Mateus 15
15
Tradisaun No Ukun Fuan
1 # 15:1-28 Bele lee iha Marcos 7:1-30. Depois ema eskriba no Farizeu sira mai hosi Jerusalém hodi hasoru Jesus. No sira dehan, 2“Tanba saa mak O nia eskolante sira la halo tuir lisan hosi bei-ala sira? Sira la fasi sira nia liman bainhira sira haan.” 3Maibee Jesus hataan, no dehan ba sira, “Tanba saa mak imi mos la halo tuir ukun fuan hosi Maromak tanba imi nia lisan? 4Tanba Maromak manda, no dehan, ‘Foo onra ba o nia inan-aman.’ No, ‘Ida nebee foo malisan ba ninia inan-aman, nia tenki mate.’ 5Maibee imi dehan, ‘Ema nebee dehan ba ninia inan-aman, “Buat nebee imi atu hetan hosi hau, buat nee hau foo fali ba Maromak,” 6ema nee la presiza foo onra ba ninia inan-aman.’ Nunee, imi halo Maromak nia ukun fuan la iha folin tanba imi nia lisan. 7Laran makerek sira! Isaias foo sai profesia lo-loos kona ba imi, bainhira nia dehan:
8‘Povu nee foo onra mai Hau ho sira nia ibun tutun;
maibee sira nia laran dook hosi Hau.
9Sira adora Hau saugati deit,
tanba sira hanorin ema nia ukun fuan sira nudar doutrina.’”#15:9 Hosi Isaias 29:13.
Buat Nebee Hafoer Ema
10Nia bolu ema lubun boot nee mai, no dehan ba sira, “Rona ba, no kompriende: 11Laos buat nebee tama ibun mak halo ema ida foer maibee buat nebee sai hosi ibun, buat nee mak halo ema foer.” 12Depois Ninia eskolante sira mai, no dehan ba Nia, “Ita Boot hatene katak ema Farizeu sira hanoin hirus bainhira sira rona liafuan nee ka?” 13Maibee Nia hataan dehan, “Ai horis hotu nebee Hau nia Aman iha lalehan la kuda, sei fokit sai tiha. 14Husik ema sira nee. Tanba sira mak matadalan nebee matan delek. No se ema matan delek ida lori ema matan delek seluk, nain rua nee sei monu ba rai kuak!” 15Depois Pedro hataan no dehan ba Nia, “Esplika mai ami ai knanoik ida nee.” 16Jesus dehan, “Imi mos seidauk kompriende ka? 17Imi la haree ka, katak saida mak tama liu hosi ibun tuun ba kabun depois sai ba sintina? 18Maibee buat sira nebee sai hosi ibun mai hosi laran. No buat sira nee halo ema foer. 19Tanba hosi laran mak hamosu hanoin aat, oho ema, adultériu, sala seksuál, naok, bosok no koalia aat.#15:19 Gregu ‘blasfémia’ nebee bele koalia aat hasoru Maromak ka hanorin Maromak nian (Marcos 2:7, Mateus 12:19). 20Buat sira nee mak hafoer ema. Maibee atu haan ho liman nebee seidauk fasi, buat nee la hafoer ema.”
Feto Kanaan Nia Fiar
21 # 15:21 Bele lee iha Marcos 7:24-30. Depois Jesus sai hosi fatin nee, no Nia tama ba área Tiro no Sidon. 22No tebes, feto Kanaan ida hosi distritu nebaa hakilar ba Nia, no dehan, “Hatudu laran luak mai hau, Oh Nai, David Nia Oan. Hau nia oan feto hetan terus boot tanba diabu ida.” 23Maibee Nia la hataan liafuan ida ba feto nee. Ninia eskolante sira hakbesik ba Nia, no husu dehan, “Haruka feto nee baa tiha; tanba nia tuir ita no hakilar beibeik.” 24Maibee Jesus hataan dehan, “Hau mai deit hodi buka bibi sira nebee lakon hosi Israel nia uma kain.” 25Maibee feto nee hakbesik no hakneak#15:25 Liafuan nee tradus mos ‘adora’ (haree Mateus 14:33). Iha lian Gregu, liafuan nee iha relasaun ho asu, nebee ita ‘halo hanesan asu’ nebee haraik aan iha patraun nia oin. ba Nia, no dehan, “Nai, ajuda hau lai.” 26Maibee Nia hataan, no dehan, “Maibee ida nee la diak atu foti oan sira nia paun no soe fali ba asu oan.” 27No feto nee dehan, “Loos duni, Nai. Maibee asu oan bele haan paun rahun nebee monu hosi sira nia nain nia meza.” 28Entaun Jesus hataan ba nia, “Oh feto, o nia fiar nee boot tebes! Husik o hetan tuir o nia hakarak.” No hosi oras nee kedas, ninia oan feto hetan isin diak.
Jesus Kura Ema Barak
29Jesus sai hosi fatin nee, no Nia lao iha tasi ibun iha Tasi Galileia. Depois Nia sae ba foho ida, no tuur iha nebaa. 30Ema lubun boot sira mai ba Nia. No sira lori ema nebee ain aat, matan delek, monok, liman aat, no sira seluk. Sira tau ema moras nee iha Jesus nia ain no Nia kura sira hotu. 31Ema lubun boot nee admira bainhira sira haree ema monok bele koalia, no ema ho liman aat sai diak fali, ema ain aat bele lao, no ema matan delek bele haree. No sira foo glória ba Israel nia Maromak.
Jesus Foo Haan Ba Ema Rihun Haat
32 # 15:32 Bele lee iha Marcos 8:1-10. Jesus bolu Ninia eskolante sira mai, no dehan, “Hau hanoin tebes ba ema lubun nee, tanba sira lao hamutuk ho Hau too loron tolu ona. Sira la iha buat ida atu haan. No Hau lakohi haruka sira fila hamlaha. Keta halo be sira sai fraku no monu iha dalan.” 33Ninia eskolante sira dehan ba Nia, “Ita hetan paun hosi nebee iha rai fuik nee hodi foo haan ema lubun nebee boot nee?” 34No Jesus dehan ba sira, “Imi iha paun fuan hira?” Sira hataan, “Hitu, no ikan kiik balu.” 35Depois Jesus haruka ema lubun boot nee tuur iha rai. 36No Nia foti paun fuan hitu no ikan sira nee, foo agradese, no silu hodi fahe ba Ninia eskolante sira, no eskolante sira fahe fali ba ema lubun boot nee. 37Sira hotu haan too bosu. No sira halibur hahaan rahun nebee resin nee too bote boot hitu nakonu. 38Sira nebee haan mak ema mane nain rihun haat (4000), nebee seidauk sura feto no labarik sira. 39Jesus haruka ema lubun boot nee fila. Depois Nia sae roo no baa área Magadan.
Currently Selected:
Mateus 15: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.