Oseias 2
2
Israel La Fiel
1“Bolu imi nia maun-alin sira ‘Ami,’ no imi nia feton sira ‘Ruhama.’#2:1 ‘Ami’ katak ‘hau nia povu’, no ‘Ruhama’ katak ‘laran luak’. Kompara ho 1:6,9.
2Foti kazu kontra imi nia inan, foti kazu ba,
tanba nia laos Hau nia feen,
no Hau laos ninia laen.
Husik nia hasai hosi ninia oin sinál prostituisaun nian,
no hosi ninia susu klaran sala adultériu.
3Se nia la halo nunee, Hau sei husik nia molik
hanesan iha loron nebee nia moris mai;
Hau sei halo nia sai rai fuik ida,
no sai rai maran ida,
no Hau sei halo nia hamrook too mate.
4Hau sei la hatudu laran luak ba ninia oan sira,
tanba sira oan hosi sala foer.
5Sira nia inan halo sala foer;
nia sai isin rua ba oan sira nee liu hosi hahalok moe nian.
Tanba nia hatete, ‘Hau sei baa buka hau nia doben sira,
nebee foo mai hau hahaan no bee,
bibi malae fulun no linhu, mina no tua uvas.’
6Tanba nunee mak Hau sei taka ninia dalan ho ai-tarak;
Hau sei harii moru ida hodi kontra nia,
hodi nunee nia la hetan ninia dalan.
7Nia sei halai tuir ninia doben sira,
maibee sei la toman sira;
nia sei buka sira,
maibee sei la hetan.
Entaun, nia sei dehan:
‘Hau sei fila fali ba hau nia laen ida primeiru,
tanba iha tempu nebaa hau nia moris diak liu fali ohin loron.’
8Nia la rekonhese katak Hau mak foo
trigu, tua uvas no mina ba nia,
no halo ninia osan mean no osan mutin aumenta barak,
nebee ikus fali nia uza ba Baal.
9Tanba nunee mak Hau sei foti fali
Hau nia trigu iha tempu trigu nian,
no Hau nia tua uvas bainhira nia prontu ona.
Hau sei hasai hosi nia Hau nia bibi malae fulun no Hau nia linhu,
nebee nia uza hodi taka ninia isin tanan.
10Agora Hau sei hatudu sai ninia oin lulik
iha ninia doben sira nia oin,
no ema ida sei la bele salva nia hosi Hau nia liman.
11Hau sei hapara ninia haksolok,
ninia festa sira, ninia festa fulan foun nian,
ninia loron Sabdu sira, no ninia festa sira hotu.
12Hau sei estraga ninia uvas huun no ai figeira sira,
nebee nia dehan,
‘Nee mak hau nia kolen
nebee hau simu hosi hau nia doben sira.’
Hau sei halo sira sai ai laran ida,
nebee animál fuik sira sei haan hotu.
13Hau sei kastigu nia tanba loron sira nebee nia oferese insensu ba Baal sira,
bainhira nia tunu motuk oferta ba sira,
no nia hafurak aan ho kadeli no buat murak sira
no baa buka tuir ninia doben sira,
no nia haluha Hau,” hatete Nai.
Nai Nia Laran Luak
14“Nunee tebes, Hau sei dada ninia atensaun mai Hau,
no Hau sei lori nia ba rai fuik
no Hau sei koalia mamar ho nia.
15Iha nebaa Hau sei foo fila fali ninia toos uvas sira,
no Hau sei halo Rai Tetuk Akor sai odamatan esperansa nian.
Iha nebaa nia sei hataan Hau hanesan iha tempu nebee nia foin sae,
hanesan iha tempu nebee nia sai hosi rai Ejitu.
16“No iha loron nebaa,” hatete Nai, “o sei bolu Hau ‘Hau nia Laen.’ O sei la bolu tan Hau ‘Hau nia Baal.’ 17Tanba Hau sei hasai hosi o nia ibun Baal sira nia naran sira, no o sei la hanoin tan naran sira nee. 18Iha loron nebaa, hau sei halo akordu ida ho animál fuik sira hosi ai laran no ho manu sira nebee semo iha lalehan, no mos ho animál sira nebee dolar iha rai. Hau sei halakon rama inan, surik no funu hosi rai nee, no Hau sei halo o toba hakmatek. 19Hau sei kaben ho o ba nafatin. Hau sei kaben ho o tuir buat loos no justu, ho domin metin no laran luak. 20Hau sei kaben ho o ho fidelidade, no o sei konhese Nai.
21“Iha loron nebaa, Hau sei hataan,” hatete Nai,
“Hau sei hataan ba lalehan,
no lalehan sei hataan ba rai,
22no rai sei hataan ba batar, ba tua uvas no ba mina,
no sira sei hataan ba Jezreel.#2:22 Jezreel katak ‘Maromak mak kuda’.
23Hau sei kuda nia ba Hau rasik iha rai nee.
Hau sei hatudu laran luak ba Lo-Ruhama.
Hau sei hatete ba ida nebee Hau bolu Lo-Ami,
‘O mak Hau nia povu,’
no nia sei dehan,
“O mak hau nia Maromak.”#2:23 Lo-Ruhama katak ‘la iha laran luak. Lo-Ami katak ‘laos hau nia povu’. Haree 1:6,9, no Roma 9:25.
Currently Selected:
Oseias 2: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.