Mataayi 11
11
Yowane Mubotiki waheeke bantumu kuri Yisu
(Luk 7.18-35)
1Yisu kamana kuha ntumunu dzidzo kuri bayiki baandi, bo kuumi na boolo, wayisika haho, na wayende mu kweyikisa na mu kwebikisa mu mabvula.
2Ngo Yowane, mu boroko mu kaba, wayuka badzoonsolo mu biyiriki bya Kiristo. Nde ha kaheeke bayiki baandi, 3mu kumufuula ti : « Ye ngo wunde wukwiisa, ho ti beetu tukiinga mukimi ? » 4Yisu wabvutula kuri bo ti : « Yende lweluyaabisa kuri Yowane, mamo maluri mu kuyuka na maluri mu kumono : 5Bafwa miisu bamono, na bikata bikweyende, babeele bwaasi batsyeemekusu, bafwa makutu bayuka, bafwa bafuluka, na Musamu Wamubwete bari mu kuyaabisa kuri bawelu. 6Kiminu kuri wunde wuhele kubumina makya mu me. »
7Bayiki babo bamanaa kubvutuka, Yisu wabeke kudzoonso kuri mampuumbu mu ntoono Yowane ti : « Nki beenu lweensyee kumono ku nsi yankatu ? Dyaari dyanyingisu mu kiteembu ? 8Heki nki beenu lweensyee kumono ? Muutu walwaata binkutu byabibwe ? Ha mbeti, balwaata binkutu byabibwete, mu manzo ma bambyaasi babaanaa. 9Heki nki lweensyee kumono ? Mubikiri ? Hein-hein, nyiluleeriri ti nde bvuriri na mubikiri. 10Mu mitariri nde, diri dyatinu ti : "Mono, me nyiheeke munati-mikeensu waami ku mankula ma ye, nde wuyirika nzila yaaku, ku mankula ma ye." 11Ngwanwa me nyiluleele ti : Mu babutuka mu bakyeetu, kwahele wubvuri bukuutu na Yowane Mubotiki ; ngo wubvuri bulesi mu Kimfumu kya mayulu, bvuriri bukuutu na nde. 12Kuholosono mu biluumbu bya Yowane Mubotiki, natee mu lumalu, Kimfumu kya mayulu kyanwaanusu ; na baholo kyo, bangaa-makwa. 13Mukwongo, babikiri bobanso na Mangisi babikiri natee mu ntaangu ya Yowane. 14Ngo mbuti lutiiri kutaambula, lo nde ngo Eliya wuyelemini kwiisa. 15Mpisi wunde wuri na makutu hemese kayuka ! » 16« Na na me nyifwanikisa kiseendu kimaki ? Kyafwanikina na mwaa baala badzakala ha kibeendu kya bobanso, na bari mu kuleele kuri bakaka 17ti : "Beetu twasikiri nseembe mu beenu, ngo beenu lwaasii kina ko ; beetu twayimbiri mikuunga mya lufwa, ngo beenu lwaasii tsoniso mansangisi ko !" 18Mukwongo, Yowane wayisa, wahele kwedya na kwenwa, baatu baleele ti : "Nde wuri na mpeeve yayibi !" 19Mwaana muutu wayisa, wukwedya na wukwenwa, baatu kuleele ti : "Monee ngaa-mante ma kudya, yaa-kinwi, nduku batori ba mpaku na bangaa-masumu !" Madyeele mabaka buungu mu biyiriki byaandi. »
Mabvula mambisa kusa kanyi
(Luk 10.13-15)
20Haho, Yisu wabeke kuseembe mabvula, mari nde wayirikiri bimaangu byaandi byalaka munsa mo, bukuri mo masiiri kuyiinga madyeele ko : 21« Kyaari kuri ye Koradzi ! Kyaari kuri ye Betesayida ! Bukuri mbuti bimaangu byayirimini kuri beenu, ngo byayirimini ku Tire na Sidoni, nkani na kidzika bo balweeti matsaaka na kuyoolo lufuta, nkani baketi yiinga madyeele. 22Ngo me nyileele kuri beenu ti, mu kiluumbu kya mutsuundu, sa babvula kuseembe beenu ti na Tire na Sidoni. 23Heki ye Kaperenawumi, buri natee ku yulu, ye wuba wadzaangusu ? Natee ku nsuku lubila ye wusunduka ; bukuri mbuti mu Sodomo mwayirimini bimaangu byayirimini ku wuri ye, nkani Sodomo dyakiri natee lolo. 24Ngo me nyiluleele ti, mu kiluumbu kya mutsuundu, ye sa babvula kukuseembe ti na nsi ya Sodomo. »
Wasee kuri me mu kubaka mpuumunu
(Luk 10.21-22)
25Mu ntaangu yiyo, Yisu wabaangula mbeembu waleele ti : « Me nyikudumusa, Taata, Mfumu ya ku yulu na ya ha butoto, bukuri bangaa-madyeele na bangaa-nyaabulu, ye wabasweeke misamu mimyo, ngo wayaabisa myo kuri mwaa baala bantele. 26Bunubwo Taata, ye bubwo watiiri ti buba ha busu bwaaku. » 27« Me Taata wampa byobinso. Kuri muutu ti mosi wuyaari Mwaana, mbuti ka Taata ko. Kuri se muutu ti mosi wuyaari Taata, mbuti ka Mwaana ko, na kuri wunde wuri Mwaana tiiri kamuyaabisa. » 28« Waseenu kuri me, beenu bobanso, bari na mpasi na bari na bilemu, na me sa nyaluha mpuumunu. 29Lwaateenu kihaangu kyaami, na yiikeenu kuri me, bukuri me nyiri na bundeembu na nyakuluka mu mutima, beenu sa lwabaka mpuumunu ya miheebulu myeenu. 30Mukwongo, kihaangu kya me kyahele na mpasi, na kinati kwaami kyaleenge. »
Currently Selected:
Mataayi 11: ATBABC
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique du Congo 2024