Mateus 28
28
Jesus Moris Hias
1 # 28:1-8 Haree Marcos 16:1-8, Lucas 24:1-10 no João 20:1. Liu tiha loron Sabdu, bainhira loro matan atu sae iha loron primeiru ba semana nee,#28:1 Loron domingu. Maria Madalena no Maria ida seluk baa haree rate. 2No tebes, rai nakdoko makaas tanba Nai nia anju ida tuun mai hosi lalehan. Anju nee mai no duir fatuk sai hosi odamatan, no tuur iha fatuk leten. 3Nia iha oin hanesan rai lakan, no ninia ropa mutin hanesan neve. 4Guarda sira nee nakdedar tanba tauk, no sira sai hanesan ema mate. 5Maibee anju dehan ba feto sira nee, “Keta tauk. Tanba hau hatene katak imi buka Jesus, nebee ema prega tiha ona ba krús. 6Nia la iha nee. Tanba Nia moris hias ona, tuir Ninia liafuan. Mai, haree fatin nebee uluk Nia toba. 7Baa lalais no foo hatene ba Ninia eskolante sira katak Nia moris hias ona hosi mate. No tebes, Nia baa uluk imi too Galileia. Imi sei haree Nia iha nebaa. Tebes, hau foo hatene ona ba imi.” 8No sira sai lalais hosi rate nee. Sira tauk no haksolok tebe-tebes. Sira halai hodi foo hatene ba Jesus nia eskolante sira. 9No tebes, Jesus hasoru sira no dehan, “Salóm!” Sira hakbesik no kaer Ninia ain no adora Nia. 10Depois Jesus dehan ba sira, “Keta tauk. Baa foo hatene ba Hau nia maluk sira atu baa Galileia. No sira sei haree Hau iha nebaa.”
Guarda Sira Habelar Lia Falsu
11Bainhira sira baa dadaun, tebes, guarda balu tama ba sidade. Sira foo hatene ba xefi saserdote sira kona ba buat hotu nebee akontese. 12No bainhira xefi saserdote sira halibur hamutuk ho katuas sira, no sira koalia hamutuk ona, sira foo osan boot ba soldadu sira. 13No sira dehan, “Imi tenki dehan, ‘Ninia eskolante sira mai iha kalan, no naok mate isin nee bainhira ami toba dukur hela.’ 14No se karik governadór rona istória nee, ami sei koalia diak ho nia, hodi imi la presiza hanoin.” 15Entaun sira foti osan no halo tuir orden nee. No istória nee habelar iha ema Judeu sira nia leet too ohin loron.
Halo Disípulu Ba
16Tuir mai, eskolante nain sanulu resin ida baa Galileia. No sira baa too foho nebee Jesus foo hatene ona ba sira. 17No bainhira sira haree Nia, sira adora Nia. Maibee ema balu laran rua hela. 18Jesus hakbesik hodi koalia ba sira, no dehan, “Hau simu ona kbiit tomak iha lalehan no mundu. 19Nee duni, imi baa, no halo disípulu ba ema hosi nasaun hotu-hotu. Foo batizmu ba sira hodi Aman, hodi Oan, no hodi Espíritu Santu nia naran. 20Hanorin sira atu halo tuir buat hotu nebee Hau manda ona ba imi. No tebes, Hau sei hamutuk nafatin ho imi, too mundu nia rohan.”
Currently Selected:
Mateus 28: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.