Mateus 14
14
João Batista Mate
1Iha tempu nebaa, Herodes, nebee ukun nain iha área nebaa,#14:1 Herodes Antipas nebee Herodes Boot nia oan ida. Bainhira Herodes Boot mate, ninia reinu fahe ba distritu haat. Herodes Antipas ukun distritu ida iha Galileia no Pereia. rona kona ba Jesus nia konhesidu. 2Nia dehan ba ninia atan sira, “Ema nee mak João Batista. Nia moris hias ona hosi mate. Tanba nee nia iha kbiit hodi halo milagre sira.” 3Tanba Herodes kaer ona João, kesi nia, no tau nia iha komarka tanba Herodias nebee ninia alin Filipe nia feen. 4Tanba João dehan ba Herodes, “Tuir lo-loos, ita boot la bele kaben ho Herodias.” 5Mezmu Herodes hakarak oho João, nia tauk povu, tanba sira haree João nudar profeta. 6Maibee bainhira Herodes halo tinan, Herodias nia oan feto dansa iha sira nia oin, no Herodes sai kontenti. 7Nunee nia promete ho juramentu atu foo saida deit nebee oan feto nee husu. 8No feto nee simu liafuan hosi ninia inan, no dehan, “Foo mai hau iha nee João Batista nia ulun iha bandeja ida.”
9Liurai tristi, maibee tanba ninia juramentu, no sira nebee tuur no haan hamutuk ho nia, entaun nia foo orden katak sira foo buat nebee feto nee husu. 10No Herodes haruka ema baa no tesi sai João nia ulun iha komarka. 11Depois sira lori mai ninia ulun iha bandeja ida, no foo ba labarik feto nee. No nia lori ulun nee ba ninia inan. 12Depois João nia eskolante sira mai, no foti mate isin nee, no hakoi nia. No sira baa no foo hatene ba Jesus.
Jesus Foo Haan Ba Ema Rihun Lima
13Bainhira Jesus rona tiha liafuan nee, Nia sai hosi fatin nee liu hosi roo, no tama ba rai fuik mes-mesak. Bainhira povu rona tiha ida nee, sira lao tuir Nia hosi sidade sira. 14Bainhira Jesus too rai maran, Nia haree ema lubun boot ida. Nia hanoin tebe-tebes sira, no Nia kura ema sira nebee moras. 15Bainhira rai nakaras ona, Ninia eskolante sira mai no dehan ba Nia, “Fatin nee rai fuik, no tempu liu ona. Haruka ema lubun boot nee fila ba, hodi sira bele tama ba aldeia sira, no sosa hahaan. 16Maibee Jesus dehan ba Ninia eskolante sira, “Sira la presiza sai baa. Imi foo haan ba sira.” 17No eskolante sira dehan ba Nia, “Ami iha deit paun fuan lima no ikan rua.” 18Jesus dehan, “Lori hahaan sira nee mai Hau.” 19Depois Nia haruka ema lubun boot nee tuur iha duut leten. Nia foti paun fuan lima no ikan rua nee. Nia hateke ba lalehan no foo sai bensaun. Nia silu paun nee no fahe ba Ninia eskolante sira. Depois eskolante sira fahe hahaan ba ema lubun boot nee. 20Ema sira hotu haan too bosu. Depois sira halibur hahaan resin ba bote sanulu resin rua nakonu. 21Ema sira nebee haan ona nee maizoumenus mane nain rihun lima (5000), nebee la sura feto no labarik sira.
Jesus Lao Iha Tasi Leten
22Depois Jesus haruka kedas Ninia eskolante sira sae roo ida, no baa uluk Nia ba tasi sorin. No Jesus haruka ema lubun boot nee fila ba. 23Bainhira Nia haruka ona ema lubun boot nee fila ba, Nia mesak sae ba foho hodi halo orasaun. Bainhira kalan mai ona, Nia iha nebaa mes-mesak. 24Maibee iha tempu nebaa roo iha tasi klaran ona. Laloran baku makaas roo nee tanba anin hasoru sira. 25No iha dadeer-saan nakukun,#14:25 Gregu dehan ‘iha tempu ba dala haat nebee ema tau matan’. Sira fahe kalan ida ba parte haat, nunee oras nee iha tuku 3:00-6:00 dadeer. Jesus baa sira, no Nia lao iha tasi leten. 26Bainhira eskolante sira haree Nia lao iha tasi leten, sira tauk tebes, no dehan, “Ida nee mak mate klamar!” No sira hakilar tanba tauk. 27Maibee Jesus koalia kedas ba sira, no dehan, “Aten brani ba! Nee mak Hau. Keta tauk.”
28Pedro hataan ba Jesus, no dehan, “Nai, se O mak nee duni, haruka hau lao iha bee leten ba O.” 29Jesus dehan, “Mai!” Pedro tuun hosi roo no nia lao iha bee leten atu baa too Jesus. 30Maibee bainhira nia haree anin boot, nia sai tauk. Nia komesa mout no nia hakilar dehan, “Nai, salva hau ba!” 31Jesus lolo kedas Nia liman no kaer Pedro. Jesus dehan ba nia, “O nebee iha fiar kiik-oan, nusaa mak o laran ru-rua?” 32No bainhira sira tama roo, anin nee para ona. 33Depois sira nebee iha roo laran adora#14:33 Liafuan iha Gregu iha sentidu atu hakneak, rei no adora. Haree liafuan nee hanesan iha Mateus 4:10. Jesus, no dehan, “Loos duni, O mak Maromak nia Oan.”
Jesus Kura Ema Moras Iha Genesaré
34Bainhira sira too iha tasi sorin, sira baa too rai Genesaré. 35No bainhira ema hosi fatin nee hatene kona ba Nia, sira haruka lia-menon ba rai tomak iha nebaa. No sira lori ba Nia ema hotu nebee moras. 36Sira husu Nia atu sira bele kona deit Ninia ropa rohan. No ema hotu nebee kona Ninia ropa nee hetan duni isin diak.
Currently Selected:
Mateus 14: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.