1 Jn 2

1Ami yalaqapi, ami jamaĝalo jenjo' yediijec qaedi qaya'te ya'uo loec. Qalaĝaja, qom 'uo gamachaqaega ya'uo ga'me loec, qama'le joote 'uo joñe'me jo'ne qo'mi de'uolo'te jo'ne ne'tot joñe'me Qadet'a, mach'e Jesucristo jo'ne yataqatelegue. 2Jesucristo nach'eñe jo'ne nemenegueta ena'uac daa'me qadoeco ca'li yeleu, qaedi naa'me qadoeco male qoyapalaĝa't, nataq'aen ja nach'e qo'mita dite da'me yema gaa'me aleua laje'pi.

'Noota qom anoqopichiiye't

3Qom jauoqo'oe jodaa'me lamaĝajoĝonaĝaco joñe'me Dios, qama'le jaqanatetaq ta'le jenaqatapela't male jovitaĝa da'me jatetonaq joñe'me. 4Ga'me jo'ne enaac: “Jateton joñe'me Dios”, qalaĝaja qom maliaĝa ja yauo'oe daa'me lamaĝajoĝonaĝaco, nach'ega jo'ne qovinaĝanaĝaic nataq'aen da'me eja ja ue'tajop joga'me. 5Qalaĝaja, gamachaqaega jo'ne yauo'oe daa'me 'laqataqa joñe'me Dios, nach'ega male yovita da'me loqopich'i jo'ne yataqatelegue. Nach'eda eeta da'me male jayatenaq queda'me jonaqataye joñe'me. 6Ga'me jo'ne eetapela't yataqata netaye joñe'me Dios, 'noota qom que'teguelo daa'me 'lonataqa joñe'me Jesucristo.

7Ami yaqaya'olqa, dojo' namaĝajoĝonaĝac jo'ne ami janema ja dalaĝaic, qa'a nach'eda da'me jo'ne joote auacoñiyeguet, chiyoĝogueta gaa'me noloqo'ote ca'li auep'iiya'a. Dojo' namaĝajoĝonaĝac jo'ne toijec nach'eda jo'ne joote auomachiiya. 8Qalaĝaja dojo' namaĝajoĝonaĝac nach'e ena'am dalaĝaic, jo'ne yataqachiñe netaye joñe'me Cristo, nataq'aen ami netayelo. Yataqachiñe dalaĝaic qa'a maqachaĝa yenoĝotaye nayi ga'me 'lalaĝa nataq'aen male edañgui ga'me yoqochiñe jo'ne yataqatelegue.

9Qom 'uo gamachaqaega jo'ne eetapela't netaye da'me yoqochiñe, qalaĝaja maliaĝa niquiya'a ga'me laqaya, qama'le maliaĝa uetaue da'me 'lalaĝa. 10Ñe'me jo'ne noqopita ga'me laqaya, nach'eñe uetaue da'me yoqochiñe nataq'aen qaya'te ga'me chiyaqayi q'aen ta'le chiyaqaje'mot. 11Qalaĝaja ga'me jo'ne ja noqopita ga'me laqaya, nach'ega uetaue da'me 'lalaĝa, nataq'aen quetalegue da'me 'lalaĝa, qama'le ja yayaten ga'me dajoyi, qa'a da'me 'lalaĝa yaqanamaqatet joga'me.

Aviyamaĝachiyouelo naa'me adai'lidi' daa'me 'laqataqa joñe'me Dios

12Ami yalaqapi, ami janema jenjo' 'yaqatac

qa'a joote qoyapalaĝa't jodaa'me adoecodi',

chiyoqotelegue da'me auacoñiyeguet joñe'me Jesús.

13Ami 'yaĝaiquipi, ami janema jenjo' 'yaqatac

qa'a joote auatetoñi joñe'me jo'ne jalchi'ena 'uo joca'li yemta.

Ami joĝodipi, ami janema jenjo' 'yaqatac

qa'a adaloya'aguet ta'le anomachi joñe'me payac.

14Ami yalaqapi, queda'me joote ami janema da'me 'yaqatac

qa'a auatetoñi joñe'me Qadet'a.

Ami 'yaĝaiquipi, queda'me joote ami janema da'me 'yaqatac

qa'a auatetoñi joñe'me jo'ne jalchi'ena 'uo joca'li yemta.

Ami joĝodipi, queda'me joote ami janema da'me 'yaqatac

qalaqach'ele ami 'uañaĝayaqolqa,

nataq'aen da'me joote auacoñiyegueta daa'me 'laqataqa

ñe'me Dios,

nataq'aen queda'me joote anomachi joñe'me payac.

15Ena'te auepichiya'alo gaa'me yauo'oe jogaa'me jiyaĝadipi jo'ne ja 'noe'n, uotaĝa gaa'me jo'ne lamaico uedalegue jena'me aleua. Qom gamachaqaega yepita'alo gaa'me yauo'oe jogaa'me jiyaĝadipi jo'ne ja 'noe'n, qama'le ja yaqanatet ta'le noqopita ñe'me Qadet'a. 16Qa'a yema gaa'me lamaico jogaa'me jiyaĝadipi jo'ne ja 'noe'n ja chiyoqodaje'ma joñe'me Qadet'a, dite da'me mach'e chiyaqayilo jogaa'me jiyaĝadipi. Naajo' yepitaqate'tape 'lonataqa jo'ne ja 'noe'n gaa'me jiyaĝadipi: daa'me ja 'noe'n lamaico 'me nejiyaĝauayaĝaco, nataq'aen da'me yepiteda'a ga'me jo'ne yauata, nataq'aen daa'me ni'yoĝodenaĝaco da'me neuoyaĝac. 17Qalaĝaja pa'l qom'te gaa'me jiyaĝadipi jo'ne ja 'noe'n, nataq'aen gaa'me lamaico jogaa'me; qalaĝaja gaa'me jo'ne yauo'oe daa'me jo'ne yepaquetapegalo joñe'me Dios, qama'le yataqachiñe 'uo da'me lec'alaĝa jo'ne ja pal.

18Ami yalaqapi, male yovideta gaa'me noloqo'ote jo'ne p'atedegue, nataq'aen joote auomachiiya queda'me 'uo ga'me na'taquena jo'ne nautena joñe'me Cristo. Qama'le nayi uo'oe gaa'me qayoĝode' jo'ne nautetedapega joñe'me Cristo: qo'che' jayatenaq queda'me male yovideta gaa'me noloqo'ote jo'ne p'atedegue. 19Nach'egaua jo'ne qo'mi ueteda'ajopa mañaĝa, qalaĝaja ja eja da'me qo'mi chiyoqodayilo, qama'le qo'mi ca'ae jogaa'me. Gamachaqaega jo'ne yataqata qo'mi chiyaqayilo, nach'ega qamqa'me nach'e eta't qo'mi uetauelo. Qalaĝaja, 'uo da'me dojo' qaedi di'yoqo'teque queda'me yema jogaa'me ja qo'mi 'te yotaua'n.

20Qalaĝaja, Cristo joote ami yanema joñe'me Dios Lepaqal, qama'le yema ami 'uo da'me ami yayatenaĝaneque yema naa'me naajo'. 21Qama'le nayi ami janema jenjo' 'yaqatac; qalaĝaja, yaqa'a ta'che ja auayachiñe da'me jo'ne eja, dite da'me joote auayachiñe; nataq'aen auayachiñe queda'me gamachaqaega noqovinaĝanaĝac ja yaqanatet ta'le qoyachiyoĝotaye q'aen da'me jo'ne eja. 22Gamachaqaega jo'ne nematapec joñe'me Jesús queda'me ja en 'te Cristo, nach'ega jo'ne yataqachiñe qovinaĝanaĝaic. Nach'ega jo'ne Jesús lauteua, qa'a nematapec joñe'me Qadet'a choqoñe'me Lec'oĝot. 23Nataq'aen gamachaqaega jo'ne yoqoleguet joñe'me Lec'oĝot nach'e ena'am ja ue'tajop joñe'me Qadet'a; qalaĝaja joga'me jo'ne dechoqotaĝanec joñe'me Lec'oĝot, nach'ega ue'tajop joñe'me Qadet'a.

24Chane'eja, 'noota qom aviyamaĝachiyouelo naa'me adai'lidi' da'me 'naqataĝanaĝac jo'ne eja, 'me auomachiiya jo'ne chiyoqo'tagueta gaa'me noloqo'ote ca'li yemta auacoñiyeguet da'me adepi'i. Qom naq'aeta queda'me dojo' netayelo jonaa'me adai'lidi', qama'le nach'e ena'am oquitalegue queda'me auoqochi'taguet joñe'me Dios Lec'oĝot, nataq'aen joñe'me Qadet'a. 25Dojo' nach'eda jo'ne qo'mi 'yaĝatema joñe'me Jesucristo da'me 'noyaĝac jo'ne yataqatelegue.

Auacoñiyeguet ga'me jo'ne ami yapaĝagueneque joñe'me Dios Lepaqal

26Qama'le ami jamaĝalo jenjo' yediijec qaedi ami jaqataĝana'alo jogaa'me jo'ne jetaque ami yoqovi'n. 27Qalaĝaja joote ami ua'ajopa joñe'me Dios Lepaqal jo'ne Jesucristo ami yanema. Qama'le ja auachitataitaque ta'le 'uo ga'me ami yapaĝague'n, qa'a joñe'me Dios Lepaqal nach'eñe ami yapaĝagueneque ena'uaque jogaa'me jo'ne uo'oe, nataq'aen da'me lapaĝaguenataĝanaĝac yataqata eja, nataq'aen qaya'te loqovinaĝanaĝac. Chane'eja, nach'e aueñeta't auoqochi'taguet joñe'me Cristo, nach'e naq'aeta da'me Dios Lepaqal joote ami yapaĝagueneque.

Auoqochi'taguet joñe'me Cristo

28Nayi, ami yalaqapi, 'noota qom nach'e aueñeta't auoqochi'taguet joñe'me Cristo, qaedi yataqachiñe 'uo da'me qadepe'e qom'che di'yo'quena joñe'me, nataq'aen qaedi qo'mi ja qadepocoq qom jajoyaqa'aguet joñe'me da'me lovidaĝac. 29Qom joote auayachiñe queda'me Jesucristo yataqata chimaqachiñe, qama'le nach'e ena'am auayachiñe queda'me ena'uaque jogaa'me yauote jodaa'me jo'ne chimadichidiñe, nach'egaua yataqata Dios lec'oqo'tolqa.

Currently Selected:

1 Jn 2: TSN

Highlight

Copy

Compare