Looma 10
10
1Bampaangi, ma nyitiisila me kunsa mutima waami, na mu lusaambulu lwaami kuri Nzaambi mu bo, kuri ti baba babvuukusu. 2Bukuri, me nyita kimbaangi mu bo ti, bari na kuheme mu Nzaambi, ngo bahele na nyaabulu. 3Mukwongo, bu bahele kuyaaba nsungumunu ya Nzaambi, na bakwesaka kusalila nsungumunu ya bo-meene, lo bahele kuba batumuma mu nsungumunu ya Nzaambi. 4Bukuri Kiristo ngo nsukulu ya mangisi, mu ntoono nsungumunu, ya mpisi wunde wusa kanyi.
Mvuukulu yiri kuri mpisi wunde, wasa kanyi mu Mfumu
5Mukwongo, Moose watina mu mitariri nsungumunu ya mangisi ti : « Muutu wumasalila, sa kaba mwooyo mu mo. » 6Ngo, nsungumunu mu kanyi yiri mu kuleele bumabu : « Yaa leele mu mutima waaku ko ti : Na wunde wunwaata ku yulu ? » Mbangukulu lo ti : Mu kusundula Kiristo. 7Bunu pele : « Na wusunduka ku nsi ya bafwa ? » Mbangukulu lo ti : Mu kutoombolo Kiristo mu bafwa. 8Ngo nki diri mu kuleele ? « Maampu mari bebele na ye, mari munsa munwa waaku, na munsa mutima waaku. » Mamo ngo maampu ma kanyi, maturi mu kweyaabisa. 9Mbuti ye leeriri mu munwa waaku, ti Yisu ngo Mfumu, na siiriri kanyi mu mutima waaku, ti Nzaambi wamufulukisa mu bafwa, lo ye sa bvuuka. 10Mukwongo, mu mutima bakoosiilaa kanyi mu kubaka nsungumunu, na mu munwa bakootambukilaa mu kubaka mvuukulu. 11Matinu maleele ti : « Mpisi wunde wusiila kanyi mu nde, lo kafwa nsoni ko. » 12Mukwongo, kwahele nsobokoso ha kakati dya Muyudayo na Mungereke. Bukuri bobanso Mfumu mosi, wuri kisina kuri bobanso bakoomuteelaa mbila. 13Bukuri mpisi wunde wuteele nkuumbu ya mfumu, lo sa kaba kabvuuka.
14Ngo dyaburi bateelele wunde wuri bahele kumusiila kanyi ? Dyaburi basiila kanyi mu wunde, wuri bahele kuyuka badzoonsolo mu nde ? Dyaburi bayukila, mbuti kwahele wuyaabisa ? 15Na buri bayabisila, mbuti bahele kubaheeke ? Bunu bu diri dyatinu ti : Miri myamibwete, miilu mya babo bakweyaabisa misamu myamibwete !
16Ngo, bobanso bahele kutumuma mu Musamu Wamubwete. Mukwongo, bunu buleele Esayi ti : Mfumu, na wasiiriri kanyi, mu ma kayukiri kuri beetu ? 17Hango, kanyi difumunaa mu mi bayukaa, na mi bayukaa mu maampu ma Kiristo.
18Kasi me nyifuula ti : Buri basii kuyuka ko ? Hein-hein bayukiri kwaandi !
Mbeembu bo yayukukuna mu nsi yansiina,
na maampu ma bo matubuka natee mwasukuna butoto.
19Kasi me nyifuula ti : Buri Iselili wuri kasii bakula ko ? Moose ngo watete mu kuleele ti :
« Me sa nyalusa bangaa-bukwa, mu babo bahele kuba kaanda ;
me sa nyalubakisa nkesi, mu kaanda dyahele na nyukulu. »
20Esayi se wutsiitsa kuleele ti :
« Babo bari bahele kwesaka me, banzuukiri ;
na me nyamonikini kuri babo bari bahele kwemfuula. »
21Ngo kuri Iselili nde wuleele ti :
« Mpisi kiluumbu, me nyalaamburi myooko myaami,
kuri baatu bari na nko, na bari na tungu. »
Currently Selected:
Looma 10: ATBABC
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique du Congo 2024