nach'e eta't ami made'tapolqa. 17Nach'e aueñeta't da'me jalcote da'me auauoyi da'me anetamenaĝaqui. 18Auañem adamaiqui joñe'me Dios, qa'a nach'ena jena'me jenjo' yataqata paquetapega da'me ami, jouaĝat da'me ami p'etaqadayaqa, yataqata auep'iiya'a joñe'me Cristo Jesús.
19Ena'te a'uomaĝachi da'me 'lonataĝanaĝac joñe'me Dios Lepaqal, 20qama'le ena'te a'uotañi joga'me 'laqataĝanaĝa'j jogaa'me 'laqataĝanaĝanaqa ñe'me Dios. 21'Noota qom auapiyeñi ena'uac, qaedi male auacoñiya joga'me yataqata 'noota ladic. 22Qalaĝaja oquiya'a yema joga'me 'lonataĝanaĝac da'me ja no'en, ena'te oquiyegue.
23'Noota qom Dios male naqaeñe jo'ne chiyoqo'ot da'me 'nemaĝac, male yataqata ami 'yeteque da'me male jalcote da'me ja ami 'te 'nalo'te, nataq'aen yataqata netela yema da'me at'oyaĝaqui, uotaĝa na'me adepaqali jo'ne ami uetauelo, nataq'aen netela na'me adai'lidi', choqona'me adapa'chidi', qaedi male yataqata qaya'te ami netayelo jo'ne ja no'en, chayovida'a qom male 'niyelaq joñe'me Qadejaliaĝanec mach'e Jesucristo. 24Ñe'me jo'ne ami yiyaĝanalo yataqata qaya'te ena'am da'me yataqata yataqatelegue joñe'me.
Da'me p'ategue lep'iyenataĝanaĝac ñe'me Pablo
25Ami qadaqaya'olqa, nataq'aen nach'e eta't qo'mi auajelaĝañilo'te da'me qo'mi.
26Auañema ena'uaque joga'me qadaya'olqa jena'me jenjo' qadep'iyenataĝanaĝac, chayovida'a joga'me qadamaic jo'ne yataqata ja 'nalegue jo'ne ami janemaĝam.
27Ami ñachoĝodenoto nataq'aen ami jamaĝalo'te queda'me jacona da'me lejaliaĝa ñe'me Qadejaliaĝanec, qaedi auojeyilegue jana'me janjo' yediije ga'me qadayi qaedi yema qodomachiya ga'me ja'aĝatetac.
28'Noota qom auacoñiyeguet da'me anichoĝodenataguequi jo'ne chiyoqo'ot ñe'me Qadejaliaĝanec Jesucristo, onolqa'tape da'me ami.
Currently Selected:
1 Ts 5: TSN
Highlight
Share
Copy
Want to have your highlights saved across all your devices? Sign up or sign in
Nuevo Testament Toba del Oeste © 2010 Sociedad Bíblica Argentina