Eseteere 8
8
1Mu kiluumbu kinikyo, mbyaasi Dzerekese waha kuri Eseteere mukasi mbyaasi, nzo Amani mutaatu Bayudayo. Maredoki wayende kwemono mbyaasi, bukuri Eseteere waba mwaamuyaabisa bumvilu bu baba na bo. 2Mbyaasi waholo lungele lwa kinyemu, lu kayusuri kuri Amani, na waha lwo kuri Maredoki. Eseteere waha miswa kuri Maredoki myakuba mukuutu nzo Amani.
Mbyaasi waholo manzeengulu mu kukalila Bayudayo
3Eseteere wabweese kudzoonso kuri mbyaasi. Nde wabwa ha miilu mya nde, wadila na wayingikila mbyaasi mpisi kakabukisa, momanso mamabi mabeeri matsima kuyirika Amani, wa mu kaanda dya Angangi, mu Bayudayo. 4Mbyaasi walaambula luboto lwaandi lwawoolo kuri Eseteere, na Eseteere wateleme ha busu bwa mbyaasi. 5Nde waleele ti : « Mbuti mbyaasi wumono dyo ti bwabubwete, na mbuti me ntaamburi bweese ha busu bwa mbyaasi, mbuti bwayelemene, na mbuti nde tiiri me, lo batina mukaanda wuyusula manzeengulu ma mikaanda myatinini Amani mwaana Hamedata, wa mu kaanda dya Angangi, kuri ti bamana kudzusa Bayudayo bari mu mankoonsi momanso, mari mu lutumu lwa mbyaasi. 6Bukuri me ka nyibangisina kukuunda ko ti, manyoongi ma bubwo mabwa mu baatu ba me, me ka nyibangisina kukuunda ko ti, kaanda dya me, bamana kudidzusa. »
7Mbyaasi Dzerekese waleele kuri Eseteere, na kuri Maredoki, Muyudayo ti : Mono, me nyaheeri nzo Amani kuri Eseteere, na bamulelekiri mu kuunsi, bukuri nde wabeeri wasilikina kudzusa Bayudayo. 8Tinee beenu-meene mu nkuumbu ya mbyaasi, mamo malutiiri mu Bayudayo, na lusa lungele lwa kinyemu kya mbyaasi. Bukuri misamu myatina mu nkuumbu ya mbyaasi, myasa lungele lwa kinyemu kya mbyaasi, lo babweese kumiyaala ko.
9Mu kiluumbu kinikyo, kyamakuumi moolo na bitatu, mu ngoondo yamatatu bunu pele ya Sibvani, batumisa batini ba mikaanda ba mbyaasi. Bunu bwaba lutumu lwa Maredoki, bo batina mikaanda kuri Bayudayo, kuri bimonikisi bya mbyaasi, bangoforo, na bakuutu bari mu mankoonsi nkama na makuumi moolo na nsaamu, kubandikila ku nsi ya Indya natee ku nsi ya Etyopi. Batina mikaanda mimyo mu lutinunu lwa mpisi nkoonsi, na mu ndiinga ya mpisi kitsuumbu, na kuri Bayudayo mu lutinunu na mu ndiinga ya bo-meene. 10Batina mikaanda mimyo mu nkuumbu ya mbyaasi Dzerekese, basa myo kinyemu kya lungele lwa mbyaasi. Bayakisa myo kuri banati ba makavaalu, ma basooriri mu mampuumbu ma mbyaasi, mpisi beende mu kwemikabula. 11Mu mikaanda mwaba mwatinu bumabu : Mbyaasi heeri miswa kuri Bayudayo bari mu mabvula momanso, mpisi bakutukina mu kukalila kidziingu kyaaku, mu kudzusa, kufuukisa na kudziimbisa mpisi mpuumbu baatu, yiri mu mpisi nkoonsi ya kimfumu, yikweende mu kubanwaanisa. Bo bari na miswa mya kudzusa bakyeetu na baala, na kuwoolo bitotolo bya baatu babo. 12Bo bari na miswa mimyo, mu mankoonsi momanso ma kimfumu kya mbyaasi Dzerekese, mu kiluumbu kyakuumi na bitatu mu ngoondo yakuumi na moolo bunu pele ya Adare. 13Mu mpisi nkoonsi, mukaanda wunde yelemini kuba wayabakana bunu lutumu kuri baatu bobanso, mpisi heki Bayudayo, baba bayirima mu kubvutula kitete kuri bataatu baaku mu kiluumbu kikyo. 14Mbyaasi bu kamana kuha lutumu, banati ba makavaalu, ma basooriri mu mampuumbu ma mbyaasi, bayende mu mawasu. Tumi bayaabisa lutumu lubatinini lulwo, mu bvula dya Suse.
15Maredoki wapala ku nzo mbyaasi, kuri walwaata kinkutu kya bumbyaasi kyabeenge na kyahembeke, wateeteke kiyuungu kyahembeke na kyabeenge, na walwaata lukoongolo lwawoolo. Bvula dya Suse dyaba dyaluula mu kiminu na mu nkeembu. 16Kuri Bayudayo bubwo bwaba buungi na kiminu, nkeembu na masiiku. 17Mu mpisi nkoonsi na mu mpisi bvula, dyatubukiri lutumu lwa mbyaasi lubatinini lulwo, lo kyaba kiminu, na munkeembu kuri Bayudayo, na kiluumbu kya mubuluku wamunene. Baatu balaka ba bitsuumbu byakaka, bataambula kuba Bayudayo, bukuri baba na boomo bwalaka mu Bayudayo.
Currently Selected:
Eseteere 8: ATBABC
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique du Congo 2024