Mateus 19
19
Hanorin Kona Ba Soe Malu
1 # 19:1-9 Haree Marcos 10:1-12. Bainhira Jesus koalia ona liafuan nee, Nia sai hosi Galileia no tama ba área Judeia, iha Jordaun nia sorin ba. 2Ema lubun boot sira tuir Nia. No Nia kura sira iha nebaa.
3Ema Farizeu sira mos mai ba Nia. Sira koko Nia no dehan ba Nia, “Tuir lo-loos, mane ida bele soe ninia feen tanba razaun naran deit ka lae?” 4Nia hataan ba sira, “Imi lee tiha ona ka lae, katak Nia nebee kria sira iha tempu hahuu, Nia kria sira mane no feto? 5No Maromak dehan, ‘Tanba nee mane ida sei husik ninia inan-aman, no nia sei hela hamutuk ho ninia feen. No sira nain rua sei sai isin ida deit.’#19:5 Haree Jénesis 2:24 no nota. Fraze ‘hela hamutuk’ nee mak ‘belit’ (hanesan lem) iha lian Gregu. 6Nunee sira laos ema nain rua ona, maibee ida deit. Nee duni, buat nebee Maromak tau hamutuk, ema la bele haketak.” 7Sira dehan ba Nia, “Entaun tanba saa mak Moisés foo orden ba ema atu foo surat soe malu nian no soe ninia feen?” 8Nia dehan ba sira, “Tanba imi nia fuan laran toos. Nunee Moisés foo lisensa ba imi atu soe imi nia feen. Maibee iha tempu hahuu laos hanesan nee. 9No Hau dehan ba imi: see deit nebee soe ninia feen, no kaben ho ema seluk, nia halo adultériu. Só deit tanba sala seksuál mak nia bele soe ninia feen.”#19:9 Manuskritu balu aumenta ‘No see-see deit nebee kaben ho nia nebee ema soe ona mak halo adultériu.’
10Jesus nia eskolante sira dehan ba Nia, “Se karik hanesan nee entre mane ho ninia feen, entaun diak liu lalika kaben.” 11Maibee Nia dehan ba sira, “Laos ema hotu bele simu liafuan nee, só deit ba ema nebee simu grasa nee.#19:11 Ka ‘só deit ba ema nebee (Maromak) foo ona’. 12Iha ema balu la kaben,#19:12 Liafuan iha Gregu refere ba ema eunuku (Port. eunuco; Ind. orang kasim). Uluk liu sira serví iha palásiu hodi tau matan ba liurai nia feen no feen kiik sira. tanba sira moris mai hanesan nee hosi sira nia inan nia oan fatin. No ema balu la kaben, tanba ema seluk halo sira hanesan nee. No ema balu la kaben, tanba sira rasik desidi hanesan nee tanba reinu lalehan. Nia nebee bele simu liafuan nee, husik nia simu ba.”
Husik Labarik Sira Mai
13 # 19:13-15 Haree Marcos 10:13-16 no Lucas 18:15-17. Depois ema lori labarik kiik sira ba Jesus atu Nia bele tau liman ba sira no halo orasaun. No eskolante sira siak ema sira nee. 14Maibee Jesus dehan, “Husik labarik kiik sira nee hakbesik mai Hau, no keta bandu sira. Tanba ema hanesan labarik sira nee mak sai Maromak nia reinu.” 15No Nia tau liman ba sira. Depois Nia sai hosi fatin nebaa.
Joven Mane Nebee Riku
16 # 19:16-29 Haree Marcos 10:17-30 no Lucas 18:18-30. Tebes, ema ida mai no dehan ba Jesus, “Mestri, hau tenki halo buat diak saida atu hau bele hetan moris rohan laek?” 17No Jesus dehan ba nia, “Tanba saa mak o husu Hau kona ba buat nebee diak? Iha Ida deit nebee diak. Maibee se o hakarak hetan moris, halo tuir ukun fuan sira.” 18Nia husu Jesus, “Ukun fuan ida nebee?” Jesus dehan, “Keta oho, keta halo sala seksuál, keta naok, keta foo sasin falsu, 19foo onra ba o nia inan-aman, no hadomi o nia maluk hanesan o nia aan rasik.”#19:19 Haree ukun fuan sira nee iha Exodu 20:12-16 no Levítiku 19:18. Haree mos Roma 13:9. 20Joven mane nee dehan ba Jesus, “Hau halo tuir ona buat sira nee hotu. Saida tan mak hau sei falta?” 21Jesus dehan ba nia, “Se o hakarak sai perfeitu,#19:21 Gregu telios, nebee perfeitu, kompletu no pas (hanesan ‘loos ona’). Haree Filipe 3:15 no nota. baa faan o nia sasaan, no foo ba ema kiak, no o sei hetan riku-soin iha lalehan. No mai tuir Hau.” 22Maibee bainhira joven mane rona tiha liafuan nee, nia fila ho laran tristi, tanba nia iha riku-soin barak.
23Depois Jesus dehan ba Ninia eskolante sira, “Tebes Hau dehan ba imi, katak susar duni ba ema riku atu tama ba reinu lalehan. 24Dala ida tan, Hau dehan ba imi, fasil liu ba kuda kamelu#19:24 Iha lian Aramaiku, liafuan ‘kuda kamelu’ no ‘tali’ atu hanesan deit (uluk sira halo tali hosi fulun kuda kamelu nian). ida atu tama liu hosi daun kuak duké ema riku ida atu tama ba Maromak nia reinu.” 25Bainhira Ninia eskolante sira rona nunee, sira hakfodak tebes no dehan, “Entaun see loos mak bele hetan salvasaun?” 26Maibee Jesus hateke ba sira, no dehan, “Ba ema, la bele; maibee ba Maromak, buat hotu bele.” 27Depois Pedro hataan no dehan ba Nia, “Tebes, ami husik ona buat hotu, no tuir O; nunee ami sei hetan saida?” 28Jesus dehan ba sira, “Hau koalia lo-loos ba imi, iha mundu foun,#19:28 Gregu dehan ‘bainhira buat hotu foun fali’ ka ‘bainhira buat hotu moris mai fali’. bainhira Ema Nia Oan tuur iha Ninia kadunan iha glória, imi mos nebee tuir Hau sei tuur iha kadunan sanulu resin rua. No imi sei tesi lia ba Israel nia suku sanulu resin rua. 29No ema hotu nebee husik uma, ka maun-alin sira, ka inan-aman, ka feen, ka oan sira, ka rai tanba Hau nia naran, sira sei simu dala atus ida liu tan. No sira sei hetan moris rohan laek nudar liman rohan. 30Maibee ema barak nebee primeiru sei sai ikus, no sira nebee ikus sei sai primeiru.”
Currently Selected:
Mateus 19: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.