Mataayi 8
8
Yisu watsinikisa mubeeru bwaasi
(Mal 1.40-45; Luk 5.12-16)
1Yisu kamanaa kukulumuka ku yulu mulaandu, mampuumbu malaka mamunama. 2Mubeeru bwaasi wayisa kuri nde, watsukuma ha busu bwa nde, na wamuleele ti : « Mfumu, mbuti ye tiiri, lo ye tsyemikisi me. » 3Yisu kalaambulaa kooko, wumubelemini na waleele ti : « Me ntiiri, ba watsyeemeke. » Na hanaho, nde watsyeemeke mu bwaasi bwaandi. 4Yisu waleele kuri nde : « Wuyuka ! Yaa leele kuri muutu ti mosi ko. Ngo yende wemonokono ye-meene kuri ngaanga-Nzaambi, na nata kikabu kya tuma Moose, mpisi kiba kimbaangi kuri baatu. »
Yisu watsinikisa kisari kya mukuutu nkama bayongolo
(Luk 7.1-10; Ywa 4.43-54)
5Bu kakoto ku Kaperenawumi, mukuutu nkama bayongolo mosi, wayende kuri nde na wamuyingukila, 6na waleele ti : « Mfumu, kisari kya me waneŋene munsa nzo, wabwa mambwolokoto, na wuri mu kubama nkati kwa makwa. » 7Yisu wabvutula kuri nde ti : « Me nyikweende, nyimutsinikisa. » 8Mukuutu nkama bayongolo wabvutula waleele ti : « Mfumu, me nyahele kuyelemene mu kuri ti ye koto mu nzo me. Ngo leele kwaandi ntoono mosi kitsu, lo kisari kya me bee kitsiinikini. 9Mukwongo, me muutu nyiri kunsa lutumu, ngo me-meene se nyiri na bayongolo kunsa lutumu lwa me. Me ndeelaana kuri wumawu ti : "Yende", lo nde weensi ; na kuri wakaka ti : "Wasa", lo wiisiri ; na kuri kisari kyaami ti : "Yirika mamama", lo yirikiri. » 10Yisu kayukaa bubwo wakimuka, na waleele kuri baba kwemunamaana ti : « Ngwanwa me nyiluleele ti : Me nyamwiini mu Iselili, muutu wuri na kanyi dyadinene dya bumabu ko. 11Me nyileele kuri beenu ti, baatu balaka sa bafumuna ku Esete, na ku wesete, sa biisa na sa badzakala mu kudya kintwaari na Abarahami, na Isaki na Yakobi, mu Kimfumu kya mayulu. 12Kasi baala ba Kimfumu sa babatuba ku mampimbisi ma ku mbasi ; kukwo kuba bidilu na nkweetulu miinu. » 13Yisu waleele kuri mukuutu nkama bayongolo ti : « Yende, buba kuri ye, bunu busiiriri kanyi. Mu kilookolo kinikyo, kisari kyaandi kyatsiinika. »
Yisu watsinikisa babeeru balaka
(Mal 1.29-34; Luk 4.38-41)
14Yisu bu kayende ku nzo Peetelo, wamono nguri mukasi Peetelo waneŋene, wabeele baawu. 15Yisu wabelemene kooko kwa nde, na baawu dyawa. Nde wateleme, na wabeke mu kumusalila. 16Nsinsika bu yatubuka, batwaala kuri Yisu, baatu balaka baba na mampeeve mamabi ; na nde mu kitoolo kimosi wabinga mampeeve, na watsinikisa babeeru, 17mpisi heki maleeriri mubikiri Esayi meende mu mana. Nde ti : « Nde waholo bipfuumi byeetu, na wanata mabeeru meetu. »
Batiiri kunama Yisu
(Luk 9.57-62)
18Yisu kamonaa mpuumbu baatu mu teke nde, waha lutumu lwa kweende ku simu dya mubu dyakaka. 19Mutini-mangisi mosi wayisa na wamuleele ti : « Muyikisi, me sa nyanama ye mpisi ku wukwe. » 20Yisu waleele kuri nde ti : "Mibaku miri na miduku, na banoni ba yulu bari na madzaansa ; ngo Mwaana muutu wahele na ha kusuusa mutu". 21Mosi mu bayiki baandi waleele kuri nde ti : « Mfumu, ha me miswa me tekeseleeti kweedziika taata. » 22Yisu wabvutula kuri nde ti : « Nama me. Hemese bafwa badziika bafwa baaku bo-meene. »
Yisu wadzuunisa kiteembu
(Mal 4.35-41; Luk 8.22-25)
23Bu kanwaata mu bwaatu, bayiki baandi se bamunama. 24Butoto bwatembele mu makwa kunsa mubu, kuri bwaatu bweki dyaama mu mipaku, ngo nde waba tolo. 25Bakokosolaa kuri nde, bamusiimbiri, na bamuleeriri ti : « Mfumu, bvuukisa beetu, beetu tufuukiri ! » 26Nde waleele kuri bo ti : « Buri beenu luri na boomo, baatu ba kanyi dyantele ? » Hanaho, bu kateleme, nde waŋaŋana kiteembu na mubu. Na kidzuunu kyakinene kyayisa. 27Baatu bakimuka baleele ti : « Nkya muutu wu, bukuri biteembu na mubu bitumuma kuri nde ? »
Yisu watsinikisa baatu boolo baba na mampeeve mamabi
(Mal 5.1-20; Luk 8.26-39)
28Yisu bu katubuka ku simu dya mubu dyakaka, mu nsi ya Ngadara, baatu boolo baba na mampeeve mamabi bapala kunsa mampeembe, bamubwaana. Baluula mu kibakala, kuri muutu ti mosi haba lo kubangisina pe kulutila mu nzila yiyo. 29Mono, bo babeke mu kufula misaakulu, baleele ti : « Nki ha kakati dya ye, Mwaana Nzaambi, na beetu ? Buri ye wiisiri mu kukwaamisa beetu tekesele ntaangu yitubuka ? » 30La na bo, kwaba mpuumbu bangulu yayinene yaba mu kwedya. 31Mampeeve mamabi mayingukila Yisu maleele ti : « Mbuti ku mbasi ye wutubinga, lo tuheeke kweetu mu mpuumbu bangulu yi. » 32Yisu waleele kuri bo ti : « Yendee ! » Mampeeve mamo mapala na makoto mu bangulu. Na mono, mpuumbu bangulu yoyinso yabununa ku nsuku mulaandu yabwa mu mubu, na yafwiila mu maampa. 33Baba kwekebe bangulu bayitika, babvutuka ku bvula, bayaabisa myominso mimyo, na mayirimini mu baatu baba na mampeeve mamabi. 34Na mono, bvula dyodinso dyapala mu kubwaana Yisu, na bu bamumono, bamuyingukila mpisi kapala mu nkoonsi bo.
Currently Selected:
Mataayi 8: ATBABC
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique du Congo 2024