Mataayi 9
9
Yisu watsinikisa kikata
(Mal 2.1-12; Luk 5.17-26)
1Yisu kanwaataa mu bwaatu, wayende ku simu dya mubu dyakaka, na watubuka ku bula bwa nde-meene. 2Baatu batwaala kuri nde kikata kimosi kyaneŋesene ha nkwaala. Yisu kamonaa kanyi dya bo, waleele kuri kikata ti : « Lwaata kibakala mwaana me ! Masumu maaku mabakiri mpemisi ! » 3Na mono, babamosi mu Batini ba mangisi, baleele kunsa mitima ti : « Muutu wu, wuri mu kusaana Nzaambi ! » 4Yisu bu kabakula bitsimi bya bo, waleele ti : « Buri luri na bitsimi byabibi kunsa mitima myeenu ? 5Nki bibvuriri kuleenge ? Kuleele ti : "Masumu maaku mabakiri mpemisi", ho ti kuleele ti : "Teleme na yende ?" 6Mpisi heki, beenu luyaaba ti Mwaana muutu wuri na lutumu, ha butoto mu kuhemesene masumu. » Haho nde kaleele kuri kikata ti : « Teleme, holo nkwaala yaaku, na yende ku nzo yaaku. » 7Muutu wunde katelemaa, weensi ku nzo yaandi. 8Mampuumbu bu mamono bubwo, mabaka boomo na makeembese Nzaambi, waheeri lutumu lwa bubwo kuri baatu.
Yisu wateele Mataayi mbila
(Mal 2.13-17; Luk 5.27-32)
9Yisu, bu kaba mu kuluta, wamono muutu mosi, nkuumbu Mataayi wadzakala ha kibeendu ki batolaa mpaku. Yisu waleele kuri nde ti : « Nama me ! » Bu kateleme, wamunama. 10Bu kaba mu kudya mu nzo, mono, batori ba mpaku balaka na bangaa-masumu, bayisa mu kudya kintwaari na Yisu na bayiki baandi. 11Bafarisi, bamonaa bubwo, baleele kuri bayiki baandi ti : « Muyikisi beenu, buri kari mu kudya kintwaari na batori ba mpaku na bangaa-masumu ? » 12Yisu bu kayuka bubwo, waleele ti : « Babatsiina bahele na nzala ngaanga, ngo babeele. 13Yendeenu luyika dyaambu dimadi : "Mutima wangebe me ntiiri, nkani ka nzusulu bibulu mu bikabu ko." Bukuri, me nyahele kwiisa mu kuteele basuunguma, ngo bangaa-masumu. »
Kifuuri mu ntoono ya loomi
(Mal 2.18-22; Luk 5.33-39)
14Bayiki ba Yowane bayende kuri Yisu na bamufuula ti : « Bukuri nki, beetu na Bafarisi tukotaa loomi kwalaka ; ngo bayiki ba ye bakookotaa loomi ko ? » 15Yisu wabvutula kuri bo ti : « Buri banduku ba mukweeri lo bakotiri mu ngebe, mu ntaangu yoyinso yiri mukweeri, wuri kintwaari na bo ? Ngo biluumbu sa biisa, mu ntaangu yiri mukweeri bamuyusiri ha kakati dya bo, mu ntaangu yiyo, bo bakoto loomi. »
16« Kuri muutu ko wuloondaana kinkutu kyakikulu, mu kiteendi kya nsaanda yamoono. Bukuri lo kiteendi kya nsaanda yamoono, lo kikaakiri kinkutu, na kinkutu lo kihamisini kutyaabuka. 17Bakoosekelaa malu mamono mu bimpokoro byabikulu ko. Bukuri lo malu maluukisiri bimpokoro. Malu lo matsaamukini, na bimpokoro se bibvukini. Ngo malu mamoono kusekele mu bimpokoro byamoono, na byobyoolo babikebiri. »
Mukyeetu mosi wabelemene kinkutu kya Yisu, na mwaana Yayiro wafulukusu
(Mal 5.21-43; Luk 8.40-56)
18Yisu, bukari mu kubaleelaa misamu mimyo, mono, mfumu mosi wayisa, watsukuma ha busu bwa nde, waleele ti : « Mwaana me wamukyeetu, weki mu kufwa ; ngo wasa wumutetekele kooko kwaaku, na nde sa kaba wamwooyo. » 19Yisu wateleme na wamunama kintwaari na bayiki baandi.
20Heki mukyeetu mosi, waba kwepalaana makila mu kiteesu kya mibvu kuumi na myoolo, wayisa mambisa-mambisa, na wabelemene heengu dya kinkutu kya Yisu. 21Nde wabaleele kunsa mutima ti : « Mbuti me belemini kwaandi ti kinkutu kya nde, lo me bvuukiri ». 22Yisu bu kasyeeteke, bu kamumono, waleele ti : Lwata kibakala, mwaana waami ! Kanyi dyaaku dikubvuukisiri. Na mukyeetu wabvuuka mu kini kilookolo kikyo. 23Yisu bu kaba mu kweende ku nzo mfumu, wamono basiki ba nseembe, na mpuumbu baatu yiri mu kubununa. 24Nde waleele ti : « Sasikeenu, bukuri mwaana mukyeetu wahele kufwa, ngo wuri mu kubwa tolo. » Ngo baatu basiila Yisu munsiku. 25Mpuumbu yimanaa kupala ku mbasi, Yisu wakoto mu nzo, wakwaata kooko kwa mwaana, na mwaana mukyeetu wasiimbuka. 26Mvuumfu yatsyamukina mu nkoonsi yoyinso yiyo.
Yisu watsinikisa baatu boolo bafwa miisu
27Yisu, bu kaba mu kuyooko, baatu boolo bafwa miisu bamunama, kuri bakwefula misaakulu ti : « Bakila beetu ngebe, mwaana Daavidi ! » 28Yisu kakota mu nzo, bafwa miisu bayende kuri nde, na nde waleele kuri bo ti : « Beenu lusii kanyi, ti me lo nyirikiri bubwo ? » Bo babvutula kuri nde ti : « Hein-hein, Mfumu. » 29Haho, nde wabelemene miisu mya bo, na waleele ti : « Miyirima mu beenu bunu buri kanyi dyeenu ! » 30Miisu mya bo myadzibuma. Yisu wabadzoonsolo mu kibakala waleele ti : « Yirikee kuyuka ! Muutu ti mosi yaa kayaaba ko. » 31Ngo bo bapalaa, batsamukisa mvuumfu Yisu mu nkoonsi yoyinso.
Yisu watsinikisa baba
32Bo, bu baba mu kupala, mono, batwaala kuri Yisu muutu mosi wa baba waba na mpeeve yayibi. 33Yisu kamanaa kupalisa mpeeve yayibi, baba wadzoonso. Mampuumbu ma baatu makimuka na baleele ti : « Twamwii mya bu mu Iselili ko ! » 34Ngo Bafarisi baleele ti : « Mu mpinu dza mukuutu mampeeve mamabi, nde kari mu kwepalisa mampeeve mamabi ! »
Yisu wabakila mampuumbu ngebe
35Yisu waba kweyendaana, mu mabvula momanso na mu mabula, kuri wukweyikisa munsa manzo ma nkutukunu ma bo, wukweyaabisa Musamu Wamubwete wa Kimfumu, na wukwetsinikisa mabeeru momanso, na bipfuumi byobinso. 36Bu kamono mampuumbu ma baatu, nde wamono ngebe kunsa mutima, mu ntoono baatu babo, bukuri baba beki makwa pe, na bari na ngebe bunu bimeeme byahele na mutari. 37Haho, Yisu waleele kuri bayiki baandi ti : « Bya kutolo munsa nseke byalaka, ngo bangaamba bantele. 38Ngo loombee kuri ngaa-nseke, kaheeke bangaamba bakweetolo nseke yaandi. »
Currently Selected:
Mataayi 9: ATBABC
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique du Congo 2024