Mateus 13
13
Rai Oin Haat
1 # 13:1 Bele lee iha Marcos 4:1-12, Lucas 8:4-10. Iha loron nebaa, Jesus sai hosi uma, no tuur iha tasi ibun. 2Ema lubun boot mai haleu Nia. Entaun Nia sae roo ida, no tuur. No ema lubun boot nee hamriik hela iha tasi ibun. 3Nia foo sai buat barak ba sira liu hosi ai knanoik sira. Nia dehan, “Tebes, toos nain ida baa hodi kari fini. 4Bainhira nia kuda fini nee, balu monu iha dalan ninin. No manu sira mai no haan hotu. 5Balu monu iha fatuk laran. No fini nee iha rai uitoan deit. Fini nee tubun lalais, tanba rai uitoan deit. 6Maibee, bainhira loro matan sae, sira sai maran, no namlaik too lakon tanba abut la iha. 7No fini balu monu iha ai tarak laran. Ai tarak nee sai boot, no hanehan sira. 8No fini balu tan monu iha rai diak, no foo isin. Balu foo fali too dala atus ida, balu too dala neen-nulu, no balu too dala tolu-nulu. 9Ema nebee iha tilun hodi rona, husik nia rona ba.”
Tanba Saa Jesus Uza Ai Knanoik
10Eskolante sira mai, no dehan ba Nia, “Tanba saa mak Ita Boot koalia ba sira ho ai knanoik?” 11Nia hataan no dehan ba sira, “Tanba imi deit bele simu segredu kona ba reinu lalehan, maibee sira la hetan. 12Tanba nia nebee iha ona, nia sei hetan tan, nunee nia sei iha barak loos. Maibee ba nia nebee la iha, nia sei lakon mos buat ruma nebee nia iha. 13Tanba nee Hau koalia ba sira ho ai knanoik: tanba maski sira haree maibee sira la haree, no maski sira rona maibee sira la rona, nunee sira la kompriende. 14Nee duni Isaias nia profesia kona ba sira sai loos ona, nebee nia dehan,
‘Tebes, imi sei rona duni, maibee imi sei la kompriende;
tebes, imi sei haree duni, maibee imi sei la hatene.
15Tanba povu nee nia fuan laran sai toos ona,
no sira nia tilun rona la moos,
no sira nia matan taka ona;
keta halo be, sira bele haree ho sira nia matan,
no rona ho sira nia tilun,
no kompriende ho sira nia fuan laran,
no fila fali hodi Hau bele kura sira.’#13:15 Hosi Isaias 6:9-10.
16Maibee haksolok ba imi nia matan, tanba sira haree; no imi nia tilun, tanba sira rona. 17Tanba Hau koalia lo-loos ba imi katak profeta barak no ema barak nebee moris loos hakarak tebes atu haree buat nebee imi haree, maibee sira la konsege haree; no rona buat nebee imi rona, maibee sira la konsege rona.
Jesus Esplika Ai Knanoik Ho Toos Nain
18 # 13:18 Bele lee iha Marcos 4:13-23, Lucas 8:11-15. “Entaun, rona kona ba ai knanoik ho toos nain: 19Bainhira ema ida rona liafuan kona ba reinu nee, no nia la kompriende liafuan nee, nunee buat aat mai, no foti sai buat nebee kuda ona iha ninia fuan laran. Nia mak ida nebee simu fini iha dalan ninin. 20Maibee ida nebee simu fini iha fatuk laran mak ema nebee rona liafuan nee, no nia simu kedas ho laran haksolok. 21Maibee liafuan nee la iha abut iha nia laran. Nia bele tahan too tempu uitoan deit. Bainhira tempu susar ka terus mosu mai tanba liafuan nee, nia monu kedas. 22Ida nebee simu fini iha ai tarak laran mak nia nebee rona liafuan nee, maibee nia preokupa kona ba moris iha mundu no riku-soin nebee dada bosok. Hanoin resin nee hanehan liafuan nee no nia la foo fuan. 23Maibee ida nebee simu fini iha rai diak mak nia nebee rona liafuan nee, no nia kompriende. Nia foo mos fuan, no balu foo fali too dala atus ida, balu too dala neen-nulu, no balu tan too dala tolu-nulu.”
Ai Knanoik: Duut Iha Toos
24Jesus konta ai knanoik ida fali ba sira. Nia dehan, “Reinu lalehan nee hanesan ema ida nebee kari fini diak iha ninia toos. 25Maibee bainhira nia toba hela, ninia inimigu mai no kari fini hosi duut aat#13:25 Duut nebee oin hanesan ho ai horis trigu nian. iha trigu nee nia leet. Depois inimigu nee baa tiha. 26Bainhira trigu nee moris mai, no foo fuan, duut aat mos mosu mai. 27Nunee toos nain nia atan sira mai no dehan ba nia, ‘Senhor, iha ita boot nia toos, ita boot kari fini nebee diak ka lae? Nunee duut aat nee mai hosi nebee?’ 28Nia dehan ba sira, ‘Inimigu ida mak halo nunee.’ Ninia atan sira dehan ba nia, ‘Ita boot hakarak ami baa fokit duut aat nee?’ 29Maibee nia dehan, “Lae, tanba bainhira imi fokit duut aat nee, imi bele fokit sai mos trigu hamutuk ho sira. 30Husik sira moris hamutuk too tempu kolheta, no iha tempu kolheta hau sei hatete ba sira nebee koa trigu, ‘Koa uluk duut aat, no futu hamutuk hodi sunu tiha. Maibee koa trigu hodi halibur ba iha hau nia armazén.’”
Fini Mostarda No Fermentu
31 # 13:31 Bele lee iha Marcos 4:30-32, Lucas 13:18-19. Nia foo sai ai knanoik ida fali ba sira, Nia dehan, “Reinu lalehan mak hanesan mostarda musan#13:31 Mostarda iha rai Israel hanesan uitoan ho modo bayam nebee iha fini kiik maibee bele husik ai horis nee sai boot no aas liu ema. ida, nebee ema ida foti no kuda iha ninia toos. 32Fini nee kiik liu fali fini hotu. Maibee bainhira fini nee moris, nia sai boot liu fali modo hotu. No nia sai hanesan ai huun ida. Nunee manu sira iha loro leten mai hela iha ninia sanak sira.”
33Ai knanoik seluk nebee Nia konta ba sira mak nee, “Reinu lalehan mak hanesan fermentu, nebee feto ida foti, no kahur ho trigu saku ida.#13:33 Gregu sea tolu, nebee 22L. Masa tomak nee sae tanba fermentu.”
34Buat hotu nebee Jesus dehan ba ema lubun nee, Nia dehan liu hosi ai knanoik. Nia la koalia ba sira ho liafuan oin seluk, só Nia uza deit ai knanoik.
35Ida nee hodi kumpri buat nebee profeta ida hatete ona, nia dehan,
“Hau sei loke hau nia ibun ho ai knanoik,
hau sei foo sai buat nebee subar hela hosi tempu nebee mundu hahuu.”#13:35 Hosi Salmu 78:2.
Jesus Esplika Kona Ba Duut Aat
36Depois Jesus husik ema lubun boot nee no Nia tama ba uma laran. Ninia eskolante sira hakbesik ba Nia, no dehan, “Esplika mai ami ai knanoik kona ba duut aat iha toos.” 37Nia hataan no dehan ba sira, “Ida nebee kari fini diak mak Ema Nia Oan. 38Toos nee mak mundu. Fini diak mak reinu nia oan sira maibee duut aat mak aat nain nia oan sira. 39Inimigu nebee kuda duut aat nee mak diabu. Tempu kolheta nian mak mundu nia rohan. No sira nebee koa trigu mak anju sira. 40Nunee tempu nebee sira koa duut aat no sunu iha ahi, buat nee sei akontese iha mundu nia rohan. 41Ema Nia Oan sei haruka Ninia anju sira, no sira sei koa sai hosi Ninia reinu buat hotu nebee halo ema monu ba sala, no sira nebee iha hahalok aat. 42Nia sei soe sira ba fornu nebee lakan, no iha nebaa sira sei tanis no ruun nehan.
43Depois ema nebee moris loos sei nabilan hanesan loro matan iha sira nia Aman nia reinu. Ema nebee iha tilun, rona ba.
Riku-soin Ho Folin Boot
44“No mos, reinu lalehan mak hanesan riku-soin nebee subar iha toos. Bainhira ema hetan riku-soin nee, nia subar fali buat nee. No ho laran haksolok nia baa no faan buat hotu nebee nia iha hodi sosa toos nee.
45No mos, reinu lalehan mak hanesan loja nain ida nebee buka pérola#13:45 Pérola nee mak musan hosi ramiis boot iha tasi laran. Nia oin mutin no kabuar hanesan fatuk murak ho folin boot. nebee diak. 46Bainhira nia hetan pérola ida nebee folin boot, nia baa no faan buat hotu nebee nia iha, no sosa pérola nee.
Kona Ba Mundu Nia Rohan
47“No mos, reinu lalehan mak hanesan redi nebee ema soe ba tasi no hetan ikan oi-oin. 48Bainhira redi nee nakonu, sira dada ba tasi ibun. Depois ema tuur hodi halibur ikan diak iha raga sira, maibee ikan nebee aat sira soe tiha. 49Nunee mos bainhira tempu nee hotu ona. Anju sira sei mai, no haketak sira hosi ema loos sira nia leet. 50No anju sira sei soe ema aat sira ba fornu nebee lakan. Iha nebaa, sira sei tanis no ruun nehan.”
51Jesus husu ba sira, “Imi kompriende buat nee hotu ka?” Sira hataan ba Nia, “Sin.” 52Nunee Nia dehan ba sira, “Entaun eskriba#13:52 Eskriba nia servisu atu hakerek buat ruma, liu liu atu hakerek Maromak nia liafuan hodi halo kópi. Sira mos matenek kona ba Maromak nia liafuan no bele hanorin ema seluk. hotu nebee aprende ona kona ba reinu lalehan mak hanesan uma nain nebee lori sai buat sira nebee foun no tuan hosi ninia riku-soin.”
Profeta Nebee La Hetan Onra
53Bainhira Jesus foo sai tiha ai knanoik sira nee, Nia sai hosi fatin nebaa. 54Bainhira Nia too Ninia rai, Nia hanorin sira iha sira nia sinagoga. Ema sira nee hakfodak, no dehan, “Ema ida nee hetan matenek no kbiit nee hosi nebee? 55Laos Nia mak badaen ai nia oan mane ka? Laos Ninia inan mak Maria? No Ninia alin mane sira mak Tiago, José, Simão no Judas? 56No Ninia alin feto sira, laos sira hotu iha nee ho ita? Entaun mane ida nee hetan buat hirak nee hosi nebee?” 57No sira hanoin sala#13:57 Lian Gregu mak skandalidzo nebee iha relasaun ho lasu ida nebee ema sidi no hetan kastigu. tanba Nia. Maibee Jesus dehan ba sira, “Profeta ida sempre hetan onra, só iha ninia rai rasik no ninia iha uma rasik mak nia la hetan onra.” 58No Nia la halo milagre#13:58 Lian Gregu ‘hahalok ho kbiit’. barak iha nebaa tanba sira la fiar.
Currently Selected:
Mateus 13: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.