Ester 2
2
Ester Sai Liurai Feto
1Liu tiha nee, bainhira liurai Asueru nia laran hirus tuun ona, nia hanoin hetan Wasti no buat nebee feto nee halo, no orden nebee nia foo sai hasoru Wasti. 2Depois liurai nia atan sira nebee serví nia dehan, “Husik ema buka feto klosan nebee bonita ba liurai. 3Husik liurai hili funsionáriu sira iha distritu hotu iha ninia reinu, hodi sira bele halibur feto klosan hotu nebee bonita no lori ba kapitál Susan. Feto sira nee bele tama ba uma feto nian, ho Hegai, liurai nia ministru nebee kuidadu feto sira. No husik nia foo feto nia ai morin ba sira. 4No feto ida nebee halo liurai kontenti bele sai liurai feto troka Wasti.” Liurai kontenti ho planu nee no nia halo tuir.
5Iha kapitál Susan, iha ema Judeu ida naran Mordekai, oan hosi Jair, oan hosi Simei, oan hosi Kis, nebee ema Benjamin ida. 6Nia mak ema ida nebee sira lori ba kastigu hosi Jerusalém hamutuk ho sira seluk nebee ema kastigu. Sira lori nia iha tempu nebee Nabukodonozor, liurai hosi Babilónia lori Joakim,#2:6 Ebreu Jekonias, nebee Joakim nia naran seluk. liurai hosi Judá. 7Mordekai hakiak Hadasa, nebee Ester, ninia tiu nia oan feto, tanba Ester la iha inan-aman. No feto nee mak oin bonita no isin diak. Bainhira ninia inan-aman mate, Mordekai foti nia nudar ninia oan feto. 8Bainhira ema rona liurai nia ukun fuan no ninia orden, sira halibur hamutuk feto klosan barak ba kapitál Susan, hodi Hegai bele tau matan ba sira. Nunee sira lori mos Ester ba liurai nia uma, hodi Hegai bele tau matan ba nia nebee kuidadu feto sira. 9Nia halo Hegai kontenti. Nunee Hegai hatudu domin metin ba Ester. Hegai foo lalais ai morin ba Ester, buat nebee nia presiza, no feto nain hitu hosi liurai nia uma hodi ajuda nia. No Hegai tau nia no ninia ajudante feto sira nee iha fatin nebee diak liu iha uma feto nian. 10Ester la foo hatene kona ba ninia povu ka ninia família tanba Mordekai haruka nia la bele foo hatene. 11Mordekai loro-loron lao iha uma feto nia fatin nia oin hodi hatene Ester nee oinsaa no saida mak akontese ba nia.
12Feto ida-idak troka malu hodi tama ba liurai Asueru. Maibee molok nee, feto sira gasta fulan sanulu resin rua, tuir kostumi feto nian. Tanba sira haan tempu nee hodi halo aan bonita. Sira uza mina mira too fulan neen no mina morin ho buat seluk too fulan neen hodi sai bonita. 13Depois feto nee bele tama ba liurai. Sira foo saida deit nebee feto hakarak lori hosi uma feto nian ba uma liurai nian. 14Nia tama uma liurai iha rai nakaras no aban fali nia fila ba uma feto segundu nian. No Saasgaz, nebee liurai nia ministru, tau matan ba sira tanba nia toma konta kona ba feto sira nee. No feto nee la bele tama fali ba liurai, só deit se liurai kontenti ho nia no bolu nia ho ninia naran.
15No Ester nia tempu mai. Nia mak oan hosi Abihail, Mordekai nia tiu. Mordekai foti nia nudar ninia oan feto. Bainhira nia tempu mai atu tama, nia la husu buat ida, só deit buat nebee Hegai mak hili, liurai nia ministru nebee tau matan ba feto sira nee. No Ester hetan grasa iha ema hotu nia oin nebee haree nia. 16Nunee sira lori Ester ba liurai Asueru hodi tama ba ninia palásiu liurai nian iha fulan sanulu, nebee fulan Tebet, iha tinan ba dala hitu iha liurai nia reinu. 17Liurai hadomi Ester liu fali feto hotu, no Ester hetan grasa no domin metin iha liurai nia oin liu fali feto klosan hotu. Nunee liurai tau koroa liurai nian iha ninia ulun no halo nia sai liurai feto troka Wasti. 18Depois liurai halo festa boot ba ninia xefi no atan sira hotu, nebee festa kona ba Ester. Nia husik distritu sira la presiza selu taxa no nia foo prezenti tuir ninia riku-soin.
Mordekai Deskobre Planu Atu Oho Liurai
19Bainhira ema halibur feto sira ba dala rua nee, Mordekai tuur iha liurai nia portaun. 20Ester la foo hatene kona ba ninia família ka ninia povu tuir Mordekai nia orden. Tanba Ester tuir Mordekai nia liafuan hanesan uluk iha tempu nebee Mordekai hakiak nia. 21Iha tempu nebaa, liurai nia ministru rua, Bigtana no Teres, nebee hein odamatan, sai hirus no buka atu ataka liurai Asueru. 22Mordekai deskobre planu nee no foo hatene ba liurai feto Ester. Ester foo hatene fali ba liurai hodi Mordekai nia naran. 23Bainhira sira halo investigasaun ba asuntu nee, sira deskobre planu nee. Nunee sira tara mate ministru nain rua nee iha ai riin. Ema hakerek buat nebee akontese nee iha livru krónikas nian iha liurai nia oin.
Currently Selected:
Ester 2: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.