Josué 2
2
Josué Haruka Espiaun Baa Jerikó
1Hosi akampamentu iha Sitim, Josué haruka nonook espiaun nain rua, no dehan, “Baa haree di-diak rai iha nebaa, liu-liu ba sidade Jerikó.” Entaun sira baa, no sira tama ba iha feto aat ida#2:1 “feto aat” mak feto ho hahalok aat tanba sala seksuál. nia uma, feto nee naran Raab, no sira hela iha nebaa. 2No ema foo hatene ba liurai iha Jerikó, no dehan, “Tebes, iha kalan nee, ema nain rua hosi ema Israel sira mai hodi haree rai nee.” 3Entaun liurai Jerikó haruka ema baa Raab, no dehan, “Lori sai tiha ema sira nebee vizita o, no tama ba iha o nia uma laran nee, tanba sira mai hodi haree rai nee hotu.” 4Maibee Raab foti tiha ona mane rua nee no subar sira. Nia hataan, “Loos duni, ema balu mai iha hau nia uma, maibee hau la hatene sira mai hosi nebee. 5Bainhira iha oras taka portaun, no rai nakukun ona, mane sira nee sai ona. Hau la hatene sira baa nebee. Halai lalais, duni tuir sira, no imi bele hetan sira.” 6Maibee Raab lori tiha espiaun sira nee sae ba uma kakuluk nia leten no subar sira ho ai flaxu kain nebee nia aruma iha kakuluk leten.#2:6 Iha kultura nee sira habai ai kain ida naran “flaxu” iha uma leten hodi uza halo hena. 7Entaun liurai nia ema sira nee baa ona. Bainhira sira sai hosi sidade, ema taka tiha portaun sidade nian. Sira buka espiaun nain rua nee too iha fatin atu hakur Jordaun.
8Molok espiaun nain rua nee toba, Raab sae ba uma leten hodi hatete ba sira, 9“Hau hatene katak Nai foo rai nee ba imi. Ema hotu iha rai nee tauk tebe-tebes imi, no mos ema hotu nebee hela iha sira nia rai nebaa nabeen iha imi nia oin. 10Tanba ami rona ona kona ba oinsaa Nai halo maran Tasi Teberau#2:10 Ebreu yam suf, katak ‘tasi duut aas’. iha imi nia oin, bainhira imi sai hosi Ejitu. Ami mos rona oinsaa imi oho#2:10 Ebreu khoram. Tau ketak ba Maromak, signifika mak estraga ka oho hotu kedas. Seon ho Ogue, ema Amoreu sira nia liurai hosi Jordaun sorin ba. 11Bainhira ami rona liafuan nee, ami nia fuan laran nabeen,#2:11 “fuan laran nabeen” signifika katak sira tauk tebe-tebes. no mane sira nia espíritu halai lakon hotu tanba imi. Ema hotu-hotu iha nee sira nia brani lakon, tanba imi. Tanba Nai, imi nia Maromak, Nia mak Maromak iha lalehan iha leten no iha mundu iha okos. 12Nunee agora, favór ida, imi jura hodi Nai nia naran katak imi sei hatudu domin metin ba hau ho hau nia família sira, hanesan hau hatudu ona domin metin ba imi. Nee duni imi tenki foo sinál loos ida mai hau. 13Imi tenki promete katak imi sei la oho hau nia aman, hau nia inan, no buat hotu nebee sira nian, no imi sei salva ami hosi perigu atu mate nee.” 14Ema nain rua nee hataan, “Ami promete ho ami nia moris katak bainhira Nai entrega rai nee mai ami, mak ami sei hatudu domin metin no fidelidade ba imi, naran katak o la bele konta ba ema kona ba ami.”
15Tanba Raab nia uma harii iha moru sidade nian, no nia hela iha moru laran nee, entaun Raab hatuun ema nain rua nee ho tali hosi janela. 16Raab dehan ba sira nain rua “Imi baa tiha iha foho, hodi ema sira nebee duni imi la bele hetan imi. Subar iha nebaa iha loron tolu nia laran too sira fila, foin imi bele kontinua lao ba.” 17Mane rua nee hatete ba Raab, “Ami sei la simu sala kona ba juramentu nebee o husu ami jura nee. 18Só tebes, bainhira ami tama mai rai nee, o tenki kesi tali mean nee iha janela, iha fatin nebee o hatuun ami ba nee. O tenki halibur o nia inan-aman, o nia maun-alin sira, no o nia aman nia uma kain hotu iha o nia uma nee. 19Se ema ruma sai hosi uma nee, entaun ninia raan sei monu ba ninia ulun fatuk rasik. Ami la simu sala nee. Maibee see-see deit nebee hein ho o iha uma nee, se liman ida kona nia, nunee ninia raan monu ba ami nia ulun fatuk.#2:19 ‘raan monu ba ulun fatuk’ iha sentidu katak sira lori responsabilidade kona ba ema nia moris nee. 20No se o konta buat nebee ami halo nee, entaun ami sei sai hosi juramentu nebee o husu ami jura nee.” 21Raab hataan, “Husik buat nee tuir imi nia liafuan.” Depois sira baa. No Raab kesi tali mean iha janela nee.
22Mane sira nee sai ba no tama ba foho no hela iha nebaa too loron tolu, too ema nebee duni sira fila ona. Ema sira nebee duni sira buka ba-mai iha dalan hotu, maibee la hetan sira. 23Depois mane nain rua nee fila tuun hosi foho no hakur mota hodi fila ba Josué, oan hosi Nun. Sira nain rua konta buat hotu nebee sira hasoru. 24Depois sira hatete ba Josué, “Loos duni, Nai foo ona rai nee hotu mai ita nia liman. Tanba ema hotu nebee hela iha rai nebaa sai nabeen tanba ita.”
Copyright Kadi Timor. All rights reserved. Portions of scripture can be used without permission for the promotion of God's glory.