Lutaangu 35
35
Mabvula ma Baleevi
1Yaave wadzoonso kuri Moose ku bibiti bya Mohabi, bebele na Yeriko, wamuleele ti : 2« Yaabisa kuri baala ba Iselili, baha kuri Baleevi, ndaambu saala dya mu mabvula ma bo, mpisi badzakala#35.2 Kufwanikisa Bal 25.32-34 ; Yos 21.1-42 ; 1 Mp 6.39-66.. Babaha se bibiti biri bebele na mabvula maaku mu kudiisila bibulu. 3Bo sa baba na mabvula makudzakala ; bibiti mu ntoono bibulu byaaku, na bitotolo byaaku na mu ntoono bibulu byaaku. 4Bibiti bya mabvula mamo biluha kuri Baleevi, bi baandika ku kibaka kya bvula natee ku mambisa, fuunda dya mankwaanga mu bula. 5Beenu sa lwateese ku mambisa ma bvula, mankwaanga 2 000 ku mpele ya esete, 2 000 ku mpele ya suude, 2 000 ku mpele ya wesete, na 2 000 ku mpele ya noode. Bvula sa dyaba ha kakati. Bubwo buba mandilu ma mabvula maaku. 6Mu mabvula maluha kuri Baleevi, sa lwaha mabvula masaamunu ma kusweemene kuri lo mudzusi#35.6 Kumono 35.9-34. yitikiri, na makuumi mana na moolo makaka. 7Mabvula momanso ma luha kuri Baleevi sa maba makuumi mana na mpoomo, na bibiti byaaku. 8Mabvula ma luha kuri Baleevi, mu mansi ma baala ba Iselili, sa lwa mabvulusa kuri bari na saala dyalaka, na sa lwa makulula kuri bari na saala dyantele. »
Mabvula ma kusweemene
9Yaave wadzoonso kuri Moose na waleele ti : 10Yaabisa baala ba Iselili, baleele ti : Mu ntaangu yi lusabuka Yorodaani mu kweende ku nsi ya Kanaana, 11sa lwasoolo mabvula meenu ma kusweemene. Sa maba mabvula masweeminaa baatu badzusaa baatu kwahele kuŋanikisa#35.11 Kufwanikisa Ngi 4.41-43 ; 19.1-13 ; Yos 20.1-9.. 12Mabvula mamo sa maba bisweemunu kuri beenu mu kuyitika batiiriri kubvutula kitete#35.12 Mu Mba 9.6 ; Mpa 21.23-25 ; Bal 24.19-21 ; Ngi 19.21, lufwa lwa muutu lwabateelaa lufwa lwa muutu wumudzusiri ; mwisi-kaanda wuri bebele na wufwiiri waba na miswa mu kubvutula kitete kya nyoombo mu kudzusa mudzusi.; bubwo mudzusi ka katsiisa kufwa ko tekesele bamutsuundisa ha mankula ma kaanda. 13Mu mabvula ma luha, masaamunu sa maba kuri beenu, mabvula ma kusweemene ; 14mabvula matatu sa luha mu simu dya Yorodaani dyakaka, na matatu ku nsi ya Kanaana. Sa maba mabvula ma kusweemene. 15Mu baala ba Iselili na mu banzeense bari ha kakati dya beenu, mabvula mo masaamunu sa maba buni kisweemunu kiyitika wunde wadzusiri muutu kwahele kuŋanikisa.
16Mbuti kiseengu kaleti, ngo muutu kafwiiri, lo muutu wunde mudzusi, nde se bayelemini kumudzusa. 17Mbuti tari diri ha kooko kaleti, ngo muutu kafwiiri, lo muutu wunde mudzusi, nde se bayelemini kumudzusa. 18Bunu pele kitsootso kaleti, ngo muutu kafwiiri mu kyo, lo muutu wunde mudzusi, nde se bayelemini kumudzusa. 19Wunde wubvutula kitete sa kadzusa mudzusi. Ntaangu yi kabwaana nde lo yelemini kumudzusa. 20Mbuti mu mutima bubi kadyeeti muutu, bunu pele kitotolo kamuleti mu kabala, ngo muutu kafwiiri, 21bunu pele mu nkesi kaleti nguutu mu muutu, ngo muutu kafwiiri, lo sa badzusa wunde wuleti, bukuri nde mudzusi. Wunde wubvutula kitete sa kadzusa mudzusi mu ntaangu yi kamubwaana.
22Ngo mbuti muutu dzusiri mbaasi mu kinkuma, kwahele mankesi, mbuti wumuheekiri kitotolo kwahele kuŋanikisa, 23bunu pele, kwahele kumono, wumuleti tari dibakiri mu nde, ngo muutu kafwiiri, kwahele kooti, bunu pele kwahele kuŋanikisa, 24lo kaanda sa dyatsuundisa ha kakati dya wudzusiri na wutiiri kubvutula kitete, bunu buri mikele mitala musamu wabubwo. 25Kaanda sa dyakuula mudzusi mu myooko mya wubvutula kitete, na sa bamubvutula ku bvula dya kusweeme ku kayitikiri.
Sa kadzakala ku bvula didyo natee lufwa lwa ngaanga-Nzaambi yayikuutu yibakusiri maasi mangisi. 26Ngo mbuti mudzusi tiiri kupala mu nkoonsi ya bvula di kayitikiri mu kusweeme, 27na wubvutula kitete wumubakiri ku mambisa ma nkoonsi ya bvula dya kusweeme, na wumudzusiri, lo nde kari na mukanu ko. 28Bukuri mu bvula dya kusweeme nde kayelemini kudzakala natee lufwa lwa ngaanga-Nzaambi yayikuutu. Ha mambisa ma lufwa lwa ngaanga-Nzaambi yayikuutu mudzusi sa kiisa ku nto nsi yaandi.
29Mamo sa maba mangisi kuri beenu, kuri biseendu ngo biseendu, mwomunso mu ludzakala.
30Bobanso badzusa baatu sa lubadzusa mu madzoonso bambaangi. Kimbaangi kya muutu mosi kyahele kukuka mu kudzusa#35.30 Kumono Ngi 17.6 ; 19.15 ; Mat 18.16 ; 2 Ko 13.1 ; 1 Tm 5.19 ; Bah 10.28.. 31Luri Ntambukulu palata mu mudzusi wayelemene kufwa ko, bukuri sa bamudzusa. 32Luri Ntambukulu se palata ko mu kumuyitikisa mu bvula dya kusweemene, bunu pele mu kubvutuka na kudzakala mu nsi, tekesele lufwa lwa ngaanga-Nzaambi yayikuutu.
33« Luri nsumunu nsi yiluri ko, bukuri makila masumunaa nsi. Bari nsyemesene nsi mu makila ma batsyaamina mu lufwa lwa mudzusi ko. 34Kaluri nsumukunu butoto bu luri lwadzakala na bu nyiri me ha kakati ko. Bukuri me Yaave nyiri ha kakati dya baala ba Iselili. »
Alliance Biblique du Congo 2024