Isaias 2
2
Nai Nia Foho
1Liafuan nebee Isaias, Amoz nia oan, haree kona ba Judá no Jerusalém.
2Ida nee sei akontese iha tempu ikus,
foho nebee iha Nai nia uma,
Nia sei estabelese nudar foho aas liu,
hodi sai foho ida nebee aas liu foho sira seluk,
no nasaun hotu sei lao nadodon ba foho nee.
3Ema barak sei baa no hatete,
“Mai, ita sei sae ba Nai nia foho,
ba Jacó nia Maromak nia uma,
hodi Nia bele hanorin ita kona ba Ninia hahalok,
no ita bele lao iha Nia dalan.”
Tanba lei sei sai hosi Zion,
no Nai nia liafuan sei sai hosi Jerusalém.
4Nia sei tesi lia iha nasaun sira nia leet,
no Nia sei desidi bainhira povu barak diskuti malu;
no sira sei tuku sira nia surik atu halo fali ai suak,
no tuku dima atu halo fali sabit;
nasaun ida sei la foti tan surik atu hasoru nasaun seluk,
no sira sei la aprende tan atu halo funu.
5Oh Jacó nia família, mai,
mai ita lao iha Nai nia naroman.
Nai Nia Loron
6O husik ona Jacó nia família,
tanba sira nakonu ho sasaan hosi rai lorosae,
no buan sira hanesan ema Filisteu sira,
no sira kaer liman ho estranjeiru sira nia oan sira.
7Sira nia rai mos nakonu ho osan mutin no osan mean,
sira nia riku-soin la iha rohan;
sira nia rai nakonu ho kuda,
sira nia kuda kareta barak too rohan la iha.#2:7 Haree lei iha Deut. 17:16-17, nebee Nai bandu riku-soin no kuda barak.
8Sira nia rai mos nakonu ho ídulu sira;
sira hakneak ba buat nebee sira halo ho sira nia liman rasik,
ba buat nebee sira halo ho sira nia liman fuan.
9Ema nee haraik aan,
ida-idak tuun –
keta foo perdaun ba sira!
10Tama ba fatuk kuak,
subar iha rai rahun,
tanba imi tauk Nai,
no Ninia glória nebee makaas.
11Sira nebee hateke hanesan ema boot sei sai ema kiik,
sira nebee hanoin aan deit tenki haraik aan,
no Nai deit sei sae aas iha loron nebaa.
12Tanba Nai Forsa Nain nia loron
sei hasoru ema hotu nebee gaba aan no loko aan,
no hasoru buat hotu nebee foti aan, no sira sei monu tuun;
13no hasoru ai teka#2:13 Ai mean nebee iha folin diak no uza katak ai teka (Portugés: cedro) hotu iha Líbanon,
nebee sae aas tebes,
no hasoru ai huun boot#2:13 Ai huun boot no metin iha rai (Portugés: carvalho) hotu iha Basan;
14no hasoru foho boot hotu nebee aas,
no hasoru foho oan hotu nebee foti aan;
15no hasoru uma aas hotu,
no hasoru moru metin hotu;
16no hasoru roo boot hotu hosi Tarsis,
no hasoru roo hotu nebee furak.
17Sira nebee gaba aan sei hakneak,
no sira nebee foti aan tenki tuun,
no Nai deit sei sai aas iha loron nebaa.
18Ídulu hotu sei lakon mohu.
19No ema sei tama fatuk kuak,
no sira sei tama ba rai rahun, tanba sira tauk Nai,
no Ninia glória nebee makaas,
bainhira Nia hamriik hodi halo mundu tauk.
20Iha loron nee ema sira sei soe
sira nia ídulu osan mutin no sira nia ídulu osan mean,
nebee sira halo hodi adora,
sira soe ba laho#2:20 Animal ida nebee hela iha rai kuak kiik. no ba niki,
21hodi tama ba fatuk kuak,
no subar iha fatuk lolon,
tanba sira tauk Nai,
no Ninia glória nebee makaas,
bainhira Nia hamriik hodi halo mundu tauk.
22Lalika hanoin tan ema,
ida nebee dada iis iha nia inus kuak,
nia iha folin saida?
Copyright Kadi Timor. All rights reserved. Portions of scripture can be used without permission for the promotion of God's glory.