1 P 5
5
Napaĝaguenague'j jogaa'me 'yaĝaicachidi
1Nayi ami jaqatalo, ami 'yaĝaicachidi jo'ne ami lajoĝola'te gaa'me p'etaqadayaqa, queda'me nach'e ena'am jayem 'yaĝaicachigui jo'ne ja'aĝatetac da'me jo'ne lachoĝodec joñe'me Cristo, qama'le nataq'aen jouetaue qomle da'me 'lonaĝa joñe'me jo'ne qo'mi di'yoĝoma jo' qomle. 2'Noota qom yataqata adechiliyalo jogaa'me 'naĝanaĝatel jo'ne Dios lec'oqo'tepi 'me ami qoyanema qaedi adechiliyalo. 'Noota qom anoualaĝañetape'to, qa'a naqaeda da'me jo'ne Dios 'yamaqaten, qama'le ena'te aueñe'tem da'me ch'e ami qoyamaqatalo'te, uotaĝa ta'le aueñi adelnataĝaqui da'me ami qoyejeteneque jaga'me laicaua, dite da'me nach'e eta't da'me anejapachita. 3Ena'te aueñe'tem ta'le yataqachiñe auoqochiyaja'am jogaa'me jo'ne ch'e adouataldi', dite da'me auepaquitapega da'me naqa'ami jo'ne laloqotenaĝanaĝaiqui jogaa'me, 4qaedi qom novitequena joñe'me jo'ne p'ajaye 'me 'nouatoqo't ena'uaque joga'me p'etaqadaiquipi, qama'le da'me ami male auacoñiyeguet jaga'me lomataĝanaqate jo'ne nach'e eta't 'uo da'me 'lonaĝa, nach'e eta't ja pal.
Napaĝaguenague'j joga'me joĝodipi
5Nach'e ena'am da'me ami joĝodipi, 'noota qom a'nonaĝachiguilo jogaa'me 'yaĝaicachidi jo'ne 'uo da'me lejaliaqa'. Nach'e ena'ama ena'uaque da'me ami, a'nonaĝachiguilo onolqa'tape gaa'me adaqayadi' qama'le ena'te ami 'yoĝodenaĝayaqa, qa'a naa'me nedii's jo'ne joote qoyedidiñe joca'li eet'oi:
“Joñe'me Dios en lauteua jogaa'me 'yoĝodenaĝayaqa,
Qalaĝaja jogaa'me choĝodache lecochaĝanegueta da'me lichoĝodenataĝanaĝac.”
6Chane'eja auanaqae'ñejop ga'me louaq joñe'me Dios jo'ne 'uo da'me lañoqotaĝanaĝac, qaedi joñe'me ami yañidijeguem jo' qomle jogaa'me noloqo'ote jo'ne laloqotenec. 7Auepotañejop ena'uaque jogaa'me adepagaĝadiqui' joñe'me Dios, qa'a joñe'me nach'e eta't da'me ami yelolo'te.
8Ena'te a'uochiitac, dite da'me a'nañaĝachela't, qa'a ñe'me adauteuai jo'ne payac ena'am ga'me jauaĝaic da'me 'loĝoyaĝac qama'le nomitetaque ga'me jetaque nolaĝachiñe. 9'Noota qom a'nañaĝachiyeguet nataq'aen da'me ami 'yañaqate't da'me adepi'i, qa'a yemeda naa'me aleua lael, jogaa'me jo'ne mach'e adaqayadi' nach'e ena'ama da'me 'uo da'me lachoĝode'j jo'ne ena'am da'me jo'ne ami qo'yeteque. 10Qalaĝaja qom yenoĝodegue jogaa'me noloqo'ote da'me 'uo da'me adachoĝodequi qama'le joñe'me Dios male ami 'yañaqateneque, nataq'aen da'me en ami 'uañaĝayaqa choqoda'me ami yanema da'me jo'ne yataqatelegue. Qa'a nach'eñe ñe'me Dios 'uo da'me loqopich'i let'adaic chane'eja ami yiyaĝanalo qaedi ademii'teguet joñe'me Jesucristo qama'le ovitaue da'me jo'ne mach'e 'lonaĝa jo'ne qaya'te loiquiaqa'. 11Da'me lejaliaĝa joñe'me nach'e eta't ja pal. Jaja'a, nach'e naq'aeta da'me dojo'.
Da'me p'ategue nep'iyenataĝanaĝac
12Joñe'me Silvano mach'e yaqaya jo'ne yataqatelegue, nach'eñe joñe'me jo'ne jayem lecochiya qaedi jediñe jenjo' yediijec. Qama'le nayi ami jamaĝalo jenjo' jo'ne jaqaloq qaedi ami jaqatalo nataq'aen qaedi ami japaĝagueneque da'me yataqachiñe eja jo'ne lichoĝodenataĝanaĝac joñe'me Dios, nach'eda jo'ne joote auacoñiyeguet qaedi oqui'tegue.
13Jogaa'me jo'ne neda'ña di'me Babilonia, ga'me Dios lec'oqo'tepi jo'ne nach'e ena'ama Dios liquiyaqa jo'ne nach'e ami ena'ama, ami yamaĝalo da'me lamai'j, choqoñe'me Marcos jo'ne ena'am ta'le yalec. 14Anep'iyeñetape'to jogaa'me adaqayadi' da'me anec'ouoqoitape'to queda'me 'uo da'me adoqopich'i jo'ne adaqayayaĝaqui.
'Noota qom ami uetauelo da'me 'nemaĝac, ena'uaque da'me ami jo'ne ademii'teguet joñe'me Cristo.
Currently Selected:
1 P 5: TSN
Highlight
Share
Copy
Want to have your highlights saved across all your devices? Sign up or sign in
Nuevo Testament Toba del Oeste © 2010 Sociedad Bíblica Argentina