Mankuma 26
26
Mu ntoono madzuba
1Maampa makituka tari mu kyoosi basuusiri ha mwiini, bumosi mvula mu ntaangu ya ntolulu byandya,
byafwanikina na lukiinsu lubaheeri kuri kilawuku.
2Bunu noni yipatikiri, bunu lubebendu ludumukini,
bubwo buri mpopi kwahele kooti.
3Kikoti kuri kabvaalu, kiletusulu kuri mpuunda,
luboto ha mbisa bilawuku.
4Yaa ha mvutu kuri kilawuku ko, bunu buri bulawuki bwaandi,
mu kubata ti ye wukwiisa kufwanikina na nde, ye se.
5Ha mvutu kuri dzeeke, bunu buri budzeeke bwaandi,
mu kubata ti kakwiisa kumonoko ngaa-madyeele ha miisu myaandi.
6Wunde wuhololo kiwulu bunu ntumi,
wafwanikina na muutu wutabiri miilu myaandi na kunyiima bubi.
7Miilu mya mubeeru miilu myahele kukuma ;
bumosi Mankuma mu munwa bilawuku.
8Kuha lukiinsu kuri kilawuku,
luri bunu bakaangiri tari ha muti lasa.
9Lunseende lumenaa ha yulu kikaayi kya yaa-kinwi,
bunubwo buri mu Mankuma mu minwa mya biwulu.
10Mukuutu wuholo bobanso baluta
bunu pele kiwulu mu kisalu, wuholo, wuri na bubayi kakoonini kuba na bubayi ko.
11Bunu mbwa yibvutukiri mu kudya biluku byaandi,
bunu dzeeke dibvutukiri mu budzeeke bwaandi.
12Ye wumonaana muutu wutsima ti nde ngaa-madyeele,
lo yaaba ti, bubvuriri bubwe mu kusa nsiitu mu kilawuku ti na mu muutu wunde.
Kinzelu kya mubolo
13Mubolo ti : « Kweki kibulu kyansisi ha nzila,
kweki nkosi mu mahaambu. »
14Mweelu wusyeetikaa muri bikaangulu,
mubolo kulumukaana ha yulu mbuka.
15Mubolo wasoko kooko kwaandi mu lukoombo,
waholo bito mu kubvuuta kwo na munwa waandi.
16Mubolo wumonoko ngaa-madyeele ha miisu myaandi,
ti na baatu nsaamu bari na nyaabulu.
Mankuma makimi
17Wunde wukoto mu yumu dya ŋani,
wafwanikina na wunde wukwaata mbwa yiluta mu makutu.
18Bunu wunde wuri mu kusa bulawuki, wuheeke mile mya mbaawu,
mbasi dza nsyaari na lufwa,
19bubwo buri muutu wuwuna mpaangi yaandi,
tumi kamuleele ti : « Me kusakana kwaami ? »
20Mbaawu kudzima, bitsootso biheriri ;
habaanaa wufutukila dzuunini, mayumu mawiiri.
21Madzima ha yulu makeengele mambaawu, bitsootso mu ntoono mbaawu,
bubwo buri ngaa-mayumu hansa baatu.
22Mumfutukila wuri bunu byandya byabibwete,
biri bu bisundukiri mu mwooyo, byeensi mu binamu.
23Bisesengu byamboongo, byanamukusu mu kisa,
biri bunu bibori bya mbaawu na mutima bubi.
24Mu bibori byaandi, wuri na lubelu wusweemaa.
Nde wusuusa munsa nde mawunu.
25Ntaangu yikadzoonsaa nde mu madyeele, yaa wumusiila kiminu ko :
Mampeeve nsaamu ma ngaansi mari munsa mutima waandi.
26Lubelu lwaandi lwafuka mu bumpitu-bumpyoongo,
bubi bwaandi sa bwamonokono kuri baatu.
27Wunde wuhaka bulu wubwaanaa mu dyo.
Muti wubvutukilaa mukwaangi.
28Ludimu lwampya lwabele bakalemesaa ;
munwa wa luloombo lutwaala nsyamukunu.
Currently Selected:
Mankuma 26: ATBABC
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique du Congo 2024