Ester 3
3
Haman Halo Planu Hasoru Ema Judeu
1Liu tiha nee, Asueru promove Haman, oan hosi Hamedata, nebee ema Agag. Liurai foti sae nia no tau ninia kadeira aas liu xefi sira seluk nebee hamutuk ho nia. 2Liurai nia atan sira hotu nebee iha liurai nia portaun hakneak no hakruuk ba Haman. Tanba liurai haruka sira halo hanesan nee ba nia. Maibee Mordekai la hakneak no la hakruuk ba nia. 3Entaun liurai nia atan sira, nebee iha liurai nia portaun, dehan ba Mordekai, “Tanba saa mak ita kontra liurai nia orden?” 4Sira koalia loro-loron ba nia no nia la rona tuir sira. Tuir mai, sira foo hatene ba Haman hodi haree saida mak akontese ba Mordekai. Tanba nia foo hatene ba sira katak nia mak ema Judeu. 5Bainhira Haman haree katak Mordekai la hakneak no nia la hakruuk, Haman sai hirus makaas. 6Nia hanoin katak la too atu ataka Mordekai mesak deit tanba sira foo hatene kona ba Mordekai nia povu. Nunee Haman hanoin atu halakon ema Judeu hotu nebee iha Asueru nia reinu tomak, tanba sira mak Mordekai nia povu.
7Iha fulan primeiru, nebee fulan Nisan, iha tinan ba dala sanulu resin rua iha liurai Asueru nia reinu, sira dada Pur,#3:7 ‘dada Pur’ nee mak sistema ida nebee sira uza hodi siik hodi hatene buat ruma. nebee dada rifa, kona ba Mordekai. Sira dada rifa ba loron ida-idak no ba fulan ida-idak, too fulan sanulu resin rua, nebee fulan Adar. 8Haman dehan ba liurai Asueru, “Ita iha povu ida nebee namkari no fahe iha povu nia leet iha distritu hotu iha ita boot nia reinu. Sira iha lei nebee la hanesan ho povu hotu. No sira la halo tuir liurai nia lei. Nunee liurai la hetan benefísiu hodi tahan sira. 9Se liurai kontenti, husik ema hakerek orden atu halakon sira. No hau sei selu osan mutin tonelada atus tolu lima-nulu (350t) ba sira nebee tau matan ba liurai nia riku-soin, hodi hatama ba liurai nia tezourária. 10Entaun liurai hasai ninia kadeli hosi ninia liman no foo ba Haman, oan hosi Hamedata, ema Agag, nebee ema Judeu sira nia inimigu. 11Liurai dehan ba Haman, “Osan mutin nee hau foo ba o, no povu mos, hodi halo tuir o nia hakarak.”
12Depois ema bolu liurai nia eskriba sira iha loron sanulu resin tolu iha fulan primeiru. Sira hakerek buat hotu nebee Haman manda ba liurai nia administradór sira no governadór sira nebee toma konta ba distritu hotu, no ba povu nia xefi hotu iha distritu hotu, tuir metodu nebee sira hakerek no tuir povu hotu nia lian. Sira hakerek hodi liurai Asueru nia naran no taka ho liurai nia kadeli nudar karimbu.#3:12 Iha tempu antigu sira uza kadeli nudar karimbu. Haree Jénesis 41:42. 13Sira haruka surat sira nee liu hosi manu-ain sira ba liurai nia distritu hotu hodi destrui, oho no halakon ema Judeu hotu, labarik no katuas, kiik-oan no feto, iha loron ida deit nebee iha loron ba dala sanulu resin tolu iha fulan sanulu resin rua, nebee fulan Adar, no bele hadau sira nia riku-soin. 14Ema halo kópia hosi dokumentu nebee foo orden ba povu hotu iha distritu ida-idak hodi sira bele prepara aan ba loron ida nee. 15Manu-ain sira sai ba, no sira baa lalais tanba sira lori liurai nia orden. No sira foo sai orden nee iha kapitál Susan. Depois liurai no Haman tuur hamutuk hodi hemu. Maibee sidade Susan nee sai konfuzaun.
Currently Selected:
Ester 3: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.