Provérbiu 3
3
Fiar Nai Ho O Nia Fuan Tomak
1Hau nia oan, keta haluha hau nia hanorin,#3:1 Ebreu torah
maibee husik o nia fuan laran tuir nafatin hau nia ukun fuan sira,
2tanba sira sei foo loron barak ba o,
no moris naruk ho dame.
3Keta husik domin metin no fidelidade,
kesi sira iha o nia kakorok,
hakerek sira iha fatuk belar#3:3 Iha tempu antigu sira hakerek surat iha fatuk belar nebee metin no la sai aat. Haree Exodu 24:12, Isaias 30:8 no Lucas 1:63. o nia fuan laran nian.
4Nunee o sei hetan grasa no susesu diak
iha Maromak no iha ema nia oin.
5Fiar ba Nai ho o nia fuan laran tomak,
no keta sadere#3:5 Sentidu hanesan ‘foo konfiansa’. ba o nia kompriensaun rasik.
6Iha o nia dalan hotu, rekonhese Nia,
no Nia sei diriji o nia dalan sira.
7Keta hanoin katak, tuir o nia haree, o iha matenek klean,
hamtauk ba Nai, no hadook aan hosi hahalok aat.
8Buat nee sei lori kura ba o nia isin lolon,
no haforsa o nia ruin sira.
9Foo onra ba Nai ho o nia riku-soin,
no ho rezultadu dahuluk hosi o nia produtu hotu.
10Nunee o nia armazén sei nakonu ho produsaun barak,
no o nia tanki uvas nian sei nakonu liu ho tua uvas foun.#3:10 Sira halo tanki ho fatuk kuak boot ba sira nia prosesu halo tua uvas. Haree nota no dezenhu iha Isaias 16:10.
11Hau nia oan, la bele despreza disiplina hosi Nai,
no keta kole bainhira Nia koriji o,
12tanba Nai koriji ema ida nebee Nia hadomi,
hanesan aman ida koriji ninia oan nebee nia simu ho kontenti.#3:11-12 Haree Ebreu 12:5-6.
Haksolok ba Ema Matenek Klean
13Haksolok ba ema nebee hetan matenek klean,
no ema nebee hetan kompriensaun.
14Tanba buat nebee ita manaan hosi matenek klean sei diak liu fali buat nebee ita manaan hosi osan mutin,
no lukru hosi nia sei diak liu fali osan mean.
15Nia iha folin boot liu fali rubi sira,#3:15 Rubi mak fatuk nebee mean no naroman no karun nebee iha folin boot loos.
no buat hotu nebee o hakarak la kompara ho nia.
16Moris naruk sei iha ninia liman loos,
no iha ninia liman karuk iha riku-soin no onra.
17Ninia dalan sira mak dalan kontenti,
no ninia dalan hotu sei hakmatek.
18Nia mak ai huun moris nian ba sira nebee kaer metin ba nia,
no sira nebee kaer nafatin ba nia sei hetan bensaun.
19 Nai harii tiha mundu liu hosi matenek klean,
liu hosi kompriensaun Nia estabelese ona lalehan sira.
20Liu hosi Ninia matenek, fatin klean nakloke ona,
no kalohan sira hatuun mahobeen.
21Hau nia oan, keta husik buat sira nee sees hosi o nia matan:
tuir nafatin matenek klean nebee loos no desizaun sira nebee diak,
22nunee sira sei foo moris ba o nia klamar,
no buat furak ba o nia kakorok.
23O sei lao ho seguransa iha o nia dalan,
no o nia ain sei la sidi.
24Se o toba, o sei la tauk;
bainhira o toba, o sei toba dukur diak.
25Keta tauk ba dezastre nebee mai derepenti,
no keta tauk ba susar nebee mai ba ema aat.
26Tanba Nai sei sai o nia konfiansa,
no Nia sei proteje o nia ain hosi lasu.
27Keta tahan buat diak hosi sira nebee lo-loos tenki hetan,
bainhira o iha podér iha o nia liman hodi halo buat diak nee.
28Keta dehan ba o nia maluk, “Baa ona, no mai fali aban,
tanba aban hau sei foo buat nee ba o,” bainhira o iha ona buat nee.
29Keta halo planu aat hasoru o nia maluk,
nebee hela ho laran metin iha o nia sorin.
30Keta haksesuk malu bainhira la iha razaun,
bainhira ema seluk la halo buat aat ba o.
31Keta laran moras ba ema nebee halo violensia,
no la bele hili atu tuir dalan ida hosi nia.
32Tanba ema aat mak foer loos ba Nai,
maibee ema moris loos mak iha Nai nia konfiansa.
33 Nai nia malisan sei iha ema aat tebes nia uma,
maibee Nia foo bensaun ba ema justu nia uma.
34Tebes Nia goza ba goza door sira,
maibee Nia foo grasa ba ema nebee haraik aan.#3:34 Haree Tiago 4:6-7 no 1 Pedro 5:5-6.
35Ema nebee iha matenek klean sei simu onra hanesan eransa,
maibee ema beik sira sei hetan moe.
Currently Selected:
Provérbiu 3: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.