Eseteere 9
9
Bayudayo Babvutula kitete
1Mu kiluumbu kyakuumi na bitatu mu ngoondo yakuumi na moolo, bunu pele ngoondo ya Adare, lutumu lwa mbyaasi lwaba lweki lwa kusalila. Mu kiluumbu kikyo, bataatu ba Bayudayo batsimini ti bo beeri baluulukiri, ngo misamu myayiingiri, na Bayudayo baluulukiri ha busu bwa bataatu baaku. 2Mu mabvula, ma mankoonsi momanso ma kimfumu kya mbyaasi, Bayudayo bakutukuna mu kunwaanisa babo, babasakaa kubasoongo manyoongi. Kwasiiri kuba muutu ti mosi ko wuteleme ha busu bwa bo, bukuri baatu bobanso baba beki na boomo. 3Bakuutu ba mankoonsi bobanso, bimonikisi bya mbyaasi, bangoforo, na bisari bya mbyaasi bakoto mu kusyaamisa Bayudayo, bukuri baba na boomo mu ntoono Maredoki. 4Maredoki waba na kibeendu kyadzaangama mu nzo mbyaasi, na mvumfu yaandi yaba yayabikina mu mankoonsi momanso, na mpinu dzaandi dzaba kusa kuhamisa.
5Bayudayo bayirika mabababatiiri mu bataatu baaku, babalatila mu mambeesi mamala, babadzusa, na babafuukisa. 6Mu bvula dya Suse, Bayudayo badzusiri nkama taanu dza baatu. 7Badzusiri se Parakandata, Dalafoni, Asepata, 8Porata, Adalya, Aridata, 9Paramaseta, Arisayi, Aridayi, na Bvayidzata, 10babo ngo baala bo kuumi ba Amani, mwaana Hamedata, mutaatu Bayudayo. Ngo, basiiri kuwoolo bitotolo bya bo ko.
11Kini kiluumbu kikyo se bayaabisiri kuri mbyaasi, lutaangu lwa baatu babadzusiri mu bvula dya Suse 12Mbyaasi waleele kuri Eseteere mukasi waandi ti : « Mu bvula dya Suse Bayudayo badzusirye nkama taanu dza baatu na baala kuumi ba Amani. Heki mu mankoonsi makaka ma kimfumu kya mbyaasi lo bakwe ? Ngo ndoombulu dza ye nki, mpisi bakuha ? Nki ye tiiri mpisi bakuyirikila ? » 13Eseteere wabvutula ti : « Mbuti mbyaasi wumono ti buri bwabubwete, lo baha miswa mpisi bweepari Bayudayo bari ku Suse, babweese kuyirika mabayirikiri lumalu, na baleleke mu makuunsi manyutu ma baala bo kuumi ba Amani. » 14Mbyaasi waleele ti, bayirika bubwo. Babweese kuha lutumu lubayaabisa ku Suse, na baleleke manyutu ma baala bo kuumi ba Amani. 15Bayudayo baba ku Suse babweese kukutukuna mu kiluumbu kyakuumi na bina mu ngoondo ya Adare, na babweese kudzusa nkama tatu dza baatu ku Suse, ngo, basiiri kuwoolo bitotolo bya bo ko.
16Bayudayo baba mu mankoonsi makaka ma kimfumu kya mbyaasi, bo se bakutukuna mu kukalila kidziingu kyaaku. Badzusa 75 000 mu bataatu baaku, ngo, basiiri kuwoolo bitotolo bya bo ko. 17Mimyo myayirimini mu kiluumbu kyakuumi na bitatu mu ngoondo ya Adare, mu kiluumbu kyakuumi na bina bo bawuuma, na bayirika mubuluku wamunene na wakiminu mu kiluumbu kikyo. 18Ngo, Bayudayo ba ku Suse bakutukina, mu kiluumbu kyakuumi na bitatu na kyakuumi na bina, na bo bawuuma mu kiluumbu kyakuumi na bitaanu, na bayirika mubuluku wamunene na wakiminu mu kiluumbu kikyo. 19Mu didyo, Bayudayo bari mu mabula, na babo badzakalaa mu mabvula mahele mpaangu, bakoosaanaa munkeembu mu kiluumbu kyakuumi na bina mu ngoondo ya Adare, kikyo kiluumbu kyakiminu, kya mubuluku wamunene, kya munkeembu, ki bakoohekisinaa bimbwanga bo na bo.
Lutumu lwa nyirukulu munkeembu wambambukulu mwooyo
20Maredoki watina misamu mimyo munsa mikaanda, na waheeke myo kuri Bayudayo bobanso, bari mu mankoonsi momanso ma kimfumu kya mbyaasi Dzerekese, bari bele na bari ku la. 21Nde wabaloombo mu kuholo lutumu, lwa kuyirikaa munkeembu, mu mpisi kiluumbu kyakuumi na bina, na kyakuumi na bitaanu kya ngoondo ya Adare, mu mpisi mubvu. 22Mukwongo, mu biluumbu bibyo Bayudayo babakiri mpuumunu kuri bataatu baaku, na mu ngoondo yiyo manyoongi ma bo makitukiri kiminu, na bufwiiri bwa bo bwakitukiri munkeembu. Bo bayelemini kusa mubuluku wamunene na wakiminu mu biluumbu bibyo, mpisi muutu kaheeke kimbwanga, kuri bambaasi baandi na kuri bawelu. 23Bayudayo Bataambula kuyirikaana mamo ma babaandikiri kuyirika, mabatinini Maredoki ti :
24Amani mwaana Hamedata, wa mu kaanda dya Angangi, mutaatu Bayudayo, waba na kitsimi kya kufuukisa Bayudayo, ngo ha kateeri dzeke diri nkuumbu Mapurime mu kuta wari, mpisi kayaaba kiluumbu ki kaba katsima kubatsyaamuna na kumana kubadzusa. 25Ngo, musamu wunde bu katubuka kuri mbyaasi, nde waha lutumu lwatina bumabu ti : Kitsimi kyakibi ki kabakiri nde mu Bayudayo, ha yulu mutu wa nde-meene kibwiila. Mu didyo bamulelekiri nde-meene na baala baandi mu makuunsi. 26Hango nkuumbu, bakooteelaa biluumbu bibyo ti Mapurime haho lo ti dzeke, mu ntoono misamu myaba myatina mu mikaanda, mibamwiini na mi babwanikini na myo. 27Bayudayo baholo lutumu na bataambula kifu kya kusalila bubwo mu bo-meene, mu baala baaku, na mu bobanso bataambula kuba Bayudayo, mu kusa munkeembu mu mpisi mubvu, mu ntaangu yibari basoolo, mu biluumbu byobyoolo bibyo, bunu bu bari batina. 28Biluumbu bibyo bya kubambukilaa mwooyo mu biseendu ngo biseendu, mu mpisi nkoonsi, mu mpisi bvula. Biluumbu bya Mapurime bibyo biri bya kudzimikina ko, Bayudayo na baala ba bo bayelemini kubambukilaa byo mwooyo kwahele manunu.
29Eseteere mukasi mbyaasi, mwaana Abihayili, bo na Maredoki, Muyudayo batina mu lutumu lwaaku lwolunso, mu kutswiikisa mukaanda wunde wa Mapurime. 30Bo baheeke mikaanda kuri Bayudayo bobanso, mu nkama na makuumi moolo na nsaamu dza mankoonsi ma kimfumu kya mbyaasi Dzerekese. Mu mikaanda mimyo muri maampu makiyeengi na mangwanwa. 31Maampu mamo maloombo kuri Bayudayo, mu kusa munkeembu wa biluumbu bya Mapurime mu ntaangu yibari basoolo, bunu bwaba misiku mya Maredoki, Muyudayo bo na Eseteere, mukasi mbyaasi, mu bo-meene na mu baala baaku, bunu buri musiku wa nkotolo loomi na wa kudila. 32Maampu ma lutumu lwa Eseteere matswiikisa munkeembu wa Mapurime. Mu didyo, bari batina mo mu mukaanda.
Currently Selected:
Eseteere 9: ATBABC
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique du Congo 2024