Ester 9
9
Ema Judeu Halakon Sira Nia Inimigu
1Iha fulan ba dala sanulu resin rua, nebee fulan Adar, iha loron ba dala sanulu resin tolu, loron ida nebee ema Judeu sira nia inimigu espera atu domina sira, inimigu sira nee prepara atu kumpri liurai nia orden. Maibee planu nee troka - ema Judeu sira konsege domina fali ema nebee odi sira. 2Nunee ema Judeu sira halibur aan iha sira nia sidade sira iha liurai Asueru nia distritu hotu hodi ataka ema nebee buka atu halo aat ba sira. No la iha ema ida nebee bele hamriik hasoru sira. Tanba povu hotu sai tauk ba sira. 3Xefi hotu-hotu iha distritu sira, no administradór sira, governadór sira no funsionáriu sira hosi liurai ajuda ema Judeu sira. Tanba sira tauk Mordekai. 4Tanba Mordekai mak boot iha liurai nia uma, no ninia konhesimentu baa too iha distritu hotu tanba nia sai forti liu tan. 5Nunee ema Judeu sira ataka sira nia inimigu hotu ho surik, no sira oho no halakon ema sira nee. Sira halo tuir sira nia hakarak ba ema sira nebee odi sira. 6Iha kapitál Susan, ema Judeu sira oho no halakon ema nain atus lima. 7Sira oho mos Parsandata, Dalfon, Aspata, 8Porata, Adalia, Aridata, 9Parmasta, Arisai, Aridai no Vaizata, 10nebee oan mane nain sanulu hosi Haman, oan hosi Hamedata, nebee inimigu ba ema Judeu sira. Maibee sira la hadau ema sira nee nia riku-soin.
11Iha loron nebaa, ema foo hatene ba liurai kona ba ema nain hira nebee mate iha kapitál Susan. 12Liurai dehan ba liurai feto Ester, “Ema Judeu sira oho no halakon ema nain atus lima iha kapitál Susan, inklui mos Haman nia oan mane nain sanulu. Nunee sira konsege halo saida iha liurai nia distritu sira seluk? Agora, o hakarak saida? Tanba o sei hetan. No o husu saida tan? Tanba ema bele halo tuir. 13Ester dehan, “Se liurai kontenti, husik ema Judeu sira nebee iha Susan bele halo tuir orden nee aban hanesan sira halo tuir ohin loron. No husik ema tara Haman nia oan mane nain sanulu iha ai riin aas.” 14Entaun liurai foo orden hodi halo tuir liafuan nee. Ema foo sai orden nee iha Susan no sira tara mate Haman nia oan mane nain sanulu. 15Ema Judeu sira nebee iha Susan halibur hamutuk mos iha loron ba dala sanulu resin haat, iha fulan Adar, no oho ema nain atus tolu iha Susan. Maibee sira la hadau ema sira nee nia riku-soin.
16Ema Judeu sira nebee iha liurai nia distritu sira seluk halibur hamutuk no hamriik hodi defende sira nia moris. Sira hetan deskansa hosi sira nia inimigu sira. Sira oho inimigu nain rihun hitu-nulu resin lima (75.000), maibee sira la hadau ema nee nia riku-soin. 17Sira halo nunee iha loron sanulu resin tolu, iha fulan Adar, no iha loron sanulu resin haat sira deskansa no halo loron nee sai nudar loron festa no haksolok nian. 18Maibee ema Judeu sira nebee iha Susan halibur hamutuk iha loron ba dala sanulu resin tolu no sanulu resin haat. Depois iha loron ba dala sanulu resin lima sira deskansa no halo loron nee sai nudar loron festa no haksolok nian. 19Nunee ema Judeu iha aldeia sira, nebee hela iha fatin nebee moru la iha, halo loron haksolok no festa nian iha loron ba dala sanulu resin haat iha fulan Adar, no loron nee diak nebee bele haruka prezenti ba malu.
Loron Boot Purim
20Mordekai hakerek buat nebee akontese nee no haruka surat sira ba ema Judeu sira hotu nebee iha liurai Asueru nia distritu hotu, inklui distritu besik no dook. 21Nia haruka sira selebra loron nee iha sira nia leet. No tinan-tinan sira bele halo loron boot iha loron ba dala sanulu resin haat iha fulan Adar, no mos iha loron ba dala sanulu resin lima. 22Sira bele halo nunee tanba loron nebee sira deskansa hosi sira nia inimigu sira. Tanba iha fulan nee, sira troka hosi laran tristi ba laran haksolok, no loron tanis ba loron diak. Sira bele halo loron nee sai loron festa no haksolok nian, hodi haruka hahaan ba malu no foo prezenti ba ema kiak sira.
23No ema Judeu sira hataan atu kontinua halo buat nebee sira hahuu nee, nebee Mordekai hakerek ba sira. 24Tanba Haman, oan hosi Hamedata, ema Agag, no inimigu ba ema Judeu hotu, halo planu hasoru ema Judeu sira atu halakon sira. No sira soe Pur, nebee dada rifa, hodi duni sira no halakon sira. 25Maibee bainhira liurai hatene kona ba planu nee, nia foo orden liu hosi surat sira katak Haman nia planu aat nebee nia halo hodi hasoru ema Judeu sira, sei fila fali ba ninia ulun. Nunee sira tara mate Haman no ninia oan mane sira iha ai riin aas. 26Tanba nee sira hanaran loron sira nee ‘Purim’ hosi naran ‘Pur’. Nunee, tanba liafuan hotu nebee Mordekai hakerek iha surat nee, no buat hotu nebee sira hasoru kona ba asuntu nee, nebee akontese ba sira, 27ema Judeu sira desidi metin katak sira, no sira nia oan sira, no ema hotu nebee liga aan ba sira, la bele falta atu halao loron rua nee tinan-tinan. Sira sei tuir liafuan nebee sira hakerek no tuir tempu komemora nee. 28No sira tenki hanoin no halo tuir loron sira nee iha jerasaun ida-idak, família ida-idak, distritu ida-idak no sidade ida-idak. Loron Purim sira nee la bele para iha ema Judeu sira nia leet, no sira nia bei-oan sira la bele haluha tempu nee.
29Depois liurai feto Ester, oan feto hosi Abihail, no Mordekai nebee ema Judeu, hakerek ho autoridade kompletu hodi konfirma surat segundu nee kona ba Purim. 30Nia haruka surat sira ba ema Judeu hotu, nebee iha distritu atus ida rua-nulu resin hitu iha reinu Asueru nian, ho liafuan dame no lia loos. 31Nia konfirma loron Purim sira tuir sira nia tempu, no tuir orden hosi Mordekai, ema Judeu nee, no liurai feto Ester. Sira halo orden nee ba ema Judeu sira no sira nia bei-oan sira kona ba sira nia jejún no lamentasaun. 32Ester konfirma asuntu Purim nian no ema hakerek iha livru.
Copyright Kadi Timor. All rights reserved. Portions of scripture can be used without permission for the promotion of God's glory.