Mateus 21
21
Jesus Tama Ba Jerusalém
1 # 21:1-9 Haree Marcos 11:1-10, Lucas 19:28-38 no João 12:12-15. Bainhira sira too iha Betfage, iha Foho Oliveira nebee besik ba Jerusalém, Jesus haruka eskolante nain rua, 2no Nia dehan ba sira, “Tama ba aldeia iha imi nia oin nebaa. Imi sei hetan kuda buru inan ida nebee kesi hela. Ita hetan mos kuda buru oan ho inan nee. Kore sira no lori mai Hau. 3No se ema dehan buat ruma ba imi, imi sei dehan, ‘Nai mak presiza sira.’ Nunee nia sei haruka kedas kuda buru sira nee.” 4Buat nee akontese atu kumpri liafuan nebee profeta koalia tiha ona bainhira nia dehan nanis ona,
5“Hatete ba Zion nia oan feto,
‘Tebes, o nia Liurai mai ba o, ho laran maus,
no Nia sae kuda buru ida,
no kuda buru oan ida nebee halo servisu baibain deit.’”#21:5 Hosi Zakarias 9:9.
6Eskolante sira nee baa, no halo tuir Jesus nia orden ba sira. 7Sira lori mai kuda buru inan ho ninia oan. Sira tau sira nia ropa iha kuda buru nia leten no Jesus sae kuda buru nee. 8Depois ema barak hosi ema lubun boot nee nahe sira nia ropa iha dalan. Ema seluk taa ai sanak sira no tau iha dalan. 9No ema lubun boot nebee lao iha oin, no sira nebee tuir, hakilar, “Hosana#21:9 Hosana mak liafuan hosi Ebreu no iha sentidu ‘salva’. Haree ezemplu iha 2 Samuel 3:18 no Salmu 20:9. ba Oan Mane hosi David! Bensaun ba Nia nebee mai hodi Nai nia naran! Hosana iha fatin aas liu!” 10No bainhira Nia tama Jerusalém, sidade tomak hakfodak no husu ba malu, “See mak nee?” 11No ema lubun boot dehan, “Nee mak Jesus, profeta hosi Nazaré, nebee hosi Galileia.”
Jesus Hamoos Templu
12Jesus tama ba Templu,#21:12 Manuskritu balu dehan ‘tama ba Maromak nia Templu’. no Nia duni sai ema hotu nebee faan no sosa iha Templu. Nia baku fila meza sira nebee ema uza hodi troka osan no banku nebee ema uza hodi faan manu pombu sira. 13Nia dehan ba ema sira nee, “Sira hakerek nanis ona, ‘Ema sei hanaran Hau nia uma nudar uma orasaun nian.’ Maibee imi halo fatin nee sai fali naok-teen sira nia knuuk.”#21:13 Kona ba ‘uma orasaun’, haree Isaias 56:7. Kona ba knuuk ba naok-teen sira, haree Jeremias 7:11.
14Ema matan delek no ema ain aat hakbesik ba Jesus iha Templu, no Nia kura sira. 15Bainhira xefi saserdote sira no eskriba sira haree milagre sira nebee Jesus halo, ho tan labarik sira hakilar iha Templu, no dehan, “Hosana ba Oan Mane hosi David!” sira sai hirus. 16Sira dehan ba Nia, “O rona ona buat nebee labarik sira dehan ka lae?” Jesus dehan ba sira, “Sin; imi nunka lee liafuan nee ka:
‘Hosi bebee no kiik-oan sira nia ibun,
O prepara liafuan nebee hahii.’?#21:16 Haree Salmu 8:2, maibee Jesus nia liafuan nee liga fali ba Salmu 8 iha lian Gregu (Septuaginta).
17Depois Jesus husik sira, no Nia sai hosi sidade no tama ba Betánia. No Nia toba kalan iha nebaa.
Jesus Halo Ai Figeira Namlaik
18 # 21:18-22 Haree Marcos 11:12-14, 20-24. Iha dadeer-saan, bainhira Jesus fila fali ba sidade, Nia hamlaha. 19Nia haree ai figeira huun ida iha dalan ninin. Bainhira Nia too iha ai huun nee, Nia la hetan ai fuan ida, só tahan deit. Nia dehan ba ai nee, “O sei nunka foo fuan tan too rohan laek.” No ai figeira nee sai maran kedas.
20Bainhira eskolante sira haree ida nee, sira admira, no dehan, “Oinsaa ai figeira nee sai maran kedas?” 21Jesus hataan no dehan ba sira, “Tebes Hau dehan ba imi, se imi fiar no la duvida, imi bele halo liu fali buat nebee Hau halo ona ba ai figeira nee. Imi bele mos dehan ba foho, ‘Hiit aan lai, no soe aan ba tasi laran.’ No ida nee sei akontese duni. 22Buat hotu nebee imi husu iha orasaun, no se imi fiar, imi sei simu.”
Jesus Nia Kbiit
23 # 21:23-27 Haree Marcos 11:27-33 no Lucas 20:1-8. Tuir mai, Jesus tama ba Templu. Bainhira Nia hanorin hela, xefi saserdote sira no katuas sira hosi povu nee mai hasoru Nia. Sira dehan, “Liu hosi kbiit ida nebee mak O halo buat sira nee? See mak foo kbiit nee ba O?” 24No Jesus hataan no dehan ba sira, “Hau mos sei husu imi pergunta ida. Se imi hataan mai Hau, nunee Hau sei foo hatene ba imi liu hosi kbiit ida nebee mak Hau halo buat sira nee. 25João nia batizmu mai hosi nebee? Hosi lalehan, ka hosi ema?” No sira koalia ba malu no dehan, “Se ita dehan, ‘Hosi lalehan,’ Nia sei dehan ba ita, ‘Tanba saa mak imi la fiar nia?’ 26Maibee se ita dehan, ‘Hosi ema,’ ita tauk povu nee. Tanba ema hotu haree João nudar profeta ida.” 27Sira hataan ba Jesus, “Ami la hatene.” Nia dehan ba sira, “Nunee Hau sei la foo hatene ba imi liu hosi kbiit ida nebee mak Hau halo buat sira nee.”
Ai Knanoik Kona Ba Oan Mane Rua
28“Maibee imi hanoin nusaa? Mane ida iha oan mane nain rua. No nia koalia ba oan primeiru, no dehan, ‘Oan, ohin o baa servisu iha hau nia toos uvas.’ 29No nia hataan, ‘Hau lakohi baa.’ Maibee tuir mai nia arepende, no nia baa. 30Depois aman nee koalia ba oan ida seluk, no dehan hanesan. No oan nee hataan, ‘Hau sei baa, senhor.’ Maibee nia la baa. 31Hosi oan mane nain rua nee, ida nebee mak halo tuir ninia aman nia hakarak?” Sira dehan ba Nia, “Ida primeiru.” Jesus dehan ba sira, “Tebes Hau dehan ba imi, katak kobradór impostu no feto luroon sira tama uluk liu imi iha Maromak nia reinu. 32Tanba João mai ba imi liu hosi dalan moris loos nian, no imi la fiar nia. Maibee kobradór impostu no feto luroon sira fiar nia. Maski imi haree ona ida nee, imi la arepende no la fiar nia.”
Ai Knanoik: Ema Nebee Hadau Toos
33 # 21:33-46 Haree Marcos 12:1-12 no Lucas 20:9-18. Kompara ho Isaias 5:2. Rona ai knanoik ida seluk. Iha uma nain ida nebee kuda uvas iha toos ida, no nia halo lutu haleu toos nee. Nia kee rai kuak hodi halo fatin sama uvas nian no nia halo uma seguru ida. Nia foo aluga ba ema hodi servisu iha toos nee no nia baa rai dook ida. 34No bainhira tempu atu kuu uvas fuan besik ona, nia haruka ninia atan sira ba ema nebee servisu iha toos, hodi simu uvas fuan hosi toos nee. 35No ema nebee servisu iha toos foti ninia atan sira. Sira baku ida, oho ida no tuda fatuk ba ida seluk.#21:35 Bele tuda fatuk too mate. 36Toos nain haruka fali atan sira seluk, nebee liu fali grupu uluk. Maibee sira nebee servisu iha toos halo hanesan. 37Ikus liu, nia haruka ninia oan mane ba sira, no dehan, ‘Sira sei respeita hau nia oan mane.’ 38Maibee bainhira ema nebee servisu iha toos haree oan mane nee, sira dehan ba malu, ‘Nia mak sei simu toos nudar liman rohan. Mai ita oho nia, no ita bele hadau ninia liman rohan hodi sai ita nian.’ 39No sira kaer nia, no soe nia ba toos liur, no oho nia. 40Bainhira toos uvas nia nain mai, nia sei halo saida ba sira nebee servisu iha toos nee?” 41Sira dehan ba Jesus, “Nia sei halakon duni ema aat sira nee. No nia sei foo ninia toos uvas ba ema seluk hodi servisu iha toos nee, nebee sei foo ninia uvas fuan tuir tempu kuu nian.”
42Jesus dehan ba sira, “Imi nunka lee Eskritura nee ka?
‘Fatuk ida nebee badaen sira rejeita,
ida nee sai fatuk ulun iha lidun.#21:42 Fatuk nebee importante liu. Signifika katak sira rejeita Jesus maibee Nia mak ema boot liu.
Nai mak halo ida nee,
no ita haree ida nee furak tebes.’#21:42 Hosi Salmu 118:22-23. Haree mos Apostolu 4:11.
43Nunee Hau dehan ba imi, Maromak sei foti Ninia reinu hosi imi, no foo ba povu ida nebee sei foo fuan. 44No see deit nebee monu ba fatuk nee sei rahun. Maibee bainhira fatuk nee monu ba ema ida, fatuk nee sei harahun nia too uut.”#21:44 Haree Isaias 8:14-15.
45No bainhira xefi saserdote sira no Farizeu sira rona tiha Ninia ai knanoik sira nee, sira hatene katak Nia koalia kona ba sira. 46Maski sira hakarak kaer Nia, sira tauk ema lubun boot nee, tanba ema lubun boot nee haree Nia nudar profeta ida.
Currently Selected:
Mateus 21: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.